Паян кӑнтӑрла «Энӗш» автоҫул ҫинче, Канаш хулипе Тӑвай хушшинче, Тӑвай округӗнчи Вырӑс Нӑрваш ялӗ ҫывӑхӗнче, тырӑ тултарнӑ прицеп ҫаврӑнса ӳкнӗ.
Самосвалӑн номерӗсем – Тутарстанран. Прицеп ун умӗнче тӳнсе кайнӑ, тырӑ ҫул тӑрӑх сапаланнӑ. Хальлӗхе авари мӗне пула тухнине пӗлтермен.
Авари хыҫҫӑн Канаш еннелле ҫул хупӑннӑ – прицеп ҫул варринчех выртнӑ. Машинӑсем хирӗҫ ҫулпа иртсе кайнӑ. Унта вара – ҫул-йер правилисене пӑсакансене ӳкерекен камера пур.
Авӑн уйӑхӗн 1-мӗшӗнче 21 сехетре А-151 автоҫул ҫинче ӗне машина айне лекнӗ. Ку авари Канашпа Ҫӗрпӳ хушшинче пулнӑ.
Шел те, ӗне вилмеллех аманнӑ. Тӗттӗм хӗрлӗ тӗслӗскер каҫхине ҫул ҫине тухнӑ. Пӗр водитель чарӑнса ӗлкӗреймен – ӑна ҫапса хӑварнӑ. Вырӑна йӗрке хуралҫисем ҫитнӗ. Ӗне, ахӑртнех, ҫухалса кайнӑскер пулнӑ.
РФ Следстви комитечӗн Чӑваш Енри упарвленийӗн специалисчӗсем Канашри 62 ҫулти арҫын тӗлӗшӗпе пуҫарнӑ пуҫиле ӗҫе тӗпчесе пӗтернӗ. Ӑна РФ Пуҫиле кодексӗн 105-мӗш статйин 1-мӗш пайӗпе килӗшӳллӗн явап тыттарӗҫ.
Тӗпчевҫӗсем палӑртнӑ тӑрӑх, кӑҫалхи ҫу уйӑхӗн 14-мӗшӗнче арҫын Канашра хӑйӗн тӑванӗпе (вырӑсла хыпарта «брат» тесе ҫырнӑ) эрех ӗҫсе ларнӑ. Ҫав вӑхӑтра харкашса кайса ӑна хӗнесе пӗтернӗ. Шар курни кӑштахран вилсе кайнӑ.
Пуҫиле ӗҫе халӗ суда ярса панӑ.
Авӑн уйӑхӗн 1-мӗшӗнчен Канаш хулинче общество транспорчӗпе ҫӳремелли билет хакӗ ӳсӗ - 5 тенкӗ хӑпарӗ. Хальхи вӑхӑтра билет 30 тенкӗ тӑрать. Кӗркуннерен вара 35 тенкӗ пулӗ.
Палӑртмалла: Канашра перевозчиксем хӑйсен тарифӗсемпе ӗҫлеҫҫӗ, ҫавна май хаксене хӑйсем палӑртма пултараҫҫӗ.
Авӑнӑн 1-мӗшӗнчен Канаш билет хакӗпе республикӑри чи хаклӑ хула пулӗ.
Республикӑра Патшалӑхӑн пӗрлехи экзаменӗсен кӑтартӑвӗсем лайӑх. Статистика кӑтартнӑ тӑрӑх, 64 ҫамрӑк 68 экзаменра 100 балл пухнӑ.
Чи лайӑх кӑтартусем ытларах Ҫӗнӗ Шупашкарта, Канашра, Патӑрьел тата Вӑрнар муниципаллӑ округӗсенче пулни паллӑ.
Тата ҫакна палӑртмалла: шкултан вӗренсе тухакансем физикӑпа, математикӑпа, литературӑпа, акӑлчан чӗлхипе ППЭре чи пысӑк балсем тӑтӑшах илме пуҫланӑ.
Паян кӑнтӑрла иртни 3 сехетре Канаш хули ҫывӑхӗнче хӑрушӑ авари пулнӑ. Унта ҫынсен пурнӑҫӗ татӑлнӑ.
