Шупашкарта пурӑнакан арҫын ӗҫсӗрлӗх пособине суйса илсе тӑнӑ.
Хулари Мускав районӗн прокуратури тӗрӗслев ирттернӗ те, 2021 ҫулхи авӑн уйӑхӗнче Ӗҫпе тивӗҫтерекен центрта регистрациленнӗ арҫын ӗҫе вырнаҫсан та пособи илсе тӑнине палӑртнӑ. Ҫавӑн пек майпа вӑл 2021 ҫулхи чӳк уйӑхӗнчен пуҫласа 2022 ҫулхи пуш уйӑхӗччен укҫа илсе пурӑннӑ.
Халӗ арҫын тӗлӗшпе РФ Пуҫиле кодексӗн 159.2 статйин 1-мӗш пайӗпе пуҫиле ӗҫ пуҫарнӑ.
Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрта тӗрлӗ темӑпа сӑнӳкерчӗксен куравне пӗрмаях ирттереҫҫӗ. Унта ватӑ ҫынсене явӑҫтараҫҫӗ. «Хӗл ытамӗнче» курава 85 ҫулти Вениамин Папченко та хутшӑннӑ. Вӑл учрежденин стационарӗнче пурӑнать.
«Фотокурав валли сӑн ӳкерӗнме ыйтрӗҫ те, килӗшрӗм», — тет иккен мучи.
Центрӑн пресс-секретарӗ Вера Иванова каласа кӑтартнӑ тӑрӑх, Вениамин Петровича сӑн ӳкерме питех те кӑмӑллӑ пулнӑ. «Ӑна кирек епле тӑма ыйтсан та кашнинчех унӑн ӑслӑ сӑнӗ куҫа тӑрӑнать. Вениамин Папченко — нумай вӗреннӗ ҫын. Мучи паян та кӗнеке вулама юратать», — каласа кӑтартать ватӑсене сӑн ӳкернӗ специалист.
Ватӑсен сӑнӳкерчӗкӗсене курсан пурте хавхаланаҫҫӗ: аслисем пурӑнма тата пурнӑҫпа килменме кая юлманнине ӑнланса илеҫҫӗ, ҫамрӑксем вара — тӑнлав пасарсан та хитре ҫын илемлӗ пулса юлассине.
Шупашкарта пурӑнакан, Ҫӗрпӳ районӗнчи (халӗ — муниципаллӑ округ) Паваркасси ялӗнче пурӑнакан Поликарп Фёдоров паян 95 ҫул тултарать. 2021 ҫулхи ҫулларанпа арҫынна Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрӑн социаллӑ ӗҫченӗ пӑхса тӑрать.
Поликарп Фёдорович мӑшӑрӗпе Серафима Васильевнӑпа (хӗрарӑм 2019 ҫулта пурнӑҫран уйрӑлса кайнӑ) виҫӗ ывӑл ӳстернӗ. Паян мучие 5 мӑнукӗ тата мӑнукӗн 7 ачи савӑнтараҫҫӗ.
Наталия Митрофанова социаллӑ ӗҫчен пӗлтернӗ тӑрӑх, Фёдоровсем ывӑлӗсене ырӑ ҫын пулма вӗрентнӗ. Кинӗсем те ҫавӑн пек. Ватӑ ҫын патне ачисем кашни кунах пырса ҫӳреҫҫӗ. Ывӑлӗсенчен пӗри ватӑ ашшӗне пӑхма тесе нумаях пулмасть ӗҫӗнчен пӑрахнӑ.
«Поликарп Фёдорович унччен мана кашни кӗҫнерникунсерен кукӑль пӗҫерсе кӗтсе илетчӗ», — каласа кӑтартать социаллӑ ӗҫчен. Халӗ арҫын сусӑр кӳмипе ҫӳрет те кил тӗрӗшӗнчи ӗҫе хӑй тӗллӗн пурнӑҫлаймасть. Апла пулин те вӑл пурнӑҫа юратать, пуринпе те ӑшӑ кӑмӑллӑ, мӑшӑрӗпе 65 ҫул тату та килӗшӳллӗ пурӑннине, унпа пӗрмаях чӑваш театрне спектакльсем курма, ҫулла вара Ҫӗрпӳ ярмӑрккине кайнине хавасланса аса илет.
Шупашкарта пурӑнакан Василий Дмитриевич Акулов нарӑсӑн 15-мӗшӗнче 100 ҫул тултарнӑ. Ӑна саламлама килнӗ тӳре-шара РФ Президенчӗн Владимир Путинӑн саламлӑ открыткине панӑ.
Василий Дмитриевич Пенза облаҫӗнчи Кирилловка ялӗнче хресченсен ҫемйинче ҫуралнӑ. Тӑван ҫӗршывӑн Аслӑ вӑрҫи вӑхӑтӗнче вӑл II Украина фронтӗнче, Курск пӗккинче, II Беларуҫ фронтӗнче ҫапӑҫнӑ. Танкист пулнӑ, темиҫе хутчен аманнипе госпитальте нумай вӑхӑт сипленнӗ.
