Канаш округӗнчи ҫамрӑксем, Усман Эскеровпа Дарья Садовская, Мускавра иртекен Пӗтӗм Раҫҫейри «Раҫҫей. Чӗресене пӗрлештесе» туй фестивальне кайӗҫ.
Фестивале утӑн 8-мӗшӗнче, Ҫемье тата юратупа шанчӑклӑх кунӗнче, иртӗ. Ҫав кун Чӑваш Енри хӗрпе каччӑ ҫӗршыври ытти ҫамрӑкпа пӗрле пӗр-пӗрне ӗмӗр юратмашкӑн тупа туса ылтӑн ҫӗрӗ тӑхӑнтартӗҫ.
Вӗсен юрату историйӗ темиҫе ҫул каялла йӑл илнӗ. Усманпа Дарья «Космонавт» уйлӑхра паллашнӑ. Ун чухне Усман уйлӑхри хыпарсене пӗлтерсе тӑнӑ, Дарья канма килнӗ. Яшпа хӗр кайран та ҫыхӑнӑва ҫухатман. Анчах вӗсем ҫулсем иртсен кӑн тӗл пулнӑ, ҫавӑн чухне туйӑмсем ҫуралнӑ.
Усманпа Дарья спортпа туслӑ, ҫул ҫӳреме кӑмаллаҫҫӗ. Тата вӗсем тӑван культурӑна питӗ хисеплеҫҫӗ: чӑвашла юрлаҫҫӗ, кашни ҫул Акатуя ҫӳреҫҫӗ.
Кӑҫал Патшалӑх Думине депутатсене суйламалла. Ҫавна май партисем авӑн уйӑхне хатӗрленеҫҫӗ. Вӗсен шутӗнче КПРФ та.
Нумай пулмасть партире праймериз иртнӗ. «Коммерсантъ» пӗлтернӗ тӑрӑх «Халӑх депутачӗ» умсасӑлава пурӗ 2,4 миллион ҫын хутшӑннӑ.
Ҫӗпӗр халӑх депутачӗсен пухӑвӗнче КПРФ ТК председателӗн ҫумӗ Юрий Афонин малтанхи пӗтӗмлетӳсемпе паллаштарнӑ. Электронлӑ площадкӑра 100 пин ытла умсуйлавҫӑ хӑйӗн сассине панӑ. Ҫапла май праймеризра мала тухнӑ кандидатсене палӑртнӑ. Вӗсен йышне Чӑваш Енри коммунистсен партийӗн пӗрремӗш секретарӗ Александр Андреев та кӗнӗ.
Ҫирӗм ҫын хушшинче ҫавӑн пекех Патшалӑх Думин хальхи депутачӗсем Михаил Матвеев, Олег Михайлов тата Сергей Обухов, Ингушетири уйрӑмӗн пӗрремӗш секретарӗ Хамзат Кодзоев, Олег Новицкий летчик-космонавт тата ыттисем кӗнӗ. 2021 ҫулта пӗр мандатлӑ округсенчен суйланнӑ Сергей Казанков та мала тухнӑ ҫирӗм ҫын шутне кӗнӗ.
Ҫитес суйлавра хӑш-хӑш ҫынна парти йышӗнчен суйлава тӑратассине пухӑва пӗтӗмлетнӗ май ҫирӗплетӗҫ.
Раҫҫейри влаҫсем республикӑсен патшалӑх чӗлхисемпе вӗренӳ кӗнекисен пӗрлӗхлӗ патшалӑх йышне тума йышӑннӑ. Патшалӑх правительствин пресс-служби пӗлтернӗ тӑрӑх, ҫак йышӑнӑва Раҫҫей патшалӑх чӗлхе политикин никӗсӗсене пурнӑҫа кӗртессин мероприятисен планне кӗртӗҫ.
Планпа килӗшӳллӗн специалистсем наци чӗлхисемпе литературӑна вӗрентмелли ҫӗнӗ методологие вырӑс чӗлхипе тачӑ ҫыхӑнтарса хатӗрлӗҫ. Ҫавӑн пекех шкулсем валли икӗ чӗлхеллӗ сӑмахсарсем кӑларма, вӗрентӳпе меслетлӗх базине йӗркелеме йышӑннӑ. Кунсӑр пуҫне чӗлхесене патшалӑх реестрне кӗртмелли ӑслӑлӑх критерийӗсене те палӑртнӑ.
