Шупашкарти «Университет» микрорайонта 1500 ача вӗренмелӗх шкул хута ярӗҫ. Ӑна 2024 ҫулхи утӑ уйӑхӗн 31-мӗшӗччен туса пӗтермелле.
Вӗренӳ учрежденине «Тус» строительство компанийӗ хӑпартӗ. Шкула тума хыснаран 1 миллиард та 408 миллион тенкӗ уйӑрӗҫ.
Асӑннӑ суммӑран 569,9 миллионне килес ҫул уйӑрӗҫ, 2024 ҫулта – 838,1 миллион тенкӗ.
Шкул Лукин урамӗнчи 5-мӗш ҫурт тӗлӗнче пулӗ.
«Лента» предприятире производствӑна модернизацилема палӑртнӑ. Ҫав тӗллевпе унта 30 миллион тенкӗ укҫа хывӗҫ.
Предприяти Чӑваш Енӗн Промышленноҫа аталантаракан фончӗпе ятарлӑ килӗшӗве алӑ пусса ҫирӗплетнӗ. Ҫавна май акционерсен обществи фондран ҫулталӑкра 1 процент тӳлемелле кивҫен укҫа илет.
«Кӗмӗле» предприяти кивӗ станоксене ҫӗнӗ йышшисемпе ылмаштарма усӑ курӗ. Латекслӑ ҫурма фабрикатсем хатӗрлекен лини хута яма та палӑртса хунӑ. Ку вӑл производствӑра кирлӗ материала туянса укҫа тӑкаклассине чакарма май парасса шанаҫҫӗ.
Чӑваш Ене кӗнӗ ҫӗрте вырнаҫнӑ 3 стелӑна улӑштарӗҫ. Ку тӗллевпе ятарласа аукцион ирттернӗ. Стелӑсене лартма 8,6 миллион тенкӗ уйӑрма хатӗр.
Вӗсенчен иккӗшне Чӗмпӗр облаҫӗнче лартӗҫ - М-7 тата А-151 федераци ҫулӗсем ҫине. Тепри Тутарстан чиккинче пулӗ.
Аукциона пӗр организаци кӑна хутшӑннӑ. Унпа хальлӗхе килӗшӳ алӑ пусман.
Сӑмах май, стелӑсене улӑштарма ЧР Элтеперӗ хушнӑ, ҫакна вӗсем кивелнипе, сансӑрланнипе сӑлтавланӑ. Кун пирки вӑл кӑҫал кӑрлач уйӑхӗнче каланӑ.
Шупашкарти таксист пӗр кунхине ултавҫӑ капкӑнне ҫакланнӑ.
Юпа уйӑхӗн 13-мӗшӗнче вӑл палламан икӗ ҫамрӑка хула тӑрӑх турттарса ҫӳренӗ. Вӗсем малтан пӗр ҫӗре, унтан тепӗр ҫӗре кӗрсе тухма ыйтнӑ. Ҫамрӑксенчен пӗри ҫула май тенӗ пек хӑйӗн чуна ыраттаракан историне каласа кӑтартма тытӑннӑ: унӑн ачи чирлӗ имӗш, ӑна васкавлӑн сиплеме эмел туянас тесе укҫа пухать.
Таксист ҫамрӑк ашшӗне хӗрхеннипе ҫав ҫыннӑн банк картти ҫине 5 пин укҫа куҫарса панӑ. Тата тепӗр ҫӗре ҫитсен ҫамрӑксем таксиста ҫул укҫи тӳлеме тата кивҫен илнӗ укҫана тавӑрса пама шантарса машинӑран тухнӑ. Анчах водитель вӗсене кӗтсе илеймен. Унтан вӑл йӗрке хуралҫисенчен пулӑшу ыйтнӑ.
Улталаканни судпа унччен темиҫе хутчен те айӑпланнӑ (наркотикпа ҫыхӑннӑ пӑтӑрмахшӑн, вӑрланӑшӑн тата улталанӑшӑн) 20 ҫулти каччӑ пулнӑ. Унӑн ача-пӑча тавраш пулман. Пакунлисем ҫав каччӑ ҫавӑн пек мелпе тата ытти ҫынна та улталаман-ши тесе шанмаҫҫӗ.
Ҫӗнӗ Шупашкарта пурӑнакан 59 ҫулти хӗрарӑм виҫӗ ҫул каялла мессенджерсенчен пӗринче ют ҫӗршыв арҫыннипе ҫыру ҫӳретме тытӑннӑ. Хайхи этем хӑйӗнпе пӗччен ашшӗ тесе пӗлтернӗ, укҫа-тенкӗ ҫитсе пыманнишӗн пӑшӑрханнӑ.
Ҫӗнӗ тусне пуҫ усма парас мар тесе хӗрарӑм темиҫе хутчен те кивҫен илнӗ. 2019-2021 ҫулсенче вӑл ют ҫӗршыври банксен счёчӗ ҫине 1,2 млн ытларах тенкӗ куҫарса панӑ.
Ҫав вӑхӑтра хӗрарӑм ултавҫӑпа ҫыхланнине сисмен те, туйман та. Пакунлисене пӗлтерме хӗрарӑмӑн тӑванӗ хистенӗ. Вӑл ҫывӑх ҫынни кредит илсе тултарнине пӗлсен тӗлӗнсех кайнӑ.
