Муркаш районӗнчи Мӑн Токшик ялӗнче пурӑнакансем чӗрӗк ӗмӗре яхӑн шыв башнисӗр пурӑннӑ. Унччен туни кивелсе ваннӑ та, кайран, самани саккӑрла ҫаптарма тытӑнсан, ун патне никамӑн та ал ҫитмен. Ҫынсем ҫӑлтан шыв ӑсса пурӑннӑ.
21-мӗш ӗмӗрте сӗм вӑрманти евӗр пурӑнас килмест халӑхӑн. Вӗсем вырӑнти Тимеш ял тӑрӑхӗн пуҫлӑхӗнчен Евгений Орловран пулӑшу ыйтнӑ.
Вырӑнти хастар Борис Оньков шухӑшланӑ тӑрӑх, 20 пин тенкӗпех шыв башнине юсама пулӗччӗ, ҫынсем хӑйсемех тӑвӗччӗҫ, анчах техника ҫук.
Тӳре-шара вара самай пысӑк сумма кирлӗ тесе шухӑшлать иккен. Вӗсен шучӗпе, киввине юсаймӑн. Тепӗр тесен, ҫавна хаклама экспертиза ирттермен-ха...
КПРФӑн РФ Патшалӑх Думинчи фракцийӗн ертӳҫин канашҫи Ирина Филатова Евгений Орловпа ҫыхӑннӑ. Вырӑнти пӗчӗк тӳре-шара пӗтӗмлетнӗ тӑрӑх, ҫынсем пустуйранах пӑшӑрханаҫҫӗ. Вӗсен хӑйсем ҫӑл чавнӑ, ялта та ҫӑл пур.
Ирина Филатовӑна ку хурав тивӗҫтермен. Шывпа ҫыхӑннӑ ыйтӑва епле татса панине вӑл тӗрӗслесе тӑма шантарнӑ.
Суйлав тесен те темӗн те тӑвӑн тесси ҫеҫ юлать пулӗ ҫав. Авӑн уйӑхӗнче суйлав ҫывхарать те, депутат пулас ӗмӗтлӗ кандидатсем те, вӗсене майлисем те канӑҫа ҫухатнӑ темелле.
«Район (сӑмах Красноармейски районӗ пирки пырать. — Авт. асӑрхаттарӑвӗ) администрацийӗн пуҫлӑхӗ Александр Кузнецов оргпайра тӗп специалист-эксперт пулса ӗҫленӗ хӗрарӑма ӗҫрен кайма хистенӗ, мӗншӗн тесен унӑн упӑшки КПРФ ячӗпе Депутатсен районти пухӑвне суйланма регистрациленнӗ», – тесе пӗлтернӗ Александр Андреев коммунист. Кун пирки «Правда ПФО» тӗнче тетелӗнчи хаҫатра хыпарланӑ.
Кузнецов маларах эпир асӑннӑ кандидатӑн арӑмӗн ӗҫ пӳлӗмне темиҫе те кӗрсе тухнӑ имӗш, ӑна вӑл упӑшки депутат пулма суйлава ан хутшӑнтӑр тесе ӳкӗте кӗртме пӑхнӑ. «Тӳре-шаран тыткаларӑшӗ пирки прокуратурӑна евитленӗ», — тенӗ Андреев.
Етӗрне районӗнче вара ЧР Патшалӑх Канашне суйланас ӗмӗтлӗ КПРФ райкомӗн пӗрремӗш секретарӗ Николай Федоров наганпа ӳкерӗннӗ, видеона хӑйӗн партийӗшӗн сасӑлама ыйтса Интернета вырнаҫтарнӑ. Ку эстремизм мар-и тесе йӗрке хуралҫисене ҫӑхавлакансем тупӑннӑ.
Либерал-демократсен партийӗн ертӳҫи Владимир Жириновский Раҫҫей регионӗсене пӗрлештерсе пысӑклатасшӑн. Кун пирки вӑл «Комсомольская правда» МИХ журналистне каланӑ. Пӗрлештересси пирки сӑмах хускатнӑ май Жириновский Чӑваш Ене, Бурят Республикине, Удмурт Республикине, Тутарстана тата ытти наци республикине пӗтересшӗн.
Ҫӗршывӑн вице-премьерӗ Марата Хуснуллин маларах ҫӗршыври хӑш-пӗр региона (сӑмахран, Еврей автономи облаҫне тата Хабаровск крайне, Курган тата Тӗмен облаҫӗсене) пӗрлештермелле, ҫакӑ пӗчӗк регионсенчи чылай экономика ыйтӑвне татса пама май парӗ тенӗ.
Жириновский каланӑ тӑрӑх, вӗсен партийӗ регионсене пысӑклатма 25 ҫул ӗнтӗ сӗнет.
