Шупашкарти арҫын хӑйӗн ҫуралнӑ кунӗнче автобус тапратса тарма пуҫланӑ. Халӗ ун тӗлӗшпе пуҫиле ӗҫ пуҫарма пултараҫҫӗ.
Ку ӗнер, ака, уйӑхӗн 2- мӗшӗнче, пулнӑ. Туристсене илсе ҫӳрекен водитель автобуса «Ботаника сачӗ» чарӑнура хӑварнӑ та апатланма кайнӑ. Хӑй каланӑ тӑрӑх, уҫҫине унтах хӑварнӑ, алӑкне вара питӗрнӗ. Апла пулин те унта нихӑҫан та права илмен арҫын кӗрсе автобуса тапратса хускатма пултарнӑ.
Юрать-ха, инҫе каяйман. Водитель шӑп ҫав вӑхӑтра тухнӑ, алӑпа сулкалашса ӑна чарӑнма хушнӑ. Лешӗ вара салонран тухса тарма хӑтланнӑ, анчах водитель ӑна хӑваласа ҫитнӗ, йӗрке хуралҫисем киличчен тытса тӑнӑ.
Кун пек хӑтланнӑшӑн арҫын тӗлӗшпе административлӑ протокол ҫырнӑ. Ӑна 15 талӑклӑха хупма пултараҫҫӗ.
Шупашкарта пурӑнакан 45 ҫулти хӗрарӑм банк картти ҫинчен 95 пин тенкӗ ҫухални пирки полицие пӗлтернӗ. Анчах ҫакна вӑл пӗр уйӑхран кӑна тунӑ.
Йӗрке хуралҫисем тӗрӗслев ирттернӗ те ку ӗҫе унӑн 34 ҫулти пӗлӗшӗ тунине палӑртнӑ. Хӗрарӑм ӑна телефона хӑйех эрех-сӑра илме панӑ. Кайран пӗрле эрех-сӑра ӗҫнӗ хыҫҫӑн хайхи арҫын телефонри банк сарӑмӗпе усӑ курса унӑн счечӗ ҫинчен 95 пин тенкӗ куҫарнӑ.
Ҫак арҫын тӗлӗшпе пуҫиле ӗҫ пуҫарнӑ. Банк картти ҫинчен укҫа вӑрланӑшӑн 6 ҫул таран ирӗксӗр хӑварма пултараҫҫӗ.
Ҫӗнӗ Шупашкарти 60 ҫулти арҫын ултавҫӑсене 2 миллион ытла тенкӗ куҫарса панӑ. Ку кӑна мар-ха, вӑл кунсӑр пуҫне кредит илнӗ.
Ун патне ҫак уйӑхра мессенджерта палламан ҫын шӑнкӑравланӑ. Хайхи арҫын вӑл унччен ӗҫленӗ организацири кадрсенчен пайӗнчен-мӗн. Вӑл пенсие ҫӗнӗрен шутламаллине пӗлтернӗ.
Кайран хӑйсемпе «Госуслуги» портал тата йӗрке хуралӗн ӗҫченӗсем тесе паллаштарнӑ ҫынсем шӑнкӑравланӑ. Хайхискерсем арҫынна вӑл унччен ултавҫӑпа калаҫнине ӗнентернӗ, ҫавна май халӗ унӑн ячӗпе кредит илме хӑтланаҫҫӗ имӗш.
Палламан ҫынсем каланипе арҫын пухнӑ 2 миллон тенкине курьер урлӑ парса янӑ. Кунсӑр пуҫне 430 пин тенкӗ кредит илнӗ, ӑна та палламан ҫынсем каланӑ счет ҫине куҫарнӑ.
Пуш уйӑхӗн 28-мӗшӗнче ултавҫӑсенчен шар курнӑ арҫын полицие пулӑшу ыйтма пынӑ.
Ҫӗнӗ Шупашкарта пурӑнакан 74 ҫулти арҫын ултавҫӑсене 6,5 миллион тенкӗ куҫарса панӑ.
Полицие пырсан вӑл акӑ мӗн каласа кӑтартнӑ: нарӑсӑн 24-мӗшӗнче ун патне вӑл 40 ҫул ытла ӗҫленӗ предприятири кадрсен уйрӑмӗнчи специалист шӑнкӑравланӑ. Ӑна сиенлӗ стажшӑн пенсие ҫӗнӗрен шутласа памалла-мӗн. Палламан ҫын смс-ҫырупа килнӗ кода ыйтнӑ – ку Пенси фондне ҫырӑнма кирлӗ имӗш.
Кайран унпа «йӗрке хуралҫисем» тата «Тӗп банк ӗҫченӗсем» ҫыхӑннӑ. Хайхискерсем «Госуслуги» порталти даннӑйсене ют ҫынсем пӗлнӗ тесе хӑратма тытӑннӑ, вӗсем терроризм организацийӗсене укҫа куҫарма пултараҫҫӗ-мӗн. Вӗсем каланипе 74 ҫулти арҫын ҫӗнӗ телефон, сим-карта, роутер илнӗ. Ҫапла преступниксем ӑна йӑлт сӑнаса тӑнӑ.
Хайхи арҫын арӑмӗпе пӗрле банка кайса счет ҫинчи пысӑк укҫа илнӗ. Унта ӗҫлекенсене ку укҫа Мускавра операци тума кирлӗ тесе суйнӑ. Пушӑн 3-мӗшӗнче каҫхине курьер укҫана илсе кайнӑ та истори ҫакӑнпа вӗҫленӗ. Арҫыннӑн вара полицие кайма тивнӗ.
