ШӖМ тунӑ сӑн

Паян 12 сехетре Ҫӗрпӳ районӗнче, А-151 федераци ҫулӗн 9-мӗш ҫухрӑмӗнче темиҫе машина ҫапӑннӑ. Шел те, инкек ҫын пурнӑҫне татнӑ.

ЧР ШӖМӗ малтанлӑха пӗлтернӗ тӑрӑх, «Киа-Карнивал» машина унпа ҫула май пыракан «Опельпе-Астрӑпа» ҫапӑннӑ. Лешӗ «Чанган» кроссовер ҫине пырса тӑрӑннӑ. Ку вара «Ниссан» ҫине пырса кӗнӗ. Пур водитель те урӑ пулнӑ.

Аварире «Ниссанри» 40 ҫулти пассажир вилнӗ. Унтах пулнӑ хӗрарӑмпа икӗ ача суранланнӑ. Вӗсем ҫула май машинӑпа пульницӑна ларса кайнӑ.

Следстви комитечӗ тунӑ сӑн

Авӑн уйӑхӗн 13-мӗшӗнче Елчӗк районӗнче тракторист сарӑмсӑр вилнӗ. РФ Следстви комитечӗ пӗлтернӗ тӑрӑх, вӑл хӑйӗн тракторӗ айне пулнӑ.

Ҫав кун «Труд» ял хуҫалӑх производство кооперативӗнче 15 сехетре 34 ҫулти арҫын удобрени пушатнӑ чухне хӑйӗн тракторӗн кустӑрми айне пулнӑ. Вӑл ҫавӑн чухнех сывлама пӑрахнӑ.

Халӗ следовательсем ӗҫ-пуҫа тӗпчеҫҫӗ. Ку ӗҫе Ӗҫ инспекцийӗн ӗҫченӗсене те явӑҫтарӗҫ.

cap.ru сӑнӳкерчӗкӗ

Авӑн уйӑхӗн 15-мӗшӗнче Элӗкре пӗвере арҫын виллине тупнӑ. Ӑна иртен-ҫӳрен асӑрханӑ.

Малтанлӑха пӗлтернӗ тӑрӑх, 58 ҫулти арҫын пӗве хӗррине пулӑ тытма кайнӑ. Анчах вӑл хӑрушсӑрлӑх мерисене пӑхӑнман - путса вилнӗ. Ҫакӑ паллӑ: вӑл ӳсӗр пулнӑ.

Сӑмах май, ун пек инкек унччен Вӑрнар районӗнче те пулнӑ. Унта та арҫын пулла кайсан путса вилнӗ.

cheb.ru сӑнӳкерчӗкӗ

Шупашкарти техникумсенчен пӗринче пушар тухнӑ.

Вут-ҫулӑм Шупашкарти транспорт тата строительство технологийӗсен «ТрансСтройТех» техникумӗнче алхасма тытӑннӑ. Вӑл Магницкий урамӗнче вырнаҫнӑ.

Авӑн уйӑхӗн 13-мӗшӗнче ирхи 6 сехет те 30 минутра тухнӑ пушара ҫӑлавҫӑсем пырса ҫитиччен сӳнтерме пултарнӑ. Кун пирки Чӑваш Енӗн Инкеклӗ ӗҫсен министерствинче пӗлтернӗ.

Пушар вӑхӑтӗнче кухньӑри электричество оборудованийӗ сиенленнӗ.

jur24pro.ru сайтри сӑн

Елчӗк районӗнче 88 ҫулти арҫын 91 ҫулти хӗрарӑма хӗнесе пӗтернӗ. Район прокуратури ун тӗлӗшпе пуҫарнӑ пуҫиле ӗҫе суда ярса панӑ.

Следстви палӑртнӑ тӑрӑх, авӑн уйӑхӗн 12-мӗшӗнче ҫак арҫын ӳсӗр пулнӑ, кӳрше каҫнӑ. 91 ҫулти хӗрарӑм унпа эрех ӗҫме килӗшмен-мӗн. Кӳрши ӑна хӗнеме пуҫланӑ: кӗлеткинчен тапнӑ, ҫапнӑ. Ку кӑна мар - мӑйӗнчен пӑвма пуҫланӑ, вӗлерессипе хӑратнӑ.

Следстви комитечӗ тунӑ сӑн

Паян кӑнтӑрла Канашри Ленин урамӗнчи 30-мӗш ҫуртра 3 ача газ сӗрӗмӗпе наркӑмӑшланнӑ. Телее, пурте чӗрӗ.

Ачасем - 5-ре,7-ре тата тата 13 ҫулти. Кӑнтӑрла ашшӗ киле килнӗ те газ шӑрши кӗнине туйнӑ. Кӑштахран ачасем пуҫ ыратма пуҫлани пирки каланӑ. Вӗсене пульницӑна илсе ҫитернӗ.

