Паян 9 сехет ҫурӑра Ҫӗрпӳ муниципалитет округӗнче «Тойота» «Канаш – Шупашкар» маршрутпа ҫӳрекен автобуспа ҫапӑннӑ. Шел те, ҫӑмӑл машина рулӗ умӗнче ларнӑ 58 ҫулти хӗрарӑм, Ҫӗнӗ Шупашкарта пурӑннӑскер, вилнӗ.
Авари вӑхӑтӗнче автобус салонӗнче 7 пассажир пулнӑ. Вӗсем аманман.
Малтанлӑха пӗлтернӗ тӑрӑх, «Тойота» рулӗ умӗнче ларнӑ хӗрарӑм транспорта итлеттереймен – хирӗҫ ҫул ҫине тухса кайнӑ та «Грантӑна» кӑштах лектернӗ, унтан микроавтобус ҫине пырса кӗнӗ.
Чӑваш Енре пурӑнакан Семёновсем Мускаври «Раҫҫей» курав вӑхӑтӗнче иртекен «Родные – Любимые» (чӑв. Тӑвансем — Юратнисем) форума хутшӑнӗҫ.
Асӑннӑ мероприяти кӑрлач уйӑхӗн 19-23-мӗшӗсенче иртет. Асӑннӑ форум ҫӗршывра кӑҫал палӑртнӑ Ҫемье ҫулталӑкне уҫӗ.
Конкурса хутшӑнакан ҫемьсем 3 кун хушши хӑйсен регионӗсемпе паллаштарӗҫ, ентешӗсен ҫитӗнӗвӗсем тата тӑван тӑрӑхри палӑ вырӑнсем ҫинчен каласа кӑтартӗҫ, сцена ҫине тухса хӑйсен пултарулӑхӗпе паллаштарӗҫ.
Семёновсем — Шупашкар муниципаллӑ округӗнчен. «Ҫулталӑк ҫемйи-2022» республика конкурсӗнче вӗсеем «Пултарулллӑ ҫемье» номинацире ҫӗнтернӗ. Николай Анатольевич тата Алевтина Мефодьевна 20 ҫул ӗнтӗ пӗрле. Вӗсем 5 ача ӳстереҫҫӗ.
Шупашкарти 46-мӗш гимназире вӗренекенсем икӗ эрне карантинра пулнӑ. Ачасем шкула таврӑннӑ-ха, анчах пӳлӗмсенче, спортзалта, коридорта сивӗ. Ашшӗ-амӑшӗ «Ҫыхӑнура» портала ҫӑхав ҫырса янӑ.
Мӗншӗн сивӗ? Ашшӗ-амӑшӗ директор патне пырса та калаҫнӑ. Анчах ыйту татӑлман. Хӑш-пӗр пӳлӗмре сывлӑш температури 12-16 градус кӑна ӑшӑ, коридорта - 12, спортзалта 10 градус ӑшӑ.
Шупашкар хулинче пурӑнакан Татьяна Орлова паян 100 ҫул тултарнӑ.
Сарту облаҫӗнче ҫуралнӑскер ача чухне ашшӗ-амӑшӗпе Шупашкар куҫса килнӗ. Ҫичӗ класс вӗренсе пӗтерсен вӑл фармацевтсен шкулне вӗренме кӗнӗ. Унтан 1942 ҫулхи пуш уйӑхӗнче вӗренсе тухсан Тулӑна ӗҫлеме янӑ. Унти аптека тытӑмӗнче тата ҫар госпиталӗнче тӑрӑшнӑ.
Паян кинемей Шупашкарта пурӑнать. Хӑйӗн вӑрӑм ӗмӗр вӑртӑнлӑхне ҫемье лайӑх пулнипе сӑлтавлать. Упӑшкипе, Юрӑпа, вӑл килӗштерсе пурӑннӑ. Анчах 25 ҫул ҫеҫ. Арҫын усал чире пула пурнӑҫран 50 ҫула ҫитичченех уйрӑлса кӗнӗ.
Ватӑ ҫынна Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центр ӗҫченӗсем саламланӑ.
Кӗҫӗр вӑйлӑ ҫил Шупашкарти Богдан Хмельницкий урамӗнчи 57-мӗш «а» ҫуртӑн тӑррине сӳсе пӑрахнӑ. Унта – лавккасем, кафе, парикмахерски… Ҫурт самаях сиенленнӗ. Тӑррине ҫил сӳнӗрен мачча та курӑнать.
