Красноармейски районӗ муниципалитет округӗ пулӗ. Ун хыҫҫӑн Ҫӗмӗрле районӗ те ҫавнашкалах статуса йышӑнӗ.

Ҫак икӗ района сӑнав проектне кӗртнӗ. Малашне ыттисенче те ҫавнашкал округ туса хурасшӑн. Ҫапла йышӑннӑ ЧР Патшалӑх Канашӗ ларура.

Ҫӗмӗрле районне 11 ял тӑрӑхӗ кӗрет. Вӗсене юридици сӑпачӗ пек пӗтерӗҫ те полномочисем район ҫине тиенӗҫ. Ҫавӑн пекех ял тӑрӑхӗсенчи депутатсем пулмӗҫ, районтисем ҫеҫ юлӗҫ.

Сӑмах май, Красноармейски районӗ муниципалитет округӗ тӑвас ыйтупа хӑй тухнӑ.

Либерал-демократсен партийӗн ертӳҫи Владимир Жириновский Раҫҫей регионӗсене пӗрлештерсе пысӑклатасшӑн. Кун пирки вӑл «Комсомольская правда» МИХ журналистне каланӑ. Пӗрлештересси пирки сӑмах хускатнӑ май Жириновский Чӑваш Ене, Бурят Республикине, Удмурт Республикине, Тутарстана тата ытти наци республикине пӗтересшӗн.

Ҫӗршывӑн вице-премьерӗ Марата Хуснуллин маларах ҫӗршыври хӑш-пӗр региона (сӑмахран, Еврей автономи облаҫне тата Хабаровск крайне, Курган тата Тӗмен облаҫӗсене) пӗрлештермелле, ҫакӑ пӗчӗк регионсенчи чылай экономика ыйтӑвне татса пама май парӗ тенӗ.

Жириновский каланӑ тӑрӑх, вӗсен партийӗ регионсене пысӑклатма 25 ҫул ӗнтӗ сӗнет.

Чӑваш Ен Элтеперӗн Олег Николаевӑн паянтанпа — ҫӗнӗ пресс-секретарь. Хушӑва республика ертӳҫи хӑй алӑ пуснӑ.

Пресс-секретарь пулма Борис Краснова ҫирӗплетнӗ. Вӑл И.Я. Яковлев ячӗллӗ Чӑваш патшалӑх педагогика университетӗнче тата Патшалӑх службин Атӑл-Вятка академийӗнче вӗреннӗ.

Маларах вӑл Росреестр ертӳҫин пулӑшуҫинче, Ингушети пуҫлӑхӗн пулӑшуҫи-канашҫинче, «Опора России» (чӑв. Раҫҫей тӗрекӗ) президент организацийӗнче пресс-секретарьте ӗҫленӗ. Борис Краснов РФ Ял хуҫалӑх министерствин пресс-службине те ертсы пынӑ, «Химпромра» та, Чӑваш Ен Сывлӑх сыхлав министерствинче те тӑрӑшнӑ.

Паян Чӑваш Республикин Министрсен Кабинечӗн Председателӗн ҫумне — строительство, архитектура тата ҫурт-йӗрпе коммуналлӑ хуҫалӑх министрне ҫирӗплетнӗ. Ку должноҫре пулма Павел Данилова шаннӑ.

Павел Владимирович Шупашкарта 1974 ҫулхи утӑ уйӑхен 25-мӗшӗнче ҫуралнӑ. Ҫемьеллӗ. Мӑшӑрпе виҫӗ ача ӳстереҫҫӗ.

Павел Данилов Г.В. Плеханов ячӗллӗ Раҫҫей экономика университетӗнче «Финанс тата кредит» специальноҫа алла илнӗ. 2011-2013 ҫулсенче иккӗмӗш аслӑ пӗлӳ илнӗ. Экономика наукисен кандидачӗ.

Павел Данилов юлашки ҫулсенче «Раҫҫей Стройминӗн проект дирекцийӗ» автономи учрежденине ертсе пынӑ. Мускавран килнӗ пулин те Чӑваш Еншӗн ют мар. Вӑл кунта ҫуралнӑ, 2000-мӗш ҫулсенче Шупашкар хула администрацийӗн пуҫлӑхӗн Анатолий Емельяновӑн финанспа экономика енӗпе ҫумӗ пулса ӗҫленӗ.

news-111.ru сӑнӳкерчӗкӗ

Чӑваш Енре суйлав комиссийӗсен кунӗ иртӗ. Ҫакӑн ҫинчен калакан хушӑва республика Элтеперӗ Олег Николаев паян, ака уйӑхн 28-мӗшӗнче, алӑ пуснӑ.

Ӗҫлӗ хутра ҫапларах ҫырса хунӑ: «Суйлав правине тата Раҫҫей Федерацийӗн гражданӗсен референдумне хутшӑнас правӑна пурнӑҫа кӗртессинче Чӑваш Республикинчи суйлав комиссийӗсен тӳпине шута илсе Чӑваш Республикинче Суйлав комиссийӗсен кунне йӗркелес тата ӑна ҫулсерен утӑ уйӑхӗн 27-мӗшӗнче ирттерес».

Хушӑва республикӑн влаҫ органӗсен официаллӑ порталӗнче вырнаҫтарнӑ.

elista.org сайтри сӑн

Паян РФ Президенчӗ Владимир Путин Федераци Канашне Ҫырупа тухрӗ. Мӗнле ҫӗнӗлӗхсем кӗтеҫҫӗ ҫӗршыв ҫыннисене?

