Ҫак ҫынсем сноубордпа ярӑнма кайнӑ та чутах юлташӗсӗр тӑрса юлман. Кӑрлачӑн 16-мӗшӗнче спортсменсен ушкӑнӗ Куславкка районне, республикӑри чи ҫӳллӗ вырӑна, снобуордпа ярӑнма кайнӑ. Ку вырӑна «кайӑк ҫӳллӗшӗнчен» теҫҫӗ халӑхра.

Ҫамрӑксем ярӑннӑ, савӑннӑ… Анчах кӑштахран чутах пысӑк инкек пулман. Тахӑш самантра пӗр спортсмен ҫине юр чӑмакки йӑтӑнса аннӑ. Унӑн алли ҫеҫ курӑннӑ. Юлташӗсем ун патне чупса пырса ӑна пулӑшнӑ.

Лешӗ юр айӗнче сывлайман та, кӑвакарса кайнӑ. Тусӗсем ӑна чавса кӑларнӑ. Юрать, инкекпе вӗҫленмен. Ҫутҫанталӑкра канма юратакансене асӑрхаттараҫҫӗ: тимлӗ пулмалла.

ШӖМ тунӑ сӑн

ШӖМ спорт костюмне вӑрланӑ хӗрарӑма шырать. Вӑл ача кӗтекен хӗрарӑм пулма пултарать.

Калинин урамӗнче вырнаҫнӑ суту-илӳ центрӗнче пулнӑ ку. Кӑрлач уйӑхӗн 26-мӗшӗнче пӗр хӗрарӑм спорт костюмне йӑтнӑ та касса патӗнчен уншӑн тӳлемесӗрех иртсе кайнӑ. Сутуҫӑсем костюм ҫухалнине асӑрхасан кун пирки полицие пӗлтернӗ.

Спорт костюмне камера ҫине лекнӗ хӗрарӑм вӑрлама пултарнӑ. Вӑл 35 ҫулти пек курӑнать. Шурӑ калпак, ҫутӑ кӗрен куртка, шурӑ шӑлавар, хӑмӑр пушмак тӑхӑннӑ пулнӑ. Хура шарф ҫыхнӑ, хура рюкзак ҫакнӑ. Камера ҫине пӑхсан ҫакӑ паллӑ: вӑл ача кӗтме пултарать.

Ӑна паллакан ҫынсене «02» номерпе шӑнкӑравлама ыйтаҫҫӗ.

Паян ирхине урамра шуҫса ӳкнипе тухтӑрсенчен пулӑшу ыйтакансем йышланнӑ. Ирхи 6 сехетрен пуҫласа 11 сехетчен Шупашкарта ҫеҫ 15 ҫынпа 10 ача шар курнӑ. Вӗсенчен 1 ҫынпа 1 ачана пульницӑна вырттарма тивнӗ. Ыттисене пӗрремӗш пулӑшу кӳнӗ хыҫҫӑн килте сипленме янӑ.

Ҫӗнӗ Шупашкарта травмпункта 12 ҫын пынӑ. Вӗсем пульницӑра сипленмеллех аманман.

Шупашкарта 52 ҫулти хӗрарӑм троллейбусран аннӑ чух шуҫса ӳкнӗ, 73-ри хӗрарӑм — аптекӑран тухнӑ чух. Вӑл картлашка ҫине ӗнсепе тата ҫурӑмпа персе аннӑ. Ӳкнине курнисем васкавлӑ пулӑшу тухтӑрӗсене чӗнсе илнӗ.

report.az сайтри сӑн

Юлашки талӑкра республикӑра 96 ҫын кӑшӑлвируспа чирленине палӑртнӑ. Палӑртмалла: ку кӑтарту майӗпен пӗчӗкленме пуҫланӑ. Паянхи кун тӗлне пӗтӗмпе 19198 ҫын каварлӑ вируса ҫаклатнӑ. Вӗсенчен 17302-шӗ сывалнӑ.

Вилекенсем каллех нумаййӑн пулнӑ: 12 ҫын. Юлашки вӑхӑтра пӗр талӑкра 10-12 ҫын вилет. Ку таранччен кӑшӑлвирус республикӑри 842 ҫыннӑн пурнӑҫне татнӑ.

Юлашки талӑкра 89 ҫын сывалнӑ. Сӑмах май, ҫулталӑк пуҫланнӑранпа, 28 кунра, республикӑри 314 ҫын кӑшӑлвируса парӑнтараймасӑр вилнӗ.

yourma.ru сайтри сӑн

«Юрма» агрохолдинга каллех панкрута кӑларма ыйтаҫҫӗ. Арбитраж сучӗн сайтӗнче пӗлтернӗ тӑрӑх, унӑн парӑмӗ 1,6 миллиард тенке яхӑн.

