Чӑваш Ен боксерӗ ӑмӑртуран куҫ айӗнчи кӑвакпа таврӑннӑ, анчах – медальпе.
Федор Сидоров Тольятти хулинче иртнӗ «Спартак» спортобществӑн Пӗтӗм Раҫҫейри ӑмӑртӑвне хутшӑннӑ. Вӑл 57 килограмм тайман 19-22 ҫулсенчи спортсменсемпе кӗрешсе пӑхӑр медаль ҫӗнсе илнӗ.
Саламлатпӑр ентешӗмӗре!
Чӑваш Ен спортсменки, Лана Прусакова фристайлҫӑ, Швейцарире иртекен ӑмӑртӑва хутшӑнать.
Лана унта Тӗнче кубокне ҫӗнсе илессишӗн тупӑшать.
Ӑмӑрту ҫак кунсенче Лакс хулинче иртет. Унта лайӑх кӑтартусем ҫӗнсе илнӗ спортсменсен кӑҫал хӗллехи Олимп вӑййисене хутшӑнма май килӗ. Вӑл вара нарӑсӑн 6-22-мӗшӗсенче Италири Милан тата
Кортина-д’Ампеццо хулисенче иртӗ.
Спорт ӑмӑртӑвӗсене пӑхма юратакансене паянхи кун чӑннипех те савӑнтарчӗ. Италире иртнӗ Тур де Ски ӑмӑртӑвӗнче Раҫҫейри икӗ спортсмен ӑнӑҫлӑ ӑмӑртрӗҫ. Вӗсем – Дарья Непряева тата Савелий Коростелев йӗлтӗрҫӗсем.
Ту тӑррине хӑпармалла ӑмӑртнӑ чухне Савелий тӑваттӑмӗш вырӑн йышӑнчӗ, Даша – улттӑмӗш.
Ҫапла вара Тур де Скин пӗтӗмӗшле зачётӗнче Савелий Коростелев саккӑрмӗш вырӑн йышӑнчӗ, Дарья Непряева – вуннӑмӗш.
Куславкка округӗнчи спортсменсем Алеквтина Судеркина тата Лев Петров ҫемье ҫавӑрнӑ. Вӗсем пӗрлешмешкӗн илемлӗ кун суйланӑ: 25.12.2025.
Алевтина Судеркина — ҫӑмӑл атлетика енӗпе СССР спорт мастерӗ, Раҫҫейри тата Беларуҫри чылай ӑмӑртура мала тухнӑ. Лев Петров — пауэрлифтинг енӗпе спорт мастерӗ, триатлон енӗпе иртнӗ ӑмӑртусенче нумай хутчен чемпион пулнӑ.
Вӑрнар тӑрӑхӗнчи Ярмушка ялӗнче ҫуралса ӳснӗ спортсменка Надежда Лаврентьева Тунисра ветерансен хушшинче иртнӗ ӑмӑртура икӗ медаль ҫӗнсе илнӗ. Вӑл 20 тата 10 ҫухрӑм чупса икӗ «ылтӑн» ҫӗнсе илнӗ. Ӑмӑрту хӗрӳ иртнӗ – унта 25 ҫӗршыври спортсменсем хутшӑннӑ.
Палӑртса хӑварар: 61 ҫулти Надежда Алексеевна – ЧР культурӑн тава тивӗҫлӗ ӗҫченӗ тата ҫӑмӑл атлетика енӗпе спорт мастерӗн кандидачӗ.
Шупашкарти апатлану технологийӗпе коммерци техникумӗн студенчӗ Виталий Марков ҫар искусстви енӗпе иртнӗ тӗнче чемпионатӗнче ылтӑн медаль ҫӗнсе илнӗ. Ӑмӑрту Рим хулинче пулнӑ. Пирӗн ентеш «Solovyov Team» команда чысне хӳтӗленӗ.
