Ыран, чӳк уйӑхӗн 28-мӗшӗнче, Шупашкарта хӑш-пӗр ҫулпа чылай машинӑна ҫӳреме чарӗҫ. Ҫапла ирхи 7 сехетрен пуҫласа Ача амӑшӗн кунӗпе ҫыхӑннӑ массӑллӑ мероприятисем вӗҫлениччен пулӗ. Ку Ленинград урамне (Воробьев композиторсен урамӗпе хӗресленнӗ вырӑнтан пуҫласа Хӗрлӗ тӳрем таран) пырса тивет.

Ҫак вырӑнта тӳлевлӗ паркинг та ӗҫлемӗ. Ҫавна май Шупашкар хула администрацийӗ маршрута маларах палӑртса хума сӗнет.

Шупашкарта биспилотникрен шар курнӑ ҫуртра чӳречесем лартма тытӑннӑ. Кун пирки Шупашкар хулин пуҫлӑхӗн тивӗҫӗсене пурнӑҫлакан Станислав Трофимов хыпарланӑ.

Комисси хваттерсене ӗнер пӑхса тухнӑ: чӳречесене виҫнӗ, ӑҫта рама, ӑҫта кантӑк кӑна лартмаллине палӑртнӑ. Монтажниксем тӳрех ӗҫе пуҫӑннӑ. Чӳрече туса кӑларакан предприятире тӗп ӗҫе вӑхӑтлӑх чарса лартса ҫак ҫурт валли чӳречесем тума тытӑннӑ.

cap.ru сайтри сӑн

Украина ҫарӗсен беспилотникӗсем Шупашкарти 12 хутлӑ ҫурт тӑррине сиенлетнӗ чухне икӗ ҫын аманни пирки пӗлтернӗччӗ. Вӗсем – амӑшӗпе ывӑлӗ.

Ӗнер пульницӑна вӗсем патне ЧР сывлӑх сыхлавӗн министрӗ килсе кайнӑ, амӑшӗпе ывӑлне мӗнле медпулӑшу кӳнине тӗрӗсленӗ. Ывӑлӗ вӑйлах аманман. Амӑшне вара операци тума тивнӗ.

Аса илтерер: чук уйӑхӗн 26-мӗшӗнче ҫур ҫӗр иртни 2-3 сехетре Шупашкара Украина беспилотникӗсем тапӑннӑ.

«Контактра» халӑх тетелӗнчи сӑн

Ҫӗнӗ Шупашкарти стоматологи клиникин администраторӗ ултавҫӑсене 100 пин тенкӗ каҫарса панӑ. Вӑл мессенджерта пуҫлӑхӗпе ҫырӑнать тесе ӗненнӗ.

Ӗҫ чатне пуҫлӑхран ҫыру килнӗ, унӑн хӑвӑрт кӑна укҫа тӳлесе ямалли пур-мӗн. Номерӗ те, сӑнӳкерчӗкӗ те пуҫлӑхӑнни пекех пулнӑ. Кайран хайхи «пуҫлӑх» администратора хӑйне ҫырма пуҫланӑ. Вӑл ӑна ӗненсе хӑйӗн картти ҫинчен 100 пин тенкӗ куҫарса панӑ.

«Директор» каллех укҫа куҫарма ыйтсан тин вӑл иккӗленме тытӑннӑ. Ҫапла аккаунт суя пулни, ӑна ултавҫӑсем ҫырни ҫиеле тухнӑ.

Ку канмалли кунсенче, чӳкӗн 15-мӗшӗнче, Шупашкарти «Пехет» агромаркетра Патӑрьел округӗн кунӗ иртӗ.

Унта пыракансене пуян программа кӗтет: «Пашьел»: «Чемен», «Умарина», «Ялкын», «Гармония» халӑх ансамблӗсен пултарулӑхӗпе киленме май пулӗ. «Паттӑр» спор шкулӗн спортсменӗсем фитнес-аэробика номерӗпе паллаштарӗҫ.

Ҫавӑн пекех аслисемпе ачасем ал ӗҫӗ енӗпе ӑсталӑх класӗсене хутшӑнайӗҫ. Сцена ҫинче чӑваш эстрада ҫӑлтӑрӗсем те юрӑсемпе савӑнтарӗҫ – Алексей Московский тата Сергей Лекеров пулӗҫ.

