Сире общество транспорчӗпе ҫӳреме килӗшет-и? Ку тытӑмра сире йӑлтах тивӗҫтерет-и? Раҫҫейри тӗрлӗ хулара пурӑнакан ҫынсен шухӑшне sz-fo.ru портал ыйтса пӗлнӗ те танлаштарӑм хатӗрленӗ.

«Общество транспортне кӗтсе илме пулать-и? Унпа хулан кирек хӑш кӗтесне те ҫӑмӑллӑнах ҫитме май пур-и?» Ҫак ыйтсене респондентсем хуравланӑ.

Списока Шупашкар хули те лекнӗ. Вӑл 11-мӗш вырӑн йышӑннӑ. Анчах, пӗлтӗрхипе танлаштарсан, вӑл 5 йӗрке аяларах аннӑ. Ыйтӑма Шупашкарта пурӑнакан 1214 ҫын хутшӑннӑ.

Танлаштарӑмра 1-мӗш вырӑнта – Тӗмен. 2-мӗш йӗркене Грозный хули йышӑннӑ, 3-мӗшне – Ангарск. Чи аялти йӗркесене Волгоград, Шахты, Балашиха хулисем йышӑннӑ.

Чӳк уйӑхӗн 15-17-мӗшӗсенче Кӑнтӑр Корейӑри Сеулта кирек пуканӗ йӑтассипе тӗнче ӑмӑртӑвӗ иртнӗ. Шупашкарти «Энергия» спорт шкулӗнче ӑсталӑхне туптакан спортсменсем, Чӑваш патшалӑх ял хуҫалӑх академийӗн студенчӗсем Алексей Иванов тата Анастасия Александрова унта лайӑх кӑтартупа палӑрнӑ.

Алексей Иванов 32 килограмм таякан кирек пуканне 114 хутчен тӗртнӗ, 193 хутчен сулласа ҫӗкленӗ. Ҫапла майпа вӑл ылтӑн медаль ҫӗнсе илнӗ. Кунсӑр пуҫне пирӗн ентеш юниорсен хушшинче тӗнчен икӗ рекордне ҫӗнетнӗ.

Анастасия Александрова та пӗрремӗш вырӑн йышӑннӑ. Вӑл 24 килограмлӑ кире пуканне 145 хутчен ҫӗкленӗ. Настя кунашкал кӑтартушӑн савӑннӑ, анчах вӑл кунпа кӑмӑллах юлман.

Семинар хыҫҫӑн.

Шупашкара ҫитес вӑхӑтра йывӑр чирлӗ ачасене ҫӑлӑнӑҫ пама ятарлӑ аппаратсем кӳрсе килӗҫ. Ҫав аппаратсене ытти чухне усӑ курнӑ оборудовани пулӑшайми пулсан ҫеҫ парӗҫ. Кун пирки Чӑваш Ен ПТРК пӗлтерет.

Раҫҫейӗн ача-пӑча тӗп реаниматологӗ Сергей Степаненко Чӑваш Енӗн тӗп хулинче пулнӑ май республикӑри тухтӑрсем валли йӗркеленӗ вӗренӳ семинарне хутшӑннӑ тата сывлӑх сыхлавӗн министрӗпе Владимир Викторовпа тӗл пулнӑ. Сергей Степаненко республикӑра ачасене ҫӑлмалли ҫӗнӗ меслетпе усӑ курма сӗннӗ. Вӑл ӳпкене искусствӑлла майпа нумай вӑхӑт сывлаттаракан аппарата ылмаштарма май парать.

«Пирӗн респираторлӑ пулӑшу меслетне аталантармалла. Чӑваш Енре ӗҫе чунӗпе парӑннӑ тухтӑрсем вӑй хураҫҫӗ. Меслете ӗҫе кӗртме условисем пур», — тенӗ Раҫҫейӗн ача-пӑча тӗп реаниматологӗ.

Ҫӗнӗ ҫулччен вӑхӑт нумай юлнӑ пек туйӑнать-и? Анчах сиссе те юлаймастӑр – уяв ҫитсе тӑрӗ. Ҫӗнӗ ҫула ӑҫта ирттересси пирки пуҫ вататӑр-и? Tvil.ru сайт вара туристсене уява Шупашкарта ирттерме сӗнет.

Мӗншӗн шӑпах Шупашкарта-ха? Мӗншӗн тесен тӗп хуламӑрта уява ирттерме укҫа нумай кирлӗ мар-мӗн. Tvil.ru сайт Ҫӗнӗ ҫулта йӳнӗ хакпа канма май пур хуласен танлаштарӑмне хатӗрленӗ.

