Ӗнер Елчӗк районӗнче пулнӑ аварире нумай ҫын шар курнӑ. Шел те, вӗсенчен пӗри вырӑнтах вилнӗ.
Ку авари "Елчӗк - Курнавӑш" ҫул ҫинче 16 сехетре пулнӑ. ШӖМ пӗлтернӗ тӑрӑх, "Лада Гранта" умӗнче пыракан "Лада Калина" ҫине пырса тӑрӑннӑ. "Калинӑри" 61 ҫулти пассажирка ҫавӑнтах вилнӗ. 7 ҫынна больницӑна илсе кайнӑ.
Ҫакӑ паллӑ: "Лада Грантӑри" водитель ӳсӗр пулнӑ.
Ӗнер, ҫу уйӑхӗн 24-мӗшӗнче, ирхи 2 сехетре Шупашкарта ҫамрӑк водитель инкеке лекнӗ.
Пӑтӑрмах Граждан урамӗнчи 66-мӗш ҫурта хирӗҫ вырӑнта пулса иртнӗ. «Лада Гранта» автомашинӑн 19 ҫулти водителӗ руле тытса чарайманнипе ҫултан пӑрӑнса кайса бетон блок ҫине пырса кӗнӗ.
Инкекре икӗ хӗрпе пӗр каччӑ аманнӑ. Вӗсем — 17-19 ҫулсенчискерсем. Аманнӑскерсене больницӑна ӑсатнӑ, пикесенчен пӗрне пирвайхи пулӑшу кӳнӗ хыҫҫӑн килне янӑ, иккӗшне больницӑна вырттарнӑ.
Каччӑ водитель правине илнӗренпе виҫӗ эрне те ҫитмен иккен. Хӑй вӑл ӳсӗр пулман. Машина чӳречине ҫутӑ кӗме чаракан кантӑк вырнаҫтарнӑ.
Ӗнер, ҫу уйӑхӗн 23-мӗшӗнче, 7 сехет те 33 минутра Пӑрачкав ялӗнче «КамАЗ» Комсомольски урамӗнчи 72-мӗш ҫурт ҫывӑхӗнчи газ пӑрӑхне лектерсе йӑтса антарнӑ. Ҫывӑхри ҫурта газ лекнӗ, электричество замыканийӗ пулса пушар тухнӑ.
Пушарнӑйсем ҫулӑма 1 сехетре сӳнтернӗ. Ҫурт вӑйлах сиенленнӗ. Юрать-ха, хӑть кӳршӗри пӳрте ҫунса кайма паман: пушарнӑйсем тӑрӑшнипе ҫулӑм ун ҫине куҫман.
Ӗнер, ҫу уйӑхӗн 22-мӗшӗнче, ирхи 8 сехетре Вӑрнар районӗнчи Вӑрманкас ялӗнче пушар пулнӑ. Шел те, вӑл ҫыннӑн пурнӑҫне татнӑ.
Пушар Учитель урамӗнчи пӗр ҫуртра тухнӑ. Инкеклӗ лару-тӑру министерстви малтанлӑха пӗлтернӗ тӑрӑх, ҫулӑм пирус асӑрханмасӑр туртнӑран вӑй илнӗ.
Пушара сӳнтерсен 59 ҫулти арҫын виллине тупнӑ. Вӑл кил хуҫи пулнӑ. Халӗ ӗҫ-пуҫа уҫӑмлатаҫҫӗ.
Шупашкарти шкулсенчен пӗринче ӗҫлекен хӗрарӑм-учитель ачана хырӑмӗнчен тапнӑ.
«Ҫыхӑнура» форумра пӗлтернӗ тӑрӑх, пӑтӑрмах паян хулари 35-мӗш вӑтам шкулта пулса иртнӗ. Форума вырнаҫтарнӑ видео тӑрӑх хакласан, учитель: «Надоели, достали», — тенӗ пек илтӗнет.
Учитель хӑйӗн ҫӳллӗш пикене хырӑмӗнчен чӗркуҫҫипе лектерет.
Асӑннӑ пӑтӑрмах тӗлӗшпе прокуратура тӗрӗслев пуҫарнӑ иккен.
