orlandoshuttleport.com сӑнӳкерчӗкӗ

Ҫӗнӗ ҫул каҫхине пирӗн ҫӗршывра кашни абонент вӑтамран миҫе хутчен шӑнкӑравлассине палӑртнӑ.

Кашни ҫын вӑтамран пӗр хутчен шӑнкӑравлӗ, 7 СМС-ҫыру ӑсатӗ, 1 Гб ытларах интернет пӗтерӗ. Кун пек прогноза «Тинькофф» искусство интеллекчӗн технологийӗсен центрӗ шухӑшласа кӑларнӑ ETNA аналитика сервисӗ пӗлтернӗ.

Мобильлӗ интернет-трафика ытларах тӑкаклакан вӑхӑт раштав уйӑхӗн 31-мӗшӗнче 19 тата 21 сехетсене тивӗ тата ҫурҫӗр ҫитеспе нумайланӗ. Шӑнкӑравлакансем раштав уйӑхӗн 31-мӗшӗнчи 22 сехетрен пуҫласа кӑрлач уйӑхӗн 1-мӗшӗччен йышланӗҫ. СМС-ҫырусене паян 13 сехет тӗлӗнче нумай ӑсатӗҫ тата кӑрлачӑн 1-мӗшӗнче ҫурҫӗртен пуҫласа ирхи 3 сехетчен.

autopronews.ru сӑнӳкерчӗкӗ

РФ Пашалӑх Думин спикерӗ Вячеслав Володин Патшалӑх Думин гаражӗ хамӑр ҫӗршывра туса кӑларнӑ автомобильсемпе пуянланни ҫинчен пӗлтернӗ. Депутатсем вӗсемпе Ҫӗнӗ ҫул хыҫҫӑн ҫӳреме тытӑнӗҫ.

«Патшалӑх Думин гаражне «Lada Vesta» машинӑсем килсе ҫитрӗҫ. Депутатсем вӗсемпе Ҫӗнӗ ҫул хыҫҫӑ ҫӳреме тытӑнӗҫ. Автопарк кивелсе пынӑҫемӗн ӑна хамӑр ҫӗршывра туса кӑларнисемпе ылмаштарса пырӑпӑр. Кунсӑр пуҫне суйлав округӗсенче кашни депутата хамӑр ҫӗршыври машинӑсене ҫирӗплетсе парӑпӑр», — тенӗ Володин.

Вӑл пӗлтернӗ тӑрӑх, депутатсене «Москвич», «Лада», «Аурус» маркӑллӑ машинӑсемпе тивӗҫтерӗҫ.

cap.ru сӑнӳкерчӗкӗ

Хӗрлӗ Чутай районӗнчи Ҫӗнӗ Атикассинче пурӑнакан, Тӑван ҫӗршывӑн Аслӑ вӑрҫине хутшӑннӑ Клавдия Ижетникова раштавӑн 29-мӗшӗнче 100 ҫулхи юбилейне паллӑ тунӑ. Ӑна саламлама тӳре-шара кӑна мар, Хӗл мучипе Юр пике те ҫитнӗ.

Унӑн ҫамрӑклӑхӗ вӑрҫӑ тапхӑрне лекнӗ. Клавдия Гавриловна вулама юратнӑ, вӗрентекен пулма ӗмӗтленнӗ. Курссене пӗтерсен вӑл кӗҫӗн классене вӗрентме тытӑннӑ. 1942 ҫулта вара хӑйӗн ирӗкӗпе вӑрҫа кайнӑ, стрелоксен дивизийӗн автомат ротине лекнӗ. Амансан киле кӑкӑрӗ тӗлӗнче виҫӗ ванчӑкпа таврӑннӑ.

Халӗ Клавдия Гаариловнӑн 7 мӑнук, 11 кӗҫӗн мӑнук пур.

ШӖМ тунӑ сӑн

Паян 14 сехет те 50 минутра Етӗрне ҫывӑхӗнчи кӗпер ҫинче темиҫе машина ҫапӑннӑ. Малтанлӑха пӗлтернӗ тӑрӑх, ҫӑмӑл машина водителӗ руле итлеттереймесӗр хирӗҫ килекен КамАЗпа ҫапӑннӑ. Унтан ҫӑмӑл машина тепӗр машина ҫине пырса кӗнӗ.

Аварире пӗр ҫын вилмеллех суранланнӑ. Миҫе ача аманнине тӗрлӗрен хыпарланӑ: 4 е 5. Вӗсене пульницӑна илсе ҫитернӗ.

Халӗ йӗрке хуралӗ ку ӗҫ-пуҫа тишкерет.

cap.ru сӑнӳкерчӗкӗ

Ҫӗмӗрле муниципаллӑ округӗнче пурӑнакан Марина Сайбель «Амӑшӗ героиня» ята тивӗҫнӗ. Мӑшӑрӗпе Андрейпа вӗсем 11 ачана воспитани параҫҫӗ: 9 хӗр те 2 ывӑл.

Марина халӗ тивӗҫлӗ канура, Андрей автошкулта вӗрентет. Ҫемье питӗ хастар, тӗрлӗ мероприятие хутшӑнать. Вӗсем кӗнеке вулама юратаҫҫӗ, каҫсерен пӗрле сасӑпа та вулакалаҫҫӗ.

