Шупашкарти «Ҫӗнӗ хула» микрорайонта пӗр арҫын пӗр яша тытса тӑрса хӑйӗн ывӑлне ҫапма хушнӑ, хӑй вӑл ҫав вӑхӑтра яша тытса тӑнӑ.
Ку пӑтӑрмах пирки тӗнче тетелӗнчи тӗрлӗ ҫӑлкуҫра хыпар сарӑлнӑ хыҫҫӑн РФ Следстви комитечӗн Чӑваш Енри управленийӗн ӗҫченӗсем тӗрӗслев пуҫарнӑ.
Скейт-паркра ярӑнакан яшсем пӗчӗк ачана пӑрӑнма ыйтнӑ-мӗн. Ҫакӑ ачан ашшӗне килӗшмен. Яшсенчен пӗрне вӑл ярса илнӗ те хӑйӗн пӗчӗк ывӑлне яша ҫапма хушнӑ.
Чӑваш Енӗн Ипотека корпорацийӗн гендиректорӗ Алексей Антонов тӗлӗшпе пуҫиле тата тепӗр ӗҫ пуҫарнӑ. Вӑл ӗҫ вырӑнӗпе хӑйшӗн усӑ курнӑ тесе шухӑшлаҫҫӗ.
Тӗпчевҫӗсем шухӑшланӑ тӑрӑх, 2022 ҫулхи авӑн уйӑхӗнче Чӑваш Енӗн Ипотека корпорацийӗ застройщик-организаципе Вӑрмарта нумай хваттерлӗ ҫурт хӑпартма килӗшӳ тунӑ. Хваттерсенчен хӑшӗсем социаллӑ тӗллевлӗ пулнӑ: ҫынсене ишӗлекен ҫуртран куҫарма тата тӑлӑх ачасем валли.
Чӑваш Енӗн Минстройӗ тӗрӗслев ирттернӗ чухне тӗрлӗ кӑлтӑк тупса палӑртнӑ, апла пулин те Антонов строительство ӗҫне ҫитменлӗхе пӗтермесӗрех тӑсма хушнӑ-мӗн.
Ӳлӗмрен ҫав ҫурта хута ярайман. Пурӑнма май килмен ҫурта сӳтме тивнӗ. Ҫавна пула Антонов 40 миллион тенке яхӑн тӑкак кӳнӗ тесе шухӑшлаҫҫӗ. Ҫурт хӑпартнӑ чух укҫа хывнӑ ҫынсем тата тӑлӑхсем хваттерлӗ пулайман.
Гендиректор тӗлӗшпе пакунлисем унччен те пуҫиле ӗҫ пуҫарнӑ.
Ҫӗрпӳ хулинче стройкӑра рабочи башня кранӗ ҫинчен ӳксе вилнӗ. Халӗ ку ӗҫе РФ Следстви комитечӗн Чӑваш Енри специалисчӗсем тӗрӗслеҫҫӗ. Вӗсем тӗпчеве РФ Пуҫиле кодексӗн 143-мӗш статйин 2-мӗш пайӗпе пуҫарнӑ.
Пӑтӑрмах ҫӗртме уйӑхӗн 17-мӗшӗнче Ҫӗрпӳри строительство организацийӗн территорийӗнче пулса иртнӗ. 57 ҫулти арҫын техникӑна ӗҫе хатӗрлессипе тӑрӑшнӑ чухне ҫӳлтен персе анса кранӑн тимӗр лаптӑкӗ ҫине ӳкнӗ. Вӑл вырӑнтах висле кайнӑ.
Юрий Сементер чӑваш халӑх поэчӗ ҫырнисен черетлӗ: улттӑмӗшпе ҫиччӗмӗш томӗсене — кӑларма хатӗрленет.
Чӑваш чӗлхин тӗпчевҫи Леонид Петров халӑх тетелӗнче пӗлтернӗ тӑрӑх, нумаях пулмасть вӑл Юрий Сементер патӗнче ӗҫпе пулнӑ.
«Поэтӑн ӑс-хакӑлӗ – янкӑр, ҫав хушӑрах чуна ҫунатлантаракан темле ачаш хӗлхемӗ – чӑппи таранах тулли.