Видеона ҫынсем тӗрлӗрен хаклаҫҫӗ. Виҫӗ ҫеккунта тӑсӑлаканскер тӑрӑх унти пӑтӑрмаха хаклама йывӑр. Асӑннӑ хыпара вуланисенчен учителе тӳрре кӑларакансем ҫук та, анчах хальхи вӑхӑтри ачасем усалтарах тесе шухӑшлакансем те самайӑн.
Шупашкарти Введени кафедра соборӗнчен алка-эреше вӑрлани пирки ҫу уйӑхӗн 7-мӗшӗнче пӗлтернӗ. Такам чиркӗве кӗрсе Хусан Турӑ Амӑшӗн турӑшне уҫнӑ та унта упраннӑ алка-эреше йӑкӑртнӑ. Вӗсене вара чиркӗве ҫӳрекенсем илсе килнӗ пулнӑ.
Йӗрке хуралҫисем ҫак ӗҫе кам тума пултарнине палӑртнӑ. Вӑл - Ҫӗрпӳ районӗнчи 23 ҫулти арҫын. Вӑл унччен те ҫакнашкал ӗҫшӗн судпа айӑпланнӑ. Алка-эреше вӑл ломбарда панӑ. Вӗсене унтан илсе каялла чиркӗве тавӑрса панӑ.
Арҫын тӗлӗшпе пуҫиле ӗҫ пуҫарнӑ.
Ҫу уйӑхӗн 18-мӗшӗнче Шупашкарта автобусран хӗрарӑм тухса ӳкнӗ. Ку пӑтӑрмах «Университет» чарӑнура пулса иртнӗ.
Иртсе пыракан машинӑн видеорегистраторӗ ҫакна шӑпах ӳкерсе илнӗ. Ӑна пӑхсан ҫакӑ курӑнать: автобус чарӑнуран тапранса каять те хӗрарӑм хыҫалти алӑкран ҫул ҫине тухса ӳкет. Водитель алӑка хупмасӑрах кайма пуҫланӑ.
Сӑмах май, нумаях пулмасть Шупашкарта 37-мӗш маршрутпа ҫӳрекен автобус ҫуннӑ.
Куславкка районӗнче "Киа Рио" водителӗ сарӑмсӑр вилнӗ. Авари "Атӑл" М-7 федераци автоҫулӗ ҫинче пулнӑ.
Иномарка водителӗ ҫул хӗрринче ларакан "Ивеко" фура ҫине пырса кӗнӗ. Машинӑн ҫур пайӗ ҫурмаприцеп айне кӗрсе кайнӑ. ҪҪХПИ пӗлтернӗ тӑрӑх, водитель вырӑнтах вилнӗ.
Халӗ йӗрке хуралҫисем ӗҫ-пуҫа уҫӑмлатаҫҫӗ.
Ӗнер, ҫу уйӑхӗн 17-мӗшӗнче, Шупашкарта каллех автобус ҫуннӑ. Хальхинче 37-мӗш маршрутпа ҫӳрекен транспорт «Оперӑпа балет театрӗ» чарӑнура ҫунма тытӑннӑ. Ку 19 сехет ҫурӑра пулнӑ.
Ҫакна ҫынсем сӑн ӳкерсе «Про Город» хаҫата ярса панӑ. Автобус ҫунма пуҫласанах пассажирсем салонран тухнӑ.
Водитель мотор патӗнчен ҫунма пуҫланӑ вырӑна огнетушительпе сӳнтернӗ. Ӑна тепӗр арҫын пулӑшнӑ.
Ӗне 18 сехетре ҫӑлавҫӑсем Ҫӗнӗ Шупашкарти Женя Крутова урамӗнчи 12-мӗш ҫуртра пушар сӳнтернӗ. Унта иккӗмӗш хутри пӗр пӳлӗмлӗ хваттер ҫуннӑ.
Малтанлӑха пӗлтернӗ тӑрӑх, ҫулӑм пирус асӑрханмасӑр туртнӑран тухнӑ. Ҫӑлавҫӑсем алӑка ҫӗмӗрсе кӗнӗ. Шалта 58 ҫулти кил хуҫин виллине тупнӑ. Пушара хӑвӑртах, 3 минутран, сӳнтернӗ.
Халӗ ӗҫ-пуҫа уҫӑмлатаҫҫӗ. Сӑмах май, ҫулталӑк пуҫланнӑранпа Чӑваш Енре 81 пушар тухнӑ, вӗсенче 8 ҫын вилнӗ.
+5.3 °C