Суда тавӑҫа Перекет банкӗ тӑратнӑ. Кӑрлач уйӑхӗн 14-мӗшӗнче тавӑҫа тӗрӗслеме суд ларӑвӗ ирттерме палӑртнӑ. Вӑл нарӑс уйӑхӗн 12-мӗшӗнче пулӗ. Тавӑҫра 1 миллиард та 695 миллион тенкӗ те 537 пин те 705 тенкӗ ыйтса ҫырнӑ.

Сӑмах май, 2019 ҫулхи утӑ уйӑхӗнче Арбитраж судне Тутарстан компанийӗ «Юрмана» панкрута кӑларма ыйтса тавӑҫ ҫырнӑ. Нумаях пулмасть агрохолдингӑн ҫӗнӗ пуҫлӑхӗ ҫитменлӗхсене пӗтересси пирки пӗлтернӗ.

gladdenprivateisland.com сӑнӳкерчӗкӗ

Ӗнер, кӑрлач уйӑхӗн 27-мӗшӗнче, Канаш хулинче пурӑнакан ватӑ хӗрарӑм шар курнӑ. Шел те, пӑтӑрмах вилӗмпе вӗҫленнӗ.

Асӑннӑ хулари Ленин урамӗнчи 52-мӗш ҫуртри хваттерте пурӑнакан 81 ҫулти хӗрарӑм, малтанласа шухӑшланӑ тӑрӑх, каҫхи 22 сехет тӗлӗнче апат хатӗрлеме тӑнӑ. Ҫавӑн чухне унӑн ҫипуҫӗ хыпса илнӗ.

Тумтир ҫунма пуҫласан хӗрарӑм те ҫӗтсе кайнӑ, анчах вӑл пиҫсе кайнӑ.

Ҫулталӑк пуҫланнӑранпа пирӗн республикӑра пушар 82 хутчен тухнӑ. Вут-ҫулӑм 2 миллион тенкӗ ытлалӑх шар кӑтартнӑ. Инкекре 17 ҫын пурнӑҫӗ татӑлнӑ.

equipnet.ru сайтри сӑн

Чӑваш Енре пурӑнакан хӗрарӑм ӗҫсӗр тесе халӑха ӗҫпе тивӗҫтерекен центрта шутра тӑнӑ. Хӑй вара ҫав вӑхӑтра ӗҫлесе укҫа ӗҫлесе илнӗ.

Хайхискер Канашра Раҫҫей чукун ҫулӗн филиалӗнче тӑрӑшнӑ, пӳлӗмсене тирпейленӗ, ҫунӑ. Куншӑн ӑна укҫа тӳленӗ. Ҫав вӑхӑтрах вӑл халӑха ӗҫпе тивӗҫтерекен центрта шутра тӑрса тӑватӑ уйӑх пособи илнӗ.

Ҫапла майпа ҫак хӗрарӑм халӑха ӗҫпе тивӗҫтерекен центра 24 пин ытла тенкӗлӗх тӑкак кӳнӗ. Ун тӗлӗшпе пуҫиле ӗҫ пуҫарнӑ. Халӗ пуҫиле ӗҫе следовательсем тишкерсе пӗтернӗ. Ӑна кӗҫех Канашри миравай суд пахса тухӗ.

Урамсен чӑваш ячӗсем питӗ илемлӗ. Вӗсене тишкеретӗн те чӑвашсем мӗнле кӑна ят паман-ши тесе тӗлӗнетӗн. Шел те, хальхи вӑхӑтра хӑлӑх ӑсӗ мӑкарах пулас. Вӗсен фантази ҫитмест. Юрӗ, тейӗпӗр, Совет саманинче ҫӳлтен хушнӑ та чылай ялта Совет, Комсомол, Ленин тата ытти ҫавнашкал урамсем купипех шӑтса тулнӑ. Хальхи вӑхӑтра унашкалли ҫук, анчах ҫавах питӗ хавшак: ӑҫта ан пӑх — Садовая, ӑҫта ан пӑх — Южная та Лесная, Парковая та Луговая... Молодежная е Новая текеннисем пирки калаҫу та ҫук.

Лапсар ялӗнчи урам ячӗсем пулман пулас. Е сыхланса юлман. Пӗр урамӑн кӑна темиҫе ят пур: ӑна е Киремет урамӗ теҫҫӗ, тата авал Парник урамӗ тени сыхланса юлнӑ. Эпир вара ытларах Пӗрремӗш урам, Иккӗмӗш урам тата Виҫҫӗмӗш урам тетпӗр (сӑмах май, эпир, Комсомол урамӗнче пурӑнакансем, ӑна Пӗрремӗш тетпӗр, Шупашкар урамне — Виҫҫӗмӗш; Шупашкар урамӗнче пурӑнакансем вара урӑхла — хӑйсенне Пӗрремӗш, пирӗнне Виҫҫӗмӗш).