Кӑҫалхи авӑн уйӑхӗнче суйлав иртмелле. Унччен тӗрлӗ парти пайташӗсем уйрӑмах хастарланаҫҫӗ, халӑхпа тӗл пулаҫҫӗ, уявсене хутшӑнаҫҫӗ, саламлаҫҫӗ, савӑнтараҫҫӗ. Ҫав вӑхӑтрах парти пайташӗсем те ҫынсемех, вӗсен хайсен хушшинче те ӑнланмалӑхсем сиксе тухма пултараҫҫӗ. Ҫавӑн пек тӗслӗхсенчен пӗри — Чӑваш Енре Раҫҫей Федерацийӗн коммунистсен партийӗн рескомӗн пӗрремӗш секретарьне суйлассипе ҫыхӑннӑ ыйту.
Асӑннӑ пукан Валентин Шурчанов секретарь пурнӑҫран уйрӑлнӑ хыҫҫӑн пушаннӑччӗ.
Пуш уйӑхӗн пуҫламӑшӗнче партин Чӑваш Енри рескомӗ черетсӗр пленума пухӑннине Чӑваш халӑх сайчӗ пӗлтернӗччӗ. Аса илтерер: «Провинцивиль» сайтра хыпарланӑ тӑрӑх, ларӑва Валентин Шурчановӑн ывӑлӗн, Алексейӑн, ҫывӑх ҫыннисем пухӑннӑ. Алексей Шурчанова пӗрремӗш секретаре суйланӑ. Парти членӗсем пулнӑ хӑш-пӗр хастара йышран кӑларнӑ. Ҫакӑнта Александр Андреев, Евгений Воронков тата Виктор Макаров лекнӗ.
Кунпа парти пайташӗсем килӗшме пултарайман. Лару-тӑрӑва йӗркене кӗртме «ҫӳлтисем» те хутшӑннӑ.
Ыран, ака уйӑхӗн 10-мӗшӗнче, коммунистсен партийӗ отчетпа суйлав пухӑвне пуҫтарӑнӗ.
Чӑваш Ен Патшалӑх Канашӗнчи «Пӗрлӗхлӗ Раҫҫей» партин депутачӗсен хӑйне евӗр рейтингне йӗркеленӗ. «Халӑх тарҫисен» уссине РФ Патшалӑх Думин тӗслӗхне шута илсе палӑртнӑ.
Танлаштарӑмра ҫӳлти йӗркене Федерацин травматологи, ортопеди тата эндопротезировани центрӗн тӗп врачӗ Николай Николаев, И.Н. Ульянов ячӗллӗ Чӑваш патшалӑх университечӗн ректорӗ Андрей Александров, «Дент-а-мед» стоматологи клиникин тӗп врачӗ Юрий Зорин лекнӗ.
Аутсайдерсен йышӗнче – «Акконд» хапрӑк директорӗ Валерий Иванов, «Реал-Б» обществӑн гендиректорӗн ҫумӗ Елена Васильева, Улатӑрти профсоюз ӗҫченӗ Николай Ефремов, Роман Каляев тата Леонид Лукин усламҫӑсем, газ компанийӗсен ертӳҫи Кияметдин Мифтахутдинов, «Элара» гендиректорӗ Андрей Углов, «Чӑвашхлебопродукт» пуҫлӑхӗ пулнӑ Владимир Яковлев.
Вӑтаммисен йышӗнче – Елена Николаева олимп чемпионки, «Авангард» ООО гендиректорӗ Николай Курчаткин, ЧР Патшалӑх Канашӗн соцполитика комитечӗн ертӳҫи Вячеслав Рафинов, Альбина Егорова спикер.
Раҫҫей Федерацийӗнчи коммунистсен партийӗн Чӑваш Енри рескомӗн III пленумӗ иртессине Чӑваш халӑх сайчӗ пӗлтернӗччӗ. Аса илтерер: кӑрлачӑн 25-мӗшӗнче реском бюровӗн ларӑвӗ иртнӗччӗ. Унта пленума хӑҫан пухӑнасси пирки калаҫнӑ.
Реском черетсӗр пленума пухӑннӑ. «Провинцивиль» сайтра пӗлтернӗ тӑрӑх, ларӑва Валентин Шурчановӑн ывӑлӗн, Алексейӑн, ҫывӑх ҫыннисем пухӑннӑ имӗш. Алексей Шурчанова пӗрремӗш секретарь пулма суйланӑ.
Парти членӗсем пулнӑ хӑш-пӗр хастара йышран кӑларнӑ. Ҫакӑнта Александр Андреев, Евгений Воронков тата Виктор Макаров лекнӗ.
«Версия» сайтра пӗлтернӗ тӑрӑх, пленума пухӑнасси пирки партин Тӗп комитечӗпе тата президиумӗн хӑш-пӗр членӗпе калаҫса татӑлман. Ҫитес эрнере Шупашкара партин представителӗ килсе ҫитессе, вӑл йӗрке тӑвасса шанаҫҫӗ.
