Шупашкарта пурӑнакан 26 ҫулти арҫын налук декларацийӗ тӗрӗс мар тесе укҫасӑр тӑрса юлнӑ. Пӑтӑрмах налук инспекцийӗнчен тесе пӗр хӗр шӑнкӑравланинчен пуҫланнӑ. Хайхи каччӑна декларацие тӗрӗс мар ҫырнӑ, ӑна тӳрлетме налук инспекцине пымалла, ун валли вара электрон черете тӑмалла, черете тӑма смс-кода пӗлтермелле тесе ӗнентернӗ.
Ун хыҫҫӑн каччӑ патне патшалӑх пулӑшӑвӗн порталӗнчен, Центробанкран текенсем шӑнкӑравлама тапранса кайнӑ. Вӗсем ӑна ун ячӗсем ултавҫӑсем кредит илме заявка панӑ тесе хӑратнӑ, укҫана хӑрушсӑр счет ҫине куҫарма ӳкӗте кӗртнӗ.
Ҫамрӑк арҫын хӑй пухса пынӑ 800 пин тенке тата кредитла илнӗ 1 миллион тенке ют ҫынсене куҫарса панӑ.
Шупашкарта пурӑнакан 71 ҫулти арҫын ӗмӗрӗпе укҫа пухса пурӑннӑ. Унӑн кӗмӗлӗ ҫапла вара 2,5 миллион тенкӗ таран пуҫтарӑннӑ. Анчах нумаях пулмасть вӑл ҫав укҫана пач пӗлмен ҫынсене куҫарнӑ та панӑ.
71 ҫулти арҫынна мессенджерсенчен пӗринче вӑл ют ҫӗршыва укҫа куҫарса панӑ, ҫавӑншӑн ун тӗлӗшпе пуҫиле ӗҫ пуҫарнӑ тесе хӑратнӑ.
Улталаканнисем видеоҫыхӑнупа калаҫнӑ май хӑйсемпе Федерацин хӑрушсӑрлӑх службин тата Росфинмониторингӑн ӗҫченӗсем тесе суя удостоверенийӗсем кӑтартнӑ.
Пӗлмен-туман ҫынсене итлесе арҫын хӑй пухса пына 2,5 миллион тенке ют счетсем ҫине куҫарса янӑ.
Тутарстанри ҫамрӑк амӑшӗ Чӑваш Енре 5 пин тенкӗлӗх суя 11 укҫа вырнаҫтарнӑ.
Ҫу-ҫӗртме уйӑхӗсенче республикӑри банксене суя укҫа пулни пирки хыпарсем ҫитнӗ. Пурте – 5 пин тенкӗллӗххисем, серийӗ те пӗрешкел.
Оперативлӑ шырав мероприятийӗсем ирттернӗ хыҫҫӑн Тутарстанра пурӑнакан 21 ҫулти хӗрарӑма тытса чарнӑ. Хӑй вӑл – Киров облаҫӗнчен.
Вӑл 4 уйӑхри ачине пулницӑра хӑварса пирӗн республикӑна килнӗ, суя укҫасене вырнаҫтарнӑ. Полицейскисене ҫапла каласа кӑтартнӑ: тавара ытларах пӗчӗк лавккасенче туяннӑ. Пысӑк мар япаласем суйланӑ: кушака ҫитермелли апат, пирус, канфет, апат-ҫимӗҫ…
Анчах хӑш-пӗр лавккара кассирсем укҫа суя пулнине палӑртнӑ.
+19.3 °C