Инкеклӗ лару-тӑру министерствин Чӑваш Енри тӗп управленийӗ пӗлтернӗ тарӑх, республикӑра тепӗр ҫын путса вилнӗ. Арҫын 65 ҫулта пулнӑ.
Вӑл утӑ уйӑхӗн 7-мӗшӗнче килтен тухса кайнӑ та таврӑнман. Тепӗр кунхине, паян, ирхине 6 сехетре Йӗпреҫ районӗнчи Савкка ялӗ ҫывӑхӗнчи пӗвере унӑн виллине тупнӑ.
Палӑртмалла: Чӑваш Енре ҫулталӑк пуҫланнӑранпа 21 ҫын путса вилнӗ. Вӗсенчен иккӗшӗ – ачасем.
Паян Шупашкарти Мускав прспектӗнче автобус хыпса илнӗ. Асӑннӑ транспорт пассажирсене 26-мӗш маршрутпа турттарнӑ.
Инкек вӑхӑтӗнче салонта пулнӑ 30 ҫынна эвакуациленӗ. Вӗсенчен нихӑшӗ те шар курман.
Чӑваш Енӗн тӗп хулинчи пӑтӑрмах 17 сехет те 20 минутра «Оперӑпа балет театрӗ» чарӑнура пулса иртнӗ.
Инкек пирки РФ Следстви комитечӗн республикӑри управленийӗ пӗлтернӗ. Инкеклӗ ӗҫсен министерствин пушар хуралӗн ӗҫченӗсем ҫулӑма сӳнтернӗ-ха, анчах автрбусран ним те юлман темелле. Общесство транспорчӗн кӑшкарӗ ҫеҫ тӑрса юлнӑ.
РФ Следстви комитечӗн ӗҫченӗсем следстви умӗнхи тӗпчев пуҫарнӑ. Ахӑртнех, тӗрлӗ экспертиза ирттерӗҫ. Инкек вырӑнне Шупашкарти Мускав районӗн прокурорӗ Николай Осипов та пырса ҫитнӗ. Пӑтӑрмах сӑлтавне асӑннӑ надзор органӗ те тӗпчӗ.
Шупашкар хулинче пурӑнакан ҫамрӑк арҫын Геленджикра канас тенӗ. Краснодар крайӗнчи хулана тухса кайиччен вӑл уйрӑм ҫын ҫуртне броньленӗ. Ҫав ҫурт Хура тинӗс хӗрринче пулнӑ. Ҫуртшӑн каччӑ хакӑн пӗр пайне — 9 пин тенк — тӳлесе хунӑ.
Кавказ тӑрӑхӗнчи курорт хулине 24 ҫулти ҫамрӑк хӑйӗн ҫемйипе ҫурла уйӑхӗн пуҫламӑшӗнче тухса кайма ӗмӗтленнӗ. Анчах шухӑшланӑ пек пур чухне те пулса пымасть те, кӑштахран ҫула тухаймассине ӑнланса илнӗ. Ҫурт хуҫине укҫана каялла тавӑрса пама ыйтнӑ. Анчах лешӗ килӗшмен. Тарӑхнипе каччӑ ӗнер йӗрке хуралҫисенчен пулӑшу ыйтнӑ.
Шупашкарти йӗрке хуралҫисем РФ Пуҫиле кодексӗн 159-мӗш статйин 2-мӗш пайӗпе пуҫиле ӗҫ пуҫарнӑ.
Абхазинчи Гагры курорт хулинче пӗр ҫемье шар курнӑ. Ӑна тата унӑн виҫӗ ачине вӑйлӑ ҫил тинӗсе туртса кӗрсе кайнӑ.
Ҫӗршывӑн кӑнтӑр енчи районӗсенче сак кунсенче вӑйлӑ ҫумӑр ҫунӑ. Асар-писер ҫанталӑк Абхазинче те алхаснӑ. Тинӗсри хум 3 метр таран ҫӗкленнӗ.
