Полици уйрӑмӗнче мина хунӑ тесе суйса шӑнкӑравланӑ арҫынна суд тӗрмене хупмасӑр 3 ҫуллӑха айӑплама йышӑннӑ. Тӗрӗслев срокӗ – тепӗр 2 ҫул.
Ҫак арҫын Шупашкарта пурӑнать. Ҫӗртме уйӑхӗнчи пӗр кун вӑл «Каҫхи Хула» кафере каннӑ. Ҫавӑн чухне вӑл Трактор тӑвакансен проспектӗнчи 32-мӗш «А» ҫуртра вырнаҫнӑ полици уйрӑмӗнче мина хуни пирки пӗлтернӗ.
Ятарлӑ службӑсем вырӑна ҫитсе тӗрӗсленӗ те нимӗнле сирпӗнекен хатӗр те тупман. Арҫынна вара суд тунӑ.
Паян ирхине Шупашкарта Эльгер урамӗнче вырнаҫнӑ шкултан палламан арҫын 10 ҫулти арҫын ачана ҫавӑтса тухса кайма тӑнӑ. Ҫакна унӑн 18-ти пиччӗшӗ курнӑ та арҫынна тӗксе янӑ. Лешӗ кун хыҫҫӑн тарнӑ.
Кун пирки ҫийӗнчех полицие пӗлтернӗ. ҪҪХПИ инспекторӗсем палламанскер мӗнле маршрутпа куҫнине палӑртнӑ. Ӑна Университет урамӗнчи ҫурт умӗнче тытса чарнӑ.
Ҫакӑ паллӑ: 38 ҫулти арҫын психиатр патӗнче шутра тӑрать. Шкула пынӑ чухне вӑл нимӗн те ӑнланман, ҫакна мӗншӗн тунине ӑнлантараймасть.
Шупашкарти арҫын банк карттин выписки илнӗ те счет ҫинчен 19500 тенкӗ ҫухалнине курнӑ. Кун хыҫҫӑн вӑл полицие кайса кун пирки пӗлтернӗ.
Уголовлӑ шырав ӗҫченӗсем палӑртнӑ тӑрӑх, ҫак арҫын тепӗр арҫынпа ют региона шапаша ҫӳренӗ. Хайхискер пӗррехинче ун патӗнче хӑнара пулнӑ. Шӑпах ҫавӑн чухне хӑна пӗлӗшӗн телефонне йӑтса кайнӑ. Экран ҫинче вара пароль пулман.
Хайхискер банк сарӑмӗпе усӑ курса унӑн укҫине хӑйӗн счечӗ ҫине куҫарнӑ.
45 ҫулти арҫын тӗлӗшпе пуҫиле ӗҫ пуҫарнӑ. Ҫакна палӑртмалла: вӑл - алимент парӑмҫи, тӗрмерен ҫулталӑк каялла тухнӑ.
Ҫӗмӗрлере медицина тытӑмӗнче ӗҫлекен арҫын ултавҫӑсен аллине ҫакланнӑ. Ку кӑна мар-ха. Вӗсене укҫа куҫарса парсан лешсем унран кулса смс-ҫыру янӑ.
Арҫын ултавҫӑсене самаях пысӑк укҫа куҫарса панӑ: 3 миллион тенкӗ. Укҫи хӑйӗн те пулман, ӑна кредит илнӗ.
ШӖМ пӗлтернӗ тӑрӑх, 26 ҫулти ҫак арҫын полицие ӗнер пынӑ. Вӑл палламан ҫынпа телефонпа юпан 27-мӗшӗнченпе калаҫнӑ. Хайхискер Ҫӗмӗрле арҫыннине ун ячӗпе такам кредит илнине ӗнентернӗ. Ӑна пӑрахӑҫлас тесе хайхискере кредит илме ӳкӗте кӗртнӗ.
Юлашкинчен ун патне кулса-тӑрӑхласа ҫырнӑ смс-ҫыру килнӗ. Кун хыҫҫӑн тин вӑл ултавҫӑсен серепине лекнине ӑнланнӑ.
Йӗпреҫ поселокӗнче хӗрарӑмпа ачана шар кӑтартнӑ 30 ҫулти арҫынна тытса чарнӑ. Ун тӗлӗшпе пуҫиле ӗҫ пуҫарнӑ.
Следстви шутланӑ тӑрӑх, ҫак арҫын юпа уйӑхӗнче курайманнипе арӑмне тата унӑн 14 ҫулти ывӑлне хӗненӗ. Хӗрарӑм пусмӑра чӑтайман - кун пирки полицие кайса пӗлтернӗ.
Арҫын следстви вӑхӑтӗнче решетке хыҫӗнче ларӗ.
Шупашкар ҫыннине улталанӑ ют регион арҫыннине тытса чарнӑ. Вӑл - Краснодартан.
