«Ҫыхӑнура» форумран илнӗ сӑнӳкерчӗк

Чӑваш Ен финанс министрӗ пулнӑ Светлана Енилина Питӗр хулинче ӗҫлеме тытӑннине эпир пӗлтӗрхи утӑ уйӑхӗнче пӗлтернӗччӗ-ха. Ҫӗнӗ ҫӗрти ӗҫе вӑл 2020 ҫулхи утӑ уйӑхӗн 30-мӗшӗнчен кӳлӗннӗччӗ. Светлана Енилина Питӗр хулинче финанс комитечӗн ертӳҫин ҫумӗ пулса тӑрӑшнӑ.

Халӗ вара тепӗр ҫӗнӗ хыпар пӗлтӗмӗр. Светлана Енилина Питӗр хулинчи финанс комитечӗн пуҫлӑхӗн тивӗҫӗсене вӑхӑтлӑх пурнӑҫлама тытӑннӑ.

Аса илтерер: Светлана Енилина Чӑваш Ен Элтеперӗ пулнӑ Михаил Игнатьевпа пӗр командӑра ӗҫленӗччӗ. Республика Элеперӗн тивӗҫӗсене вӑхӑтлӑха пурнӑҫлама Олег Николаева шансан ӑна ӗҫрен хӑтарнӑччӗ.

gcheb.cap.ru сӑнӳкерчӗкӗ

Шупашкар хула администрацийӗн вӗренӳ управленине Елена Сахарова ертсе пыма тытӑннӑ. Тилхепене ӑна раштав уйӑхӗн 27-мӗшӗнче тыттарнӑ.

Елена Петровна вӗренӳ тытӑмӗнче 22 ҫул ытла ӗҫлет. 2012 ҫултанпа вӑл вӗренӳ управленийӗн пуҫлӑхӗн заместителӗнче тӑрӑшнӑ.

Хула администрацийӗн вӗренӳ управленийӗн пуҫлӑхӗн вырӑнӗ кӑҫалхи ҫурла уйӑхӗнче Дмитрий Захарова республика Правительствине ӗҫлеме илсе кайсан (вӑл унта вӗренӳ тата ҫамрӑксен политикин министрӗн должноҫне йышӑнчӗ) пушаннӑччӗ. Елена Сахарова ҫав кунранпа вӗренӳ управленийӗн пуҫлӑхн тивӗҫӗсене пурнӑҫланӑччӗ.

kremlin.ru сайтри сӑн

Ыран РФ Президенчӗ Владимир Путин журналистсемпе пресс-конференци ирттерет. Вӑл Мускавра Манежра пулӗ.

Чӑваш Енрен унта каймашкӑн икӗ ҫын аккредитациленнӗ. Вӗсем – Наци телерадиокомпанийӗн ӗҫченӗсем: директорӑн информаци политики енӗпе ӗҫлекен ҫумӗ Вадим Муравьев тата Юрий Марков телеоператор.

Пресс-конференцине 507 ҫын хутшӑнӗ. Кӑшӑлвируса пула унта хутшӑнакансен йышне ытти ҫулхинчен сахалрах тума тивнӗ.

Пресс-конференци ыран 12 сехетре пуҫланӗ. Ӑна «Россия-1», «Россия-24», «НТВ», «Пӗрремӗш канал» телеканалсемпе тата «Маяк», «Вести ФМ», «Раҫҫей радиовӗ» радиостанцисемпе итлеме пулать.

2022 ҫулта республикӑри районсем муниципалитет округӗ пуласси пирки пӗлтернӗччӗ. Анчах пӗр районти депутатсем ку улшӑнӑва хирӗҫ сасӑланӑ. Вӑл — Шупашкар районӗ.

Атайкасси ял тӑрӑхӗнчи депутатсенчен ытларахӑшӗ ку улшӑнӑва хирӗҫ сасӑланӑ. Видеона «Вести района/Чебоксарский район» ушкӑна вырнаҫтарнӑ. Сасӑлава пуҫличчен депутатсем администраци ӗҫченӗсене тула тухма ыйтнӑ.

Аса илтерер: хальхи вӑхӑтра Красноармейски тата Ҫӗмӗрле районӗсене муниципалитет округӗ туса хурас ӗҫ пырать.

Инстаграмри @oanikolaev1969 страницӑри сӑнӳкерчӗк

Раштав уйӑхӗн 24-мӗшӗнче, 18 сехетре, Чӑваш Ен Элтеперӗ Олег Николаев ҫынсемпе «тӳрӗ линие» тухӗ. Ыйтусене халех ярса пама пулать, вӗсене ҫак каҫӑпа йышӑнаҫҫӗ.

Унччен йӗркеленӗ «тӳрӗ линисенчипе» танлаштарсан хальхинче комментарисенче ҫынсене хӑйсен даннӑйӗсене пӗлтерме ыйтмӗҫ. Ыйтса ҫырнисене тӳрӗ эфирта пурне хуравласа ӗлкӗреймесен те каярах хуравлама шантараҫҫӗ. Ыйтусене видеоформатпа та йышӑнӗҫ. Анчах файл калӑпӑшӗ 20 мегабайтран иртмелле мар. Тӳрӗ эфир вӑхӑтӗнче ыйтусене 56-51-00 телефон номерӗпе йышӑнӗҫ.

