Шупашкарта пурӑнакан 71 ҫулти арҫын ӗмӗрӗпе укҫа пухса пурӑннӑ. Унӑн кӗмӗлӗ ҫапла вара 2,5 миллион тенкӗ таран пуҫтарӑннӑ. Анчах нумаях пулмасть вӑл ҫав укҫана пач пӗлмен ҫынсене куҫарнӑ та панӑ.
71 ҫулти арҫынна мессенджерсенчен пӗринче вӑл ют ҫӗршыва укҫа куҫарса панӑ, ҫавӑншӑн ун тӗлӗшпе пуҫиле ӗҫ пуҫарнӑ тесе хӑратнӑ.
Улталаканнисем видеоҫыхӑнупа калаҫнӑ май хӑйсемпе Федерацин хӑрушсӑрлӑх службин тата Росфинмониторингӑн ӗҫченӗсем тесе суя удостоверенийӗсем кӑтартнӑ.
Пӗлмен-туман ҫынсене итлесе арҫын хӑй пухса пына 2,5 миллион тенке ют счетсем ҫине куҫарса янӑ.
Ҫу уйӑхӗн 20-28-мӗшӗнче Владивосток хулинче «Активное долголетие: Россия — Китай» (чӑв. Хастар ватлӑх: Раҫҫей — Китай) вӗренмелли пӗтӗм тӗнчери I стажировка иртет. Унта Чӑваш Енри Лариса Мышева кӗмӗл волонтёр хутшӑнать.
Лариса Ивановна «Контактра» халӑх тетелӗнчи хӑйӗн страницинче пӗлтернӗ тӑрӑх, Раҫҫейӗн 19 регионӗнчи социаллӑ сферӑра ӗҫлекен уучрежденисен директорӗсемпе специалисчӗсем, пурӗ 85 ҫын, Владивостокра пуҫтарӑннӑ.
Делегаци пайташӗсем Китайри Яньцзи тата икӗ ҫӗршыв чиккинче вырнаҫнӑ Хуньчунь хула уесӗнче пулса курӗҫ. Унт вӗсем Китайри патшалӑх учрежденийӗсен вата ҫынсен ыйтӑвӗсемпе тимлекен ӗҫченӗсемпе тӗл пулӗҫ.
Патӑрьелте 73 ҫулти хӗрарӑма таптаса кайнӑ.
32 ҫулти водитель «Лада Приора» автомобильпе ватӑ ҫын ҫине пырса кӗнӗ. Хӗрарӑм ҫав вӑхӑтра ҫуран ҫӳрекенсене каҫса ҫӳремелли ҫулпа утса пынӑ.
Инкек район центрӗнчи Ленин проспектӗнчи 47-мӗш ҫурт патӗнче пулса иртнӗ. Суранланса пӗтнӗ ватта пульницӑна ӑсатнӑ.
«Старость в радость» (чӑв. Ватлӑх савӑнма) ыркӑмӑллах фончӗ Чӑваш Енре пурӑнакан ватӑсемпе сусӑрсене час-часах тӗрлӗ енчен пулӑшать. Хальхи вӑхӑтра вӑл вутӑ хутса пурӑнакан пӗччен ватӑсемпе сусӑрсене вутӑ туянса парать, килех илсе ҫитерсе парать.
Вутӑ та туянайман Каҫал тарӑхӗнчи 11 ҫынна пулӑшнӑ та ӗнтӗ. Тӳлевсӗр вутӑллӑ пулнисен йышӗнче Гельсинур Гилачетдиновна ятла хӗрарӑм та пур. Ырӑ ҫынсем килӗ умне касса-ҫурса хатӗрленӗ пӗр машина вутӑ илсе килсе пушатсан вӑл питех те савӑннӑ.
Шупашкар хулинчи халӑха социаллӑ пулӑшу паракан комплекслӑ центрта ватӑсене чӑваш классикӗ ҫинчен каласа кӑтартнӑ.
«Литература классикӗн классикӗ» литература сехетне Константин Иванов ҫуралнӑранпа 135 ҫул ҫитнине халалланӑ.
Литература сехетне хальхинче те М. Шумилов ячӗллӗ вулавӑш ӗҫченӗ
Наталья Хуморова йӗркеленӗ. Вӑл Константин Иванов ҫинчен кӑсӑклӑ нумай факт каласа кӑтартнӑ.
Шупашкарта пурӑнакан 67 ҫулти хӗрарӑм ватлӑхра инвестор пулса укҫа ҫапас тенӗ.