Пӗр хӗрарӑм тинӗс хумханнине пӑхса тӑман – шыва кӗме кайнӑ. Ӑна хӑна ҫуртӗнче ӗҫлекенсем те чарасшӑн пулнӑ имӗш, анчах виҫӗ ача амӑшӗ тӑнламан.
Ҫемье Бзыбь юханшывра шыва кӗнӗ. Тахӑш самантра вӑйлӑ юхӑм ҫемьене тинӗсе туртса кайнӑ. Инкеке лекнӗ ачасенчен пӗрне ҫынсем пулӑшма пултарнӑ. Вырӑна пырса ҫитнӗ ҫӑлавҫӑсем тепӗр икӗ ачана ҫӑлнӑ, анчах вӗсенчен пӗри пульницӑра вилсе кайнӑ. Хӗрарӑма тупайман-ха.
Утӑ уйӑхӗн 5-мӗшӗнче Сартури 42 ҫулти арҫын-турист Гагры хулинче путса вилнӗ. Ун чухне те тинӗс вӑйлӑ хумханнӑ.
Ҫӗнӗ Шупашкарта пурӑнакан хӗрарӑма строительствӑра кирлӗ инструментсене вӑрланӑ тесе шухӑшлаҫҫӗ.
Асӑннӑ хулари 10-мӗш пилӗкҫуллӑх урамӗнчи отделочниксен бригади дрель, перфоратор, плита касмалли хатӗр, лазер уровнӗ ҫуккине асӑрханӑ. Кун пирки Чӑваш Енӗн Шалти ӗҫсен министерствинче пӗлтернӗ.
Пурӗ 19 пин тенкӗ тӑракан инструментсем ҫухалнӑ хыҫҫӑн штукатура шанман. 34 ҫулти хӗрарӑм ӗҫе темиҫе кун тухман.
Вӑл йӗрке хуралҫисене ӑнлантарнӑ тӑрӑх, инструментсене илнӗ, вӑхӑтлӑха ломбарда панӑ. Ҫакна вӑл укҫа кирлипе сӑлтавланӑ. Кайран япаласене каялла илесшӗн пулнӑ имӗш. Ломбарда япала парса укҫа вӑл унччен те илкеленӗ иккен.
Хӗрарӑм тӗлӗшпе пуҫиле ӗҫ пуҫарнӑ.
Шупашкарта нумай хваттерлӗ ҫурт ҫывӑхӗнче ҫын виллине тупнӑ. «Про Город» хаҫата халӑх корреспонденчӗ пӗлтернӗ тӑрӑх, арҫын 7-мӗш хутран паян 14 сехет те 10 минутра ӳкнӗ. Вӑл 28 ҫулта пулнӑ.
Вырӑна оперативлӑ следстви ушкӑнӗ ҫитнӗ. Халӗ арҫын мӗнле майпа ӳкнине тӗпчеҫҫӗ – ҫапла пӗлтерет Следстви комитечӗ.
Аса илтерер: ҫак кунсенче Шупашкарти Пасар урамӗнче арҫын виллине тупнӑччӗ. 74 ҫултискер ҫӳлти хутран ӳкнӗ.
РФ Следстви комитечӗн Чӑваш Енри тӗпчевҫисем Канаш хулинче пурӑнакан арҫын тӗлӗшпе пуҫарнӑ пуҫиле ӗҫе тӗпчесе пӗтернӗ. 47 ҫулти вӑй питтие ҫынна вӗлерме тӑнӑшӑн айӑплӗҫ.
Тӗпчевҫӗсем пӗлтернӗ тӑрӑх, кӑҫалхи ҫу уйӑхӗн 12-мӗшӗнче ҫурҫӗр иртни 25 минутра хайхи этем пӗр общежитире пурӑнакан кӳршипе харкашма тытӑннӑ. 25 ҫулхи ҫамрӑка асли унччен те килӗштермен, унпа хирӗҫсе пурӑннӑ иккен. Сӑмахпа кӑна харкашни ҫитмен — 47-ри арҫын хальхинче алла ҫӗҫӗ ярса илсе ҫамрӑка чикнӗ. Каччӑн чӗри тата ӳпки аманнӑ.