«Контактра» халӑх тетелӗнчи сӑн

Шупашкарта Чӑваш АССРӗн Аслӑ Канашне 17 ҫул ертсе пынӑ политика, Шупашкарӑн хисеплӗ ҫыннине Семен Ислюкова халалланӑ палӑк пулӗ. Ӑна Ислюков скверӗнче вырнаҫтарӗҫ.

Палӑк авторӗ – Владимир Нагорнов скульптор. Ислюков аллинче – плащ тата шлепке, вӑл ҫӳллех мар пьедестал ҫинче тӑрать. Ҫапла ахальтен туман – скульптор яланах халӑхпа ҫывӑх пулнӑ политикӑн уҫӑ та ансат кӑмӑлне кӑтартасшӑн.

«На связи» форумри сӑн

«Ҫыхӑнура» портал пӗлтернӗ тӑрӑх, Шупашкарти Афанасьев урамӗнчи 19-мӗш ҫуртра подъезда кӗмелли вырӑнта стена йӑтӑнса аннӑ.

Рабочисем юсав ӗҫӗсене пуҫӑннӑ ӗнтӗ. Вӗсем каланӑ тӑрӑх, стена ҫурт халӗ те анса (усадка) пынӑран йӑтӑннӑ. Сӑмах май, ҫак ҫуртра – 12 подъезд, 652 хваттер. Хальлӗхе ытти подъезд йӗркеллех.

Ку ҫурта малтан «Ютон» компани тунӑ. Вӑл панкрута тухсан ӑна «СМУ-58» туса пӗтернӗ.

«Контактра» халӑх тетелӗнчи сӑн

Халӑхсен пӗрлӗхӗн кунӗ умӗн Шупашкарта пысӑк флешмоб иртнӗ. Унта вырӑнти аслӑ шкулсенче вӗренекенсем тата ют ҫӗршывран килнӗ студентсем хутшӑннӑ.

Чӳк уйӑхӗн 2-мӗшӗнче Анне палӑкӗ умӗнче 400 яхӑн ҫын пухӑнса 5 вӑйӑ картине тӑнӑ. Ҫапла халӑхсем туслӑ пурӑннине кӑтартнӑ вӗсем.

Палӑртмалла: хӑшӗсем акцие ушкӑнӗпех килнӗ.

rg.ru сайтри сӑн

Шупашкарта пурӑнакан 50 ҫулти арҫын укҫа-тенке инвестици хывса тупӑш тума ӗмӗтленнӗ. Анчах шухӑшланӑ пек пулса тухман – вӑл 5,8 миллион тенкӗ ҫухатнӑ. Хайхискер ултавҫӑсен серепине ҫакланнӑ.

Вӑл ку рекламӑна тӗнче тетелӗнче курнӑ. Унта тӳрех заявка хӑварнӑ. Кӗҫех унпа инвестици компанийӗн «менеджерӗ» ҫыхӑннӑ та телефона сарӑм вырнаҫтарма каланӑ. Ҫапла арҫын счет ҫине укҫа куҫарса тӑнӑ. Хӑйӗн пулман, вӑл банксенчен кредит илнӗ.

Арҫын хӑйне улталанине пӗр уйӑхран ӑнланнӑ. Счет ҫине хывнӑ укҫана каялла тавӑраймасан тин ҫак шухӑш патне пырса ҫитнӗ вӑл.

ШӖМ тунӑ сӑн

Шупашкарта ҫул-йӗр инспекторӗсем 48 ҫулти водителе тытса чарнӑ та протокол ҫырма пуҫланӑ. Лешӗ вара ҫав вӑхӑтрах ҫывӑрса кайнӑ.

Водитель тытса чарнӑ чухне вӑйлах ӳсӗр пулнӑ, ура ҫинче аран тӑнӑ. Унччен маларах вӑл «Лада Калинӑпа» Эгер бульварӗнче парковкӑра ларакан Лада Гранта» ҫине пырса тӑрӑннӑ. Юрать-ха, никам та суранланман.

Палӑртмалла: водитель медосвидетельствовани витӗр тухма килӗшмен.