Шупашкарти Прещидентӑн пепкеллӗх центрӗнче чӗре чирӗллӗ хӗрача ҫуралнӑ. Врачсем ӑна тӗплӗн тӗрӗсленӗ хыҫҫӑн ҫине тӑрса сиплеме тытӑннӑ. Телемедицина меслечӗпе кардиохирурги клиникисенчи специалистсемпе канашланӑ. Ҫавӑн хыҫҫӑн пепкене Раҫҫейӗн Сывлӑх сыхлав министерствин Пенза хулинче вырнаҫнӑ Федерацин чӗрепе юн тымарӗсен хирургийӗн центрне илсе кайма йышӑннӑ.

Шупашкарти пепкелӗх центрӗнче кирлӗ реанимаци оборудованийӗ, ҫав шутра реанимобильсем те, пур. Вӗсене туянма укҫана пӗлтӗр республика хыснинчен уйӑрнӑ.

Ачапа инҫе ҫула реанимаци уйрӑмӗн пуҫлӑхӗн тивӗҫне пурнӑҫлакан Наталия Скворцова анестезиолог-реаниматолог, Алина Романова медицина сестри-анестезисчӗ тата Анатолий Васильевпа Сергей Андреев водительсем ҫула тухнӑ. Федераци центрӗнче пепкене операци тунӑ. Халӗ ача хӑйне аван туять. Хӗрача ҫемьери пӗрремӗш тата кӗтнӗ ача иккен.

Чӑваш Ен Сывлӑх сыхлав министерствинче санитари ыйтӑвӗсемпе тата эпидемие хирӗҫ ӗҫлекен комиссин ларӑвӗ иртнӗ. Ӑна сывлӑх сыхлав министрӗн пӗрремӗш ҫумӗ Алексей Кизилов ертсе пынӑ. Ларӑва Роспотребнадзорӑн республикӑри управленийӗн специалисчӗсем хутшӑннӑ.

Кӑҫал пирӗн республикӑра пурӑнакансенчен 60 процентран кая мар йышне грипран прививка тума палӑртнӑ. Чир хӑвӑрт ерес хӑрушлӑх пур ҫынсене илсен вакцинаци кӑтартӑвӗ 75 процентран кая мар пулмалла.

Эпидемиологи тапхӑрӗнче тухтӑрсен пульницӑри амбулатори тата стационар уйрӑмӗсенче ҫеҫ мар, ҫынсем патне киле ҫитсе те пулӑшмалла. Вируса хирӗҫ препаратсене те пульницӑсен ҫителӗклӗ хатӗрлесе хумалла. Хушма койка фончӗ уҫма та хатӗр тӑмалла.

Республикӑн ача-пӑча клиника пульницинче Чечен Республикинчи хӗрачана операци тунӑ. Пӗчӗкскерӗн сайра тӗл пулакан чир пулнӑ. Ачан кӑкӑр клеткин форми ҫуралнӑ чухнех улшӑннӑ.

Торакопластика текен операцие ача-пӑча клиника пульницин тӗп тухтӑрӗ Анатолий Павлов (вӑл — ача-пӑча хирургӗ), Дмитрий Лукоянов анестезиолог-реаниматолог тата ача-пӑчан хирруги уйрӑмӗн заведующийӗ Иван Глазырин ирттернӗ.

Кун пек кӑткӑс операцие пульницӑра унччен те ирттернӗ. Анатолий Павлов тӗп врач кӑкӑр клеткине тытакан ятарлӑ пластина шухӑшласа кӑларма хутшӑннӑ. Унӑн патентне те илме пултарнӑ. Халӗ ҫав хатӗрпе тухтӑрсем усӑ кураҫҫӗ.

Shnyagi.net сайтри сӑн

Чӑваш Енре кӑшӑлвирусран сывалакансен йышӗ нумайланса пырать. Кӑшӑлвирус сарӑлассипе кӗрешекен оперштаб ларӑвӗнче ЧР сывлӑх сыхлавӗн министрӗ пӗлтернӗ тӑрӑх, инфекциленнисен 83 проценчӗ сывалнӑ.

Ку таранччен 7585 ҫын каварлӑ вируса ҫаклатнӑ. Вӗсенчен 6237-шӗ сывалнӑ. Вилнисен йышӗ хальлӗхе улшӑнман – 68 ҫын.

Паянхи кун тӗлне 1280 ҫын кӑшӑлвирусран сипленет. Ӗнертенпе инфекциленнӗ 34 тӗслӗхе палӑртнӑ. Юлашки талӑкра 20 ҫын сывалнӑ. Кӑшӑлвирус сарӑлнин индексӗ 1-пе танлашать.

Сӑмах май, республикӑра урамри аттракционсене ӗҫлеме, уҫӑ сывлӑшра тренировкӑсем ирттерме, 18 ҫултан аслӑрах спортсменсемпе ӑмӑртусем йӗркелеме ирӗк панӑ.

Zdorovie-legkie.ru сайтри сӑн

Кӑҫал Чӑваш Енре регионта пурӑнакансен 60 процентне грипран прививка тӑвасшӑн. Ҫавна май 80 пин доза вакцина туянма заявка панӑ.

Сывлӑх сыхлавӗн, вӗренӳ, транспорт тата ЖКХ тытӑмӗсенче ӗҫлекенсене грипран прививка пурне те тӑвӗҫ. Шала кайнӑ чирсемпе нушаланакансене тата 60 ҫултан аслӑраххисене те вакцинацилӗҫ.

Ҫитес вӑхӑтра вакцинӑн пӗрремӗш партийӗ ҫитмелле, ку 84,4 пин доза ачасем валли. Уйӑх вӗҫлениччен тепӗр 159,2 пин доза килмелле. Ку вара аслисем валли.

