Республикӑра суйлав кампанийӗ пырать. «Ҫыхӑнура» портал суйлав кампанийӗ ирттерме кандидатсем валли мӗн чухлӗ укҫа уйӑрнине тишкернӗ.
РФ Патшалӑх Думине суйланакан кандидатсен суйлав фондне ахаль ҫынсемпе организацисем 30 миллиона яхӑн тенкӗ хывнӑ. Ҫак укҫан 73 проценчӗ Алла Салаевӑна лекнӗ. Ку кӑтартупа республикӑри суйлав комиссийӗ авӑн уйӑхӗн 4-мӗшӗнче паллаштарнӑ.
Алла Салаева валли тӑватӑ организаци тавӑрса памалла мар укҫа куҫарнӑ: НФПР (8 миллион тенкӗ), Чӑваш Енри ФПРСР (8 миллион тенкӗ), Халӑх проекчӗсен фончӗ (2 миллион тенкӗ), «1-мӗш КП» тулли мар яваплӑ общество (1 миллион тенкӗ). Тепӗр 3 миллион тенкӗ физсӑпатсенчен килнӗ.
Анатолий Аксакова 4,5 миллион тенкӗ лекнӗ: «Элара» АОран (3 миллион тенкӗ) тата «3-мӗш стройтрест» СЗ» АОран (1,5 миллион тенкӗ). Владимир Ильина – 1,56 миллион тенкӗ, Александр Андреева 1,25 миллион тенкӗ лекнӗ.
2021 ҫулхи суйлава илес тӗк, Патшалӑх Думине суйланнӑ Анатолий Аксаков валли ун чухне 17 миллиона яхӑн тенкӗ уйӑрнӑ, Алла Салаева валли – 28,7 миллион тенкӗ. Ҫапла иккӗшӗн валли – 45,7 миллион тенкӗ. Ытти кандидатсем организацисенчен пӗтӗмпе 127,6 пин тенке тивӗҫнӗ.
Чӑваш Ен премьер-министрӗ Сергей Артамонов хӑйӗн ӗҫ пӳлӗмӗнче юсав ӗҫӗсем туса ирттересшӗн. Кун валли аукцион пулассине пӗлтернӗ.
Унӑн пӳлӗмӗ Шупашкар хулинчи Президент бульварӗнчи 10-мӗш ҫуртра 14-мӗш хутра вырнаҫнӑ. Аукционӑн малтанхи хакӗ — 7 869 550 тенкӗ. Укҫа-тенке республика хыснинчен уйӑрӗҫ. Аукциона заявкӑсене авӑн уйӑхӗн 9-мӗшӗччен йышӑнаҫҫӗ. Аукционра пӳлӗм номерне кӑтартнӑ – 17-мӗш. Вӑл – Сергей Артамоновӑн.
Пӳлӗм лаптӑкӗ 45,5 тӑваткал метр. Дизайн-проекта «A la Carte» студи 2025 ҫулта хатӗрленӗ. Вӗсем пӳлӗме виҫӗ зонӑна уйӑрнӑ: йышӑну пӳлӗмӗ, кӗтмелли пӳлӗм тата кухня блокӗ.
Аукционра ҫӗнтернӗ подрядчикӑн кивӗ светильниксене, обойсене, плинтуссене илмелле. Унтан маччапа стенана якатса обой, декоративлӑ штукатурка ҫыпӑҫтармалла. Паркет урая лакпа витӗҫ. Аукцион хакне юсав ӗҫӗсем кӑна кӗнӗ, сӗтел-пукан хакне шута илмен.
Шупашкар хулинчи шкулсенчен пӗрне Пӗлӳ кунӗнче пӗр яш линейкӑна питбайкпа пынӑ. Ун чухне вӑл тепӗр ачана чутах ҫапса кайман. Хӑшӗсем патшалӑхӑн ҫул-йӗр хӑрушсӑрлӑхӗн инспекцине пӗлтерес тенӗ, теприсем вара яша хута кӗнӗ.
Пӑтӑрмах хулан Ҫурҫӗр-Хӗвеланӑҫ районӗнче вырнаҫнӑ 45-мӗш шкулта пулса иртнӗ.
Апла пулин те ҫемьене йӗрке хуралҫисем чӗнсе илнӗ-илнех. Унта яшӑн амӑшӗ ывӑлне хӳтӗленӗ: «У всех во дворе есть, чем мое дите хуже!» (чӑв. Пурин те картишӗнче ларать, манӑн ачам ыттисенчен мӗнпе кая?).
Линейкӑна пынӑ питбайка амӑшӗ 220 пин тенкӗ кредит илсе туянса панӑ. Йӗрке хуралҫисем ҫемьене 30 пин тенкӗлӗх штрафланӑ, унсӑр пуҫне яшӑн ашшӗ-амӑшне хӑйсен тивӗҫне йӗркеллӗ пурнӑҫламаншӑн административлӑ май майпа явап тыттарӗҫ.
Ҫӗнӗ Шупашкар хӗрарӑмӗ урамра ӳсӗр ҫывӑракан пӗлӗшӗн укҫине вӑрланӑ. Халӗ ҫавӑншӑн ӑна тӗрмене хупса хумасӑр ҫулталӑклӑха ирӗкрен хӑтарма йышӑннӑ.