Ака уйӑхӗн пуҫламӑшӗнче ун патне пӗр хӗр шӑнкӑравланӑ та криптовалюта сутса укҫа тума май пуррине ӗнентернӗ. Ун валли укҫана ятарлӑ счет ҫине хывма сӗннӗ. Укҫа тесен шапа та алӑ тӑсать теҫҫӗ те, ватӑ ҫын ҫунатланса кайнӑ. Телефона мобильлӗ приложени вырнаҫтарнӑ та ун урлӑ темле счет ҫине 1,5 миллион тенкӗ укҫа куҫарса янӑ.
Паян, ҫу уйӑхӗн 11-мӗшӗнче, Шупашкарта пурӑнакан вӑрҫӑ ветеранӗ Агриппина Янович 100 ҫул тултарнӑ.
Элӗк районӗнчи Тури Татмӑш ялӗнче ҫуралса ӳснӗ пикене 1942 ҫулхи ҫуркунн ҫар ретне илнӗ. Медицина сестри пулса вӑл Мускавран Кенигсберга ҫитнӗ, Курск пӗкки патӗнчи хаяр ҫапӑҫӑва хутшӑннӑ.
Агриппина Алексеевна юнпа тӑпра хутӑшнӑ самантсем пирки нумай каласа кӑтартма пултарать. Темле хӑрушӑ вӑрҫӑра пулнӑ пулин те вӑл ӑшӑ кӑмӑлла та уҫӑ чунлӑ.
Кинемей ӗҫлеме ӳрӗк пулнӑран пӗлтӗр те дачӑра ҫу каҫнӑ.
Агриппина Алексеевнӑн нумай награда. Кӑҫал вара ӑна «Чӑваш Республикин хисепле гражданине» ят панӑ.
Шупашкарта пурӑнакан 86 ҫулти Людмила Никифорова Мускаври Ҫӗнтерӳ парадне хутшӑнма Мускава кайнӑ.
Людмила Васильевна Ленинград хулинче ҫуралнӑ. Ачан ашшӗ, вӑрҫӑн малтанхи кунӗсенчех фронтра ҫапӑҫнӑскер, 1944 ҫулта вилнӗ, ҫемьене тӑлӑха хӑварнӑ. Людмила амӑшӗ ача садӗнче воспитательте ӗҫленӗ.
1943 ҫулта Ленинградра пурӑнакансене эвакуацилеме тытӑнсан Людмила Васильевнӑна амӑшӗпе пӗрле Чӑваш Енри Шӑмӑршӑна ӑсатнӑ. Ҫемье кунтах юлнӑ.
Людмила Васильевна икӗ ача — ывӑлпа хӗр — пӑхса ӳстернӗ, халӗ унӑн виҫӗ мӑнук пур.
Паян Шупашкар аэропортӗнче ӑна «Победа» авиакомпани Людмила Васильевнӑна ҫывхарса килекен Ҫӗнтерӳ кунӗпе саламланӑ май чечек ҫыххи парнеленӗ.
Ӗнер Чӑваш Енре «Победа 80» (чӑв. Ҫӗнтерӳ 80) авточупу иртнӗ. Унта хутшӑннисене салтак пӑттипе сӑйланӑ.
Авточупӑва республикӑн Ӗҫ тата социаллӑ хӳтлӗх министерстви Республикӑри ветерансен канашӗпе (ертӳҫи — Генрих Васильев) йӗркеленӗ. Авточупӑва республикӑн тӗрлӗ районӗнчи 80 автомобиль тата 160 ытла ветеран хутшӑнна.
Мероприятие республикӑн ӗҫ тата социаллӑ хӳтлӗх министрӗн ҫумӗ Лариса Арсентьева, Раҫҫей Геройӗ Николай Гаврилов, Чӑваш Енӗн Общество палатин председателӗ Ванифатий Шайкин, Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центр директорӗ директорӗ Светлана Милкина саламланӑ.
Ҫак кунсенче пирӗн ҫӗршыв Аслӑ Ҫӗнтерӗве тунӑранпа 80 ҫул ҫитнине кӗтсе илме хатӗрленет. Шупашкарта та тӗрле шайри тӳре-шара ветерансем патне ҫитсе вӗсене уявпа саламлать, парнепе хавхалантарать.
Хӗрлӗ Чутай районӗнчи Хыркасси ялӗнче 1926 ҫулхи пуш уйӑхӗнче ҫуралнӑ, халӗ Шупашкрата пурӑнакан Иван Петрова та саламланӑ. Ун патне хулари халӑхӑн социаллӑ ыйтӑвӗсене тивӗҫтерекен комплекслӑ центр ӗҫченӗсем пырса ҫитнӗ.
Сӑмах май каласан, унччен Иван Афанасьевич, ытти ветеран евӗрех, Ҫӗнтерӗве халалласа республикӑра пӗр хутчен паракан 20 пин тенкӗ укҫана тивӗҫнӗ тата федераци шайӗнчи 80 пин тенке.
+20.3 °C