vk.com/chuv_kray страницӑран илнӗ сӑнӳкерчӗксем

Чӳк уйӑхӗн 8-мӗшӗнче Санкт-Петербург хулинче «Миссис Санкт-Петербург и Ленинградская область – 2022» (чӑв. Санкт-Петербург тата Ленинград облаҫӗн хитре пики — 2022) илем конкурсӗ иртнӗ.

Финала алла яхӑн хӗр тухнӑ. Вӗсен хушшинчи пирӗн ентешӗмӗр Виктория Смирнова та пулнӑ.

Чӑваш чиперкки тӳрех икӗ хисеплӗ ята тивӗҫнӗ. Пӗрремӗшенчен, вӑл Ленинград облаҫӗн хитре пики пулса тӑнӑ; иккӗмӗшенчен, Queen of Art 2022 ята ҫӗнсе илнӗ.

«Манӑн атте Шупашкарта пурӑнать. Эпӗ хамӑн тымарӑмсемпе мӑнаҫланатӑп, тӑван тӑрӑхӑмра час-часах пулатӑп. Маншӑн сасӑланӑ ентешӗмсене эпӗ тав тӑватӑп», — тесе ҫырнӑ Виктория Смирнова тӗнче тетелӗнчи хӑйӗн страницинче.

"Лиза Алерт" сайтри сӑн

Ҫӗнӗ Шупашкарта пурӑнакан арҫынна "Лиза Алерт" хастарӗсем шыраҫҫӗ. Сергей Сергеевич Карапетян Мари Эл вӑрманне чӳк уйӑхӗн 12-мӗшӗнче тухса кайнӑ та киле таврӑнман.

52 ҫулти арҫын 170 сантиметр ҫӳллӗш, вӑтам кӗлеткеллӗ, ҫӳҫӗ шуралнӑ. Вӑрмана кайнӑ чухне вӑл симӗс костюм, хура кофта, симӗс атӑ тӑхӑннӑ, кутамкка ҫакнӑ.

Ун пирки мӗн те пулин пӗлетӗр пулсан ҫак номерсемпе шӑнкӑравлама ыйтаҫҫӗ: 8(800)700-54-52 е 112.

Паян Шупашкарта Эгер бульварӗнчи 41-мӗш ҫуртра пӗр хваттерте газ сирпӗнни пирки пӗлтернӗ Инкеклӗ лару-тӑру министерстви. Ун чухне кил хуҫи килте пӗчӗк ачипе пулнӑ. Хайхискер яшка пӗҫерме лартнӑ, вӑл вара вӗресе тӑкӑннӑ. Шыв ҫулӑма сӳнтернӗ, газ вара тухса тӑнӑ.

Арҫын унччен чӑтса ирттернӗ чире пула газ шӑршине туйман, вӑл тепӗр конфоркӑна чӗртнӗ. Газ сирпӗннӗ. Ҫывӑрмалли пӳлӗмри балкон чӳречисем арканса тухнӑ. Тӗпелте чӳрече каррисем ҫунма пуҫланӑ. Кил хуҫин пичӗ кӑшт пиҫсе кайнӑ. Вӑл ҫулӑма хӑйех сӳнтернӗ. Ача шар курман.

suvargazeta.ru сӑнӳкерчӗкӗ

Тутарстанра кӑларса тӑракан «Сувар» чӑваш хаҫатне ҫырӑнса илекенсен ҫӗвӗ машиниллӗ пулас шанчӑк пур.

Вылява хаҫата 2023 ҫулӑн 1-мӗш ҫур ҫулӗ валли ҫырӑнса илекенсен хушшинче йӗркелеме йышӑннӑ. «Сувар» ҫырӑн та ҫӗвӗ машинки санӑн! Хаҫат 30 ҫул тултарнӑ ятпа тата ытти хаклӑ парнесем!» акцие хутшӑнакансен ытти хаклӑ парнене те выляса илес шанчӑк пур.

«Сувар» хаҫата кашни ҫыхӑну уйрӑмӗнчех ҫырӑнма май пур. Ҫавӑн пекех хаҫатпа Раҫҫей почтин podpiska.pochta.ru сайчӗ урлӑ килтен тухмасӑрах туслашма май килӗ.

cheb.media сӑнӳкерчӗкӗ

Паян, чӳк уйӑхӗн 14-мӗшӗнчи ирхине, Шупашкарта пӗр машина ҫул айккинчи ҫырмана кӗрсе ӳкнӗ. «Патриот» маркӑллӑ автомобиль Энгельс урамӗпе пынӑ чухне, «Альфа-центртан» инҫех мар вырӑнта, ҫул айккинчи ҫырмана кӗрсе ӳксе ҫаврӑнса ӳкнӗ.

Малтанласа пӗлтернӗ тӑрӑх, водитель руле тытса ӗлкӗреймен. Инкек вӑхӑтӗнче ҫул пӑрлак пулнӑ.

Водителе тӗрӗсленӗ те вӑл урах пулни палӑрнӑ.