Ҫу уйӑхӗн 27-мӗшӗнче Шупашкарти 37 ҫулти арҫын тӳлевсӗр пӗлтерӳсен сайтӗнче ача-пӑча хутӑшӗ туянас тенӗ. Сутуҫӑпа ҫыхӑннӑ та ӑна 12 пин тенкӗ куҫарса панӑ. Кун хыҫҫӑн лешӗ пач ҫухалнӑ.
Шупашкар арҫынни полицие кайса пулӑшу ыйтнӑ. Кун тӗлӗшпе пуҫиле ӗҫ пуҫарнӑ. Краснодар арҫыннине нумаях пулмасть тытса чарнӑ. Унӑн хваттерӗнче 6 телефон, 15 банк картти, нумай симка тупнӑ. 38 ҫулти арҫын айӑпне йышӑннӑ.
Юпа уйӑхӗн 25-мӗшӗнче Шупашкарта пӗр водитель 10 ҫулти арҫын ачана ҫапса хӑварнӑ. Хӑй вырӑнтан тарса ҫухалнӑ.
Ҫав водителе пӗр хӗрарӑм пулӑшнипе тупнӑ. Евгения Кузина ҫав аварие хӑйӗн куҫӗпе курнӑ. Кун пирки вӑл ҪҪХПИе пӗлтернӗ.
Кун хыҫҫӑн водителе часах тытса чарнӑ.
Евгения Кузинӑна йӗрке хуралҫисене пулӑшнӑшӑн тав ҫырӑвӗпе чысланӑ.
Юпа уйӑхӗн 14-мӗшӗнче Шупашкарта пурӑнакан 20 ҫулти хӗр полицие пынӑ. Вӑл авӑн уйӑхӗн банк карттине ҫухатнӑ. Счечӗ ҫинчен 1 пин тенкӗ ытла ҫухалнӑ.
Полицейскисем ют ҫын карттипе кам таваршӑн тӳленине тупса палӑртнӑ. Павлов мичман урамӗнчи лавккари видеона пӑхнӑ та ҫак ӗҫе шурӑ куртка тӑхӑннӑ хӗрарӑм тунине палӑртнӑ. Унпа пӗрле пӗлӗшӗ те пулнӑ.
Ҫак сӑнӳкерчӗк ҫинчи хӗрарӑма палласан 8 999 756 00 68 е 102 номерпе шӑнкӑравлама ыйтаҫҫӗ.
Вӑрнар районӗнче 49 ҫулти арҫын Мускава кайсан ҫухалнӑ. Вӑл килтен авӑн уйӑхӗн 15-мӗшӗнче кайнӑ.
Юпа уйӑхӗн 19-мӗшӗнче ирхи 5 сехетре Сергей Геннадиевич Васильев тӑванӗсем патне шӑнкӑравланӑ та Чӑваш Ене килме тухнӑ. Кун хыҫҫӑн вӑл телефонне метрора хӑварнӑ. Арҫын киле таврӑнманнине кура тӑванӗсем полицирен пулӑшу ыйтнӑ. Арҫын хура куртка, хура шӑлавар, хура кроссовка тӑхӑннӑ пулнӑ.
Хӑй шакла, 175 сантиметр ҫӳллӗш. Мӗн те пулин пӗлсен полицие пӗлтерме ыйтаҫҫӗ.
Шупашкарта пурӑнакан 91 ҫулти арҫынна палламан ҫынсем улталама, унран 900 пин тенкӗ сӑптӑрма хӑтланнӑ. Анчах ватӑскер хӑйне улталама паман.
Ун патне палламан ҫын шӑнкӑравланӑ та мӑнукӗ аварие лекнине пӗлтернӗ. Куншӑн мӑнукӗ айӑплӑ-мӗн, хӗр шар курнӑ имӗш. Кӗҫех тепӗр арҫын калаҫӑва хутшӑннӑ, следователь-мӗн. Хайхискер ыйтӑва 900 пин тенкӗпе татса пама шантарнӑ.
Старик ывӑлӗ патне шӑнкӑравлама шутланӑ, анчах хайхи следователь ҫакна тума чарнӑ, вӑл манукӗн характеристикине илме кайнӑ имӗш. Старик ӑна кӗтсе илессине пӗлтернӗ. Кӗҫех телефон патне арҫын пынӑ, ывӑлӗ имӗш. Ватӑскер унран вӑл, хӑйӗн ывӑлӗ ӗнтӗ, ӑҫта ӗҫленине, арӑмӗ мӗн ятлине ыйтнӑ. Хуравӗ пулман. Ҫапла 91 ҫулти старик телефона сӳнтернӗ. Кун пирки вӑл полицие пӗлтернӗ.
+1.3 °C