«Ҫыхӑнура» порталти сӑн

Ҫӗнӗ Шупашкар хулинче 2-мӗш шкул ҫывӑхӗнче хир сыснисен кӗтӗвне асӑрханӑ. Ҫак шкул Ҫамрӑксен урамӗнчи 2-мӗш ҫуртра вырнаҫнӑ.

Хир сысни ҫурисемпе ҫул урлӑ каҫса сквера кӗнӗ. Вӗсем иртен-ҫӳрене асӑрхаман та тейӗн – лӑпкӑнах утнӑ.

Вырӑна Чӗрчунсен тӗнчине сыхлакан дирекци инспекторӗсем килнӗ. Шупашкар хула администрацийӗ пӗлтернӗ тӑрӑх, хир сыснисене каялла вӑрмана янӑ.

Специалистсем ӑнлантарнӑ тӑрӑх, хир сыснисемпе тӗл пулсан пӑлханса ӳкмелле мар, хирӗҫ тӑмасан вӗсем хӑрушлӑх кӑларса тӑратмаҫҫӗ. Ытларах чухне хир сыснисем ҫулран аташса кайса ҫынсем утакан вырӑнсене тухаҫҫӗ.

photo.airlines-inform.ru сайтри сӑн

Самолетри пассажир бортпроводника ҫапнӑ. Вӑл ӑна туалета яман-мӗн.

Ку шӑп та лӑп ҫулталӑк каялла, 2025 ҫулхи авӑн уйӑхӗн 18-мӗшӗнче, «Победа» авиакоманин «Мускав – Шупашкар» самолетӗнче пулнӑ. Ҫав арҫынна суд тунӑ ӗнтӗ.

Судра акӑ мӗн ӑнлантарнӑ вӑл. Арҫын самолета лариччен Шереметьево аэропортӗнчи бизнес-залра хӗрлӗ эрех ӗҫнӗ, анчах, хӑй каланӑ тӑрӑх, «ӳсӗрӗлмен, хаваслӑ кӑмӑллӑ кӑна пулнӑ». Самолетра вӑл кӳршипе паллашма хӑтланнӑ, анчах лешӗ хирӗҫленӗ.

Хирӗҫӳ Шупашкарта анса лариччен тухнӑ. Арҫын каланӑ тӑрӑх, вӑл вӑраннӑ, унӑн туалета каяс килсе кайнӑ. Вӑл юнашар ларакан хӗрарӑма тӑрса ирттерсе яма ыйтнӑ. Анчах лешӗ тӑрайман, мӗншӗн тесен ларкӑчсен хушшинче ҫынсем пулнӑ. Куншӑн арҫын кӳршӗ хӗрарӑмне кӑшкӑрма, тем те пӗр каласа хӑртма тытӑннӑ. Бортпроводникӑн ӑна лӑплантарма тивнӗ. Вӑл арҫынна тӗпел пӳлӗмне илсе кайнӑ та полици киличчен тытса тӑнӑ. Анчах пассажир ниепле те лӑпланайман – бортпроводника хырӑмӗнчен ҫапнӑ.

Судра арҫын айӑпне йышӑнман. Вӑл алӑпа кӑна хӑлаҫланнӑ имӗш. Ҫапах суд ӑна тӗрмене хупмасӑр 2,5 ҫуллӑха айӑпланӑ. Арҫын ЧР Аслӑ судне аппеляци панӑ, анчах приговор улшӑнман.

Малалла...

max.ru/channel_chuvashia_21 сӑнӳкерчӗкӗ

Шупашкар хулинче пурӑнакансем урамра ҫывӑрса пурӑнакан ҫынна хӑваласа ярасшӑн пулнӑ.

Килсӗр-ҫуртсӑр арҫын чукун ҫул патӗнчи ҫул айӗнчен каҫса ҫӳремелли вырӑн патӗнче тӗпленнӗ. Унта вӑл ал айне мӗн лекнӗ, ҫавӑн ҫине выртать.

Хула ҫыннисем яваплӑ тӗрлӗ службӑна ҫӑхав хыҫҫӑн ҫӑхав ҫырма пуҫланӑ. Специалистсем вӗсем пӑшӑрханнине илтнӗ, ӑша хывнӑ, арҫынна Килсӗр-ҫуртсӑр ҫынсен республикӑри центрне вырнаҫтарма хӑтланса пӑхнӑ. Анчах лешӗ унта кайса пурӑнма килӗшмен. Унта, тӗрӗссипе, ялан пурӑнаймӑн. Ҫухатнӑ документсене ҫӗнетсен е ӗҫ тупса пама тӑрӑшаҫҫӗ, сусӑр пулсан ваттисен ҫуртне вырнаҫтарма пулӑшаҫҫӗ. Анчах, шел те, пурте лӑпланса-тӗпленсе пурӑнасшӑн мар. Эрех ӗҫме юратни те ура хуни вӑрттӑнлӑх мар.

ruzaregion.ru сайтри сӑн

Шупашкар хулинче пурӑнакан арҫын ятарлӑ ҫар операцине хутшӑннӑ салтакӗн картти ҫинчен 1 млн яхӑн тенкӗ вӑрланӑ.