Машинӑна ятарлӑ техникӑпа ҫырмаран туртса кӑларнӑ.

Паян, чӳк уйӑхӗн 14-мӗшӗнче, ирхи 7 сехетре Канаш районӗнче икӗ ҫӑмӑл машина пырса ҫапӑннӑ.

Пӑтӑрмах «А-151» ҫул ҫинче пулса иртнӗ. «Лада-Приора» тата «Рено-Логан» пырса ҫапӑннӑ. Малтанласа палӑртнӑ тӑрӑх, «Приора» машина водителӗ хирӗҫ килекен ҫул ҫине тухса кайнӑ. 35 ҫулти водитель Вӑрнар районӗнчен пулнӑ. Йывӑр сурансене пула вӑл вырӑнтах вилсе кайнӑ.

«Рено» машинӑн рульне тытса пынӑ ҫын тата салонти пассажир, ҫавӑн пекех «Приора» пассажирӗ суранланнӑ.

Паян ҫанталӑк сивӗтрӗ. Ыран татах сивӗтме пуҫлӗ. Анчах юр сахал ҫурӗ-ха. Синоптиксем пӗлтернӗ тӑрӑх, вӑл кӗҫнерникун е эрнекун ҫӑвӗ.

Чӳкӗн 17-18-мӗшӗсенче ҫил каллех вӑйланӗ, ҫеккунтра 16 метр таран вӗрӗ.

Юнкун тата шӑматкун кӑна пире ҫилсӗр ҫанталӑк савӑнтарӗ. Ыран тата тепӗр кун хӗвел пӑхӗ. Кӑнтӑрла та, ҫӗрле те сивӗ пулӗ. Ҫитес 10 кунра республикӑра кӑнтӑрла – 1-6 градус, ҫӗрле 12 градус таран сивӗ тӑрӗ.

Ял хуҫалӑх министерстви тунӑ видео скринӗ

Хӗрлӗ Чутай районӗнчи «Коминтерн» ял хуҫалӑх производство кооперативӗнче ӗнесем юрӑ-кӗвӗ итлесе сӗт антараҫҫӗ.

Василий Сорокин сӗт залӗн операторӗнче 3 ҫул ӗҫлет. Кашни ир ӗҫе килет те вӑл юрӑ-кӗвӗ ярать. Вӑл тӗнче тетелӗнче ӗнесем юрӑ итлесе сет нумайрах антарни пирки вуласа пӗлнӗ.

Василий ытларах хӑй килӗштерекен юрӑсене ярать: «Кино» ушкӑнӗн юррисене, чӑваш юррисене. Хӑш чухне ӗнесене «Тӑван радио» итлеттерет.

t.me/suvargazeta сӑнӳкерчӗкӗ

Чӗмпӗрте пӗрремӗш чӑваш букварьне кун ҫути кӑтартнӑранпа 150 ҫул ҫитнӗ ятпа уяв иртнӗ. Асӑннӑ пулӑма Раҫҫейре кӑҫал иртекен Халӑхсен культура эткерлӗхӗн ҫулталӑкне халалланӑ.

Мероприяти «Чӗмпӗрти чӑваш шкулӗ. И.Я. Яковлев хваттерӗ» музейра иртнӗ. Ӑна тӑван халӑхӑмӑра ҫутта кӑларнӑ педагога тата хальхи вӑхӑтри чӑваш алфавитне йӗркеленӗ Иван Яковлев пурнӑҫӗпе ӗҫ-хӗлне, унӑн пултарулӑхне халалланӑ.

Чӗмпӗрте 1885 ҫулта кун ҫути кӑтартнӑ чӑваш букварӗ упранать. Уява хутшӑннисене ун ҫинчен тата чӑваш алфавитне тата букварьне Иван Яковлев епле хатӗрлени пирки каласа кӑтартнӑ.

t.me/suvargazeta сӑнӳкерчӗкӗ

Валентина Тарават ертсе пыракан ансамбль «Обломовкӑри туйра» ҫӗнтернӗ. Ку хыпара Тутарстанри «Сувар» хаҫат Телаграм-каналта пӗлтернӗ.

Чӗмпӗрте нумаях пулмасть туй йӑли-йӗркисен пӗтӗм ҫӗршыври «Обломовкӑри туй» III конкурс-фестивалӗ вӗҫленнӗ иккен. Раҫҫей халӑхӗсен культура еткерлӗхӗн ҫулталӑкӗн шайӗнче иртнӗ конкурс-фестивалӗн финалне хутшӑнма конкурсантсем ҫӗршывӑн 8 регионӗнчен пуҫтарӑннӑ. «Чӑнлӑри «Шанӑҫ» халӑх ансамблӗ чӑваш туйӗн пӗр сыпӑкне – хӗр вӑрланине – кӑтартса «Халӑх юррин ансамблӗсем» номинацире I степеньлӗ Диплома тивӗҫсе лауреат пулса тӑнӑ», — пӗлтернӗ «Сувар».