Вӑл пӗр чарӑнми, пӗр кун сиктерми халӗ те ҫаплах сӑвӑ тӗнчинче ҫине тӑрса ӗҫлени питӗ тӗлӗнтерчӗ. Теме те курать, темле илеме те шыраса тупма пӗлет унӑн туйӑмлӑ варкӑш ҫилӗ. Вӑйне шеллемесӗр ӗмӗрсен тӗтрийӗ витӗр таҫта та ҫитет, унталла-кунталла пӗрмай кумать…», — ытарлӑн ҫырса кӑтартнӑ Леонид Петров.
«Тӗлӗнмелле те, унӑн чунӗ, чӗрийӗ, кӑмӑлӗ унчченхинчен те вӗрирех пулӗ. Пӗртте лӑпланса ларма пӗлмест, ыранхи пиркиех шухӑшлать. Ҫырнисен пуххин пит калӑплӑ улттӑмӗш, ҫиччӗмӗш томӗсене (пиллӗкӗшӗ пичетленнӗ!) кӑларас пирки вӑй-халне шеллемесӗр малалла ӗҫлет», — пӗтӗмлетнӗ чӑваш чӗлхи тӗпчевҫи.
Ҫак эрнере Шупашкарти 4-мӗш лицей умӗнче пӗр арҫын ача ҫумне ҫулӑхнине эпир пӗлтернӗччӗ-ха. Ӗнер РФ Следстви комитечӗн Чӑваш Енри управленийӗнче пӗлтернӗ тӑрӑх, халӗ ҫав арҫынна тытса чарнӑ. Вӑл 36 ҫулта, Шупашкартан. Управлени сайтӗнче унтан ытла нимӗн те пӗлтермен.
«Ҫыхӑнура» форумра вара Шупашкарӑн кӑнтӑр-хӗвеланӑҫ районӗнче пӗр арҫын хӗрарӑмсем ҫумне унччен те ҫулӑхнине, вӗсене хӗненине пӗлтернӗ. Арҫын амӑшӗпе пурӑнать, ӑна амӑшӗ хӳтӗлет тесе хыпарланӑ. Арҫын пирки йӗрке хуралҫисене пӗлтернин усси пулман имӗш.
Красноармейскинчи ишӗлекен общежитисенче пурӑнакансем ҫӑхавпа Мускава ҫитнӗ. Вӗсене инҫет ҫыхӑну мелӗпе РФ Следстви комитечӗн ертӳҫи Александр Бастрыкин йышӑннӑ.
Видео-конференц-ҫыхӑну мелӗпе ирттернӗ йышӑну вӑхӑтӗнче Красноармейскинчи хастар хӗрарӑмсем хӑйсем пурӑнакан общежитисене никам та тытса тӑмасть, ҫуртсем вара ишӗлсе пыраҫҫӗ тесе евитленӗ.
Александр Бастыркин РФ Следстви комитечӗн Чӑваш Енри управленийӗн ертӳҫине Александр Политинина лару-тӑрӑва тӗрӗслеме хушнӑ. Тӗп аппарат вара ку ыйтӑва куҫран вӗҫертмессине шантарнӑ.
Полимер каяшӗсене тирпейлессипе ӗҫлекен Шупашкарти пӗр усламҫӑ шалу вӑхӑтра тӳлемен тесе шухӑшлаҫҫӗ. Ун тӗлӗшпе РФ Пуҫиле кодексӗн 145.1 статйин 2-мӗш пайӗпе ӗҫ пуҫарнӑ.
Тӗпчевҫӗсем шухӑшланӑ тӑрӑх, асӑннӑ организацире пӗр рабочие 47 пин тенкӗ шалу тӳлесе ҫитермен.
Шалу тӳлемен тӗслӗх пирки РФ Следстви комитечӗн Чӑваш Енри управленине темиҫе мелпе пӗлтерме пулать. Пӗрремӗшӗнчен, chuvashia.sledcom.ru сайтри интернет-приёмнӑй урлӑ; иккӗмӗшӗнчен, (8352) 624-658 шанчӑк телефонӗпе; виҫҫӗмӗшӗнчен, Следстви управленийӗн ертӳҫи патне ну (8352) 624-661 телефон номерӗпе йышӑнӑва ҫырӑнса.
