Юпа уйӑхӗн 18-мӗшӗнче Шупашкарта ГТО фестивалӗ иртӗ. Ун чухне ҫӑлтӑрпа зарядка пулӗ.
Хальхинче ӑна Голливудри паллӑ актер Игорь Жижикин ирттерӗ. Вӑл вун-вун Америка фильмӗнче ӳкерӗннӗ. Мероприяти юпа уйӑхӗн 18-мӗшӗнче, шӑматкун, Шупашкарти «Спартак» стадионта 11 сехетре пуҫланӗ.
Палӑртмалла: Игорь Жижикин 1965 ҫулта Мускавра ҫуралнӑ. 1989 ҫулта Мускав циркӗпе пӗрле АПШна кайнӑ. Фильмри пӗрремӗш роль – «Обезьяний бизнес» (АПШ, 1998 ҫул). 2001 ҫултанпа Раҫҫей фильмӗсемпе сериалӗсенче ӳкерӗнме тытӑннӑ.
Чӑваш артисчӗсем Йошкар-Олара иртнӗ Пӗтӗм Раҫҫейри ҫамрӑксен «Театральные встречи на Вознесенской» фестивальне хутшӑннӑ.
К.В. Иванов ячӗллӗ Чӑваш патшалӑх академи драма театрӗ унта «Аманнӑ шӑпа» спектакльпе хутшӑннӑ. Ҫав ӗҫе, театрта пӗлтернӗ тӑрӑх, жюри пысӑка хурса хакланӑ.
Алман Арсланов сӑнарне калӑпланӑ Николай Сергеева артиста ятарлӑ наградӑпа чысланӑ, Григорий Федоров «Иккӗмӗш планри чи лайӑх арҫын ролӗ» номинацире ҫӗнтернӗ, Светлана Андреева «Иккӗмӗш планри чи лайӑх хӗрарӑм ролӗ» номинацире палӑрнӑ. Спектакль режиссёрне Борис Манджиева «Чи лайӑх режиссура» номинацире чысланӑ.
Чӑваш Енри маттур ачасем республика шайӗнче кӑҫалхипе виҫҫӗмӗш хут иртекен «Асам» фестивале хутшӑнма хатӗрленеҫҫӗ.
Республикӑри шкул театрӗсен конкурсӗнче ачасем сцена ҫине хӑйсем лартнӑ ӗҫсемпе тухӗҫ. Малтан вӗсене муниципалитет шайӗнче пахалӗҫ. Муниципалитет шайӗнчи конкурс юпа уйӑхӗн 14-мӗшӗччен пырӗ. Унта суйласа илнисем республикӑри фестивале хутшӑнӗҫ.
Сӑмах май каласан, кӑҫалхи фестиваль теми — Тӑван ҫӗршывӑн хӳтӗлевҫин ҫулталӑкӗ тата Тӑван ҫӗршывӑн аслӑ вӑрҫинче ҫӗнтернӗренпе 80 ҫул ҫитни.
Камсем ҫӗнтернине раштав уйӑхӗн 5-мӗшӗнче пӗлтерӗҫ.
Чӑваш патшалӑх филармонийӗнче кӑҫал та «Созвездие земляков» (чӑв. Ентешсен ҫӑлтӑрлӑхӗ) халӑхсем хушшинчи фестиваль иртӗ. Вӑл юпа уйӑхӗн 9-мӗшӗнчен пуҫласа юпа уйӑхӗн 30-мӗшӗччен пырӗ. Кашни кунах мар-ха.
Юпа уйӑхӗн 9-мӗшӗнче «Мелодии российского кино» программӑпа Тутарстанри филармони джаз-оркестрӗ сцена ҫине тухӗ. Юпа уйӑхӗн 17-мӗшӗнче Пушкӑртстанри филармонин камера оркестрӗ «Времена года в Буэнос-Айресе» концерт кӑтартӗ. Юпа уйӑхӗн 23-мӗшӗнче Питӗрте пурӑнакан ентешӗмӗр Данил Прокопьев JUAN HORLENDIS BAND ушкӑнпа тата Регина Каргина вокалистпа килсе ҫитӗ.
Юпа уйӑхӗн 30-мӗшӗнче фестиваль хупӑнӗ.
Шупашкарта пурӑнакан, Элӗк районӗнче ҫуралнӑ, кӑҫалхи ҫу уйӑхӗнче 100 ҫул тултарнӑ Агриппина Янович вӑрҫӑ ветеранӗ ҫинчен ӳкернӗ фильм «Небесный град и земное Отчество – 2025» пӗтӗм Раҫҫейри фестивальте лауреат ятне тивӗҫнӗ.
Фестиваль Можайск хулинче иртнӗ, конкурса 132 кинолента тӑратнӑ. Михаил Ножкин поэт ертсе пыракан тӳресем 22 ӗҫе финал валли суйласа илнӗ.
«Через века – помните. Откровения участника ВОВ А.А. Янович» документлӑ фильм лауреат пулса тӑнӑ, ӑна ҫутӗҫ киновӗ категорире палӑртнӑ. Кинолента режиссёрӗ — Марина Янова.
