Ӗнер Чӑваш Ене пилотсӑр вӗҫекен аппаратсем тапӑннине Чӑваш халӑх сайчӗ темиҫе хутчен те хыпарларӗ. Инкек вӑхӑтӗнче пурӑнмалли ҫуртсем те сиенленнӗ, ҫынсем хваттерсӗр тӑрса юлнӑ. Тӗрӗсрех каласан, хваттерсене юсама тивет.
Шар курнӑ ҫынсене вӑхӑтлӑха хулари техникумсенчен пӗринчи общежитие вырнаҫтарнӑ. Кун пирки республикӑн Вӗренӳ министерстви пӗлтернӗ. Хула пуҫлӑхӗн тивӗҫӗсене вӑхӑтлӑх пурнӑҫлакан Станислав Трофимов 30 ытла пӳлӗм хатӗрлени пирки хыпараланӑ. Хальлӗхе унта 4 ҫын вырнаҫнӑ, ыттисем тӑванӗсем патне пурӑнма куҫса кайнӑ.
Паян Шупашкара пилостӑр вӗҫекен аппаратсем тапӑнни пирки эпир унччен хыпарласа ӗлкӗрнӗччӗ-ха. Аса илтерер: хулари темиҫе ҫурт сиенленнӗ.
Хусанкай урамӗнчи 8-мӗш ҫуртра вырнаҫнӑ 20-мӗш шкулта пулӑшу паракан пункт уҫнӑ.
Унта пухӑннисемпе республика парламенчӗн ертӳҫи Леонид Черкесов тӗл пулнӑ. Шар курнӑ ҫуртсене республика шучӗпе юсама шантарнӑ, эвакуациленисен ытти ыйтӑвне хуравланӑ.
«Сиенленнӗ хваттерсене республика хысни шучӗпе юсӑпӑр. Ӗҫе пуҫӑннӑ та ӗнтӗ», - тенӗ Леонид Черкесов.
Паян ирхине пирӗн республикӑна каллех беспилотниксем тапӑннӑ. Ҫавна пула хулари пурӑнмалли ҫуртсем те сиенленнӗ. Шар курнисем те пур.
Чӑваш Ен Элтеперӗ Олег Николаев Телеграмра пӗлтернӗ тӑрӑх, васкавлӑ мӗнпур служба инкек вырӑнӗнче ӗҫлет.
Ирхине хулари тӗп урамсемпе машинӑсене ҫӳреме чарнине ҫынсем асӑрхарӗҫ пулӗ ӗнтӗ.
Хусанкай урамӗнчи 8-мӗш ҫуртри шкулта ҫынсене пулӑшмалли пункт уҫнӑ.
Ҫак кунсенче Шупашкарта ашшӗ-амӑшӗн хӳттисӗр юлнӑ 30 ҫамрӑк хваттер уҫҫине илнӗ. Вӗсене савӑнӑҫлӑ лару-тӑрура панӑ.
Хваттерсем хӑтлӑ ҫуртра вырнаҫнӑ. Унта ҫав самантрах пурӑнмашкӑн куҫма пулать.
Сӑмах май, кӑҫал ҫак категорие кӗрекен 452 ҫынна хваттерпе тивӗҫтерме палӑртнӑ. Хальхи вӑхӑтра 367-шӗ валли пурӑнмалли кӗтес туяннӑ, тепӗр 78-шӗ ҫурт-йӗр сертификатне илнӗ. Ҫитес ҫул тӑлӑхсене хваттерпе тивӗҫтерме хыснаран 1,4 миллиарда яхӑн тенкӗ уйӑрӗҫ.
Шупашкарти 12-мӗш вӑтам шкула культура эткерлӗхӗн ҫурчӗ тесе йышӑннӑ. Вӑл вӗренӳ учрежденийӗ хулари Владимир тӑвӗ ҫывӑхӗнче вырнаҫнӑ.
Шкула 1950 ҫулта ҫӗкленӗ. Малтан шкул хальхи 36-мӗш ача пахчи ҫуртӗнче вырнаҫнӑ, 1959 ҫулта кӳршӗллӗ ҫурта куҫнӑ.
Шкула классика зодчествин формиллӗ туса лартнӑ. Тӑватӑ хутла ҫурта П саспалли евӗр купаланӑ.
Паян Шупашкарти Ҫурҫӗр-Хӗвеланӑҫ районӗнчи 68 ҫурт вӗри шывсӑр тата ӑшӑсӑр тӑрса юлнӑ. Ҫавӑн сӑлтавӗ Павлов мичман урамӗнчи коммуналлӑ инкекпе ҫыхӑннӑ.