Прокуратура малтанлӑха пӗлтернӗ тӑрӑх, «Лачетти» водителӗ чарӑннӑ чухне руле итлеттереймен, хирӗҫ ҫул ҫине тухса кайнӑ та тепӗр машинӑпа ҫапӑннӑ, унтан кювета чӑмнӑ.
Аварире 4 ҫын вилнӗ. Ҫав шутра пӗри - ача. Вӗсем пурте «Лачеттире» пулнӑ. Тепӗр машина водительне тата унти ачана медпулӑшу кирлӗ пулнӑ.
Халӗ ӗҫ-пуҫа тишкереҫҫӗ.
Канашри вӗрентекене ултавҫӑсем хӑратса пӑрахнӑ: терроризма укҫан пулӑшнӑшӑн ӑна уголовлӑ майпа явап тыттарӗҫ-мӗн. Ун патне телефонпа шӑнкӑравланӑ.
Ҫав вӑхӑтра Дмитрий Васильев тата Алла Ефимова участковӑйсем участока пӑхса ҫӳренӗ. Вӗсем хӗрарӑм такампа телефонпа калаҫнине, хӑй пӑлханнине асӑрханӑ. Полицин аслӑ сержанчӗ калаҫуран такам ӑна укҫа куҫарма хушнине ӑнланнӑ та пырса калаҫнӑ. Анчах лешсем 63-ри хӗрарӑма полицейскисенчен аякрах пӑрӑнма хушнӑ, вӗсене «вӑрттӑн операцие» хутшӑнтармалла мар-мӗн. Кун хыҫҫӑн Дмитрий Васильев ҫав палламан ҫынпа хӑй калаҫма шутланӑ. Лешӗ тӳрех телефона сӳнтернӗ.
Чӑнах та, аферист ӑна хӑйӗн укҫине «хӑрушсӑр счет» ҫине куҫарма хушнӑ иккен.
2024 ҫулхи пӗрремӗш ҫур ҫулта Чӑваш Енре 412,5 пин тӑваткал метр ҫурт-йӗр хӑпартнӑ. Ҫав шутран 221 пине тӑваткал метрӗ — нумай хваттерлӗ ҫурт-йӗр, 191,5 пин таваткал метрӗ — уйрӑм ҫурт-йӗр.
Ҫурт-йӗре пуринчен ытла Шупашкарта (213,8 пин тӑваткал метр), Шупашкар муниципаллӑ округӗнче (75, 1 пин тӑваткал метр), Муркаш тӑрӑхӗнче (15,4 пин тӑваткал метр), Ҫӗнӗ Шупашкарта ( 11,8 пин тӑваткал метр), Канашра (11,5 пин тӑваткал метр) туса лартнӑ.
Раҫҫей эстрада юрӑҫи Филипп Киркоров Канашра пурӑнакан кинемее 80 ҫул тултарнӑ ятпа саламланӑ. Ку - мӑнукӗн Влад Быковӑн парни. Вӑл вара Канашри паллӑ кутюрье. Каччӑ Дубайра хӑй ҫӗленӗ тумсене сутать. Кинемей Филипп Киркоровӑн пултарулӑхне килӗштерет.
«Хаклӑ Степанида Гавриловна, сирӗн мӑнук сире юбилейпа, 80 ҫул тултарнӑ ятпа, саламлама ыйтрӗ. Пӗлетӗп, эсир манӑн пултарулӑха килӗштеретӗр, эпӗ сирӗн кумир. Сире мӗнпур лайӑххине, сывлӑх, хаваслӑ кӑмӑл сунатӑп. Паллах, Чӑваш Енри Канаша салам яратӑп», - тенӗ паллӑ юрӑҫ.
Канашри ШӖМ уйрӑмне ертсе пыракан полици полковникне Николай Ванина «ЧШ шалти ӗҫсен органӗсен тава тивӗҫлӗ ӗҫченӗ» ята панӑ. Хушӑва ЧР Элтеперӗ Олег Николаев утӑ уйӑхӗн 4-мӗшӗнче алӑ пуснӑ.
Николай Дмитриевич ҫак тытӑма 2021 ҫултанпа ертсе пырать. Унччен ШӖМӗн Шупашкарти 6-мӗш уйрӑмне ертсе пынӑ. Сӑмах май, пӗлтӗр вӑл Калашников автоматӗнчен перес енӗпе иртнӗ ӑмӑртура мала тухнӑ.
-1.7 °C