Прививкӑна пурӑнакан вырӑнти поликлиникӑра тума пулать. Ятарласа прививка тума тухса та ҫӳрӗҫ, ку графикпе килӗшӳллӗн пурнӑҫланса пырӗ.

Шупашкарта вырнаҫнӑ Федерацин травматологи, ортопеди тата эндопротезировани центрӗн тухтӑрӗсем вӗҫӗмех тӗрлӗ семинара ҫӳреҫҫӗ. Хамӑр ҫӗршыври форумсене хутшӑнаҫҫе ҫеҫ мар, чикӗ леш енне те каяҫҫӗ. Хӑйсем вӗреннипе пӗрлех ыттисене те ӑсталӑха хӑнӑхтараҫҫӗ.

Ҫурла уйӑхӗн 21-22-мӗшӗсенче Хусанта «Артромастер» ассоциаци халӑхсем хушшинчи вӗрентӳ шкулне тӑваттӑмӗш хутчен йӗркеленӗ. Унта Шупашкарти Родион Драндров тухтӑр хутшӑннӑ. Тӗрлӗ регионти ӗҫтешӗсене вӑл хулпуҫҫи шӑммине ыратнине ирттернӗ чух ультрасасӑ тӗрӗслевӗпе тӗрӗс усӑ курма ирттерме вӗрентнӗ.

Кӑшӑлвируспа чирлекенсен шучӗ пирӗн республикӑра 7,5 пинрен иртнӗ. Ҫав шутран 82 проценчӗ сывалнӑ.

Паян ир тӗлне пирӗн республикӑра 7516 ҫын кӑшӑлвируспа чирленине шута илнӗ. Ку вӑл – официаллӑ статистика. Маларах асӑннӑ 7,5 пин ытла тӗслӗхрен 35 ҫынна вирус иртнӗ талӑкра ернӗ.

6196 ҫын сывалнӑ. Ҫав йышран 27 ҫын иртсе кайнӑ талӑкра сипленнӗ.

Кӑшӑлвирус пандемийӗ пуҫланнӑранпа COVID-19 68 пациент пурнӑҫне татнӑ. Ку вируса пула юлашки талӑкра никам та вилмен.

Аса илтерер: пирӗн республикӑра пысӑк суту-илӳ центрӗсене тата аттракционсене уҫма ирӗк панӑ.

Шупашкарта Саранскри, Питӗрти тата ытти хӑш-пӗр хулари пек пульница пулӗ. Тӗрӗсрех каласан, унтисен проектне тӗпе хурса тӑвӗҫ.

Шупашкарта тума палӑртнӑ нумай профильлӗ 1000 вырӑнлӑх поликлиника проектне ытти регион тӗслӗхне шута илсе хатӗрлеме йышӑннӑ.

Республикӑн Сывлӑх сыхлав министерствин ӗҫченӗсем Хусанти, Саранскри, Питӗрти тата Курскри ҫавӑн пек пульницӑсемпе маларах паллашнӑ.

Ҫӗнӗ пульница хальхи вӑхӑт ыйтнисене шута илсе ҫӗкленӗ. Паллах, оборудовани те унта хальхи йышши пулӗ.

Хатӗр проект ӗҫе хӑвӑртрах кӳленме май парӗ. Шупашкарта ҫӗнӗ пульница кирлине республика Элтеперӗн тивӗҫӗсене вӑхӑтлӑх пурнӑҫлакан Олег Николаев кӑҫалхи пуш уйӑхӗнче Мускавра пулнӑ чух Раҫҫей ял хуҫалӑх министрӗн ҫумӗпе Наталья Хороваяпа сӳтсе явнӑ.

cap.ru сӑнӳкерчӗкӗ

Чӑваш Енре кӑшӑлвируспа чирлекенсен хушшинче йывӑррисем те пур. Унашкаллисем – 19 ҫын. ЧР сывлӑх сыхлавӗн министрӗ Владимир Степанов вӗсене йывӑр чирлӗ пациентсем тенӗ.

Республикӑра пӗтӗмпе 7448 ҫын инфекциленнӗ. Вӗсенчен 6114-шӗ сывалнӑ. 68 ҫын вилнӗ – ку статистика, телее, юлашки кунсенче улшӑнман. 978 ҫыннӑн чирӗ хӗрӳ самантра, вӗсем сипленеҫҫӗ.

Паян кӑшӑлвирус сарӑлас енӗпе кӗрешекен оперштаб ларӑвӗнче республикӑра аттракционсемпе суту-илӳ центрӗсене уҫасси пирки калаҫнӑ. Вӗсене ҫитес вӑхӑтра уҫма пултарӗҫ. Чӑваш Енре кӑшӑлвирус сарӑлнин коэффициенчӗ 1-пе танлашать.

Ftimes.ru сайтри сӑн

Чӑваш Енре кӑшӑлвирусран сывалакансен йышӗ 6 пинрен иртнӗ, пӗтӗмпе 6074 ҫын чире парӑнтарнӑ. Паянхи кун тӗлне республикӑра пурӑнакан 7414 ҫын инфекциленнӗ. Юлашки талӑкра ку йыша 36 ҫын хушӑннӑ.

Хальхи вӑхӑтра 1272 ҫын кӑшӑлвирусран сипленет. Каварлӑ вируса пула Чӑваш Енри 68 ҫын вилнӗ. Юлашки кунсенче инфекцие пула вилнӗ тӗслӗхсем пулман.

Республикӑра кӑшӑлвирус сарӑлнин индексӗ 0,97-пе танлашнӑ. Аса илтерер: Чӑваш Енре нумаях пулмасть саунӑсене, мунчасене, фитнес-залсене ӗҫлеме ирӗк панӑ.