mir24.tv сӑнӳкерчӗкӗ

Чӑваш Енри полицейскисен Тӑвай районӗнчи Тӑрмӑшра пурӑнакан ӳсӗр водителе тытса чарассишӗн пӑшалпа усӑ курма тивнине эпир ӗнер пӗлтернӗччӗ. Пӑтӑрмах Канаш районӗнче пулса иртнӗ. Ӳсӗр водитель тӗлӗшпе пакунлисем протокол ҫырма пуҫланӑ. Ҫав самантра вырӑна ҫамрӑксемлӗ икӗ машина пырса ларнӑ. Вӗсенчен пӗринче водителӗн ывӑлӗ пулнӑ. Ҫак ушкӑн протокол ҫырнине хирӗҫ пулнӑ. Ӳсӗр водитель вырӑнтан тарас тенӗ, анчах полицейски ҫула пӳлнӗ. Ҫав самантра водителӗн ывӑлӗпе тепӗр ҫамрӑк пакунли ҫине сиксе ӳкнӗ, тапса, ҫапса пӗтернӗ. Инспектора вӗсем ҫӗр ҫине ӳкернӗ. Водитель тата унӑн ывӑлӗ каллех тарма пӑхнӑ. Ҫул-йӗр инспекторӗсенчен пӗри ӗҫри пӑшалпа асӑрхаттармалла малтан сывлӑша пенӗ, унтан машина кустӑрмине персе шӑтарнӑ.

Ҫак пӑтӑрмаха пӗлсен Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев хайӗн шухӑшне пӗлтернӗ. Ӳсӗрле руль умне ларнине тата пакунлисемпе хирӗҫнине вӑл ырламан. Пуҫтахсен тӗлӗшпе пуҫарнӑ пуҫиле ӗҫе епле тишкернине вӑл хӑй сӑнаса тӑма шантарнӑ.

Федерацин Атӑлҫи округӗнче «Наш День Победы» (чӑв. Пирӗн Ҫӗнтерӳ кунӗ) юрӑ марафонӗ пырать. Вӑл округри тӗрлӗ регионти юрӑҫсене пӗр пысӑк коллектива пухать. Музыка ансамблӗсем «День Победы» (музыки — Давид Тухмановӑн, сӑмахӗсем — Владимир Харитоновӑн) хӑйсен наци чӗлхисемпе шӑрантарса эстафетӑна пӗрне-пӗри параҫҫӗ.

Ҫу уйӑхӗн 6-мӗшӗнче паллӑ юрӑ чӑвашла янӑрӗ. Ӑна клип евӗр ӳкернӗ. Клипа «Россия 1» тата «Россия 24» телеканалсен регионсенчи эфирӗсенче, ҫавӑн пекех халӑх сечӗсенче кӑтартӗҫ.

Видеоролика Шупашкарти «Ҫӗнтерӳ» мемориал комплексӗнче, Ҫар мухтавӗн музейӗнче, Трактор тӑвакансен культура керменӗнче ӳкернӗ. Юрра шӑрантарма Чӑваш патшалӑх оперӑпа балет театрӗн, Чӑваш патшалӑх филармонийӗн артисчӗсем, «Соловушки» хор «Классика» юрӑ капелли, «Живи и помни» ансамбль, паллӑ юрӑҫсем хутшӑннӑ.

Юрӑ сӑмахӗсене Чӑваш халӑх поэчӗ Юрий Сементер чӑвашла куҫарнӑ.

kopchen.ru сайтри сӑн

Паянтан, ҫу уйӑхӗн 5-мӗшӗнчен, эрех-сӑра сутма чаракан ҫӗнӗ саккун вӑя кӗрет. Малашне «ҫуттине» нумай хваттерлӗ ҫуртсенче вырнаҫнӑ лавккасенче сутма ирӗк памӗҫ. Кун пирки РБК пӗлтерет.

Ку саккун ҫӗрле эрех сутакан усламҫӑсене тек иртӗхме памӗ. Лавкка нумайх хваттерлӗ ҫуртра вырнаҫнӑ, унӑн лаптӑкӗ 20 тӑваткал метртан пысӑк мар пулсан унта эрех-сӑра сутма юрамасть. Кунашкал «наливайкӑсенче» пачах «ҫуттине» сутма чарас тесен регионсенче кун пек тума май пур.

