Раҫҫейри писательсен союзӗн Чӑваш Енри уйрӑмӗн правленийӗ нумаях пулмасть ларӑва пуҫтарӑннӑ. Калем ӑстисен ларӑвӗ «ЛитХаб» литература клубӗнче (ун пекки те пур иккен) иртнӗ.
Раҫҫейри писательсен союзӗн Чӑваш Енри уйрӑмӗн правленийӗ «Контактра» халӑх тетелӗнчи хайӗн страницинче пӗлтернӗ тӑрӑх, унта пӗрлешӗвӗн пайташӗсене аттестаци витӗр кӑларас ыйтӑва сӳтсе явнӑ.
Правлени пайташӗсем кун йӗркинчи ыйтӑва сӳтсе явнӑ май палӑртнӑ ӗҫсене васкасарах туса ирттерме йышӑннӑ. Документсене хатӗрлес ӗҫе те хӑвӑртлатмалла.
Писательсен союзӗн регионти уйрӑмӗнче хыпарланӑ тӑрӑх, документсене малтанласа пӑхса тухассине ку уйӑхра вӗҫлемелле.
Аса илтерер: республикӑри пӗрлешӗве Сергей Павлов ҫыравҫӑ ертсе пырать.
Ҫурла уйӑхӗн 8-мӗшӗнче Чӑваш Енри ҫыравҫӑсем Йошкар-Олара иртнӗ темиҫе литература мероприятине хутшӑннӑ.
«Патша Кокшайскӗн Кремлӗ» культурӑпа истори комплексӗнче кӗнеке уявӗ иртнӗ. Ҫармӑссен II кӗнеке фестивальне кӗнеке кӑларакансемпе кӗнеке вулама юратакансем пуҫтарӑннӑ. Кӑҫалхи мероприятие «Пӗрле вулатпӑр — пӗрлӗхре пурӑнатпӑр» девизпа йӗркеленӗ. Унта Чӑваш Ен делегацийӗн йышӗнче Чӑваш кӗнеке издательствин редакторӗ Ольга Федорова хутшӑннӑ.
Кӗнеке уявне кайнисем Мускаври Игорь Караулов поэтпа тата Севастопольти Платон Беседин писательпе тӗлпулӑва хутшӑннӑ. Унта Чӑваш Енри вырӑсла ҫыракан авторсем: Александр Шпаннагель тата Светлана Гордеева поэтсем — пулнӑ. Йошкар-Оларан вӗсем хавхаланса таврӑннӑ.
Шупашкар хулинче «Илемпи» мода тата илем конкурсӗ иртӗ. Унпа килӗшӳллӗн тумтир дизайнерӗсен конкурсне йӗркелӗҫ.
Йӗркелӳҫӗсем тумтир ӑстисене хӑйсене тата коллекцие кӑтартма чӗнеҫҫӗ. Вӑхӑт нумай юлман – конкурс ҫурла уйӑхӗн 15-мӗшӗнче Шупашкар хулинчи «Каскад» суту-илӳ центрӗнче пулӗ. Кӑҫалхи тема – «Коммерци моди». Коллекцин хальхи трендсене уҫса памалла, пысӑк пахалӑхпа уйрӑлса тӑмалла. Кунсӑр пуҫне рынока илсе тухса вӗсене сутмашкӑн шухӑшсем сӗнмелле,
«Кашни кӑтарту – хӑвӑра кӑтартмалли май. Подиума тухни – пултарулӑх шухӑшне коммерци проектне ҫавӑрма май паракан шанчӑк», — ҫапла палӑртаҫҫӗ йӗркелӳҫӗсем.
Чӑваш поэчӗсем Пӗтӗм тӗнчери «Туслӑх ҫыранӗсем» конкурсра палӑрнӑ. Кун пирки МАХри «Хыпар - Вести Чувашия» канала вуласа пӗлтӗмӗр.
Унта хыпарланӑ тӑрӑх, Л. Север ячӗллӗ «Туслӑх ҫыранӗсем» Пӗтӗм тӗнчери поэзипе куҫару конкурс-фестивалӗ Ростов облаҫӗнче кӑҫал 11-мӗш хут иртнӗ. Унта Раҫҫейри тӗрлӗ регионтан тата ют ҫӗршывсенчен сӑвӑҫсем хутшӑнаҫҫӗ, пӗр-пӗрин хайлавӗсене тепӗр чӗлхене куҫарассипе ӑмӑртаҫҫӗ иккен. Тӗп номинацире Ҫӗрпӳ округӗнчи Кӗҫӗн Тивӗш ялӗнче пурӑнакан Дмитрий Трофимов финалистсен шутне кӗнӗ. Чӑваш кӗнеке издательствин редакторӗ, РФ Писательсен союзӗн членӗ Ольга Австрийская (Иванова) вара наставник пек хутшӑннӑ. Вӗсен куҫарӑвӗсем ятарлӑ кӗнекере пичетленсе тухӗҫ.
