«Кино фончӗ» пулӑшнипе Ҫӗмӗрле хулинче «Восход» культура ҫуртӗнче кинозал уҫӑлнӑ. Кун валли 9 миллион тенкӗ субсиди уйӑрнӑ. Республика хыснинчен тепӗр 2 миллион тенкӗ панӑ. Ку – кинозал пӳлӗмне хатӗрлеме.
Ҫак укҫапа нумай функциллӗ конференц-заллӑ пӗчӗк кинозала хӑтлӑлатнӑ. Пӗчӗк кинозал пӗр самантра конференц-зал пулса тӑма пултарать. ЧР Культура министерстви пӗлтернӗ тарӑх, унта ӗҫлӗ, вӗренӳ тата культура мероприятийӗсем йӗркелеме май пур.
Чӑваш Енре инкеклӗ лару-тӑрура шар курнӑ ҫынсене памалли тӳлеве ҫирӗплетнӗ. Вӑл 10 пин тенкӗрен пуҫласа 1 миллион тенкӗ таран пулӗ.
Шар курнисем пӗр хутчен 10 пин тенкӗ илме пултараҫҫӗ. Усӑ курма кирлӗ пурлӑхӑн пӗр пайне ҫухатсан 50 пин тенкӗ тӳлеҫҫӗ, йӑлтах ҫухатсан – 100 пин тенкӗ.
Инкекре ҫын вилсен ҫемьене 1 миллион тенкӗ парӗҫ. Енчен те ҫын инкеклӗ лару-тӑрура сывлӑхне йывӑр сиен кӳрет тӗк 400 пин тенкӗ тӳлӗҫ, вӑйлах сиенленмесен – 200 пин тенкӗ.
ЧР Транспорт министерстви автономлӑ майпа ҫӳрекен 153 троллейбус туянма палӑртнине пӗлтернӗ. Вӗсене икӗ ҫулта туянасшӑн.
153 троллейбусран 40-шне «Хӑрушсӑр тата пахалӑхлӑ ҫулсем» наци проекчӗпе килӗшӳллӗн транспорта ҫӗнетме илӗҫ. Ҫӗнӗ троллейбуссем «Шупашкар – Ҫӗнӗ Шупашкар» ҫулпа ҫӗнӗ маршрутсем уҫма та кирлӗ.
Сӑмах май, пӗлтӗр Чӑваш Ене 68 троллейбус килнӗ, вӗсене федераци хыснинчи укҫапа туяннӑ. Тепӗр 40 транспорт туянмаллине РФ Транспорт министерстви ырланӑ. Вӗсене 2024 ҫулта туянӗҫ.
Аса илтерер: тӳре-шара Шупашкарпа Ҫӗнӗ Шупашкар хушшинче троллейбуссем ҫеҫ ҫӳрессине каланӑ. Пӗрремӗшне ҫитес ҫул яма палӑртнӑ.
Элӗк районӗнче роботлӑ ферма уҫӑлнӑ. Вӑл — «Новый путь» хуҫалӑхра. 200 пуҫ ӗне тытмалли фермӑна пӗлтӗрхи юпа уйӑхӗнче тума тытӑннӑ. Проект 60 миллион тенке кайса ларнӑ, ҫав шутран ҫурри оборудовани туянма тухса кайнӑ. Хуҫалӑх федераци тата республика хыснинчен 18,2 млн тенкӗ илнӗ.
Ҫӗнӗ фермӑра йӑлтах автомат. Ӑслӑ аппарат шӑварать те, тислӗк те кӑларать. Сӗт сумалли тытӑм та ӑслӑскер. Сунӑ чухнех сӗт пахалӑхне тӗрӗслесе тӑрать, япӑх пулсан оператора систерет.
Ултавҫӑсем Ҫӗнӗ Шупашкар хӗрарӑмне 2,5 миллион тенкӗсӗр хӑварнӑ. Вӗсем ӑна патшалӑхран компенсаци паратпӑр тесе улталанӑ.
Ултавҫӑсене вӑл кӑна тӑрӑ шыв ҫине кӑларма пулӑшаять – ҫапла суйнӑ 38 ҫулти хӗрарӑма. Вӗсем хӑйсемпе Тӗп банк тата ФСБ ӗҫченӗсем тесе паллаштарнӑ. Хӗрарӑма укҫи-тенкине сыхласа хӑварма сӗннӗ – нухрата «хӑрушсӑр счет» ҫине куҫармалла-мӗн.
Хӗрарӑм Шупашкарта тата Ҫӗнӗ Шупашкарта темиҫе займ илнӗ. Ҫапла вӑл ултавҫӑсене 2,5 миллион ытла тенкӗ куҫарса панӑ.