Сайт раштав уйӑхӗн 30-мӗшӗнчен пуҫласа кӑрлачӑн 8-мӗшӗччен хӑна ҫурчӗсемпе хваттерсене тара илме мӗн хак пулнине шута илнӗ. Шупашкар танлаштарӑмра 6-мӗш йӗркене йышӑннӑ. Вӑтамран туристсем Шупашкарта пурӑнмалли вырӑна икӗ талӑклӑха тара илеҫҫӗ. Куншӑн вӗсем 1,5 тенкӗрен те сахалрах тӳлеҫҫӗ.

ТОП-10 списока Смоленск, Аслӑ Новгород, Воронеж, Сарӑту, Новосибирск, Ижевск, Белгород, Липецк, Киров хулисем те кӗнӗ.

Каҫхи троллейбусен шӑпи пирки халӗ те калаҫаҫҫӗ. Аса илтерер: Алексей Ладыков раштав уйӑхӗнче вӗсене каллех пӑрахӑҫлама пултарасси пирки каланӑччӗ.

Паян Шупашкар хула администрацийӗнче иртнӗ планеркӑра каллех каҫхи троллейбуссем пирки калаҫнӑ. Троллейбус управленийӗн директорӗ Александр Каныгин пӗлтернӗ тӑрӑх, 22.50 тата 23.15 сехетсенче савутсем патӗнчен тапранакан транспорта 1-2 ҫын ҫеҫ ларать.

Алексей Ладыков лару-тӑрӑва тӗплӗнрех тишкерме ыйтнӑ. Малашне те юлашки рейса 1-2 ҫын ҫеҫ ларсан троллейбуссене 22 сехет хыҫҫӑн ҫӳреттерме пӑрахтарасшӑн. Алексей Ладыков кун валли 2 эрне вӑхӑт панӑ.

Аса илтерер: каҫхи сменӑпа ӗҫлекен савутсемпе предприятисем каҫхи троллейбуссене каялла тавӑрма ыйтнӑччӗ. 1, 2, 3, 5, 11, 16, 18, 19-мӗш маршрутсемпе ҫӳрекен троллейбуссене 22 сехет хыҫҫӑн та ҫӳреттерме тытӑннӑччӗ.

Паян Шупашкарта хваттер кӗтсе ывӑннӑ пайҫӑсем пикета тухнӑ.

Ҫурта тунӑ чухнех ӳлӗмрен хваттер илес тесе укҫа хывса ,ӑра уҫҫине кӗтсе илейменнисем хӑй вӑхӑтӗнче нумайччӗ. Халӗ ун пек шар куракансем йышлах мар-ха, ҫапах та пӗр ҫын шӑпи те кун пек чуна ыраттарать. Теприсем кивҫен илсе е пурӑнмалли пӗчӗкрех кӗтесе сутса пайҫӑ евӗр укҫа хываҫҫӗ.

Кун пек йывӑр лару-тӑрӑва лекнисен ыйтӑвне Чӑваш Ен ертӳҫисем сӑнаса тӑнине пӗлтерсех тӑраҫҫӗ-ха. Ҫапах та йывӑрлӑхӗ татӑлман-ха. Ахальтен мар ӗнтӗ паян ҫынсем, 30 ҫынна яхӑн, пикета тухнӑ. Кӑмӑлсӑр ҫынсем Шупашкарти П. Хусанкай ячӗллӗ культура керменӗ умне пуҫтарӑннӑ. Вӗсем пикета паян ирпе 9 сехете пухӑннӑ.

30-а яхӑн ҫын ҫурт тӑвакан организаницесенчен пӗрне, «Алза» строительство компанине, ӳпкелесе калаҫнӑ. Вӗсемпе «Тӗрӗслӗхшӗн Раҫҫей» партин регионти уйрӑмӗн пайташӗсем тӗл пулнӑ.

Раштав уйӑхӗнче Шупашкарти «Шупашкар-Арена» пӑр керменӗнче хӗрарӑмсен хушшинче ирӗклӗ кӗрешӳ енӗпе Тӗнче кубокӗ иртет. Унта Японири, Китайри, АПШри, Азербайджанри, Монголири, Швецири, Украинӑри, Раҫҫейри спортсенсем хутшӑнӗҫ.

Ӑмӑртуччен вӑхӑт нумаях юлмарӗ. Раҫҫейри спорт кӗрешӗвӗн федерацийӗ ҫӗнтерӳҫем валли хӑйне евер парне хатӗрленӗ: пӑхӑртан тунӑ статуэтка тата мрамортан хатӗрленӗ матрӳшке. Матрӳшке ӑшӗнче – спортсменсен сӑнӗ. Унта Алена Карташовӑпа Марина Шишкинӑна курма пулать.