Кӑҫалхи кӗркунне суйлав иртӗ. Ун пирки тӗрлӗ шайра халех калаҫма пуҫланӑ. Кашни суйлав участокӗнчех видеокамерӑсем пулӗҫ. Чӑваш Ен Тӗп суйлав комиссийӗн председателӗ Александр Цветков кун пирки Халӑх сӑнавӗн штабӗн пӗрремӗш ларӑвӗнче шантарнӑ.
Уйрӑмах пысӑк 349 участокра профессионал видеотытӑмсем ӗҫлӗҫ.
Суйлав епле пынине Пӗрлехи информаци центрӗнче те, суйлав участокӗсене тухса ҫӳресе те сӑнаса тӑрӗҫ.
Халӗ сӑнавҫӑ пулас ӗмӗтлисене вӗрентсе кӑларма хатӗрленеҫҫӗ. Халӑх сӑнавӗн штабне Александр Белов журналист ертсе пырӗ.
Раҫҫей Федерацийӗнчи коммунистсен партийӗн Чӑваш Енри рескомӗн III пленумӗ хӑҫан иртесси паллӑ. Ӗнер, кӑрлачӑн 25-мӗшӗнче, реском бюровӗн ларӑвӗ иртнӗ. Унта пленума хӑҫан ирттерессине татса панӑ. Коммунистсен пӗлтерӗшлӗ пухӑвӗ нарӑс уйӑхӗн 2-мӗшӗнче 14 сехетре иртмелле.
Бюро ларӑвӗнче реском валли «Соболь» автомобиль туянас ыйтӑва та сӳтсе явнӑ. Автомобиль илме партин Тӗп комитечӗ укҫа уйӑрӗ.
Пленумра коммунистсем партин рескомӗн пӗрремӗш секретарьне тата бюро пайташӗсене суйлӗҫ.
«Правда ПФО» тӗнче тетелӗнчи хаҫат хӑйӗн ҫӑлкуҫӗ ҫине таянса хыпарланӑ тӑрӑх, Мускавра парти пайташӗсем реском пӗрремӗш секретарӗ пулма Александр Андреев тата Алексей Шурчанов кандиадтурисене тишкернӗ. Унтисем Алексей Шурчанова сӗннӗ.
Аса илтерер: рескомӑн пӗрремӗш секретарӗ Валентин Шурчанов пулнӑччӗ, пӗлтӗрхи раштавӑн 18-мӗшӗнче вӑл ӗмӗрлӗхе куҫ хупрӗ.
Чӑваш Енри студент-комсомолецсем общежитишӗн налук тӳлесшӗн мар. Ку хыпара республикӑн Патшалӑх Канашӗн депутачӗ, Раҫсей Федерацийӗн Коммунистсен партийӗн пайташӗ Александр Андреев Фейсбукра пӗлтернӗ.
«Комсомолец-студентсем Чӑваш Ен Элтеперӗ тата «Пӗрлӗхлӗ Раҫҫей» парти общежитисем валли налук сӗннине хирӗҫ. @Чӑваш Республикин Правительство ҫурчӗ», — тесе ҫырса хунӑ. Ҫак йӗркесен авторӗ ӑнланнӑ тӑрӑх, сӑмах вӗренӳ учрежденийӗсен балансӗ ҫинчи общежитисене пурлӑх налукӗ хурса парас пирки пырать.
Александр Андреевӑн страницине вырнаҫтарнӑ сӑнӳкерчӗкре Правительство ҫурчӗ умӗнче плакатпа каччӑ тӑрать. Пӗринче вӑл пӗччен, тепринче Алесандр Андреев унпа сӑн ӳкерӗннӗ, виҫҫӗмӗшӗнче ҫамрӑк патне пакунлисем тӑваттӑн тан пырса тӑнӑ.
Дмитрий Евсеев Чӑваш Ен Элтеперӗн Администрацийӗн Шалти политика управленийӗн пуҫлӑхӗн ҫумӗ – общество пӗрлешӗвӗсемпе ӗҫлекен пай пуҫлӑхӗ пулса ӗҫлеме тытӑннӑ.
Пайӑн тӗп тӗллевӗ шутӗнче — влаҫ органӗсен политика партийӗсемпе, общество тата тӗн пӗрлешӗвӗсемпе ҫыхану тытса ӗҫлесси, обществӑпа политика пурнӑҫӗпе ҫыхӑннӑ тишкерӳллӗ материалсем хатӗрлесси, вӗсене республика ертӳҫине сӗнесси.
42 ҫулти Дмитрий Евсеева чылайӑшӗ коммунист евӗр пӗлет пулӗ. Халӗ вӑл ҫав йышран тухнӑ. Вӑл Чӑваш Ен Патшалӑх Канашӗн пиллӗкмӗш созыври (2011-2016) , Шупашкар хулинчи Депутатсен пухӑвӗн VI созыври (2016-2020) депутачӗ пулнӑ. 2016 ҫулхи нарӑс уйӑхӗччен РФКП рескомӗн секретарӗ шутланнӑ.
+9.3 °C