Ӗнер, юпа уйӑхӗн 10-мӗшӗнче, Чӑваш Енри виҫӗ кинемей 100 ҫул тултарнӑ.
Вӗсенчен иккӗшӗ, Анна Иванова тата Мария Кручинина, Шупашкарта пурӑнаҫҫӗ, Шемсия Сафина — Патӑрьел муниципаллӑ округӗнчен.
Вӑрҫӑ ҫулӗсенче Мария Христофоровна тата Шемсия Алиулловна фронтра ӗҫленӗ, аслӑ Ҫӗнтерӗве ҫывхартма пулӑшнӑ. Анна Титовна II Прибалтика фронтӗнче ҫарта пулнӑ.
Анна Иванова вӑрҫӑ ҫулӗсенче телейлӗ те вӑрӑм ӗмӗр пирки ӗмӗтленнӗ. Халӗ вара вӑл ҫынсене кӳрентерес марччӗ тесе пурӑнать.
Кинемейсене Телеграмри хӑйӗн каналӗнче республика Элтеперӗ Олег Николаев саламланӑ.
Шупашкарта пурӑнакан пӗр арҫынтан суд приставӗсем ҫын хваттерне чӗртсе ярса шар кӑтартнин тӑкакне шыраса илнӗ.
66 ҫулти арҫын аппӑшӗн (тен, йӑмӑкӗн пулӗ. Суд приставӗсен сайтӗнчи вырӑсла хыпарта «сестра» тесе ҫырнӑ та) хваттерне чӗртсе янӑ. Унччен пӗртӑвансем хушшинче тавлашу сиксе тухнӑ. Арҫын тӑванне шар кӑтартас тесе алла шӑрпӑк тытнӑ. Хӗрарӑмӑн хваттерти мӗнпур пурлӑхӗ ҫунса кайнӑ.
Тӑванӗ тӗлӗшпе хӗрарӑм суда тухнӑ. Унта арҫынна 2 ҫуллӑха тӗрмене хупса хумалла тата пурлӑха сиен кӳнине саплаштармалла тунӑ.
Арҫынран суд приставӗсем 1,15 миллион тенкӗ ытла шыраса илнӗ.
Шупашкарта ыркӑмӑллӑх шкапӗ пур. Ӑна хулари МНТК пульницӑна хирӗҫ вырнаҫтарса хунӑ. Унта ҫынсем хӑйсен япалисене пырса хума пултараҫҫӗ, теприсем ҫав япаласене илсе каяйраҫҫӗ.
Тепӗр чухне хитре япаласемех юрӑхсӑра тухаҫҫӗ: е пӗчӗкленсе кайнӑран, е ун пеккине тек тӑхӑнас килменрен. Ҫӳп-ҫап контейнерне тухса перес вырӑнне ун пек япаласене ыркӑмӑллӑх шкапне кайса хума май пур.
Телеграмри каналсенчен пӗринче ҫырнӑ тӑрӑх, ун пеке шкапсем ытти вырӑнта та уплсан аван. Япалана хурса хӑварассишӗнех хулан пӗр вӗҫӗнчен тепӗр вӗҫне пурин те ҫӳрес килмест-ҫке. Ҫывӑхрах пулсан такам та кайса парӗ.
Шупашкарта пурӑнакан Анна Иванова паян, юпа уйӑхӗн 10-мӗшӗнче, 100 ҫул тултарать.
Вӑл Канаш районӗнчи Вӑрман Енӗш ялӗнче ҫуралнӑ. Ҫичӗ класс вӗренсе пӗтерсен фермӑна ӗҫе вырнаҫнӑ. Анчах вӑрҫӑ пуҫлансан ӑна связистсен курсне вӗренме янӑ, кайран салтака илсе кайнӑ.
Вӑрҫӑран аманса таврӑнса ҫыхӑну уйрӑмӗн пуҫлӑхӗнче мӗн тивӗҫлӗ канӑва кайичченех ӗҫленӗ. Мӑшӑрӗпе вӑл 1950 ҫулта ҫемье ҫавӑрнӑ. Виҫӗ ывӑлпа икӗ хӗр ура ҫине тӑратнӑ. Паян вӗсенчен пӗр хӗрӗпе пӗр ывӑлӗ ҫук ӗнтӗ — леш тӗнчене уйрӑлса кайнӑ.
Кинемей Шупашкарти хваттерӗнче пӗчченех пурӑнать. Лавккана та тухса кӗрет, килне те хӑех тирпейлесе тӑрать. Питӗр хулинчи хӗрӗ хӑйӗн патне илсе каясшӑн та, кинемей тӑван тӑрӑхран тухса кайма килӗшмест. Кинемей калпак тата шарф ҫыхса вӑхӑта ирттерет, кӳршӗ-аршӑпа хутӑшать.
«Ҫынпа ҫураҫуллӑ пурӑнмалла», — тет тӑнлавне пас тытнӑ Анна Титовна.
Шупашкарта пурӑнакан 30 ҫулти хӗрарӑм полицие пырса пулӑшу ыйтнӑ. Унӑн 9 ҫулти ывӑлӗ компьютерпа вӑйӑ вылянӑ та амӑшӗн карточки ҫинчи 65 пин тенке куҫарса панӑ. Куншӑн ӑна счет ҫине хушма «фишка» куҫарса парасса шантарнӑ. Анчах ача кӑлӑхах кӗтнӗ.