Вӑл салтака банк карттине илнӗ чухне пулӑшу сӗннӗ. Анчах хӑй ҫав вӑхӑтра карттӑна сӑн ӳкерсе юлнӑ та ҫулталӑк тӑршшӗпе мобильлӗ сарӑм урлӑ укҫа-тенке илсе тӑнӑ, таварсемшӗн тӳленӗ. Ҫапла вӑл салтак картти ҫинчен пӗтӗмпе 930 пин тенкӗ вӑрланӑ.

Следстви пуҫлансан арҫын тӑкака йӑлтах саплаштарнӑ. Суд ӑна 200 пин тенкӗлӗх штрафлама йышӑннӑ.

Сӑмах май, салтак картти ҫинчен укҫа-тенкӗ вӑрланӑ тӗслӗхсем унччен те пулнӑ. Шел те, ҫынсем ҫӑмӑл майпа пуйса юласшӑн. Анчах ваттисем калашле, ҫӑмал укҫа пулмасть, вӗренӗн те вӗҫӗ пур.

Асӑрхаттаратпӑр: урамра картта тупса унпа лавккара тӳлени те укҫа вӑрлани шутланать.

ixbt.com сайтри сӑн

Шупашкар хулинчи шкул ачи ултавҫӑсене ашшӗ-амӑшӗ пухнӑ 15 миллион тенке парса янӑ.

Ҫапла хӑтланнӑ 9-мӗш класра вӗренекен хӗр. Ун патне палламан ҫын шӑнкӑравланӑ та транспорт компанине посылка килнине, курьер ӑна пырса парассине пӗлтернӗ, смс-ҫырупа килнӗ кода калама хушнӑ. Хӗр шӑпах тата амӑшӗ посылка кӗтнине пӗлнӗ, ҫавӑнпа пӗрре те иккӗленмен, палламан ҫынна кода каланӑ. Унтан палламан ҫынсем ӑна хӑратма пуҫланӑ, видеоҫыхӑну урлӑ калаҫса килӗнче мӗн пуррине пӑхнӑ. Ку «ухтару» пулнӑ-мӗн, ҫакна тума полицейскисем хӑйсем килеймен. Хӗр килте укҫа шыраса тупнӑ, палламан ҫынсене кӑтартнӑ. Лешсем ӑна «деклараци тума» ӳкӗте кӗртнӗ. Ҫакна тусанах каялла тавӑрса параҫҫӗ-мӗн.

Хӗр таксипе Ҫӗрпӳ округне ларса кайнӑ та курьерпа тӗл пулнӑ, «коза» пароле пӗлтерсе ӑна пӗтӗм укҫана, 15 миллион тенке, тыттарса янӑ.

«Ҫыхӑнура» сайтри сӑн

Шупашкар хулинче икӗ хӗрачапа пӗр каччӑ Мускав кӗперӗнчен кӳлмеке ӳкнӗ.

Ку ӗнер, авӑн уйӑхӗн 13-мӗшӗнче, 17:47 сехетре пулнӑ. 2023 тата 2014 ҫулсенче ҫуралнӑ хӗрачасем тата пӗр каччӑ кӗперӗн техэтажӗнчен кӳлмеке шыва ӳкнӗ. Вӗсене катамаранпа ярӑнакан ҫын асӑрханӑ та ҫыран хӗррине тухма пулӑшнӑ. Хӗрачасене Республикӑри клиника пульницине тӗрӗслеме илсе кайнӑ, каччӑ вара тарса ҫухалнӑ.

«Ҫыхӑнура» форумра ҫырнӑ тӑрӑх, ҫав техэтажра ҫамрӑксемпе ачасем ҫӳреме юратаҫҫӗ-мӗн. Кӗпер айӗнче ҫын ҫӳремелӗх ҫул пур – вӑл кӗпере юсакан, тӗрӗслесе тӑракан специалистсем валли.

cap.ru сӑнӳкерчӗкӗ

Ҫӗнӗ Шупашкарта пурӑнакан хӗрарӑм шиншилла ӗрчетме йышӑннӑ. Усламҫӑ пулас ӗмӗтлӗскер ҫемье тупӑшне ӳстересси пирки нумай пуҫ ватнӑ. Ун пек шухӑшласа пӑхнӑ, кун пек те. Вара хӗрарӑм шиншилла ӗрчетес тенӗ.