Аслӑ ачисем пурнӑҫра хӑйсен вырӑнне тупнӑ. Кӗҫӗннисем вӗренеҫҫӗ, университет пурнӑҫне хастар хутшӑнаҫҫӗ.

Прокуратура архивӗнчи сӑн

Прокуратура Хӗрлӗ Чутай муниципаллӑ округӗнчи шкулсене санитарипе эпидемиологи саккунӗсене мӗнле пӑхӑннине тӗрӗсленӗ. Икӗ шкулта санитари нормине пӑснине тупса палӑртнӑ.

Хӗрлӗ Чутай шкулӗнче шӑна нумай пулни палӑрнӑ. Мӑн Этмен шкулӗнче вара техперсонал валли уборнӑй пулман.

Ҫак икӗ шкул тӗлӗшпе прокуратура представлени ҫырнӑ. Пӗр шкул директорӗ тӗлӗшпе административлӑ ӗҫ пуҫарнӑ.

Муркаш муниципаллӑ округӗнчи Автанкасси ялӗнче арҫынна шыраҫҫӗ. Унран виҫҫӗмӗш кун хыпар ҫук.

71 ҫулти Юрий Васильев раштавӑн 27-мӗшӗнче килтен тухса кайнӑ та таврӑнман. Юрий Иванович 170 сантиметр ҫӳллӗш, туллирех кӗлеткеллӗ, ҫӳҫӗ тата усси шуралнӑ. Вӑл ӑсӗпе арпашма, ҫухалса кайма пултарать. Килтен кайнӑ чухне тӗттӗм кофта, шӑлавар, резин атӑ, хӑлхаллӑ калпак тӑхӑннӑ.

Ҫак номерсемпе шӑнкӑравлама ыйтаҫҫӗ: 8(800)700-54-52 е 112. «Лиза Алерт» инфоргӗ: Леонид (Енот) 89003319602.

Синоптиксем Ҫӗнӗ ҫула ҫанталӑк мӗнле пулассине пӗлтернӗ. Прогноз унчченхинчен улшӑннӑ.

Раштавӑн 30-31-мӗшӗсенче Шупашкарта 5-10 сантиметр хулӑнӑш юр ҫума пултарать. Сывлӑш температури 5-10 градус сивӗ пулӗ.

Ҫӗнӗ ҫул каҫхине пирӗн пата Хӗл мучи сивви ҫывхарӗ. Циклон кайӗ, раштавӑн 31-мӗшӗнче ҫӗрле 10-12 градус сивӗ тӑрӗ, ирхине вара – 12-17 градус сивӗ.

Кӑрлачӑн 1-мӗшӗнче юр ҫӑвӗ. Кӑрлачӑн 2-мӗшӗнченпе кӑнтӑрла 17-22 градус сивӗ тӑрӗ, ҫӗрлесерен – 30 градус сивӗ.

Малтанлӑха пӗлтернӗ тӑрӑх, каникулта сивӗ ҫанталӑк пулӗ. Иккӗмӗш декада пуҫламӑшӗнче кӑна юр ҫӑвӗ, ӑшӑтӗ.

ШӖМ тунӑ сӑн

Раштав уйӑхӗн пуҫламӑшӗнче Канаш муниципаллӑ округӗнчи Кивӗ Шелттем ялӗнче пурӑнакан 29 ҫулти арҫынна Канаш вокзалӗнче ҫаратнӑ. Вӑл, сусӑрскер, унта ашшӗ-амӑшӗпе пулнӑ. Кӗтмен ҫӗртен ун патне палламан ӳсӗр арҫын пынӑ та хӑйне тахҫанхи тусӗ пек тыткаланӑ, ыталаса илнӗ. Ҫав вӑхӑтра вӑл сусӑрӑн енчӗкне кӑларса илнӗ. Унта вара 4 пин тенке яхӑн пулнӑ.

Йӗрке хуралҫисем ҫакна ҫав округрах пурӑнакан, унччен судпа айӑпланнӑ 39 ҫулти арҫын тунине палӑртнӑ. Ӑна тытса чарнӑ, ун тӗлӗшпе пуҫарнӑ пуҫиле ӗҫе кӗҫех суд пӑхса тухӗ.

forum.na-svyazi.ru сӑнӳкерчӗкӗ

Ҫӗмӗрле хулинчи поликлиника ӗҫлемест, ӑна 2025 ҫулта ҫеҫ тӗплӗн юсӗҫ.

Чӑваш Ен Элтеперӗ Олег Ниолаев нумаях пулмасть ирттернӗ тӳрӗ лини вӑхӑтӗнче ун патне Ҫӗмӗрле хӗрарӑмӗ шӑнкӑравланӑ, вӑл Ҫӗмӗрлери хула больници мӗншӗн ӗҫлеменнипе кӑсӑкланнӑ.

Республикӑн Сывлӑх сыхлав министерствинче уҫӑмлатса панӑ тӑрӑх, 2-мӗш поликлиника вӑхӑтлӑха ӗҫлемест, мӗншӗн тесен ҫав ҫурта тӗплӗн юсамалла. Ӗҫе 2025 ҫулта ҫеҫ пурнӑҫлӗҫ.

Унта Республикӑн ӳтпе венерологи диспансерӗн тата Республикӑн нарколог диспансерӗн диспансер уйрӑмӗсем те унта пулӗҫ.

Ҫӗмӗрлере пурӑнакансен хальлӗхе хулари 1-мӗш поликлиникӑна ҫӳремелле.