forum.na-svyazi.ru сӑнӳкерчӗкӗ

Шупашкар хула администрацийӗ йытӑ уҫӑлтарса ҫӳремелли вырӑнсене кӑҫал та уҫасшӑн. Пӗлтӗр хулара ун пек виҫӗ вырӑн йӗркеленӗ иккен.

Кӑҫал ун пек вырӑнсене хулан пур районӗнче те туса хурасшӑн:

Калинин районӗнче – Кадыков тата Шумилов урамӗсем пӗрлешекен лаптӑкра;

Ленин районӗнче – Ҫӗнӗ Лапсарти Совхоз урамӗнче;

Мускав районӗнче – Афанасьев урамӗнче.

Йытӑсем ҫӳремелли вырӑнсене карта тытса ҫавӑрӗҫ, унта балансир, дрессировка валли бум, юпасем, урнӑсем, тенкелсем тата ытти ҫавӑн пек япала вырнаҫтарӗҫ.

Палӑртнӑ ӗҫе кӑҫалхи раштав уйӑхӗн 12-мӗшӗччен вӗҫлемелле.

culture.ru сайтри сӑн

Тивӗҫлӗ канури хӗрарӑм ултавҫӑсене укҫа парас тесе Мускавах самолетпа вӗҫнӗ.

Ку Шупашкарта пурӑнакан 78 ҫулти хӗрарӑмпа пулса иртнӗ. Вӑл ултавҫӑсене 1 млн та 700 пин тенкӗ куҫарса панӑ.

Ун патне домофон улӑштармалла тесе шӑнкӑравланӑ. Хӗрарӑм хӑйӗн даннӑйӗсене пӗлтернӗ, кун хыҫҫӑн унпа темиҫе палламан ҫын ҫыхӑннӑ: опер, юрист... Вӗсем ӑна хӑратса, пӑрахнӑ. Ҫапла вӑл мӗн хушнине пурнӑҫланӑ. Ӑна 75-ри арҫынпа тӗл пулма хушнӑ, унран 1 миллион тенкӗ илме ыйтнӑ. Ҫак арҫын та улталаннӑ. Унтан хӗрарӑма хӑйӗн укҫине хушса курьера парса яма каланӑ. Унӑн укҫа татах пуррине пӗлсен ултавҫӑсем ун валли Мускава самолетпа вӗҫме билет туянса панӑ.

Хайхи «юрист» ҫыхӑнӑва тухма пӑрахсан тин хӗрарӑм хӑйне улталанине ӑнланнӑ.

vk.com/chuv_kray пабликран илнӗ сӑнӳкерчӗк

Шупашкарти Арбатра ҫутӑ мачи тӑвӗҫ.

Шупашкарти Арбат тесе Ехрем хуҫа бульварне каланине пурте пӗлеҫҫӗ пулӗ ӗнтӗ. Шӑпах ҫавӑнта Мускаври Арбатри пек ҫутӑ мачи вырнаҫтарасшӑн.

Ҫуран утса ҫӳрекенсем ҫав вырӑн вара тата та илемлӗрех пуласса шанаҫҫӗ.

ШӖМ тунӑ сӑн

Шупашкарта 18 ҫулти хӗре наркотик сутнӑшӑн суд тунӑ. Вӑл 20 эпизодпа айӑплине ҫирӗплетнӗ. Ӑна колоние 5,5 ҫуллӑха ӑсатнӑ.

Хӗре кӑҫал кӑрлач уйӑхӗнче Шупашкарти Котовский урамӗнче тытса чарнӑ. Ҫав вӑхӑтра ун ҫумӗнче 30 тӗрке наркотик пулнӑ. Хӑй те сиенлӗ япала витӗмӗнче пулнӑ.

Телефонӗнче вӑл кураторӗпе ҫырӑннӑ, хӑш подъездсенче «закладкӑсем» пуррине пӗлтернӗ. Ҫав вырӑнсене тӗрӗслесен 18 грамм ытла наркотик тупнӑ.

kem.kp.ru сайтри сӑн

Авӑн уйӑхӗн 28-мӗшӗнче Президент пепкелӗх центрӗнче кӑҫал Шупашкарти Мускав районӗнчи 1500-мӗш ача ҫуралнӑ. Арҫын ачана Александр ят панӑ.

ЗАГС ӗҫченӗсем палӑртнӑ тӑрӑх, ашшӗ-амӑшӗ кашни ҫулах ачисене хӑйне евӗр ят панӑ тӗслӗхсем тӗл пулаҫҫӗ. Кӑҫал вара уйрӑмах асра юлмаллисем пулнӑ-мӗн. Тӗслӗхрен, арҫын ачана Добрыня Никитич ят панӑ, хӗрачана вара – Мия Джульетта.

cheb-centr.soc.cap.ru сӑнӳкерчӗкӗ

Шупашкарта пурӑнакан 89 ҫулти Валерия Захарова паян та вулавӑша ҫӳрет.

Вӑл хулари К.В. Иванов ячӗллӗ библиотекӑна кайма юратать. Ватӑ ҫын унта паян пӗччен каймасть-ха, ӑна хӑйне пӑхса пулӑшакан Татьяна Шихранова социаллӑ ӗҫчен пулӑшать.