Ҫакӑ паллӑ: хваттерте газ колонки ӗҫлет, пластик чӳречесем ҫинче сывлӑш кӗмелли клапан ҫук, вентиляци лайӑх ӗҫлемен.

Инкек хыҫҫӑн Следстви комитечӗн Чӑваш Енри следстви управленийӗ тӗрӗслев пуҫарнӑ.

chuvashia.sledcom.ru сӑнӳкерчӗкӗ

Йӗпреҫ районӗнчи Чӑваш Тимеш ялӗнче пурӑнакан арҫын хӑй кайса ҫӳрекен хӗрарӑмӑн ывӑлне хӗнесе пурӑннӑ.

46 ҫулти арҫынна халӗ РФ Пуҫиле кодексӗн 117-мӗш статйин 2-мӗш пайӗн «г» пункчӗпе килӗшӳллӗн явап тыттарнӑ.

Хӑй кайса ҫӳрекен хӗрарӑмӑн 16 ҫулти ывӑлне ҫав арҫын юратман. Ҫавна май вӑл ӑна 2022 ҫулхи чӳк уйӑхӗнчен пуҫласа кӑҫалхи ҫу уйӑхӗччен пӗрре ҫеҫ мар хӗненӗ.

Суд арҫынна 3 ҫул та 2 уйӑхлӑха тӗрмене хупмасӑр ирӗкрен хӑтарма, сӑнаса тӑмалли вӑхӑта ҫулталӑк тесе йышӑннӑ.

21.мвд.рф сӑнӳкерчӗкӗ

Ҫӗнӗ Шупашкарта пурӑнакан ҫамрӑк хӗрарӑм 5 банкра кредит илсе ултавҫӑсене укҫа куҫарса панӑ.

Хӗрарӑм патне иртнӗ уйӑх вӗҫӗнче ют ҫын шӑнкӑравланӑ. Вӑл хӑйӗнпе право хуралӗн тытӑмӗнче ӗҫлекен ҫын тесе паллаштарнӑ, хӗрарӑма такамсем улталасшӑн тесе тыттарнӑ.

Ҫав ҫын ӗнентернӗ тӑрӑх, хӗрарӑм ячӗпе темле арҫын кредит илесшӗн-мӗн, укҫи-тенке упраса хӑварас тесе «хӑрушсӑр» счёт ҫине куҫармалла-мӗн.

Хӗрарӑм ултавҫӑсем каланӑ банксене кайса кивҫен укҫа илнӗ. Кредит учрежденийӗсенче ӑна ултавҫӑсем пулма пултарни ҫинчен асӑрхаттарнӑ, анчах вӑл никама та итлемен. Кредит илсе пурӗ 2 миллион тенкӗ ытла укҫана такамсене куҫарса панӑ.

ҪҪХПИ тунӑ сӑн

Авӑн уйӑхӗн 6-мӗшӗнче 17 сехет ҫурӑра М-7 федераци ҫулӗ ҫинче, Куславкка районӗнче, ҫӑмӑл машина фура умне тухнӑ. Аварире пӗчӗк машина водителӗ вилнӗ, вӑл ҫавӑн чухнех сывлама пӑрахнӑ.

Малтанлӑха пӗлтернӗ тӑрӑх, «Хендай Солярис» водителӗ иккӗмӗш пӗлтерӗшлӗ ҫул ҫинчен тухса сулахаялла пӑрӑннӑ чухне фурӑна ирттерсе яман. «МАН» ун ҫине пырса кӗнӗ.

nyafoto.ru сӑнӳкерчӗкӗ

Ҫӗнӗ Шупашкарта пурӑнакан ҫамрӑк улталаннӑ.

Банкра ӗҫлекен 26 ҫулти каччӑ мессенджерсенчен пӗринче пӗлтерӳ курнӑ. Унта хушма тупӑш ӗҫлесе илме май пурри ҫинчен пӗлтернӗ.

Каччӑ пушӑ вӑхӑтра ӗҫлеме хирӗҫ пулман. Мессенджерсенчи пӗлтерӳре каланӑ тӑрӑх, отельсемпе паллӑ вырӑнсене халӑхра сарма пулӑшмалла пулнӑ. Унӑн хӑна ҫурчӗсенчи номерсене броньлемелле, кайран ӑна вӗсен хуҫисем укҫана тавӑрса парӗҫ-мӗн.

Малтанласа каччӑн счечӗ ҫине, чӑн та, укҫа килнӗ. Анчах кайран тӳлеме пӑрахнӑ. Каччӑ 60 пин ытла тенкӗсӗр тӑрса юлнӑ.

Пӑтӑрмах тӗлӗшпе йӗрке хуралҫисем халӗ пуҫиле ӗҫ пуҫарнӑ.