Шупашкарти арҫын машина туянма тӑрсан ултавҫӑсен тӗлне лекнӗ. Ҫапла вӑл 1,5 миллион тенкӗсӗр тӑрса юлнӑ.
Арҫын машина сутни пирки интернетра пӗлтерӳ тупнӑ та сутуҫипе ҫыхӑннӑ. Хайхискер унпа машинӑна мӗнле туянасси пирки калаҫнӑ. Кун хыҫҫӑн арҫын ӑна машинӑн ҫур хакне куҫарса панӑ та «тимӗр урхамаха» кӗтме пуҫланӑ. Анчах «сутуҫӑ» каллех укҫа ыйтма тытӑннӑ — машинӑна илсе килессипе ҫыхӑннӑ пӑтӑрмахсем сиксе тухнӑ иккен.
Арҫын машинӑна кӗтсе илеймен. Вӑл полицие кайнӑ.
Чӑваш Енри 51 ҫулти библиотекарь хӑйӗн директорӗпе калаҫнине ӗненсе ултавҫӑсене 700 пин ытла тенкӗ куҫарса панӑ.
Чӑннипе, банк унӑн счетне блокировка туман-тӑк тӑкакӗ тата нумайрах пулма пултарнӑ. Ӗҫ-пуҫ вара ҫапларах пулса иртнӗ. Ун патне мессенджерта ҫыру килнӗ. Хӗрарӑм ӑна директор ҫырни пирки иккӗленмен, мӗншӗн тесен аватарка ҫинче унӑн сӑн ӳкерчӗкӗ пулнӑ. «Директор» библиотекӑра тӗрӗслев пулассине пӗлтернӗ. Ултавҫӑ анлӑ схемӑпа усӑ курнӑ: такамсем унӑн счечӗ урлӑ Украинӑна укҫа куҫараҫҫӗ имӗш, ҫавӑнпа унӑн куншӑн явап тытма тивӗ.
Хӑраса ӳкнӗ хӗрарӑм ҫӗнӗ телефон, сим-картта туяннӑ. Банка кайса счечӗ ҫинчи 755 пин тенкине илсе ултавҫӑсем каланӑ счет ҫине куҫарнӑ. Вӗсем хушнипех тепӗр банка кайнӑ. Юрать-ха, унта унӑн счетне блокласа хунӑ. Кун хыҫҫӑн тин хӗрарӑм ултавҫӑсен аллине лекнине ӑнланнӑ.
Шупашкарти 20-ри хӗр пӗрле пурӑнакан хӗр тусӗн апачӗ ҫине ҫывӑратакан эмел янӑ та унӑн 5 пин ытла тенкине вӑрланӑ.
Шар курнӑ хӗрарӑм укҫа ҫухалсан полицие кайнӑ. Йӑлтах каласа кӑтартнӑ: 5 пин те 400 пин тенке вӑл хваттер илме пухнӑ, ӑна банкра упранӑ. Кӑшт маларах унран пӗрле пурӑнакан 20 ҫулти хӗр укҫа ыйтнӑ иккен. Ҫавӑнпа полици укҫана вӑл вӑрлама пултарать тесе шухӑшланӑ.
Чӑнах та, кайран ҫакӑ палӑрнӑ: 20-ри хӗр патне ултавҫӑсем шӑнкӑравланӑ, вӗсене ӗненсе вӑл хӑйӗн 700 пин тенкине куҫарса панӑ. Лешсем ӑна тусӗн укҫине те «деклараци» тумаллине ӗнентернӗ, укҫана курьера пама, Чулхулана кайса унта «ФСБ ӗҫченӗсенчен» хушу кӗтме хушнӑ. Хӗр тусӗ нимӗн те ан систӗр тесе вӑл унӑн апачӗ тата чейӗ ҫине ҫывӑратакан эмел янӑ. Лешӗ ҫывӑрнӑ чухне ултавҫӑсем хушнине пурнӑҫланӑ та.
20-ри хӗр тӗлӗшпе пуҫиле ӗҫ пуҫарнӑ.
Йӗпреҫ округӗнчи медсестра ултавҫӑсене 3 млн ытла тенкӗ куҫарса панӑ. Ун патне «пульницӑн тӗп тухтӑрӗ» шӑнкӑравланӑ, кӗҫех унпа ФСБ ӗҫченӗ ҫыхӑнассине пӗлтернӗ.
Кӑштахран чӑнах та «ятарлӑ службӑран» шӑнкӑрав килнӗ. Хайхискер каланӑ тӑрӑх, хӗрарӑм ячӗпе такам Украина ҫарӗсене куҫарса пама кредит илнӗ. Ку ӗҫе чарса лартма часрах пӗтӗм укҫана «шанчӑклӑ» счет ҫине куҫарма хушнӑ.
Пухнӑ укҫине счет ҫинчен илнӗ, машинине сутнӑ, тӑванӗсемпе ӗҫтешӗсенчен кивҫен ыйтнӑ. Пӗтӗмпе 3 млн ытла тенкӗ куҫарса панӑ. Хӗрарӑм ултавҫӑ хушнипе ҫӗнӗ телефон туяннӑ, мӗн ҫырӑннине хуратнӑ, укҫа куҫарма кӳршӗ хулана кайнӑ. Хӑйне улталанине вӑл виҫҫӗмӗш кунхине кӑна ӑнланнӑ.
Шупашкарта пурӑнакан 57 ҫулти хӗрарӑм эзотерикӑпа кӑсӑкланма тапранса кайнӑ. Кӑсӑкланни ҫеҫ ҫитмен-ха, темле курсра вӗренес тенӗ.