Конкурсӑн ытти номинацине хутшӑнакан та сахал мар пулнӑ. РФ Писательсен союзӗн пайташӗ Галина Матвеева «Эпир пӗрле» номинацире – 3-мӗш, «Ачалӑха илсе каякан ҫул» номинацире 1-мӗш вырӑн ҫӗнсе илнӗ.
Хӗрлӗ Чутай тӑрӑхӗнчи Тралькасси клубӗнче ачасене ҫӑм арлама вӗрентнӗ. Ку ӗҫе хӑнӑхтараканни — Галина Еремеева.
«Кӗнчеле йывӑҫҫипе е ятарлӑ урапапа арлатпӑр. Кӗнчеле ҫӑмха юпинчен е туратӗнчен, лаппинчен, пуҫӗнчен, ҫӑмхинчен, кантринчен тӑрать. Кӗнчеле туралли те, хӑма пуҫли те пулать. Ҫӑмхана кӗнчеле пуҫне ҫӳхе кантрапа ҫыхса вырнаҫтаратпӑр та сулахай алӑри пуҫ, шӗвӗр тата вӑта пӳрнесемпе сӗвем хыҫҫӑн сӗвем туртса кӑларатпӑр, ҫӑма сылтӑм алӑри палӑртнӑ пӳрнесемпе пӗтӗрсе арлатпӑр, ҫӳхе ҫипе йывӑҫ йӗке тавра авӑратпӑр. Хыҫҫӑн ҫӑмхаран каллех сӗвем кӑларса, авӑрнӑ ҫиппе сыпӑнтарса пӗтӗретпӗр, ҫӑма авӑра-авӑра ҫӳхе ҫип тӑватпӑр, ӑна йӗке тавра ерипен ҫавӑратпӑр», – каласа кӑтартнӑ хӗрарӑм «Хресчен сасси» хаҫат корреспондентне.
Шупашкар хулинчи Трактор музейне эсир халь ҫине кайса курнӑ-и? Унта чӑн-чӑн гигант вырӑн тупнӑ.
Ҫӗнӗ экспонат – совет тапхӑрӗнче ПКТ-2 йывӑр путепрокладчик. Унччен ҫак 20 тонна таякан машина РФ Инкеклӗ лару-тӑру министерствин Чӑваш Енри тӗп управленийӗнче ӗҫленӗ. Халӗ ав тивӗҫлӗ канӑва кайнӑ та Трактор музейӗнче вырӑн тупнӑ.
Музей ӗҫченӗсем каласа кӑтартнӑ тӑрӑх, ПКТ-2 трактора МАЗ-538 грузовике тӗпе хурса тунӑ. Унӑн тивӗҫӗ – ҫул ҫук ҫӗрте ҫул тӑвасси: вӑрманта, шурлӑхра… Машинӑн икӗ кабина, ҫавна май вӑл каялла та, малалла та пӗр пек хӑвӑртлӑхпа кайма пултарать. Вӑл нумайран та сехетре 45 ҫухрӑм хӑвӑртлӑхпа ҫӳрет. Йывӑр ҫулсем ҫинче ҫӳрес енӗпе вара вӑл гусеницӑллӑ трактортан пӗрре те кая мар. Пӗр сӑмахпа, совет тапхӑрӗнчи инженерин чӑн-чӑн хӑвачӗ!
Шупашкарта наци культурисен «Хула пикникӗ» фестивалӗ иртӗ. Ӑна Чӑваш Енӗн тӗп хулин кунне халалланӑ. Мероприяти ҫурла уйӑхӗн 9-мӗшӗнче Лакрей вӑрманӗнче пулӗ. Вӑл 12-рен пуҫласа 18 сехетчен иртӗ.
«Хыпар» издательство ҫурчӗн халӑх тетелӗнчи пабликӗнче пӗлтернӗ тӑрӑх, уявра пирӗн республикӑра пурӑнакан тӗрлӗ халӑхӑн культурипе ҫывӑхрах паллашма май килӗ. Тӗрлӗ халӑхӑн наци апатне астивсе пӑхма, халӑх ӑстисен ӗҫӗсемпе паллашма, ӑсталӑх лаҫҫисене хутшӑнма, наци вӑййисенче тата спорт ӑмӑртӑвӗсенче тупӑшма май килӗ.
Унсӑр пуҫне тӗрлӗ халӑхӑн юрри-ташшипе киленме май туса пырӗҫ.