Хӗрлӗ Чутайӗнче вӑрҫӑ ветеранне вӗлернине тӗпченине РФ Следстви комитечӗн председателӗ Александр Бастрыкин хӑй тӗрӗслесе тӑрӗ.
Пӑтӑрмах Хӗрлӗ Чутайӗнче ҫурла уйӑхӗн 10-мӗшӗнче пулса иртнӗ. 92 ҫулти хӗрарӑм (вӑл — вӑрҫӑ ветеранӗ тата тыл ӗҫченӗ) 70 ҫулти тӑванӗпе пурӑннӑ. Инкек пулса иртнӗ кун арҫын ӳсӗр пулнӑ. Ватӑ хӗрарӑма вӑл тапса ҫапса пӗтернӗ. Кинемей инкек вырӑнӗнчех вилсе кайнӑ.
Ӑна хӗнесе вӗлернӗ ырҫынна тытса чарнӑ, ун тӗлӗшпе пуҫиле ӗҫ пуҫарнӑ.
«Чӑваш Ен» издательствӑпа полиграфи комплексӗнче тӗлӗнмелле кӑларӑм пичетленсе тухнӑ. Вӑл — «Урӑх ӑру / Другое поколение / A different generation» ятлӑ кӗнеке. Кӗнеке авторӗ — чӑваш палиндромийӗн пионерӗ Марина Карягина.
«Марина Карягина хӑйӗн поэтла сисӗмӗпе тата ирӗклӗ кӑмӑлӗпе чӑвашпа вырӑс сӑмахне чи тарӑн, атомла шайӗнче пӑхӑнтарать. Вӑл вырӑсла вӑхӑтран малта пыракан палиндроми шедеврӗсем хайлать, чӑвашла вара палиндроми поэзийӗн вӗр ҫӗнӗ тӗнчине уҫать. Вӑл ҫырма пуҫличчен чӑваш литературинче палиндромин илемлӗ тӗслӗхӗсем пулман», — хакланӑ чӑваш поэчӗн пултарулӑхне вырӑс тата ют ҫӗршыв авангарчӗн тӗпчевҫи, филологи ӑслӑлӑхӗсен кандидачӗ, культурологи докторӗ, Германири Галле университечӗн преподавателӗ Сергей Бирюков.
Кӗнекере сӑвӑсене виҫӗ чӗлхепе: чӑвашла, вырӑсла тата акӑлчанла — пичетленӗ.
Республикӑра йӗркелӗхе тытса тӑрас енӗпе йӗркеленӗ координаци канашӗн ларӑвӗнче РФ Следстви комитечӗн Чӑваш Енри управленийӗн ертӳҫи Александр Полтинин шкулсенчи лару-тӑрупа ҫыхӑннӑ хӑш-пӗр самант пирки асӑнса хӑварнӑ. Хуралҫӑра ватӑ ҫынсем ларнинчен тытӑнса ачасенчен ачасем укҫа тапӑнни таранах сӑмах хускатнӑ вӑл.
Республикӑри вӗренӳ учрежденийӗсенче тантӑшӗсенчен тӑрӑхланӑ тӗслӗхсем пур иккен. Ӑна «буллинг» теҫҫӗ. Ун пирки йӗрке хуралҫисене шанчӑк телефонӗсем ҫине шӑнкӑравласа систереҫҫӗ. Анчах ҫав фактсемпе психологсем ҫеҫ ӗҫлеҫҫӗ иккен.
Йӗрке хуралҫи палӑртса хӑварнӑ тӑрӑх, ҫамрӑксен субкультурисем, сӑмахран, АУЕ, хӑрушлӑх кӑларса тӑратаҫҫӗ. Асӑннӑ юхӑмӑн ӗҫне экстремистла тесе йышӑннӑ.
«Укҫана «зонӑна» хӗртме тесе пухаҫҫӗ. Яш-кӗрӗмпе хӗр-упраҫ криминаллӑ пурнӑҫ енне сулӑнни преступлени шучӗ ӳсесси патне илсе пырать», – тенӗ Александр Полтинин.
Ведомство ертӳҫи ҫамрӑксем хушшинче воспитани ӗҫӗпе ҫине тӑрса ӗҫлемеллине палӑртса хӑварнӑ.
+13.3 °C