Красноармейскинче пурӑнакан 43 ҫулти арҫын тӗнче тетелӗнче техника туянма тӑнӑ та 100 пин тенкӗсӗр тӑрса юлнӑ.
Арҫын юр тасатмалли техника туянма тӑнӑ. Тавара тупсан вӑл заявка янӑ та хӑйӗн телефон номерне кӑтартнӑ. Сутуҫӑпа калаҫнӑ хыҫҫӑн вӑл ӑна 100 пин тенкӗ ытла куҫарса панӑ. Лешӗ трек-номер ярса пама шантарнӑ та ҫухалнӑ. Сайта та блокировка тунӑ.
Арҫын полицие кайнӑ. Ку тӗслӗх тӗлӗшпе пуҫиле ӗҫ пуҫарнӑ
Шупашкарта студенткӑна банкомат умӗнчех ҫаратса кайнӑ.
Ку нарӑс уйӑхӗн 12-мӗшӗнче Шупашкарти суту-илӳ ҫуртӗнче пулса иртнӗ. 16 ҫулти хӗр банкомат патне пырса 95 пин тенкӗ илнӗ. Хайхискер телефон туянасшӑн пулнӑ иккен.
Анчах... Укҫана алла тытнӑ кӑна – хыҫалта тӑракан арҫын 95 пин тенке туртса илнӗ те тарнӑ. Хӗр ун хыҫҫӑн чупнӑ, анчах хӑваласа ҫитеймен. Ҫапла унӑн полицие кайма тивнӗ.
Полицейскисем кеҫех вӑрра, 30 ҫулти арҫынна, тытнӑ. Ун тӗлӗшпе пуҫиле ӗҫ пуҫарнӑ.
Шупашкарти тухтӑр, 67-ри хӗрарӑм, ултавҫӑсене 3 млн тенкӗ ытла куҫарса панӑ.
Ӑна полицейскисем, банк ӗҫченӗсем, ӗҫтешӗсем укҫа куҫармалла мар тесе ӳкӗте кӗртме тӑрӑшнӑ. Анчах вӑл никама та итлемен. Ывӑлне кун пирки пӗр уйӑхран кӑна каласа кӑтартнӑ. Кун хыҫҫӑн ывӑлӗ ҫине тӑрса ӑна полицие кайма ыйтнӑ. Тинех килӗшнӗ вӑл.
Акӑ мӗн пулса иртнӗ: хӗрарӑм патне «пенси фончӗн ӗҫченӗсем», «Роскомнадзор, ФСБ, Тӗп банк ӗҫченӗсем» пӗр вӗҫӗм шӑнкӑравланӑ, ултавҫӑсем унӑн укҫине Укаринӑна пулӑшма ярасшӑн тесе хӑратса пӗтернӗ, счет ҫинчи пухнӑ укҫине, пӗлӗшӗсенчен кивҫен илсе йӑлтах «резерв фонда» куҫарма хушнӑ.
Шупашкарта 22 ҫулти воспитатель ултавҫӑсен аллине лекнӗ. Вӑл вӗсене 1 млн тенкӗ ытла куҫарса панӑ.
Палламан ҫын ун патне шӑнкӑравласа унӑн сим-карттӑпа усӑ курмалли вӑхӑт вӗҫленнине пӗлтернӗ. Килӗшӗве тӑсмалла тесе смс-ҫырупа килнӗ кода калама ыйтнӑ.
Унтан пикепе воспитательпе банк тата ФСБ «ӗҫченӗсем» ҫыхӑннӑ. Такам унӑн ячӗпе кредит илнӗ-мӗн, укҫана Украинӑна куҫарасшӑн имӗш. Палламан ҫын укҫана сыхласа хӑвармали мел пирки те каланӑ, ҫапла воспитатель микрозаймсем тата пӗлӗшӗсенчен кивҫен илнӗ, ҫав укҫана пӗтӗмпех ултавҫӑсем каланӑ счетсем ҫине куҫарнӑ.
Ултав серепине лекнине ӑнлансан вӑл полицие кайнӑ.
Вӑрнар округӗнче пурӑнакан арҫыннӑн импульс генераторне тата аккумуляторне 5 ҫул каялла вӑрланӑ. Ун чухне вӑл 20 пин ытла тенкӗлӗх тӑкак кӳнӗ.
Ҫухалнӑ япаласене тӳрех йытӑпа шыранӑ. Анчах усси пулман. Япаласене шырав базине кӗртнӗ.
Халӗ, 5 ҫул иртсен, Вӑрнарти оперативниксем вӑрланӑ генератора Вӑрнарта пурӑнакан арҫын патӗнче тупнӑ. Ӑна тытса чарнӑ, вӑл айӑпне йышӑннӑ. Ун тӗлӗшпе пуҫиле ӗҫ пуҫарнӑ.
Кӑрлачӑн 12-мӗшӗнче Куславкка округӗнчи 57 ҫулти хӗрарӑм Кивӗ Тӗрлемес станцийӗ патӗнчи лавкка умӗнче сумкине вӑхӑтлӑха хӑварнӑ. Таврӑннӑ та… вӑл ҫук. Сумкӑра вара документсем, телефон тата шӑнтнӑ катлет пулнӑ. Хӗрарӑм кун пирки тӳрех полицие пӗлтернӗ.
Аслӑ следователь Алена Аристархова сумкӑри телефон номерӗпе шӑнкӑравлама пуҫланӑ. Пӗр ҫын картишре юр тасатнӑ вӑхӑтра телефон сассине илтнӗ. Вӑл урама тухса сумкӑна тупнӑ. Ун ҫинче йытӑ шӑлӗн йӗрӗсем пулнӑ. Йытӑ сумкӑна тӑлланӑ, анчах катлета кӑларайман.
+20.8 °C