Ҫӗнӗ Шупашкар пуҫлӑхӗ Алексей Ермолаев суя документсемпе усӑ курнӑ тесе шутлаҫҫӗ. Ун тӗлӗшпе пуҫиле ӗҫ пуҫарнӑ.
Вӑл депутат та. Унӑн хӑйӗн ӗҫӗпе, ҫав шутра транспорт тӑкакӗ те, уйӑхра 18 пин тенкӗрен ытла пулмалла мар. Ермолаев 2021 ҫулхи ҫу-юпа уйӑхӗсенче финанс отчечӗ тӑратнӑ. Пӗтӗмпе - 108 пин тенкӗлӗх. Касса чекӗсем пулнӑ, анчах тӑкаксем чӑннипе пулман. Ҫак документсемпе килӗшӳллӗн унӑн счечӗ ҫине укҫа куҫнӑ. Прокуратура пӗлтернӗ тӑрӑх, ҫурла уйӑхӗнче тӗрӗслев пуҫлансан вӑл укҫан пӗр пайне тавӑрса панӑ.
Тӗрӗслев малалла пырать.
Шупашкар хулинче кӗленчесемпе банкӑсем пухакан хатӗрсем (вӗсене фандоматсем теҫҫӗ) вырнаҫтарасшӑн. Вӗсене пысӑк суту-илӳ ҫурчӗсен умӗнче лартса тухасшӑн.
Фандоматсем кирлипе кирлӗ марри пирки ҫынсем мӗн шухӑшланине пӗлме хула администрацийӗн пуҫлӑхӗ Денис Спирин Телеграм-каналта ыйтӑм ирттерессине пӗлтернӗ.
Фандоматсем пластик тата кантӑк кӗленчесене, алюмини банкисене йышӑнаҫҫӗ. Вӗсемшӗн укҫа илме пулать е лавккара тавар туянма купон параҫҫӗ.
Савӑт-сапа йышӑнакан автоматсене тӗрлӗ ҫӗршывра вырнаҫтарнӑ, вӗсем Мускавра тата ытти хӑш-пӗр хулара пур.
Шупашкарта тимӗр гаражсем сутма йышӑннӑ. Вӗсем ҫак адрессемпе вырнаҫнӑ: Илпек урамӗ, 7/2; Чапаев урамӗ, 16 (виҫӗ гараж); Энгельс урамӗ, 3 (тӑватӑ гараж); Чапаев урамӗ, 22; Усадьба урамӗ, 76; Склад проезчӗ, 18; Калинин урамӗ, 109.
Складсене сутасси ҫинчен калакан йышӑнӑва хула администрацийӗн пуҫлӑхӗ Денис Спирин алӑ пуснӑ.
Гаражсен пуҫламӑш сутлӑх хакӗ – 5 333 тенкӗ.
Улатӑрта пурӑнакан 25 ҫулти хӗр тӗнче тетелӗнче хушма укҫа ӗҫлесе илмелли мел пирки пӗлтерӳ курнӑ. Анчах малтан вӗренӳ витӗр тухмалла-мӗн, кун валли вара телефон ҫине сарӑм вырнаҫтармалла. Ку видео урлӑ ҫыхӑнма кирлӗ имӗш.
Кун хыҫҫӑн хӗр вӗсемпе ҫыхӑннӑ. Палламан ҫын мобильлӗ банк сарӑмне кӗрсе электрон енчӗкпе ҫыхӑннӑ операцисем тума ыйтнӑ. Кун хыҫҫӑн хӗр счечӗ ҫинчен 7575 тенкӗ ҫухалнӑ.
Ҫав палламан ҫын видеоҫыхӑну урлӑ хӗр мобильлӗ сарӑмра мӗнле операцисем тунине курса тӑнӑ иккен. Кун тӗлӗшпе пуҫиле ӗҫ пуҫарнӑ.
Чӑваш Енре ӗҫсӗрлӗх шайӗ — 0,81 процент. Республикӑн Ӗҫ тата социаллӑ хӳтлӗх министерстви пӗлтернӗ тӑрӑх, юпа уйӑхӗн 10-мӗшӗ тӗлне пирӗн тӑрӑхра ӗҫсӗр 4896 ҫынна шута илнӗ. Ӗҫлекенсен пӗтӗмӗшле шутӗнчен ку вӑл 0,81 процент пулать. Ҫулталӑк пуҫланнӑранпа 23 пин те 462 ҫынна ӗҫе вырнаҫма пулӑшнӑ.
Пӗтӗм тӗнчери ӗҫ организацийӗн методологийӗпе шутласан, кӑҫалхи ҫӗртме-ҫурла уйӑхӗсенче ӗҫсӗрлӗх хисепӗ пирӗн республикӑра 2,9 процентпа танлашнӑ. Ку цифрӑна Чӑвашстат илсе кӑтартнӑ.
Паянхи куна илсен, ӗҫсӗррисем уйӑхсерен 1500 тенкӗрен пуҫласа 12 792 тенкӗ (ку чи пысӑк виҫе) таран илсе тӑраҫҫӗ. Малтанхи виҫӗ уйӑхра ӗҫ укҫин 75 процентне тӳлеҫҫӗ, анчах ҫав сумма ӗҫсӗррисене паракан чи пысӑк виҫерен иртмелле мар, тепӗр виҫӗ уйӑх – 60 процент, анчах вӑл укҫа 5 пинтен иртмелле мар.
-1.7 °C