Таврари ялсенчи хӑш-пӗр урам ячӗсене пӗлетӗп. Ассакасси ялӗнче пӗр урам ҫеҫ пулнӑ та ун ячӗ пулман ӗнтӗ. Халӗ те вӗсен пӗр урам ҫеҫ — «Асакасинская».

Малалла...

Паян Чӑваш Республикин Наци вулавӑшӗнче таврапӗлӳҫӗсен пӗрлӗхне йӗркеленӗренпе ҫавра ҫул ҫитнӗрен уявлас ыйтусене сӳтсе яврӗҫ.

Кӑҫал таврапӗлӳҫӗсен пӗрлӗхӗ икӗ дата палӑртать. Пӗрремӗшӗнчен, ку — вырӑнти тавралӑха тӗпчекенсен пӗрлӗхне никӗсленӗренпе 100 ҫул ҫитни, иккӗмӗшӗнчен — «Чӑваш таврапӗлӳҫӗсен пӗрлӗхӗ» Чӑваш Республикин обществӑлла пӗрлӗхӗ 30 ҫул тултарни.

Оргкомитет ларӑвӗнче Сӑрпа Хусан хӳтӗлев чиккисене тунине ҫутатса паракан кӗнекесен куравне йӗркелеме палӑртрӗҫ. Ҫавӑн пекех паллӑ кун тӗлне чи лайӑх таврапӗлӳ кӗнекисен йышне хатӗрлеҫҫӗ. Ҫакна палӑртмалла: таврапӗлӳҫӗсем ҫулсерен вун-вун ҫӗнӗ кӗнеке хатӗрлеҫҫӗ, ҫавӑнпа тулли курава йӗркелеме йывӑр пулӗ.

Ҫавӑн пекех оргнкомитет ҫулленхи пуху вӑхӑтӗнче тухса каламалли докладсен списокне хатӗрлерӗ. Кунта ҫамрӑксене таврапӗлӗве явӑҫтармалли майсене сӳтсе явни те, Википедире таврапӗлӗве аталантарасси те, тӗпчевре Яндекс.Тӑлмачпа усӑ курасси те. Тӑхтавсенче чӑваш хореографийӗн уйрӑмлӑхӗсем ҫинчен каласа пама йышӑннӑ, ҫавӑн пекех фольклор коллективӗсем хӑйсен пултарулӑхӗпе паллаштарӗҫ.

Юбилейсене пуш уйӑхӗн 27-мӗшӗнче чӑваш таврапӗлӳҫӗсен пӗрлӗхӗ ҫуллен ирттерекен пухӑвӗнче паллӑ тӑвӗҫ.

Малалла...

Кӑрлач уйӑхӗн 29-мӗшӗнче Улатӑрта республикӑра вырӑнти хӑйтытӑмлӑха ҫӗнӗлле йӗркелес ыйтӑва сӳтсе явма пухӑнӗҫ. Халӑх итлевне хула администрацийӗн пысӑк залӗнче ирттерме йышӑннӑ.

Улатӑрсем хыҫҫӑн итлеве ытти муниципалитетра та йӗркелеме палӑртнӑ. Пухусене икӗ эрнере ирттерсе пӗтермелле.

Кунта сӑмах муниципалитет пӗрлешӗвӗн тата муниципалитет пӗрлешӗвӗн администрацийӗн пуҫлӑхӗн тивӗҫне пӗр ҫын пурнӑҫласси пирки пырать. Тата уҫӑмлӑрах ӑнлантарсан, хальхи вӑхӑтра районсемпе хула администрацийӗсен пуҫлӑхӗсем (вӗсене сити-менеджер та тетпӗр) тата районсемпе хуласен — Депутатсен пухӑвӗсен пуҫлӑхӗсем пур. Икӗ ҫын вырӑнне пӗрне ҫеҫ хӑварасшӑн тата вӗсене халӑхпа суйласшӑн.

Асӑннӑ ыйтӑва пӗлтӗрхи раштав уйӑхӗн 26-мӗшӗнче республикӑн Общество палатинчи «ҫавра сӗтелте» тишкернӗ. Унтисем халӑхпа сӳтсе явсан тӗрӗс тесе йышӑннӑ. Ку шухӑшах республика Элтеперӗ Олег Николаев та палӑртнӑччӗ.