«2013 ҫулта Муркаш районӗнчи Катикасси ялӗ ҫывӑхӗнче нумай ачаллӑ ҫемьесем валли 535 ҫӗр лаптӑкӗ уйӑрса панӑ. Анчах унта халӗ те газ, шыв, электричество ҫук», — ҫак хыпара Чӑваш халӑх сайчӗ 2018 ҫулхи пуш уйӑхӗнчех хыпарланӑччӗ. Унтанпа икӗ ҫул ытла иртсен те лару-тӑру ырӑ енне ылмашман. Ҫак темӑна Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев тӗнче тетелӗнчи халӑх ушкӑнӗсенче хускатакан ыйтусемпе епле ӗҫлемелли пирки районсемпе хула администрацийӗсен пуҫлӑхӗсемпе ирттернӗ видеоканашлура хускатнӑ.

«Виҫҫӗмӗш ача ҫуралсан пирӗн ҫемьене Муркаш районӗнчи Катикассинче пӳрт хӑпартма 2014 ҫулта ҫӗр уйӑрса пачӗҫ. Анчах никам та ним те тумасть, мӗншӗн тесен шыв та, газ та, ҫутӑ та ҫук. Шупашкарта пурӑнакан ҫӗршер ҫемьене таса уйра ҫӗр панӑ», — тесе ҫырнӑ халӑх ушкӑнӗнче.

Шупашкар хула администрацийӗн пуҫлӑхӗ Алексей Ладыков каланӑ тӑрӑх, ҫав ыйтӑва татма 3,5 млрд таран укҫа кирлӗ. Ҫав вӑхӑтрах ҫемьесен 70 проценчӗ пӳрт тӑваймассине палӑртнӑ вӑл.

Муркаш район администрацийӗн пуҫлӑхӗ Ростислав Тимофеев муниципалитет ялсене комплекслӑ аталантармалли программӑна хутшӑннине пӗлтернӗ.

Малалла...

Куславкка районӗнче пурӑнакан пӗр ҫын тӑванне хӗрхеннипе пӑтӑрмаха ҫакланнӑ.

Ҫу уйӑхӗн 1-мӗшӗнче Куславкка районӗнче пурӑнакан арҫын йӗркене административлӑ майпа пӑснӑ. Вӑл ӳсӗрле руль умне ларнӑ. Уншӑн хайхине йӗрке хуралҫисем тытса чарнӑ. Ҫавӑншӑн унӑн тӑванӗ кӑмӑлсӑрланнӑ. Кӑмӑлсӑрланнӑ ҫеҫ те мар, полицейскисем ҫине алӑ ҫӗкленӗ.

Йӗрке хуралҫисемпе «йӗрке» тума хӑтланнӑ ҫынна пуҫтахланма паман. Халӗ 31 ҫулти арҫыннӑн явап тытма тивӗ. Раҫҫейӗн Следстви комитечӗн Чӑваш Енри управленийӗн тӗпчевҫисем ун тӗлӗшпе РФ Пуҫиле кодексӗн 318-мӗш статйин 1-мӗш пайӗпе ӗҫ пуҫарнӑ. Унӑн тӑванне вара (арҫын ҫавна хӳтӗлесе хирӗҫнӗ те ӗнтӗ) ӳсӗрле руль умне ларнӑшӑн административлӑ майпа явап тыттарма йышӑннӑ.

Чӑваш Енри полицейскисен Тӑвай районӗнчи Тӑрмӑшри ӳсӗр водителе тытса чарас тесе пӑшалпа пеме тивнӗ. Малтан сывлӑша, унтан — машина урапине.

Хӗрӗнкӗ водитель пакунлисенчен тарас тенӗ. Ӑна хӳтӗлесе унӑн тусӗсем ҫул-йӗр инспекторӗсем ҫине сиксе ӳкнӗ.

Шалти ӗҫсен министерствин Тӑвай районӗнчи пайӗн ӗҫченӗсем тревогӑпа ура ҫине тӑнӑ. Водителе тытса чарма май килнӗ. Ӑна транспорт рулӗ умне ӳсӗр пуҫпа ларнӑшӑн тата полици ӗҫченӗ ыйтнине пӑхӑнмашӑн явап тыттарма йышӑннӑ. Унпа пӗрле пулнӑ икӗ ҫын тӗлӗшпе РФ Следстви комитечӗн Чӑваш Енри управленийӗ пуҫиле ӗҫ пуҫарнӑ. Вӗсен влаҫ ҫыннине хирӗҫ тӑнӑшӑн явап тытма тивӗ.

Сӑмах май каласан, ҫу уйӑхӗн 1-мӗшӗ хыҫҫӑн Чӑваш Енре ӳсӗр 49 водителе тытса чарнӑ.

«Про Город» сайтран илнӗ сӑн

Хӑшӗ-пӗри ҫутҫанталӑк лапамне канма каять те хӑйӗн хыҫҫӑн юлнӑ ҫӳп-ҫапа пуҫтармасть. Шӑпах ҫак ыйтӑва ЧР Правительствинче пӑхса тухнӑ.