Социаллӑ ӗҫчен ватӑ ҫын пирки каласа кӑтартнӑ тӑрӑх, кинемей ӗмӗрӗпех вулама юратнӑ. Библиотекӑра иртекен мероприятисенче вӑл кӗнекесене хаклать, хаваспах сӳтсе явать.

Прокуратура архивӗнчи сӑн

Шупашкарти Калинин районӗн прокуратури Пӗтӗм Раҫҫейри «РАҪҪЕЙШӖН халӑх фрончӗ» общество юхӑмӗ элчисемпе пӗрле тӗп хуламӑрти Якимов ҫырминче вырнаҫнӑ ҫӗр лаптӑкне тухса тӗрӗсленӗ.

Якимов юханшывӗ Атӑла лекнӗ вырӑнта нефть йышши япаласем пуррине тупса палӑртнӑ. Пӗтӗмпе – 400 тӑваткал метр лаптӑк ҫинче. Палӑртмалла: ҫак лаптӑк Шупашкар хула администрацийӗн шутланать.

Ҫавна май тӗрӗслев хыҫҫӑн Шупашкар хула администрацийӗн пуҫлӑхӗ тӗлӗшпе представлени ҫырнӑ, ҫак ҫитменлӗхсене пӗтерме ыйтнӑ.

Телеграмри t.me/chebcentr21 каналтан илнӗ сӑнӳкерчӗксем

Шупашкар хулинчи «Каскад» суту-илӳ ҫуртӗнче вырнаҫнӑ «Пехет» агромаркетра ҫак кунсенче Чӑваш Енӗн Ӗҫ министерствин кунӗсем иртеҫҫӗ. Асӑннӑ ведомствӑна пӑхӑнса тӑракан учрежденисем ҫавна май унта тӗрлӗ ӑсталӑх лаҫҫи йӗркелесе хӑйсен пултарулӑхне ыттисене алла илме пулӑшаҫҫӗ.

Паян Куславккаран килсе ҫитнӗ ватӑсем мунчала ҫыхма вӗренеҫҫӗ. Шупашкар хулинчи халӑхӑн социаллӑ ыйтӑвӗсене тивӗҫтерекен центра вӑхӑта хавас та усӑллӑ ирттерме ҫӳрекен кинемейсем куславккасемпе пӗрле мунчала ҫыхнӑ.

«Куславккари Надежда Чернова тата Валентина Субакаева тӑрӑшса вӗрентеҫҫӗ те чун чӑтаймарӗ, эпӗ те хӑтланса пӑхас терӗм», — каласа кӑтартнӑ Шупашкарти Людмила Сергеева хулари комплекслӑ центрӑн пресс-службине.

Вера Иванова сӑнӳкерчӗкӗ

Шупашкар хулинче пурӑнакан Аблесовсен ҫемйинче икӗ йӗкӗреш. Аслисем, ывӑлсем, самай ӳснӗ ӗнтӗ, вӗсем вунӑ ҫулта. Ҫулталӑк каялла ҫуралнӑ хӗр пӗрчисем те вӑй илсе пыраҫҫӗ.

Паян ҫемье Шупашкарти халӑхӑн социаллӑ ыйтӑвӗсене тивӗҫтерекен комплекслӑ центрти Прокат пунктне пынӑ. Унта вӗсем йӗкӗрешсене лартса урама уҫӑлма илсе тухма меллӗ кӳме, ачасене апатлантармалли икӗ сӗтел тата шӑпӑрлансене аталанма пулӑшакан икӗ тетте вӑхӑтлӑха усӑ курма илнӗ.

«Кун пек прокат пункчӗ пурри питех те аван. Туянма туянӑн-ха, анчах кайран ӑҫта хумалла тесе пуҫ ватмалла. Кун пек килетӗн те ачасем кӑшт ӳссен япаласене каялла килсе паратӑн», — хавхаланса тав тунӑ кил хуҫи Пётр Васильевич.

Прокат пункчӗ хулари Стрелоксен 324-мӗш ҫуртӗнчи 21А ҫуртра вырнаҫнӑ. Ыйтса пӗлмелли телефон номерӗ: 51-02-68.

topdent.ru сайтри сӑн

Шупашкарти 21 ҫулти медсестра ултавҫӑсене пӗр кунра 1,2 млн тенкӗ куҫарса панӑ.

Ун патне палламан арҫын шӑнкӑравланӑ. «Ҫыхӑну операторӗ» иккен вӑл. Хайхискер хӗре пӗр тӑхтамасӑр сим-карта килӗшӗвне малалла тӑсма хушнӑ. Медсестра СМС-па килнӗ кода пӗлтернӗ. Кун хыҫҫӑн тин ултавҫӑ аллине лекнине ӑнланнӑ, «Госуслуги» порталти пароле часрах улӑштарнӑ.

Анчах ултавҫӑ та ҫывӑрман. Хӗрӗн аккаунтне такам кӗни пирки уведомлени килнӗ, ҫавӑнтах ку ыйтӑва татса памашкӑн шӑнкӑравламалли номер пулнӑ.

Хӗр ҫав номерпе шӑнкӑравланӑ. Палламан ҫын хӑйӗнпе «патшалӑх службин ӗҫченӗ» тесе паллаштарнӑ, укҫана ӑҫта куҫармаллине каласа пынӑ. Ку мел нухрата упраса хӑварма пулӑшӗ-мӗн. Ҫапла хӗр картта, кредит картти ҫинчи тата пухнӑ укҫине йӑлтах куҫарса панӑ.