Кӗҫӗр ҫил-тӑман, ҫил вӑйлах алхаснӑ «Чӑваш Енри ҫанталӑк» проект авторӗ Владимир Михайлов пӗлтернӗ тӑрӑх, ҫӗрле Шупашкарта ҫил ҫеккунтра 20 метр хӑвӑртлӑхпа вӗрнӗ. Паян ҫил лӑпланнӑ. Эрнекун ирхине вара вӑл каллех вӑйланӗ, ҫеккунтра 20-22 метр хӑвӑртлӑхпа та вӗрме пултарӗ.
Шупашкар хулинче пурӑнакан Елена Мусатова ачаранпах дизайнер пулма ӗмӗтленнӗ. Анчах тава тивӗҫлӗ канӑва тухсан ҫеҫ хӑйӗн унчченхи ӗмӗтне пурнӑҫа кӗртме пултарнӑ.
Хӗрарӑм пӗлтӗрхи ҫулла Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центра ҫӳреме пуҫланӑ. Вӑл унта япала касса ҫӗлекенсен кружокне ҫырӑннӑ.
Ӗҫ инструкторӗ пулӑшнипе чи малтанах платье ҫӗленӗ. Кайран пальто ҫӗлесе тӑхӑнма шухӑшланӑ. Ӑшӑ тума Мускав облаҫӗнчи Павловский Посад хулинчи фабрикӑра туса кӑларакан ҫӑм тутӑрпа илемлетнӗ. Сӑмах май каласан, тӗнчипе паллӑ Вячеслав Зайцев кутюрье те ҫав тутӑрсемпе усӑ курма юратнӑ.
Ҫил-тӑман вӗҫтернӗрен ӗнер «Победа» авиакомпани 19 сехет те 50 минутри «Шупашкар - Мускав» тата 21 сехет те 50 минутри «Мускав - Шупашкар» рейссене вӗҫеве кӑларман.
Ҫил вӑйлӑ пулнӑран ӗнер Шупашкарти аэропорт та хӑш-пӗр рейса пӑрахӑҫланӑ. Ӗнер Сочие вӗҫмелли самолета паяна ирхи 8 сехете куҫарнӑ. Унта 184 пассажир регистрациленнӗ.
Кӗҫӗр Хусанти аэропорт та йӗркеллӗ ӗҫлеймен. Паян ирхи 6 сехетчен унта 9 самолетран пӗри кӑна анса ларайнӑ.
Патшалӑхӑн ҫул-йӗр хӑрушсӑрлӑхӗн инспекторӗсем Шупашкар ҫыннисене машинӑпа инҫе ҫула тухма сӗнмеҫҫӗ. Ялан мар-ха. Паян. Ҫил-тӑман вӗҫтернӗрен ҫулсем ҫинче 10 баллӑ пӑкӑ пулса тӑнӑ.
Инспекторсем ҫул ҫинче питех та асӑрхануллӑ пулма, ҫул-йӗр правилисене ҫирӗп пӑхӑнма сӗннӗ.
Хула урамӗсем тасатса тӑракан «Дорэкс» организаци кӑнтӑрла 96 ҫул-йӗр рабочийӗ тата 110 техника, унсӑр пуҫне субпорядчиксен техники ӗҫленине пӗлтернӗ. Каҫхине тата ҫӗрле урамсене 60-а яхӑн техника тасатса тӑрӗ.
Паян 9 сехет те 7 минутра Шупашкарта «Шупашкар» суту-илӳ комплексӗ ҫывӑхӗнче водитель машинӑпа пынӑ чухнех вилнӗ. Юрать-ха, вӑл ҫав самантра шӑпах светофор умӗнче чарӑннӑ, ҫавӑнпа никампа та ҫапӑнман.
Водитель «Лада Гранта» машинӑпа пынӑ. Малтанлӑха пӗлтернӗ тӑрӑх, унӑн чӗри чарӑнса ларнӑ.
Шупашкарта килсӗр-ҫуртсӑр пӗр ҫын лавккара ҫын сумккине вӑрланӑ. Пӑтӑрмах кӑрлач уйӑхӗн 10-мӗшӗнче пулса иртнӗ.
41 ҫулти хӗрарӑм хулари лавккасенчен пӗринче, Николаев урамӗнчи супермаркетра, япала хумалли камерӑра хӑйӗн сумккине хӑварнӑ. Каялла тухнӑ чухне пӑхать те сумка ҫухалнине асӑрхать. Хӗрарӑм 5 пин тенкӗлӗх тӑкак тӳснине пӗлтернӗ.
Йӗрке хуралҫисем кӗҫех вӑрра та тытса чарнӑ. Вӑл ҫын килсӗр-ҫуртсӑрскер пулнӑ. 54 ҫулти арҫын ҫӑрана ватса ҫын япалине илнӗ.
+10.3 °C