Президент шкула каякан кашни ачашӑн 10 пин тенкӗ пама сӗнчӗ. Ку йыша 1-мӗш класа кайма хатӗрленекенсем те кӗреҫҫӗ. Тӳлеве ҫурла уйӑхӗн варринче парӗҫ.

Ашшӗсӗр е амӑшӗсӗр ӳсекен 8-16 ҫулсенчи ачасене утӑ уйӑхӗн 1-мӗшӗнчен 5650 тенкӗ /Раҫҫейри вӑтам виҫе/ пама йышӑнчӗ. 7 ҫул тултарман ачашӑн илнӗ «больничнӑя» ӗҫ стажне пӑхмасӑрах шалӑвӑн 100 процентне тӳлес ыйтӑва ҫитес вӑхӑтра татса пама шантарчӗ.

Ача кӗтекен хӗрарӑмсене те пулӑшӗҫ. Малтанхи вӑхӑтрах шута тӑнӑ, пурнӑҫра йывӑрлӑха лекнӗ хӗрарӑмсене уйӑхсерен укҫа тӳлӗҫ. Раҫҫейре ку виҫе вӑтамран 6500 тенкӗпе танлашӗ.

Владимир Путин Правительствӑна ачаллӑ ҫемьесене пулӑшмалли мерӑсене утӑ уйӑхӗн 1-мӗшӗччен хатӗрлеме хушнӑ.

d-koffer.com сӑнӳкерчӗкӗ

Паян Чӑваш Республикин ҫутҫанталӑк пурлӑхӗпе экологи министрӗн ҫумне ҫирӗплетнӗ. Пукана Сергей Чепурнова шанса панӑ. Ӗҫлӗ хута республикӑн влаҫ органӗсен официаллӑ порталӗнче вырнаҫтарнӑ.

Сергей Чепурнов йӑлари хытӑ каяша турттарассишӗн яваплӑ «Экоцентр» предприятире гендиректорӑн ҫумӗнче ӗҫленӗ.

Ҫутҫанталӑк пурлӑхӗпе экологи министрӗн ҫумӗ пулнӑ Николай Косулина ӗҫрен кӑларнине Чӑваш халӑх сайчӗ пӗлтернӗччӗ. Аса илтерер: хушӑва Чӑваш Ен Элтеперӗ Олег Николаев ака уйӑхӗн 7-мӗшӗнче алӑ пуснӑччӗ.

Ӗнер Чӑваш Енӗн стоительство, архитектура тата ҫурт-йӗрпе коммуналлӑ хуҫалӑх министрӗн ҫумӗ пулма Михаил Коледана ҫирӗплетнӗ. Хушӑва республикӑн влаҫ органӗсен порталӗнче вырнаҫтарнӑ.

Михаил Александрович 1981 ҫулхи нарӑс уйӑхӗн 25-мӗшӗнче ҫуралнӑ. Шупашкарти коопераци институтӗнчен, И.Н. Ульянов ячӗллӗ Чӑваш патшалӑх университетӗнчи строительство факультетӗнчен, Патшалӑх службин Атӑл-Вятка академийӗнчен вӗренсе тухнӑ. Юлашки ҫичӗ ҫулта вӑл «Чӑваш Ен строительствин экспертизинче тата хаксене йӗркелессин центрӗ» акционерсен обществинче ӗҫленӗ.

agrarian.council.gov.ru сайтри сӑн

Чӑваш Енӗн пӗрремӗш президенчӗ, халӗ ҫӗршыв сенаторӗ, Федераци Канашӗн элчи Николай Федоров пӗлтӗр мӗн чухлӗ ӗҫлесе илнӗ? Вӑл деклараци тӑратнӑ.

Документра палӑртнӑ тӑрӑх, Николай Федоров пӗлтӗр 6502875 тенкӗ ӗҫлесе илнӗ, унӑн мӑшӑрӗ вара – 793839 тенкӗ. 2019 ҫулпа танлаштарсан, Николай Федоров ҫавӑн чухлех ӗҫлесе илнӗ.

Сенаторӑн харпӑрлӑхӗнче 265 тӑваткал метрлӗ хваттер пур, арӑмӗн – виҫӗ ҫӗр лаптӑкӗ, пурӑнмалли икӗ ҫурт, виҫӗ хваттер. Кунсӑр пуҫне экс-президент хваттерпе, дачӑпа, «ГАЗ М-21» машинӑпа усӑ курать.

Чӑваш Ен строительство, архитектура тата ҫурт-йӗрпе коммуналлӑ хуҫалӑх министрӗн ҫумӗ пулса ӗҫленӗ Александр Башлаева паян ӗҫрен хӑтарнӑ.

Асӑннӑ ҫын министр ҫумӗнче пӗлтӗрхи ака уйӑхӗнченпе тӑрӑшнӑ. Вӑл 1978 ҫулта Шупашкарта ҫуралнӑ. И.Н. Ульянов ячӗллӗ Чӑваш патшалӑх унивеситетӗнчен 2000 ҫулта вӗренсе тухнӑ, унта вӑл «Промышленность тата граждан строительстви» специальноҫа алла илнӗ.

«Регионстрой», «Промжилстрой» предприятисенче тӗрлӗ должноҫе ӗҫленӗ, каярах вӑл республикӑри тӗрлӗ проект организацийӗнче, Чӑваш Ен Строминӗнче тӑрӑшнӑ.