Ака уйӑхӗн 30-мӗшӗнче иртнӗ тӗлпулура районсен пуҫлӑхӗсем республикӑри санкцилемен ҫӳп-ҫап куписем пирки калаҫнӑ. Хӑш-пӗр ҫӗрте пачах йӗрке ҫук-мӗн. Ҫынсен шухӑшӗпе, вӑрманта канма пӗлменни, культура ҫукки ҫӳп-ҫап пухӑннин, йӑваланнине сӑлтавӗ.

Тӳре-шара ку ыйтӑва вырӑнти влаҫӑн тӗрӗслесех тӑмаллине каланӑ. Йӗркене пӑсакансене вара явап тыттармалла.

cheltv.ru сайтран илнӗ сӑн

Кӑшӑлвируса пула карантинра ларакан ҫынсем е пур. Вӗсем урӑх регионтан килнӗ е чирлӗ ҫынпа хутшӑннӑ.

Анчах пурте йӗркене пӑхӑнмаҫҫӗ-мӗн. 47 ҫын килте лармалли режима пӑснӑ. Вӗсене геолокаци пулӑшнипе тупса палӑртнӑ. ЧР сывлӑх сыхлавӗн министрӗ Владимир Степанов каланӑ тӑрӑх, ҫав ҫынсем хӑйсем чире ҫӑмӑллӑн ирттерме, анчах аслӑрах ӳсӗмрисене, хавшак иммунитетлисене чирлеттерсе яма пултараҫҫӗ. Унашкаллисем вара вӑйлах аптӑраҫҫӗ.

Сӑмах май, ку таранччен карантина пӑснӑ 300 ытла ҫынна тупса палӑртнӑ. Йӗркене пӑснӑ ҫынсене 15-40 пин тенкӗ штраф тӳлеттерме пултараҫҫӗ. Министр палӑртнӑ тӑрӑх, кӑшӑлвируспа чирлекенсен 80 проценчӗ чире симптомсемсӗр ирттерет.

Чӑваш Енре кӑшӑлвирус республикипех сарӑлнӑ темелле.

Ӗнерхи кун тӗлне ку вирус Улатӑр районӗнче 17 ҫынна лекнӗ;

Элӗк районӗнче —​ 13;

Патӑрьел районӗнче — 33;

Вӑрнар районӗнче —​ 12;

Йӗпреҫ районӗнче — 8;

Канаш районӗнче —​ 37;

Куславкка район​ӗнче — 1;

Комсомольски районӗнче —​ 10;

Красноармейски районӗнче — 4;

Хӗрлӗ Чутай район​ӗнче — 14;

Сӗнтӗрвӑрри районӗнче —​ 12;

Муркаш районӗнче —​ 10;

Пӑрачкав районӗнче —​ 32;

Вӑрмар районӗнче —​ 30;

Ҫӗрпӳ районӗнче —​ 19;

Шупашкар районӗнче —​ 18;

Шӑмӑршӑ районӗнче —​ 10;

Ҫӗмӗрле районӗнче —​ 22;

Етӗрне районӗнче —​ 50;

Елчӗк районӗнче —​ 10;

Тӑвай районӗнче —​ 49;

Ҫӗнӗ Шупашкарта —​ 24;

Шупашкарта —​ 241.

Ҫапла вара ку списокра курӑнманнисем темиҫе хула ҫеҫ.

lospet.ru сайтри сӑн

Сӗнтӗрвӑрри районӗнче пурӑнакан 31 ҫулти арҫын тӗлӗшпе, РФ Следстви комитечӗ пӗлтернӗ тӑрӑх, пуҫиле ӗҫ пуҫарнӑ. Вӑл пиччӗшне вӗлернӗ тесе шухӑшлаҫҫӗ.

Следстви версийӗ тӑрӑх, ҫу уйӑхӗн 1-мӗшӗнче ҫав арҫын ӳсӗр пулнӑ, килӗнче амӑшӗпе хирӗҫсе кайнӑ. Амӑшӗ ывӑлӗ ӗҫлеменшӗн кӑмӑлсӑрланнӑ.

Вӗсем вӑрҫӑннине пиччӗшӗ илтнӗ. 37 ҫулти арҫын киле кӗнӗ те амӑшне хӳтӗлеме пуҫланӑ. Пӗртӑвансем вӑрҫӑнса кайнӑ. Кӗҫӗнни ҫӗҫӗ ярса тытнӑ та аслине икӗ хутчен чикнӗ.

Пиччӗшӗ ҫавӑнтах вилсе кайнӑ. Халӗ пуҫиле ӗҫе малалла тӗпчеҫҫӗ. Ӗҫ-пуҫа уҫӑмлатас тӗллевпе тӗрлӗ экспертиза ирттерӗҫ.