Чӗлхесен нумай тӗрлӗлӗхне сыхласа хӑварма кашни ҫул Раҫҫей шайӗнче преми парса чыслама, форумсемпе конференцисем ирттерме палӑртнӑ. Общество валли пӗлтерӗшлӗ литература кӑларма та патшалӑх пулӑшӗ. Ҫак ӗҫсем чӗлхесен нумай тӗрлӗлӗхне упраса хӑварма пулӑшӗҫ.
Чӑваш Ен каллех «Раҫҫейри ҫулталӑк йывӑҫӗ» пӗтӗм Раҫҫейри конкурса хутшӑнать. Хальхинче конкурсра Шупашкар округӗнче Карачура лесничествинче ӳсекен Киремет-юман тупӑшать.
Юман — Кӑшавӑш ялӗнчен инҫех мар. Вӑл 300 ҫула яхӑн ӳсет. Ҫӳллӗшӗ – 30 метр. Унӑн пӗлтерӗшӗ те хӑйне евӗр: хӑв вӑхӑтӗнче унта чӑвашсем йӑла-йӗрке туса ирттернӗ, вӑл вӗсемшӗн сӑваплӑ йывӑҫ шутланнӑ.
Сасӑлав ҫурла уйӑхӗн 1-мӗшӗччен пырать. Чӑваш юманӗшӗн сасӑлас тесен rosdrevo.ru сайта кӗрсе 73-мӗш номере тупмалла.
Аса илтерер: 2023 ҫулта Муркаш округӗнчи 327 ҫулти юман ҫӗнтернӗ, уншӑн 21571 ҫын сасӑланӑ.
Пирӗн ентеш аякри регионсем валли ишекен госпиталь хатӗрленӗ ҫӗре хутшӑннӑ. Сӑмах — РФ юханшыв транспорчӗн тава тивӗҫлӗ ӗҫченӗ, Вӑрнар тӑрӑхӗнче ҫуралса ӳснӗ Владимир Алексеев пирки. Вӑл «Порт Коломна» АО командӑпа пӗрле «Лука Святитель» юхан шыв госпитальне тунӑ. Кун валли вӗсене пӗр ҫул ҫурӑ кирлӗ пулнӑ.
Борт ҫинче чӑн-чӑн поликлиника евӗрех: тухтӑрсен 25 пӳлӗмӗ, лаборатори, УЗИ, эндоскопи тата рентген пур. Теплоход харӑсах 50 пациента йышӑнма пултарать. Унта медиксем валли те хӑтлӑ условисем хатӗрленӗ: каютӑсем, спортзал, сауна, кухня.
Ку уйӑхра ишекен госпиталь пӗрремӗш навигацие кайӗ, ҫитме йывӑр вырӑнсенчи ҫынсене медтӗрӗслев витӗр тухма пулӑшӗ.
10 тенкӗллӗ укҫасем ҫинче Чӑваш Ен тата Шупашкар гербӗсене ӳкерӗҫ. Ку ыйтупа ЧР Элтеперӗ Олег Николаев Раҫҫей Банкӗн Атӑл-Вятка тӗп управленийӗн пуҫлӑхӗпе тӗл пулсан калаҫнӑ.
Кӑҫал «Раҫҫей Федерацийӗ» серире Чӑваш Республикин гербне ӳкернӗ 10 тенкӗллӗ укҫа тухӗ. Ҫитес ҫул «Ӗҫ мухтавӗн хулисем» серире Шупашкара халалланӑ укҫа кӑларӗҫ. Иккӗшне те хаклах мар тимӗртен шӑратса кӑларӗҫ.
Икӗ ен регионти финанс рынокне сӳтсе явнӑ. Аса илтерер: 2025 ҫултанпа Чӑваш Ен бюджет процесне цифра укҫине ҫаврӑнӑша кӗртессипе ҫыхӑннӑ сӑнав проектне хутшӑнать.
Ҫитес ҫул Ҫӗнӗ ҫул хыҫҫӑн 11 кун кантарӗҫ. Раҫҫей Ӗҫлев министерстви 2027 ҫулхи ӗҫ тата уяв календарьне хатӗрленӗ. Анчах хальлӗхе ҫирӗплетмен.
2027 ҫулта ҫак кунсенче канӑпӑр: раштавӑн 31-мӗшӗнчен пуҫласа кӑрлачӑн 10-мӗшӗччен; нарӑсӑн 21-23-мӗшӗсенче; пушӑн 6-8-мӗшӗсенче; ҫу уйӑхӗн 1-3-мӗшӗсенче тата 8-10-мӗшӗсенче; ҫӗртмен 12-14-мӗшӗсенче; чӳкӗн 4-7-мӗшӗсенче.