Ҫӗнӗ Шупашкарта пурӑнакан пӗр пенсионерка пенсин пӗр пайне кашни уйӑхрах пухса пынӑ. Ӑна вӑл банкра тытман, ялан ҫумра илсе ҫӳренӗ. Пухнӑ укҫапа вӑл хваттер юсас тенӗ.
Пӗр кунхине хӗрарӑм 250 тенкӗ укҫа, карас телефонӗ тата хутаҫри 235 пин тенкине илсе уҫӑлма тухнӑ. «Бистро» кафене кӗрсе икӗ черкке эрех ӗҫнӗ. Тахҫан та пӗрре ҫеҫ ӗҫет-мӗн те часах ӳсӗрӗлсе кайнӑ. Кафере паллакан хӗрарӑма курсан унпа ӗҫме тытӑннӑ, кайран мӗн пулса иртнине астумасть.
Вӑл Ҫӗнӗ Шупашкарти хула больницинче ҫеҫ тӑна кӗнӗ. Ҫипуҫӗ вараланса пӗтнӗ пулнӑ, пичӗ суранланнӑ, телефонпа укҫа ҫумра пулман.
Тӗпчев вӑхӑтӗнче ҫакна палӑртнӑ. Пенсионерка каҫхи 2 сехетре «Турист» суту-илӳ ҫурчӗ патӗнчен иртсе пынӑ чухне аптека тӗлӗнчи икӗ машина хушшинче персе аннӑ. Тепӗр сехетрен ӑна малтанхи пӗлӗш-хӗрарӑм тата икӗ арҫын асӑрханӑ. Хӗрарӑм укҫа хутаҫҫине кӗсьене илсе чикнӗ.
Ҫын укҫине илекенни судра ӗнентернӗ тӑрӑх, хутаҫра 30 пин ҫеҫ пулнӑ.
Ыран – аван уйӑхӗн 1-мӗшӗ, Пӗлӳ кунӗ. Ҫак кун «Чечек вырӑнне – ачасем» акци иртет. Кӑҫалхипе ӑна 10-мӗш хут йӗркелеҫҫӗ: класс 30 чечек ҫыххи вырӑнне класс ертӳҫине пӗрре парнелет, перекетленӗ укҫана йывӑр чирлӗ ачасене сиплемешкӗн Аня Чижова ячӗллӗ фонда парать. Кӑҫал фонд ку акцире 1,5 миллион тенкӗ пухма палӑртнӑ.
Шупашкар хулинчи 59-мӗш шкулта ку акци ырӑ йӑла пулса тӑнӑ. Унти педагогсем, ачасем тата ашшӗ-амӑшӗ Пӗлӳ кунне ку акцисӗр курмаҫҫӗ те. Авӑн уйӑхӗн 1-мӗшӗнче вӗрентекенсем «Ырӑлӑх урокӗсем» ирттереҫҫӗ. Фонд вара кашни класа фирмӑллӑ атрибутика парать: открытка, наклейка, хӑмпӑсем е чечек ҫыххи ҫыхмалли хӑюсем. Фонд тулли отчет туса кашни класа электронлӑ почтӑна ярса парать.
Палӑртма кӑмӑллӑ: акцие хутшӑнакансем ҫулран ҫул ӳсеҫҫӗ.
Чӑваш ялӗсем илемленсе хитерленсе пыраҫҫӗ. Красноармейски районӗнчи Упи ялӗнче хальхи вӑхӑтри спорт лапамӗ туса лартнӑ.
«Ӑна пӑхсан куҫ савӑнать», — тесе пӗлтернӗ район администрацийӗ халӑх тетелӗнчи хӑйӗн страницинче.
Спорт лапамне ниме мелӗпе укҫнӑ. Ку вӑл — республика Элтеперӗ йышӑннӑ программа. «НИМЕ — Народный бюджет» ятлӑскерпе ӗҫ тума шутласан укҫан пӗр пайне халӑхран пуҫтараҫҫӗ, ыттине хыснаран уйӑраҫҫӗ. Ҫав программа пулӑшнипе чылай ҫӗрте асфальт сараҫҫӗ, ҫӑвасене хӑтлӑлатаҫҫӗ, ача-пӑчана вылямалли лапамсем вырнаҫтараҫҫӗ.
Упи ялӗнчи спорт лапамӗн сарлакӑшӗ 43 метр, тӑршшӗ — 47 метр. Ӑна тума 5 миллион тенкӗ тӑкакланӑ. Спорт лапамне вырнаҫтараканни — Константин Прохоров усламҫӑ. Укҫан пӗр пайне республика хыснинчен уйӑрнӑ, «Красноармейски тӑрӑхӗнчи чи лайӑх ял» конкурсра ҫӗнтернӗшӗн панӑ укҫана та унта янӑ, Николай Степанов усламҫӑ 250 пин тенкӗ уйӑрса пулӑшнӑ.