Вӑрҫӑ хыҫҫӑн Василий Дмитриевич Шупашкарти тӗрлӗ предприятире столярта ӗҫленӗ. Мӑшӑрӗпе 4 ача ӳстернӗ.
Паян «Пятница!» телеканалпа пыракан «Четыре свадьбы» кӑларӑма Шупашкарти 27 ҫулти Еленӑпа Владимир хутшӑнӗҫ. Эфира 22 сехетре курма пулать.
Кӑларӑма хутшӑнакансем пӗр-пӗрин туйне тӗрлӗ критерипе хаклаҫҫӗ. Хӑшӗн туйӗ чи нумай бал пухать - ҫавӑ ҫӗнтерет.
Елена банкра ӗҫлет, Владимир -ландшафт дизайнерӗ. Вӗсем халӑх тетелӗнче паллашнӑ. Ҫамрӑксем туя классика стилӗпе туса 900 пин тенкӗ тӑкакланӑ.
1989 ҫулхи нарӑс уйӑхӗн 15-мӗшӗнче 10 ҫул хыҫҫӑн Афганистанран совет салтакӗсене илсе тухнӑ. Паян интернационалист салтаксене асӑннӑ.
Совет салтакӗсене Афганистанран илсе тухнӑранпа 36 ҫул ҫитнӗ. Ҫав вӑрҫа Чӑваш Енри 4,5 пин салтак хутшӑннӑ, вӗсенчен 115-шӗ вилнӗ, тӑваттӑшӗ хыпарсӑр ҫухалнӑ. Салтаксене асӑнса Шупашкарти «Ҫӗнтерӳ» паркра палӑк лартнӑ. Шӑпах ҫавӑнта пухӑннӑ та паян тӳре-шара.
Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрта тӑрӑшакансен сывлӑха тӗрӗслес тесе больница тӑрӑх ҫӳреме кирлӗ мар. Кунта сӑмах ҫулсерен тухакан медицина тӗрӗслевӗ пирки пырать.
Социаллӑ учреждени Хулари 1-мӗш клиника больниципе ятарлӑ килӗшӳ унти тухтӑрсем ӗсе пырсах сывлӑха тӗрӗслеҫҫӗ. Юн тата ытти анализа та унтах илеҫҫӗ. Черетлӗ медтӗрӗслев витӗр хальхинче 159 ҫын тухӗ. Тухтӑрсен бригади учрежденире икӗ кун ӗҫлӗ. Шурӑ халатлисене йывӑр тивесрен тата социаллӑ сферӑра ӗҫлекенсене черетре тӑратасран кашни структура подразделенине вӑхӑт уйӑрса панӑ.
Паянпа ыран тӗрӗслев витӗр тухманнисене ҫулла тӗрӗслӗҫ.
Шупашкарта юбилейлӑ банкнотӑсене пама пуҫланӑ. Аса илтерер: вӗсене Шупашкар 555 ҫул туларнине халалласа кӑлараҫҫӗ. Унта хулари паллӑ вырӑнсене сӑнлаҫҫӗ.
Ҫак юбилейлӑ укҫана тӗп хулари Андреевсем тивӗҫнӗ. Вӗсем Калинин район администрацийӗн ЗАГС пайӗнче хӑйсен пӗремӗш ачине регистрациленӗ, ӑна Мия ят панӑ.
Мӑшӑр ачи Шупашкар хулин юбилейлӑ ҫулӗнче ҫуралнӑшӑн савӑннӑ.
Шупашкарти «Дорэкс» предприятие ҫула япӑх тасатса тӑнӑшӑн тӑватӑ хутчен явап тыттарса штрафланӑ. Кашнинчех – 100-шер пин тенкӗшер.
Асӑннӑ организацие Кӑнтӑр посёлокне япӑх тасатса тӑнӑшӑн кӑна виҫӗ хутчен штрафланӑ.
Шупашкар хула администрацийӗн Ҫурт-йӗрпе коммуналлӑ хуҫалӑх управленийӗ нумаях пулмасть Альгешри Вишневӑй урама тӗрӗсленӗ. Унта ҫил-тӑман хыҫҫӑн ҫула виҫӗ талӑк тасатман.
Шупашкарти Арбитраж сучӗн ҫуртне тӗпрен юсасшӑн. Ҫав ҫурт хулари Ленин проспектӗнчи 4-мӗш ҫуртра вырнаҫнӑ. Вӑл республика пӗлтерӗшлӗ культура эткерлӗхӗн объекчӗ шутланать. Реставраципе ҫыхӑннӑ ӗҫсем нумаях пулмасть патшалӑх экспертизи витӗр тухнӑ.
Тӑватӑ хутлӑ кирпӗч ҫурта 1954 ҫулта хӑпартнӑ. Малтан ӑна Электроаппаратура завочӗн общежитийӗ тесе тунӑ. Проект авторӗ – паллӑ чӑваш архитекторӗ Феофан Сергеев.
Чӑваш Енӗн Арбитраж сучӗ ҫав ҫуртра 1991 ҫултанпа ӗҫлет. Ун валли хӑй вӑхӑтӗнче шалти планировкӑна тата кӗмелли алӑка улӑштарнӑ.
+14.3 °C