11 ҫулти арҫын ачан амӑшӗ те ҫапла шар курнӑ. Шӑпӑрлан вӑйӑра промокод илесшӗн пулнӑ, палламан ҫынсене амӑшӗн банк карттин реквизичӗсене пӗлтернӗ. Ҫапла счет ҫинчен 30 ытла пин тенкӗ ҫухалнӑ.
Раҫҫейри паллӑ блогер Чистомэн Шупашкара килнӗ. Вӑл Ботаника садӗнче 1 сехетре 100 литр кӗрекен 10 михӗ ҫӳп-ҫап пуҫтарнӑ.
Чистомэн кун пирки «Контактра» халӑх тетелӗнчи страницинче ҫырса кӑтартнӑ. Вӑл каланӑ тӑрӑх, парк хитре, анчах тирпейсӗр. Ӑна шывра ҫӳп-ҫап нумай выртни тӗлӗнтернӗ. Унта вӑл 5 ҫул каялла туса кӑларнӑ банка та тупнӑ.
Чистомэн михӗсене контейнера пересшӗн пулнӑ - анчах вӗсем Ботаника садӗнче ҫук. Ҫавӑнпа вӑл шупашкарсене михӗсене ҫӳп-ҫап контейнерӗ патне илсе ҫитермешкӗн пулӑшу ыйтнӑ.
Шупашкарта пурӑнакан 39 ҫулти хӗрарӑмӑн харпӑр пурнӑҫӗ ӑнман. Вӑл хӑйне пӑснӑ, тухатланӑ тесе шутланӑ. Ҫавӑнпа тӗнче тетелӗнче астролог номерне тупса унпа канашланӑ.
Лешӗ ӑна чӑнах та пӑснине ҫирӗплетнӗ, пулӑшма шантарнӑ.
Хайхи астролог икӗ эрне темӗнле йӑла-йӗрке ирттернӗ, куншӑн укҫа ыйтсах тӑнӑ. Ҫапла хӗрарӑм ӑна 800 пин тенкӗ куҫарса панӑ. Укҫи пӗтсен тин вӑл кун пирки юлташне каланӑ. Лешӗ ӑна полицие кайса каласа кӑтартма сӗннӗ.
Кун тӗлӗшпе пуҫиле ӗҫ пуҫарнӑ.
Паян Шупашкарти Хӗрлӗ тӳремре 400 яхӑн ҫын тӑрса «Путин» тесе ҫырнӑ, чӗре «ӳкернӗ». Ҫапла Чӑваш Ен РФ Президентне Владимир Путина ҫуралнӑ кунпа саламланӑ.
Мӗнле саламланине видео ӳкернӗ, ӑна ЧР Пуҫлӑхӗ Олег Николаев телеграм-каналӗнче вырнаҫтарнӑ.
Владимир Владимирович паян 71 ҫул тултарнӑ. Вӑл 1952 ҫулхи юпа уйӑхӗн 7-мӗшӗнче Ленинградра ҫуралнӑ.
Юпа уйӑхӗ ӑшӑ ҫанталӑкран пуҫланчӗ. Синоптиксем кӗҫех юр ҫӑвасса систереҫҫӗ.
Паян каҫхине ҫумӑр ҫума пуҫлӗ. Шӑматкун та ҫӑвӗ. Хальлӗхе – вӑхӑтӑн-вӑхӑтӑн тата вырӑнӑн-вырӑнӑн. Шӑматкун каҫхине тепӗр циклон ҫитӗ. Вырсарникун ҫумӑрлӑ тата ҫиллӗ пулӗ.
Тунтикун уяртӗ. Термометр ир еннелле 0 градус патнелле кӑтартӗ. Кӑнтӑрла 3-8 градус кӑна ӑшӑ пулӗ. Ҫитменнине, ҫил вӑйланӗ. Ҫавна май тата сивӗрех туйӑнӗ.
Ытларикун, юнкун юр ӳкӗ. Синоптиксем каланӑ тӑрӑх, ҫитес кунсенче Шупашкарта нӳрӗк ҫур уйӑхри норма таран ӳкӗ.
Кайран каллех ӑшӑ ҫанталӑк тавранӗ. Малтанлӑха пӗлтернӗ тӑрӑх, ҫитес эрнери канмалли кунсенче ҫанталӑк 15-20 градус таран ӑшӑтӗ.
Ӗнер, юпан 5-мӗшӗнче, 14 сехетре Шупашкарти пӗр предприятире инкек пулнӑ - унта арҫын сарӑмсӑр вилнӗ.
Слесарь юр пуҫтармалли техникӑна юсанӑ. «Про Город» хаҫата халӑх корреспонденчӗ пӗлтернӗ тӑрӑх, вӑл ӑна хускатма шутланӑ. Анчах техника куҫма тытӑннӑ. Арҫын унӑн кустӑрми айне пулнӑ. Вӑл ҫавӑнтах вилнӗ.
Арҫын - 1962 ҫулта ҫуралнӑскер.
-5.7 °C