Раҫҫейри спорт кӗрешӗвӗн федерацийӗ мӗншӗн шӑпах матрӳшке хатӗрленӗ-ха? Вӑл Раҫҫейпе тачӑ ҫыхӑннӑ. Эппин, ҫӗнтерӳҫӗ-спортсменсем хӑйсемпе пеӗле пирӗн ҫӗршывӑн пӗр пӗчӗк пайне илсе кайӗҫ. Федераци ҫак матрӳшкене ҫур ҫул хатӗрленӗ.

Сӑмах май, 2015 ҫулта Питӗрте хӗрарӑмсен хушшинче ирӗклӗ кӗрешӳ енӗпе иртнӗ Тӗнче кубокӗнче те матрӳшке тӗп паллӑ пулнӑ.

Шупашкар – ачасемшӗн хӑтлӑ хула-и? Ҫакна www.domofond.ru портала тишкерсен пӗлме пулать. Экспертсем ача-пӑча инфратытӑмӗ аталаннӑ хуласен списокне хатӗрленӗ.

Танлаштарӑма хатӗрличчен Раҫҫейри пысӑк хуласенче пурӑнакансен хушшинче ыйтӑм ирттернӗ. «Манӑн районта ачасене кирли йӑлтах пур: вӑйӑ лапамӗ, ача пахчи, поликлиника, шкул тата ытти те» предложение 1-10 балпа хаклама сӗннӗ. Ыйтӑма пӗтӗмпе 258441 ҫын хутшӑннӑ.

Танлаштарӑмра малти йӗркене Мускав хули йышӑннӑ. Иккӗмӗш вырӑнта – Питӗр. Виҫҫӗмӗш йӗркене Тӗмен йышӑннӑ. Шупашкар миҫемӗш вырӑна лекнӗ-ха? Пӗлтӗрхипе танлаштарсан, лару-тӑру улшӑнман. Кӑҫал та Шупашкар ҫиччӗмӗш вырӑн йышӑннӑ. Пирӗн хулара ыйтӑма 1214 ҫын хутшӑннӑ.

Танлаштарӑмӑн чи аялти йӗркисене Якутск, Шахты, Махачкала хулисем йышӑннӑ.

Шупашкарта чи лайӑх парикмахера суйланӑ. Конкурс Чӑваш патшалӑх оперӑпа балет театрӗнче чӳк уйӑхӗн 15-мӗшӗнче иртнӗ. Унта 17 парикмахер хутшӑннӑ.

Парикмахерсем 75 минутра хӗрсене прическа тунӑ. Вӗсен ӗҫне ЧР Экономика аталанӑвӗн министерствин ӗҫченӗсем, илем салонӗсен ертӳҫисем хакланӑ.

Палӑртма кӑмӑллӑ: чи лайӑх парикмахер Дария Прокопьева пулнӑ. 2-мӗш вырӑна Виктория Иванова йышӑннӑ, 3-мӗш вырӑна вара — Оксана Иванова.

Конкурсҫӑсене «Професси легендисем» номинацире те палӑртнӑ. Малти вырӑна Инга Чалбаева йышӑннӑ. 2-мӗш вырӑна Нелли Москвичева тухнӑ. 3-мӗш вырӑнта Нина Ильданова пулнӑ.

Ҫул-йӗрти инкекре вилнисене асӑнса чӳк уйӑхӗн виҫҫӗмӗш вырсарникунӗнче Пӗтӗм тӗнчери астӑвӑм кунӗ иртет. Ҫавна 2005 ҫулта йӑлана кӗртсе янӑ. Кӑҫалхи ырана, чӳк уйӑхӗн 19-мӗшне, тивет.

Ҫулта-йӗрте вилнисене асӑнса, чӗррисене ыррине сунса чиркӳсенче кӗлӗ вулӗҫ.

Шупашкарта ыран кӑҫалхи юпа уйӑхӗн 25-мӗшӗнчи инкекре шар курнӑ «ВАЗ-2109» автомашинӑна автоэвакуатор ҫине вырнаҫтарӗҫ те хула ҫыннисене кӑтартса ҫӳрӗҫ.

Астӑвӑм кунне халалласа Шупашкарта ӗнерех хӑш-пӗр мероприяти ирттернӗ. Шупашкарти 2-мӗш шкул ачисем ҫуран ҫӳрекенсене тата водительсене хутран ӑсталанӑ пирӗштисене парнеленӗ. Пӗтӗмп 130 пирӗшти ӑсталанӑ ачасем. Шӑпах ҫавӑн чухлӗ ҫын кӑҫал ҫул-йӗр ҫинчи автоаварире сарӑмсӑррӑн куҫ хупнӑ.