Ӗнер каҫхине Шупашкарти Пирогов урамӗнчи 1-мӗш ҫуртри 1-мӗш корпусра пушар тухнӑ. Унта пӗр пӳлӗмлӗ хваттерте ҫулӑм тухнӑ.
Ҫав вӑхӑтра килте 44 ҫулти хӗрарӑм пулнӑ. Ӑна ҫӑлавҫӑсем тӗтӗмлӗ хваттертен тухма пулӑшнӑ.
Инкеклӗ лару-тӑру министрествин Чӑваш Енри управленийӗ пӗлтернӗ тӑрӑх, ҫулӑм 16 тӑваткал метр карса тунӑ маччана, шалти отделкӑна сиенленӗ.
Паян Канаш хулинче ирхи 6 сехетре маршрутка ҫуннӑ. Юрать-ха, никам та шар курман. Салонра никам та пулман.
Транспорт Кооператив урамӗнчи автобаза пулнӑ вырӑнта ларнӑ. Маршруткӑна тӑрук ҫулӑм хыпса илнӗ. Транспорт сиенленнӗ. Халӗ ҫулӑм мӗнрен тухнине тӗпчеҫҫӗ.
Аса илтерер: иртнӗ эрнере Ҫӗнӗ Шупашкарта 101-мӗш маршрутпа ҫӳрекен автобус ҫуннӑ. Ун чухне те салонра никам та пулман.
Паян ҫур ҫӗр иртни 3 сехет ҫурӑра Шупашкарти Матэ Залка урамӗнчи 14-мӗш ҫуртри 2-мӗш корпусри хваттер ҫуннӑ. Вӑл – 1-мӗш хутра. Шел те, пушарта ҫын пурнӑҫӗ татӑлнӑ. Арҫын 66 ҫулта пулнӑ.
Пушарнӑйсем вырӑна ҫитсен ҫӳлти хутри кӳршисене урама тухма пулӑшнӑ. Вӗсем патне вентиляци шахтинчен тӗтӗм ҫитнӗ. Вӗсемех хваттерте кил хуҫи пулнине пӗлтернӗ. Ҫӑлавҫӑсем ҫунакан хваттере кӗрес тесе алӑка ҫӗмӗрнӗ. Хваттер хуҫине кравать ҫинче тупнӑ. Вӑл асӑрханмасӑр пирус туртма пултарнӑ.
Паян Шупашкарта «Ярмӑрккӑра» самай вӑйлах пушар пулнӑ. Инкеклӗ лару-тӑру министерстви пӗлтернӗ тӑрӑх, унта 120 тӑваткал метрлӗ тимӗр гаража ҫулӑм ярса илнӗ.
Малтанлӑха пӗлтернӗ тӑрӑх, шалта автомобиль ҫӑвӗсем тата шинӑсем упраннӑ. Пушарнӑйсем ҫулӑма сарӑлма паман, кӳршӗ ҫуртсене сыхласа хӑварнӑ.
Паян Шупашкарти МТВра пушар пулнӑ. Ҫулӑм тухни пирки 15 сехет те 59 минутра пӗлтернӗ.
Пушарнӑйсем вырӑна хӑвӑрт ҫитнӗ. 500 яхӑн ҫынна эвакуациленӗ. Пушар тухнӑ вырӑна ҫитес тесе плиткӑна хӑйпӑтма тивнӗ.
Паян кӑшт маларах Ҫӗнӗ Лапсар поселокӗнче сӗтел-пукан фабрики ҫуннӑ. Халӗ ҫулӑм мӗнрен тухнине тӗпчӗҫҫӗ.
Паян ҫур ҫӗр хыҫҫӑн Елчӗк округӗнчи Кушкӑ ялӗнче пушар пулнӑ. 82 ҫулти кил хуҫи мӑшӑрӗпе урама чӳречерен тухма пултарнӑ. Вӗсӗн 55 ҫулти ывӑлӗ, шел те, тухса ӗлкӗреймен.
Пушар ҫурта, хуралнӑ таврашне тӗп тунӑ. Ҫулӑм мӗнрен тухнине экспертсем палӑртрӗҫ.
Сӑмах май, ҫулталӑк пуҫланнӑранпа республикӑра 1188 пушар тухнӑ, вӗсенче 43 ҫын вилнӗ.
Елчӗк округӗнче 2014 ҫулта арҫыннӑн килӗнче пушар тухнӑ. Вӑл муниципалитет харпӑрлӑхӗнче пулнӑ. Вӑл унта социаллӑ найм мелӗпе пурӑннӑ.
Пушар хысҫӑн ҫурт пурӑнма юрӑхсӑра тухнӑ. Арҫын урӑх ҫӗре куҫнӑ. Администраци ӑна нумай вӑхӑт ҫӗнӗ ҫуртпа тивӗҫтермен. Арҫын прокуратурӑран пулӑшу ыйтсан тин пӑр вырӑнтан тапраннӑ. Суд арҫынна ҫӗнӗ пурӑнмалли вырӑн памалла тунӑ.
Канашри ӗнер ҫур ҫӗрте виҫӗ пӳлӗмлӗ хваттер ҫунма тытӑннӑ. Ҫемье коридорта ҫулӑм ҫатӑртатнипе вӑранса кайнӑ. Ҫавна май вӗсем алӑкран тухайман, хӗрарӑм ачисемпе тепӗр пӳлӗме кӗрсе пытаннӑ та ҫӑлавҫӑсене чӗннӗ.
Ҫӑлавҫӑсем 4 минутран ҫитнӗ. Вӗсем амӑшне тата 6-ри, 11-ти ачисене урама илсе тухнӑ. Вӗсене тухтӑрсен пулӑшӑвӗ кирлӗ пулман.
Пушара 10 минутран сӳнтернӗ.
Шупашкар округӗнче юпа уйӑхӗн 6-мӗшӗнче пушар пулнӑ: пилорама ҫуннӑ.
Карачура ялӗнче пилорамари пӗр цехра ҫулӑм тухнӑ. Пушарта йывӑҫ, хӑма типӗтмелли хатӗр ҫунса кайнӑ. Пилорама пӳлӗме йӑлт хӑрӑмланса ларнӑ. Пушар электросеть йӗркеллӗ ӗҫлеменрен тухнӑ тесе палӑртнӑ.
Палӑртмалла: ҫулталӑк пуҫланнӑранпа 1132 пушар пулнӑ, вӗсенче 42 ҫыннӑн пурнӑҫӗ татӑлнӑ.
Ҫӗмӗрлере хваттерте пушар пулнӑ. Юрать-ха, килте пулнӑ ҫынсем ҫӑлӑнма ӗлкӗрнӗ.
Ача асламӑшӗ (е кукамашӗ) патӗнче хӑнара пулнӑ. Пӗчӗкскер шӑрпӑк тупнӑ та унпа вылянӑ, сӗтел-пукан хыпса илнӗ. Ҫулӑм хӑвӑртах сарӑлнӑ. Кукамӑшӗпе мӑнукӗ урама тухса ӗлкӗрнӗ.
Ҫӳлти хутра пурӑнакансене вара пулӑшу кирлӗ пулнӑ. Арҫынна тата унӑн 19-ти сусӑр ывӑлне ҫӑлавҫӑсем урама кӑларнӑ.
+4.3 °C