15 сехет тӗлне нумай хваттерлӗ 68 ҫуртра, 7 ача пахчинче, 3 шкулта, 3 больницӑра тата ача-пӑча пултарулӑхӗн ҫуртӗнче ӑшӑсӑр тата ӑшӑ шывсӑр ларнӑ.
Асӑннӑ ҫуртсем ҫак адрессемпе вырнаҫнӑ:
Павлов мичман урамӗнчи 24, 26, 28, 30, 31, 32, 34, 35, 36, 37, 38, 40, 42, 46, 48, 52, 54, 56, 58, 60, 62, 66, 68; Гузовский урамӗнчи 1, 3, 3/1, 5, 7, 9, 11, 13; Элкер урамӗнчи 1, 2, 4, 5, 6, 8, 9, 10, 12, 14, 16;
Университет урамӗнчи 9, 9/1, 11, 13, 15, 17, 19, 21, 23, 25, 27, 29, 31, 33, 35; Стрелоксен 149-мӗш дивизийӗнчи 4, 6, 8, 10, 13, 16, 18, 20, 22; Ахазов урамӗнчи 2, 6-мӗш ҫуртсем.
«Ҫыхӑнура» портал пӗлтернӗ тӑрӑх, Шупашкарти Афанасьев урамӗнчи 19-мӗш ҫуртра подъезда кӗмелли вырӑнта стена йӑтӑнса аннӑ.
Рабочисем юсав ӗҫӗсене пуҫӑннӑ ӗнтӗ. Вӗсем каланӑ тӑрӑх, стена ҫурт халӗ те анса (усадка) пынӑран йӑтӑннӑ. Сӑмах май, ҫак ҫуртра – 12 подъезд, 652 хваттер. Хальлӗхе ытти подъезд йӗркеллех.
Ку ҫурта малтан «Ютон» компани тунӑ. Вӑл панкрута тухсан ӑна «СМУ-58» туса пӗтернӗ.
Ҫӗмӗрлере пурӑнакансем ӑша шыва хваттере ӑшӑтмалли батарейӑран илеҫҫӗ иккен. Вырӑнти муниципалитетра тӑрӑшакансемпе «Чӑвашгаз», управляющи компани тата шалти ӗҫсен ӗҫченӗсем нумаях пулмасть тӗрӗслеве тухнӑ.
Чылай хваттерте батарейӑна кран вырнаҫтарнӑ иккен, вӗри шыв ҫынсем унтан илсе пурӑнаҫҫӗ.
Йӗркене пӑсакансене яваплисем кӑлтӑка ҫийӗнчех пӗтерме хушса хут ҫырса панӑ.
Кӑҫалхи чӳк уйӑхӗнче Дубай хулинче тӗнчери чи ҫӳллӗ хӑна ҫурчӗ уҫӑлӗ. Ciel Dubai Marina отель 82 хутлӑ пулӗ. Кун пирки Дубай правительствин пресс-служби пӗлтернӗ.
82 хутлӑ хӑна ҫурчӗ 377 метр ҫӳллӗш пулӗ. Паянхи куна Дубайӗнчи чи ҫӳллӗ ҫурт — 356 метр.
Паянхи куна Мускаври «Федераци – Хӗвелтухӑҫ» башня 374 метр ҫӳллӗш, вӑл 97 хутран тӑрать. Башньӑна 2017 ҫулта хӑпартнӑ. Мускаври ҫав башньӑран те ҫӳллӗрех ҫурт — Питӗрти Финн кӳлмекӗн хӗрринче вырнаҫнӑ «Лахта Центр» башня, вӑл 462 метр ҫӳллӗш, вӑл 87 хутран тӑрать. Унта ҫынсене хӑпарса пӑхмалли лапам 365 метр ҫӳллӗшӗнче вырнаҫнӑ.
Елчӗкре 1887 ҫулта тунӑ йывӑҫ ҫурта реставраци тӑвасшӑн. Ку – ахаль ҫурт мар. Унта хӑй вӑхӑтӗнче Алексей Алексеевич Буйновский пурӑннӑ тата ӗҫленӗ. Вӑл — тухтӑр тата революци ӗҫченӗ.
Ҫак ҫурт паянхи кун та ларать, анчах ӑна юсаса ҫӗнетмелле. Унта халӗ те фойе, йышӑну пӳлӗмӗ, тухтӑрсен пӳлӗмӗсем пур. Хальлӗхе реставраци проекчӗ экспертизӑра. Чӑваш Енри патшалӑх экспертизи ӑна ырласан историпе архитектурӑн хӑйне евӗр палӑкӗ ҫӗнелӗ.
+21.6 °C