Уяв, тепӗр хутчен аса илтерер, Лакрей вӑрманӗнче ҫурла уйӑхӗн 9-мӗшӗнче пулӗ. Ку вӑл — вырсарни кун. Кӑмӑл пулсан ҫитсе курма май пур.
Красноармейски тӑрӑхӗнчи Пӑрӑнтӑк ялӗ ҫурла уйӑхӗн 1-мӗшӗнче ҫуралнӑ кунне паллӑ тунӑ. Кун пирки «Хыпар» издательство ҫурчӗн пабликӗнче хыпарланӑ. Унта пӗлтернӗ тӑрӑх, «уява ял ҫыннисем кӑна мар, хулара тӗпленнисем те, кӳршӗ ялсенче пурӑнакансем те йышлӑ пухӑннӑ».
Пӑрӑнтӑксене саламлама тӳре-шара, депутат тавраш пырса ҫитнӗ. Ҫав шутра Красноармейски тӑрӑхӗн пуҫлӑхӗ Павел Семенов, Красноармейски районӗнчи Депутатсен пухӑвӗн председателӗ Валерий Петров пулнӑ.
Ял кунне хатӗрленсе вырӑнти хастарсем урамсене илемлетсе капӑрлатнӑ. Сӑн ӳкерӗнмелли вырӑнсем те тунӑ. Ҫатан карта тытса ҫавӑрнӑ, ачасем валли каруҫҫел ӑсталанӑ, чуччу ҫакнӑ.
Ял уявӗнче пӑрӑнтӑксем туй йӑли-йӗркине тата салтака ӑсатнине кӑтартнӑ. Уява вӗҫлес умӗн вӑйӑ картине тӑнӑ.
Ырантан, ҫурла уйӑхӗн 5-мӗшӗнчен, Раҫҫейӗн чукун ҫулӗ «Легендарлӑ Хӗрлӗ» ретропуйӑса ҫула кӑларӗ.
Вӑл «Шупашкар-Канаш» маршрутпа ҫӳрӗ. Ретропоезд рейса ҫурла уйӑхӗн 5 тата 6-мӗшӗсенче, 8-10-мӗшӗсенче, 12-16-мӗшӗсенче ҫула тухӗ. Шупашкартан вӑл 8 сехет те 20 минутра хускалса кайӗ те Канаша 11 сехет те 15 минута ҫитӗ. Каялла килме вара унтан 14 сехет те 30 минутра тухӗ, Шупашкара 16 сехет те 15 минутра ҫаврӑнса килӗ.
Ретропуйӑс Л сериллӗ пӑравусран тата хальхи вӑхӑтри хӑтлӑ вакунсенчен тӑрать. Вӗсене революци умӗнчи стильпе капӑрлатнӑ, шалта вара интерьерӑн авалхи япалисемпе хитрелетнӗ.
Ҫул ҫинче экскурси тата театрализациленӗ программа пулӗ. Ҫулҫӳрев вӑхӑтӗнче пассажирсене ӗмӗрӗн пӗрремӗш чӗрӗк ӗмӗрӗнчи лару-тӑрӑва, Граждан вӑрҫи, революци тата революци хыҫҫӑнхи вӑхӑта аса илтерӗҫ, Василий Чапаевпа паллаштарӗҫ.
Чӑваш Енӗн премьер-министрӗ Сергей Артамонов ытти хайлавран уйрӑлса тӑракан хӑватлӑ юрӑ ҫырма ыйтнӑ. Кун пирки вӑл Раҫҫейӗн тӗрленӗ карттин музейӗнче чӑваш эстрада артисчӗсемпе тӗл пулсан каланӑ.
«Вӑл юрӑ пирӗн йӑх-несӗлӗмӗрсем патне тавӑртӑр: ҫемье, ял, хула, йӑх-несӗлӗмӗре асра тытни патне, — тенӗ вӑл. — Чӑваш халӑх поэчӗн Петӗр Хусанкайӑн питӗ тӗрӗс шухӑшлӑ йӗркесем пур: «Эпир пулнӑ, пур, пулатпӑр». «Ку сӑмахра пирӗнччен малтан пурӑннисене хисеплени, паян пуррисен пӗрлӗхӗ, ыран, пирӗн хыҫҫӑн, килекенсене шанни», – тенӗ Сергей Артамонов.
Проекта Августа Уляндина, Алексей Московский, «Глянец» ушкӑн, Алексей Шадриков, Егор Матвеевский, Маргарита Финогентова, Владимир Ашмарин, Элтияр Александров, Денис Павлов, Виталий Адюков, Ольга тата Анна Пегановсем, Вячеслав Дик, «Вирьял» ансамбль, «Приданое» фольк-ушкӑн тата ытти музыкант хутшӑнма пултарать.
+15.3 °C