Мессенджерсенчен пӗринче малтан вӑл эзотерика каналне ҫырӑннӑ, кайран онлайн-курса вӗренме илесси пирки пӗлтерӳ асӑрханӑ. Курса ҫырӑнас тесе темле каҫӑпа иртнӗ, унта банк карттин реквизитне кӑтартнӑ. Хӗрарӑмӑн укҫине, пурӗ 60 пин тенкӗ, куҫарса кайнӑ. Анчах никам та ниме те вӗрентмен, мӗншӗн тесен хӗрарӑмпа ҫыхӑнӑва тухма пӑрахнӑ.
Куславккара пурӑнакан 60 ҫулти хӗрарӑм хваттерне сутнӑ укҫине ултавҫӑсене куҫарса панӑ. Ку кӑна мар-ха, вӑл ӑна палламан ҫынсене парас тесе Хусана ҫитнӗ.
Ун патне темиҫе кун «ФСБ ӗҫченӗсем» шӑнкӑравланӑ: Украина ҫарӗсене укҫа куҫарса панӑшӑн ун тӗлӗшпе пуҫиле пуҫарнӑ имӗш. Ӗнентерес тесе «уведомлени» те ярса панӑ. Чикӗ леш енне укҫа куҫарма хатӗрленнӗ банк ӗҫченне тупма пулӑшмасан хӗрарӑма тӗрмене хупассипе хӑратнӑ.
Палламан ҫынсем каланипе вӑл «следовательпе» калаҫма телефон туяннӑ та никама ним каламасӑр Хусана кайнӑ. Унта счечӗ ҫинчи 3,1 миллион тенке (нумаях пулмасть вӑл хваттерне сутнӑ) илнӗ те банкомат урлӑ палламан ҫынсем каланӑ счет ҫине куҫарнӑ.
Преступниксем каллех укҫа ыйтма тытӑнсан кӑна вӑл улталаннине ӑнланнӑ.
Ҫӗнӗ Шупашкарти стоматологи клиникин администраторӗ ултавҫӑсене 100 пин тенкӗ каҫарса панӑ. Вӑл мессенджерта пуҫлӑхӗпе ҫырӑнать тесе ӗненнӗ.
Ӗҫ чатне пуҫлӑхран ҫыру килнӗ, унӑн хӑвӑрт кӑна укҫа тӳлесе ямалли пур-мӗн. Номерӗ те, сӑнӳкерчӗкӗ те пуҫлӑхӑнни пекех пулнӑ. Кайран хайхи «пуҫлӑх» администратора хӑйне ҫырма пуҫланӑ. Вӑл ӑна ӗненсе хӑйӗн картти ҫинчен 100 пин тенкӗ куҫарса панӑ.
«Директор» каллех укҫа куҫарма ыйтсан тин вӑл иккӗленме тытӑннӑ. Ҫапла аккаунт суя пулни, ӑна ултавҫӑсем ҫырни ҫиеле тухнӑ.
Чӗмпӗр облаҫӗнчи Барыш тата Инза епархийӗ кӗлӗ тумалли тум туянма тӑнӑ та ултавҫӑсен тӗлне лекнӗ. Вӗсем палламан ҫынсене 7 миллион тенкӗ куҫарса панӑ.
Ултавҫӑсем мессенджерта Чӗмпӗр тата Новоспасск митрополийӗн суя аккаунтне тунӑ. Ҫавӑн урлӑ вӗсем епархие тум туянмалли пирки пӗлтернӗ. Кун хыҫҫӑн епархи палламан счет ҫине 7 миллиона яхӑн тенкӗ куҫарса панӑ.
Ку тӗслӗх тӗлӗшпе пуҫиле ӗҫ пуҫарнӑ.
Канашра пурӑнакан 29 ҫулти хӗрарӑм пӗлӗшӗн 500 пин тенкине вӑрланӑ та ултавҫӑсене куҫарса панӑ. Вӑл инвестицисемпе укҫа ӗҫлесе илес тенӗ-мӗн. Анчах тупӑш тӑвайман — парӑма кӗрсе кайнӑ, ун тӗлӗшпе пуҫиле ӗҫ те пуҫарнӑ.
Хӗрарӑм унчченех «инвест-проекта» 2 млн тенкӗ ытла хывнӑ иккен. Хайхи «менеджер» ӑна юлашки хутчен укҫа хывса пысӑк тупӑш илме сӗннӗ. Ҫапла вӑл хӗрарӑм пӗлӗшӗн телефонне илнӗ те унӑн кредит картти ҫинчен палламан ҫынна 500 пин тенкӗ ытла куҫарса панӑ.
Халӗ 29-ти хӗрарӑмӑн ют ҫын укҫине вӑрланӑшӑн явап тытма тивӗ.
Шупашкарта пурӑнакан 50 ҫулти арҫын укҫа-тенке инвестици хывса тупӑш тума ӗмӗтленнӗ. Анчах шухӑшланӑ пек пулса тухман – вӑл 5,8 миллион тенкӗ ҫухатнӑ. Хайхискер ултавҫӑсен серепине ҫакланнӑ.
Вӑл ку рекламӑна тӗнче тетелӗнче курнӑ. Унта тӳрех заявка хӑварнӑ. Кӗҫех унпа инвестици компанийӗн «менеджерӗ» ҫыхӑннӑ та телефона сарӑм вырнаҫтарма каланӑ. Ҫапла арҫын счет ҫине укҫа куҫарса тӑнӑ. Хӑйӗн пулман, вӑл банксенчен кредит илнӗ.
Арҫын хӑйне улталанине пӗр уйӑхран ӑнланнӑ. Счет ҫине хывнӑ укҫана каялла тавӑраймасан тин ҫак шухӑш патне пырса ҫитнӗ вӑл.
+15.0 °C