Юрать, каччӑ инкек вырӑнӗнчен тарса ӳкнӗ тата пӑтӑрмаха курнисем хушша-хуппа кӗни те вырӑнлӑ пулнӑ. Тухтӑрсем вӑхӑтра пулӑшнипе ҫамрӑк чӗрӗ тӑрса юлнӑ.
47-ри усал этем кӗҫех суд тенкелӗ ҫине ларнӑ.
Вӑрмар районӗнчи Аслӑ Пинер ялӗнче пурӑнакан 34 ҫулти арҫын тӗлӗшпе Следстви комитечӗ пуҫиле ӗҫ пуҫарнӑ. Вӑл ҫынна асӑрханмасӑр вӗлернӗ тесе шухӑшлаҫҫӗ.
Следстви пӗлтернӗ тӑрӑх, ҫӗртме уйӑхӗн 28-мӗшӗнче 23 сехетре вӑл пӗрле пурӑнакан хӗрарӑма вӗлернӗ. Хайхискер ӑна ҫӗҫӗпе тапӑннӑ. Арҫын пиччӗшӗпе тата ҫак хӗрарӑмпа пурӑннӑ. Савнине пиччӗшӗ ҫумне кӗвӗҫнипе вӑл ҫӗҫӗ ярса тытнӑ.
Арҫынна тытса чарнӑ.
РФ Следстви комитечӗн Чӑваш Енри ӗҫченӗсем 46 ҫулти арҫынна тытса чарнӑ. Вӑл унччен темиҫе хутчен те судпа айӑпланнӑскер иккен. РФ Следстви комитечӗн Чӑваш Енри управленийӗнче ун пирки маньяк тесе пӗлтернӗ.
Тӗрмерен ҫав этем кӑҫалхи ҫу уйӑхӗнче тухнӑ. Анчах ирӗкре савӑнса та уҫӑ сывлӑпа кӑкӑр туллин киленсе пурӑнас вырӑнне арҫын каллех пӑтӑрмаха ҫакланнӑ. Хальхинче вӑл пӗр хӗре вӗлерессипе хӑратса пусмӑрлама хӑтланнӑ.
Тӗпчевҫӗсем пӗлтернӗ тӑрӑх, ҫӗртме уйӑхн 30-мӗшӗнче ҫурҫӗр тӗлӗнче арҫын Шупашкарти «Байконур» микрорайон ҫывӑхӗнчи вӑрманлӑ вырӑнта 21 ҫулхи хӗре асӑрханӑ. Вӗлерессипе хӑратса ӑна тӗмсем хушшине сӗтрсе кӗнӗ. Анчах хӗре темле пусмӑрас тесен хайхи май килмен, мӗншӗн тесен лешӗ хытах хирӗҫ тӑнӑ, пӗтӗм вӑйран кӗрешнӗ, хӗр тарса ӳкнӗ.
Халӗ арҫын тӗлӗшпе пуҫиле ӗҫ пуҫарнӑ.
Паян, утӑ уйӑхӗн 3-мӗшӗнче, Шупашкарти Пасар урамӗнче («Благовещенски» микрорайонта») нумай хутлӑ ҫурт умӗнче 74 ҫулти арҫын виллине тупнӑ. Ку паян нумаях пулмасть, 19 сехет ҫитеспе, пулнӑ.
«Про Город» хаҫата халӑх коррреспонденчӗсем пӗлтернӗ тӑрӑх, арҫын, ахӑртнех, чӳречерен тухса ӳкнӗ. Вырӑна Следстви комитечӗн оперативлӑ следстви ушкӑнӗ ҫитнӗ. Халӗ арҫын мӗнле майпа тухса ӳкнине уҫӑмлатаҫҫӗ.
+2.3 °C