Чӑваш Ен Правительстви республикӑри массӑллӑ информаци хатӗрӗсене субсиди уйӑрса пама йышӑннӑ. Укҫана хыснаран кӑларса тыттариччен хайхисене ятарлӑ проектсем ҫыртарнӑ.
Социаллӑ проектсен конкурсне, тӗрӗссипе, тахҫанах ирттереҫҫӗ. Тӳре-шара ырланисене пурнӑҫа кӗртме укҫа параҫҫӗ. Кӑҫал пӗтӗмпе 19,9 миллион тенкӗ уйӑрса пама йышӑннӑ. Вӑл кӗмӗл 6 организацин 38 медиапроекчӗ валли пулӗ. Республикӑри массӑллӑ информаци хатӗрӗсен материалсене кӑҫал ҫулталӑк вӗҫлениччен кун ҫути кӑтартмалла.
Республика хыснинчен укҫана тивӗҫнисем ҫаксем: «Чӑваш Ен» патшалӑх телерадиокомпанийӗ, Чӑваш Енӗн наци телекуравӗ, «ЮТВ» телеканал, «Хыпар» тата Ҫӗнӗ Шупашкарти «Грани издательство ҫурчӗсем, «Советская Чувашия» хаҫат.
Чӑваш Енре пуҫламӑш классен учителӗсен шалӑвне ӳстерме йышӑннӑ. Ун пек документа республика Элтеперӗ ҫурла уйӑхӗн 21-мӗшӗнче алӑ пуснӑ.
«О дополнительной мере поддержки отдельных категорий педагогических работников общеобразовательных организаций» (чӑв. Пӗтӗмӗшле пӗлӳ паракан организацисенчи педагогика ӗҫченӗсен уйрӑм категорине хушма пулӑшу парасси ҫинчен) тесе ят панӗ 113-мӗш хушура палӑртса хӑварнӑ тӑрах, кӗҫӗн классен учителӗсене уйӑхсерен 5-шер пин тенкӗ хушса тӳлеме пуҫламалла.
Элтепер документӗнче республикӑн Министрсен Кабинетне укҫа-тенкӗпе тивӗҫтерме каланӑ.
Хамӑр енчен ҫакна палӑртса хӑварар: шалу чӑннипех те ӳссен аван-ха, анчах пур чухне те ун пек пулмасть-ҫке: пӗр енчен хушса параҫҫӗ те типӗр тӳлеве тытса юлаҫҫӗ.
Кун пек те пулать-ши вара тесе тӗлӗнме ан васкӑр. Теплерен ун пекки те пулать иккен.
Шупашкартан Ҫӗнӗ Шупашкара ҫитме ҫул укҫи йӳнелнӗ. Малашне вара хак йӳнелмелле: аллӑн укҫа тӳлесен 41 тенкӗ пулӗ, карттӑпа чухне — 37 тенкӗ.
Республикӑн влаҫ органӗсен официаллӑ порталӗнче пӗлтернӗ тӑрӑх, Чӑваш транспорт управленийӗ республикӑн Конкурентлӑ политика тата тариф енӗпе ӗҫлекен службӑна хака пӑхса тухма ыйтса ҫыру янӑ иккен.
Пӗрлехи тариф пултӑр тесе республикӑн Министрсен Кабинечӗ хака ҫавӑн пек ҫирӗплетесси ҫинчен йышӑну проекчӗ хатӗрленӗ. Ку вӑл троллейбуспа кайнипе пӗр хак пулассине пӗлтерет. Пӗрлехи проездной хакӗ 2500 тенкӗ пулӗ.
Унччен пассажирсен аллӑн укҫан тӳлесен 60 тенкӗ, карттӑпа чухне 55 тенкӗ кӑларса хума тивет.
Ултавҫӑсенчен темле те шар курма пулать иккен. Кушак ҫухатсан та...
Шупашкар хулинче пурӑнакан хӗрарӑмӑн кушакӗ ҫухалнӑ. Кун пирки вӑл тӗнче тетелӗнче пӗлтерӳ вырнаҫтарнӑ. Кун хыҫҫӑн хӗрарӑм патне палламан ҫын шӑнкӑравласа кушака тупнине пӗлтернӗ, уншӑн укҫа ыйтнӑ. Памасан чӗрчуна ҫывратса ярса вӗлерессипе хӑратнӑ.
Хӑраса ӳкнӗ хӗрарӑм ҫав ҫын каланӑ счет ҫине виҫӗ хутчен укҫа куҫарнӑ. Пӗтӗмпе – 14 пин тенкӗ. Кун хыҫҫӑн «кушак ҫӑлавҫин» шӑрши-марши те юлман – вӑл ҫухалнӑ.
Ҫурӑк валашка умӗнче тӑрса юлнӑ хӗрарӑмӑн полицие каясси кӑна юлнӑ. Кушакне те тупайман вӑл, укҫине те ҫухатнӑ.
Полици асӑрхаттарать: ултавҫӑсем кун пек лару-тӑрура ҫын кӑмӑл-туйӑмӗпе усӑ кураҫҫӗ. Ҫавӑнпа асӑрханӑр, укҫа куҫарма ыйтсан сисчӗвленӗр!
+12.3 °C