Виталий 90 килограмран ытларах таякан спортсменсемпе вӑй виҫнӗ. Вӑл «Учкур» казак ҫапӑҫӑвӗнче 1-мӗш вырӑн йышӑннӑ, «Бокс-лайт» дисциплинӑра вара виҫҫӗмӗш пулнӑ.
Лапсарти А.И. Тихонов олимп чемпионӗн ячӗллӗ спорт шкулӗнче Валерий Львов боксёра асра тытса асӑну хӑми уҫнӑ. Ӑна чӳк уйӑхӗн 14-мӗшӗнче вырнаҫтарнӑ.
Валерий Константинович асӑннӑ шкулта 2013 ҫултанпа ӗҫленӗ – спортпа массӑллӑ ӗҫ енӗпе директорӑн ҫумӗ пулнӑ, каярах инструктор-методист пулса тӑрӑшнӑ.
Асӑну хӑмине уҫма спортсменсем, тренерсем, спорт ветеранӗсем пырса ҫитнӗ.
Валерий Львов 1953 ҫулта Шупашкарта ҫуралнӑ. 1978 ҫулта Белградра тӗнче чемпионӗн ятне тивӗҫнӗ. Чӑваш Енӗн тата Мари Элӑн тава тивӗҫлӗ тренерӗ.
Елчӗк округӗнчи спортсмен Раҫҫей шайӗнчи ӑмӑртура палӑрнӑ — вӑл чемпион пулса тӑнӑ. Илья Ишмуратов йывӑр атлетика енӗпе ветерансен хушшинче Орел облаҫӗнче иртнӗ Раҫҫей чемпионатне хутшӑннӑ. Пирӗн ентеш чи вӑйли пулнӑ — пӗрремӗш вырӑн йышӑннӑ.
Ӑмӑрту хӗрӳ иртнӗ. Помост ҫине Раҫҫейри тата Беларуҫри 140 ытла спортсмен тухнӑ. Пирӗн ентеш икӗ енлӗ тупӑшура пӗрремеш вырӑна тухнӑ.
Ҫакна та палӑртмалла: Илья Ишмуратов унччен йывӑр атлетика енӗпе Раҫҫей спорт мастерӗн ятне те илнӗ.
Чӑваш Ен спортсменки Анна Борисова Словакире иртнӗ Европа чемпионатӗнче икӗ медаль ҫӗнсе илнӗ.
Пирӗн ентеш мас-рестлинг енӗпе иртнӗ ӑмӑртура 75 килограмм тайман спортсменсемпе вӑй виҫнӗ, «кӗмӗле» тивӗҫнӗ. Унтан вӑл тӗрлӗ виҫе категорийӗнчи спортсменсемпе тупӑшса пӑхӑр медаль ҫӗнсе илнӗ.
Палӑртмалла: Анна И.Н. Ульянов ячӗллӗ Чӑваш патшалӑх университечӗн медицина факультетӗнче вӗренет.
Чӑваш Енри тренер Александр Тимофеев Пӗтӗм Раҫҫейри конкурсра мала тухнӑ. Саламлатпӑр!
Вӑл «Быть, а не казаться» конкурсра ҫӗнтернӗ. Ӑна наставниксем валли Раҫҫей Президенчӗн пуҫарӑвӗпе йӗркеленӗ. Унта 70 пин ҫын хутшӑннӑ, вӗсенчен 100-шӗ ҫӗнтерӳҫе пулнӑ. Ҫав шутра — Александр Тимофеев та.
Вӑл — самбо енӗпе 1-мӗш спорт шкулӗн тренерӗ. Александр «Наставник-лидер» номинацире палӑрнӑ. Вӑл ытти ҫӗнтерӳҫӗпе пӗрле Раҫҫей тӑрӑх ҫул ҫӳревре пулӗ. Унсӑр пуҫне вӑл Роспатриотцентрта пӗлӗвне анлӑлатӗ.
+4.3 °C