Екатерина Крючкова 2025 ҫулхи ака уйӑхӗнче социаллӑ контракт алӑ пусса патшалӑхран укҫа илнӗ. Шиншилла ҫурине хӗрарӑм ятарлӑ питомникра туянать, вӗсене ӳстерет те кайран сутса ярать. Туянакансене вӑл пӗлтерӳ урлӑ шырать.

Икӗ ача амӑшӗн паянхи кун тӗлне илсен тавар туянакансем те йӗркеленнӗ, шиншиллӑна пӗр ҫынсемех илеҫҫӗ. Ҫапла вара усламҫӑн ӗҫӗ пӗчӗккӗн вӑй илсе пырать.

Хӗрарӑм палӑртнӑ тӑрӑх, ҫӗнӗ ӗҫе пуҫӑнма шикленмелле мар. Унччен малтан, паллах, тӗплӗн шухӑшласа пӑхмалла. Ӗҫ чуна ҫывӑх пулсан хаваспах тӑрӑшатӑн.

https://dzen.ru/a/aqJF8hwIljOW4pgK?ysclid=mtv4x2jvhc863676710 сайтран илнӗ сӑнӳкерчӗк

Чӑваш Енӗн тӗп хулине 100 ҫын вырнаҫакан троллейбус илсе килнӗ. УТТЗ 6241.01 «Горожанин» ятлӑ маркӑллӑ ҫак транспорта Шупашкара кӑҫал 10 единица кӳрсе килмелле.

Асӑннӑ троллейбуса 100 ҫын вырнаҫать, ларса пымалли вырӑн шучӗ - 33. Чи лайӑххи вара троллейбус сасӑсӑр тенӗ пек ӗҫлени. Асинхрон двигателе пула вӑл ытлашши шавлӑ мар иккен.

Транспорт тӗрлӗ категориллӗ пассажирсене ларма меллӗ. Салонта кондиционер тата ӑшӑ тытӑмӗ пур. Унсӑр пуҫне валидаторсемпе видеофиксаци камерисем вырнаҫтарнӑ.

Кун йышши модель контакт сечӗсӗр 20 километр каяйрать.

Кӑҫал кӳрсе килме палӑртнӑ 10 троллейбусран пиллӗккӗшне чӳк уйӑхӗн 11-мӗшӗччен илсе килмелле, тепӗр пиллӗккӗшне — раштав уйӑхӗн 21-мӗшӗччен.

Сӑмах май каласан, геопозицие кӑтартса тӳлесен троллейбусри хак 10 тенкӗ йӳнӗрех ларать.

cap.ru сайтри сӑн

Шупашкар хулинче пилотсӑр вӗҫекен аппаратсенчен пытанмалли тепӗр пилӗк бетон хӳтлӗхӗ лартнӑ. Ҫапла майпа халӗ вӗсем хулара – 28. Кун пирки Шупашкар хулин пуҫлӑхӗ Станислав Трофимов пӗлтернӗ.

Хальхинче бетон хӳтлӗхсене «Ленин Комсомолӗ» чарӑнура, «Хӗвелтухӑҫ урамӗнчи 20-мӗш ҫурт патӗнче, Ҫветтуй Троица мӑнастирӗ ҫывӑхӗнче, «Культура паркӗ» тата «Ҫӗнтерӳ паркӗ» чарӑнусенче лартнӑ. Станислав Трофимов пӗлтернӗ тӑрӑх, ҫитес вӑхӑтра тепӗр пилӗк бетон хӳтлӗх илсе килӗҫ.

Кӑҫал халӑха хӑрушлӑх пирки пӗлтермелли системӑна та ҫӗнетеҫҫӗ. «Ростелеком» 16 ҫӗнӗ система вырнаҫтарнӑ, «Метелица» тулли мар яваплӑ общество вара 14 системӑна урӑх ҫӗре куҫарнӑ.

Авӑн уйӑхӗн 12-мӗшӗнче Шупашкар хулинче ретротроллейбуспа экскурсие кайма май пулӗ. Анчах ку – тӳлевлӗ, билет 300 тенкӗ тӑрать, 7 ҫул тултарман ачасене вара ахалех илсе каяҫҫӗ.

Экскурсие Чӑваш транспорт управленийӗ йӗркелет. Ҫула 1964 ҫулта туса кӑларнӑ троллейбуспа тухӗҫ. Вӑл 12 сехетре чукун ҫул вокзалӗ патӗнчен (Хула ҫум урамӗ, 1-мӗш ҫурт) тапранса кайӗ. Экскурси 2 сехете тӑсӑлӗ. Троллейбус чарӑнусенче урӑх пассажирсене лартмӗ. Экскурси вӑхӑтӗнче салонра апат ҫиме, ӗҫме юрамасть.

Сӑмах май, Чӑваш транспорт управленийӗ кун пек экскурсие пӗлтӗр те ирттернӗ.