2027 ҫулта 6 ӗҫ кунӗллӗ пӗр эрне кӑна пулӗ – нарӑсӑн 15-20-мӗшӗсенче. Виҫӗ кун канмалли 5 хутчен пулӗ: нарӑсра, пушра, ҫу уйӑхӗнче (2 хут), ҫӗртме уйӑхӗнче.
Ҫӗнтерӳ кунӗ умӗн «Вилӗмсӗр полк онлайн» акци старт илнӗ. Аса илтерер: кӑҫал Ҫӗнтерӳ парачӗ тата уяв салючӗ пулмассине, «Вилӗмсӗр полк» акци куҫӑн майпа иртмессине пӗлтернӗ.
Ҫу уйӑхӗн 9-мӗшӗнче 12:00 сехетре Тӑван ҫӗршывӑн Аслӑ вӑрҫине хутшӑннӑ паттӑрсем онлайн майпа полка тӑрӗҫ. Акцие хутшӑнас тесен ҫу уйӑхӗн 6-мӗшӗччен акци сайтӗнче (2026.polkrf.ru/) е «Вконтакте» (vk.com/polk_app), Одноклассники (ok.ru/app/polk), МАКС (max.ru/polk_app_bot) мини-сарӑмсенче заявка памалла.
Унтан паттӑр пирки информацие тата унӑн сӑнӳкерчӗкне кӗртмелле. Пӗтӗм заявкӑна тӗрӗслӗҫ (унта историксем хутшӑнӗҫ). Ҫакна йӑнӑш тата фальсификаци ан пултӑр тесе тӑваҫҫӗ
Андриян Николаевпа Валентина Терешковӑн хӗрӗн Еленӑн ҫуртне, Мускав ҫывӑхӗнчине, ҫаратнӑ. Кун пирки «Известия» хаҫат пӗлтерет.
Еленӑн мӑшӑрӗ Андрей Родионов пӗлтернӗ тӑрӑх, паллӑ мар ҫын ҫурта кӗнӗ те шыв ӑшӑтмалли хатӗре, газ баллонне тата стабилизатора йӑтса тухса кайнӑ. Пӗтӗмпе – 70 пин тенкӗлӗх. Халӗ ку ӗҫе следовательсем тӗпчеҫҫӗ. Елена Терешкова кил-ҫуртне ҫаратнине ака уйӑхӗн 9-мӗшӗнче асӑрханӑ.
Сӑмах май, Андриян Николаевпа Валентина Терешкова 1963 ҫулхи чӳкӗн 3-мӗшӗнче пӗрлешнӗ, 1964 ҫулхи ҫӗртме уйӑхӗн 8-мӗшӗнче вӗсен Елена ҫуралнӑ.
Тула облаҫӗнчи ӑслӑлӑх вулавӑшӗ «Раҫҫей чӗлхисем 2026» федераллӑ акцие хутшӑнать. Акцие хутшӑнакансене тутар е чӑваш чӗлхипе сӑвӑ вуламалла, унтан вертикаллӑ видео ҫырса халӑх тетелне вырнаҫтармалла. Вуланӑ чухне сӑввӑн куҫарӑвне е унӑн кӗске содержанине ҫырса памалла, тата мӗнле чӗлхепе вуланине палӑртмалла.
Акцие Раҫҫейри наци вулавӑшӗ, ҫав шутра Тутарстан, Дагестан, Мордва тата Чӑваш Республикисен вулавӑшӗсем, хастар хутшӑнаҫҫӗ. Сӑвӑ вуланӑ ролике Тула облаҫӗнчи ӑслӑлӑх вулавӑшӗн «ВКонтакте» халӑх тетелӗнчи страницӑра «ЯзыкиРоссии2026» хештегпа вырнаҫтарса пырӗҫ.
Акцие «Регион 71» информаци агентстви тата «Эпир – Раҫҫей» пӗрлехи информаципе ҫут ӗҫ проектне пурнӑҫлакансем те пулӑшаҫҫӗ. Ку проект пуш уйӑхӗнче пуҫланнӑ. Акци тӗллевӗ – Раҫҫей халӑхӗсен туслӑхне тата пӗр-пӗрне ӑнланнине ҫирӗплетесси.
+0.3 °C