Чӑваш Енре 2023 ҫулта пӗр уйӑхра пурӑнма кирлӗ укҫа виҫине палӑртнӑ. Вӑл, хальхипе танлаштарсан, 14,9 процент ытларах пулӗ.
Паян ЧР Министрсен Кабинечӗн ларӑвӗнче республикӑра пурӑнакансем валли ҫитес ҫул пӗр уйӑхра пурӑнма кирлӗ укҫа виҫине пысӑклатассипе ҫыхӑннӑ проекта пӑхса тухнӑ. Вӑл 2023 ҫулта 12 пин те 363 тенкӗпе танлашӗ.
Ӗҫлекен ҫынсем валли ку виҫе 13 пин те 476 тенкӗпе танлашӗ, ачасем валли – 11 пин те 992 тенкӗпе.
Етӗрне районӗн администраци пуҫлӑхӗн ҫумӗ тӗлӗшпе пуҫиле ӗҫ пуҫарнӑ. Ҫав ҫынна ӗҫ вырӑнӗпе усӑ курса улталанӑ тесе шухӑшлаҫҫӗ.
Тӗпчевҫӗсем шухӑшланӑ тӑрӑх, кӑҫалхи пуш уйӑхӗнче Етӗрне районӗн администрацийӗ подряд организацийӗпе коммуналлӑ каяшсен свалкине рекультивацилеме килӗшӳ тунӑ.
Ӗҫе пурнӑҫланӑ чухне подряд организацийӗ йӳнӗрех материалсемпе усӑ курнӑ. Ӗҫе йышӑннӑ чухне вара урӑхла кӑтартнӑ. Ҫавна пӗлсе тӑрсах пуҫлӑхӑн заместителӗ документсене алӑ пусса панӑ. Ҫакӑн хыҫҫӑн бюджетран укҫа куҫарса панӑ.
Чӑваш Енри энергосбыт компанийӗ Арбитраж судне тавӑҫ тӑратнӑ. Вӑл Шупашкарти троллейбус управленийӗнчен 14 миллион та 768 пин те 612 тенкӗ шыраса илесшӗн. Ку – вӗсен парӑмӗ.
Суд тавӑҫа йышӑннӑ. Малтанхи суд ларӑвне кӑрлачӑн 12-мӗшӗнче ирттерме палӑртнӑ.
Палартмалла: энергосбыт компанийӗ кӑҫал авӑн уйӑхӗнче те троллейбус управленийӗнчен 13 миллион тенкӗ шыраса илме тавӑҫ тӑратнӑ. Ун чухне Арбитраж сучӗ йышӑнӑва ун майлӑ тунӑ, парӑма татмалла тесе йышӑннӑ.
Шупашкар хулинче пурӑнакан 63 ҫулти хӗрарӑм ют ҫӗршывра пурӑнакан «савнине» 5 миллион ытла тенкӗ куҫарса панӑ.
Ҫулланнӑ хӗрарӑм арҫынпа тӗнче тетелӗнче паллашнӑ. Пӗр-пӗрин патне ҫыру хыҫҫӑн ҫыру ӑсатнӑ. Хайхи этем хӑйӗн пирки Канадӑран, халӗ Йемен хулинче службӑра тӑратӑп тесе каланӑ. Арҫын авланас кӑмӑллине (хӗрарӑм ҫемье ҫавӑрма ӗмӗтленнине сиснӗ пуль ҫав ӗнтӗ) пӗлтернӗ.
Арҫын ӗнентернӗ тӑрӑх, хӗрарӑмпа ҫывӑхрах паллашма тата ҫемье ҫавӑрма Раҫҫее килме ӗмӗтленет. Анчах ҫул укҫине тата ытти тӑкака саплаштарма хӗрарӑмран ыйтнӑ вӑл. Вӑхӑтлӑха. Кайран йӑлтах саплаштарма шантарнӑ.
Ултавҫа хӗрарӑм 5 миллион та 200 пин тенкӗ куҫарса панӑ. Вӑл укҫана хӗрарӑм хӑйӗн ҫуртне сутса ярсан пухнӑ иккен.
Чӑваш Ен наци телерадиокомпанийӗ спутник урлӑ эфира тухас тесе аукцион ирттерет. Палӑртмалла: 2017 ҫулхи пушӑн 1-мӗшӗнченпе наци телевиденине "Триколор" абоненчӗсем курма пуҫланӑ, ҫав ҫулах ҫӗртме уйӑхӗн 1-мӗшӗнченпе — "Телекарта" абоненчӗсем.
Аукционра палӑртнӑ малтанхи хак - 24 миллион та 924 пин тенкӗ. Ӑна республика хыснинчен тӗллевлӗ субсиди пек уйӑрса парӗҫ. Аукциона раштав уйӑхӗн 23-мӗшӗнче пӗтӗмлетӗҫ.
-1.7 °C