Фильма Чӑваш Енӗн Наци телекуравӗ юпа уйӑхӗн 11-мӗшӗнче 17 сехетре кӑтартӗ.
Чӑваш патшалӑх академи драма театрӗ пӗлтӗр чӑннипех те сумлӑ фестиваль пуҫарса ячӗ. Ӑна СССР халӑх артистне Вера Кузьминана халалланӑ. Аса илтерер: унӑн ячӗ — «Чӗкеҫ».
Асӑннӑ ятпа театрта хӑй вӑхӑтӗнче Борис Чиндыков пьеси тӑрӑх ҫавӑн ятлӑ моноспектакль лартнӑччӗ. Ӑна драматург ятарласа Вера Кузьмина валли тесе ҫырнӑ.
Кӑҫал, чӳк уйӑхӗнче, Наци театрӗсен халӑхсем хушшинчи «Чӗкеҫ» фестиваль иккӗмӗш хут иртӗ. Чӳк уйӑхӗн 12-мӗшӗнче сцена ҫине Калмӑк Республикинчи Б. Басангов ячӗллӗ наци драма театрӗ тухӗ.
Чӑваш академи драма театрӗн артисчӗсем Калмӑк Республикине кайма хатӗрленеҫҫӗ. Унта вӗсем курма мар, фестивале тухса кайӗҫ.
Б. Басангов ячӗллӗ Калмӑк наци драма театрӗнче «Манджиев ФЕСТ» регионсем хушшинчи фестиваль иртӗ. Вӑл юпа уйӑхӗн 2-мӗшӗнчен пуҫласа 7-мӗшӗччен пырӗ.
Чӑваш театрӗ сцена ҫине юпа уйӑхӗн 3-мӗшӗнче «Аманнӑ шӑпа» спектакльпе тухӗ.
Нумаях пулмасть Хусанта «Стиль жизни – Культурный код» (чӑв. Пурнӑҫ стилӗ — культура кочӗ) халӑх пултарулӑхӗн этно-Fashion фестивалӗ иртнӗ. Унта халӑх пултарулӑхӗн тата декораципе прикладной ӳнер ӑстисем пуҫтарӑннӑ.
Унта Раҫҫейӗн тӗрлӗ кӗтесӗнчи 30 ытла дизайнерсем пуҫтарӑннӑ. Ҫав шутра Тутарстанран, Мусквавран, Екатеринбургран, Липецкран, Красноярскран, Якутскран, Удмурт Республикинчен, Самараран тата Кировран. Унсӑр пуҫне Кӑркӑстанран, Турцинчен, Малайзирен, Китайран, Казахстанран, Узбекистанран.
Геннадий Волкова асӑнса регионсен шайӗнчи «Хавхалану» фестиваль-конкурс иртет. Вӑл Чӑваш Енӗн Вӗренӳ институчӗ пӗлтернӗ тӑрӑх, авӑн уйӑхӗн 16-мӗшӗнче пуҫланнӑ, вӑл юпа уйӑхӗн 31-мӗшӗнче вӗҫленӗ.
Ӑна И.Я. Яковлев ячӗллӗ Чӑваш патшалӑх педагогика университечӗпе, Чӑваш наци конгресӗпе, Шупашкар хулин мониторингпа вӗренӳ аталанӑвӗ центрӗпе тата Шупашкар хулин Г.Н. Волков Раҫҫей вӗренӳ академийӗн академикӗ ячӗллӗ уйрӑм предметсене тарӑннӑн вӗрентекен 62-мӗш пӗтӗмӗшле пӗлӳ паракан вӑтам шкулӗпе пӗрле йӗркеленӗ.
Фестиваль-конкурс тӗллевӗ – вӗренекенсене Раҫҫей вӗренӳ академийӗн сумлӑ академикӗн, публицист писателӗн, этнопедагогика никӗслевҫин Г.Н. Волковӑн пултарулӑх эткерне тӗпчесе сарасси, вӗренекенсемпе педагогсен пӗлӳпе ӑс-хакӑл пултарулӑхне вӑйлатасси, вӗсене пултарулӑхпа тӗпчев ӗҫне явӑҫтарасси, наци культурипе литературине тӗпе хурса вӗренекенсен этнокультура компетентлӑхне йӗркелесси, вӗренекенсемпе педагогсене хӑйсене аталантарма майсем туса парасси, ҫавӑн пекех халӑхсен хушшинчи хутшӑну культурине йӗркелесси.
Чӑвашсем тӗрӗк халӑхӗсен «Курултай» фестивальне хутшӑнаҫҫӗ. Вӑл Кипрта иртет.
Фестивале Чӑваш Енри, Тутарстанри, Самар облаҫӗнчи чӑвашсем хутшӑнаҫҫӗ. Чӑваш Республикин делегацийӗ йышӗнче — Чӑваш халӑх поэчӗ Раиса Сарпи, Ольга Осипова юрӑҫ, Элтияр Александров журналист, юрӑҫ тата блогер, Чӑваш патшалӑх юрӑпа ташӑ ансамблӗн артисчӗ Лев Плотников. Вӗсем Кипрта чӑваш халӑхӗн культурипе, юрри-ташшипе паллаштараҫҫӗ.
-8.7 °C