Элтепер хуравланине «Россия 24» телеканал эфирӗнче тата «Чӑваш Ен» ПТРК», «Республика 21» YouTube-каналсенче трансляцилӗҫ.

Сӗнтӗрвӑрри районӗнче – ҫӗнӗ прокурор. Ку пукана 36 ҫулти юстици советникӗ Ленар Карама йышӑннӑ.

Ленар Зелфинасович Карама Патӑрьел районӗнче 1986 ҫулта ҫуралнӑ. 2007 ҫулта И.Н.Ульянов ячӗллӗ ЧПУн юридици факультетӗнче вӗренсе тухнӑ хыҫҫӑн Красноармейски районӗнчи прокуратура следователӗ пулнӑ. Унтан Шупашкарта аслӑ следователь пулнӑ. Кун хыҫҫӑн тӗрлӗ ӗҫре тӑрӑшнӑ.

2019 ҫултанпа Ленар Карама Ҫӗмӗрлери районсен хушшинчи прокурор ҫумӗн тивӗҫӗсене пурнӑҫланӑ. Халӗ ав ҫӗнӗ ӗҫе куҫнӑ.

Денис Спирин (сулахайри). lider.cap.ru сӑнӳкерчӗкӗ

Чӑваш Енӗн экономика аталанӑвӗн тата пурлӑх хутшӑнӑвӗсен министрӗн ҫумне Денис Спирина ӗнер, раштав уйӑхӗн 9-мӗшӗнче, ӗҫрен кӑларнӑ. Официаллӑ документра палӑртса хӑварнӑ тӑрӑх, ҫапла туни Денис Вадимович урӑх ӗҫе куҫнипе ҫыхӑннӑ.

Ҫапла, чӑн сӑмахӑн суйи ҫук. Денис Спирин маларах Шупашкар хула администрацийӗн сити-менеджерӗн пуканне йышӑннӑ.

Денис Спирин Ҫӗмӗрле хулинче ҫуралнӑ. 41 ҫулти арҫын 3 хутчен аслӑ пӗлӳ илнӗ. Республикӑн экономика аталанӑвӗн тата пурлӑх хутшӑнӑвӗсен министрӗн заместителӗ пулма ӑна 2020 ҫулхи юпа уйӑхӗнче шаннӑччӗ.

cap.ru сӑнӳкерчӗкӗ

Чӑваш Енӗн Тӗп суйлав комиссийӗн председателӗ пулма Геннадий Фёдорова шаннӑ.

Ӗнер республикӑн Правительство ҫуртӗнче Тӗп суйлав комссийӗн ҫӗнӗ йышӗн (унӑн полномочийӗ 5 ҫула пырӗ) йӗркелӳ ларӑвӗ иртнӗ. Унта комисси ертӳҫисене суйланӑ.

Вӑрттӑн сасӑлавра Чӑваш Енӗн Тӗп суйлав комиссийӗн председателӗ пулма Геннадий Федорова суйланӑ, председателӗн ҫумӗ пулма Игорь Михайлова шаннӑ, секретарь пулса Олег Ефимов тӑрӑшӗ.

Генндий Фёдоров РФ Президенчӗн Федерацин атӑлҫи округӗнчи тӗп инспекторӗ пулса ӗҫленӗ. Нумаях пулмасть вӑл Чӑваш Енӗн Тӗп суйлав комиссине ӗҫлеме куҫнӑ.

Геннадий Федоров. cap.ru сӑнӳкерчӗкӗ

РФ Президенчӗн Федерацин атӑлҫи округӗнчи тӗп инспекторӗн вырӑнӗ пушаннӑ. Геннадий Федоров Чӑваш Енӗн Тӗп суйлав комиссине ӗҫлеме куҫнӑ. Ҫавна май тӗп инспектор пуканӗ пушанса юлнӑ.

Пурне те пӗлекен «Правда ПФО» кӑларӑм ҫырнӑ тӑрӑх, пушаннӑ вырӑна Григорий Сергеев йышӑннӑ. Вӑл Игорь Комаров полпредӑн авторӗнче тӗрӗслев департаментӗнче ӗҫленӗ. Сергеев Шупашкарта ҫуралнӑ. Кунта вӑл патшалӑх службинчи карьерӑна пуҫланӑ.

Кадр улшӑнӑвӗсем, сӑмах май, Шупашкарта та пулса иртмелле-мӗн. Денис Спирин сити-менеджер хула мэрине хӑйӗн командине илсе килесшӗн имӗш. Республика ертӳҫи Олег Николаев нумаях пулмасть Улатӑрта пулнӑ май унта кадр улшӑнӑвӗ пулса иртессине систернӗ иккен.

Елена Скворцова. «Ҫыхӑнура» форумран илнӗ сӑнӳкерчӗк

Чӑваш Енӗн Раҫҫей Президенчӗ ҫумӗнчи тулли пайталлӑ пайташӗн Алексей Ладыковӑн — икӗ ҫум. Вӗсем — Сергей Григорьев тата Елена Скворцова.

Елена Скворцовӑна должноҫе ӗнер, раштав уйӑхӗн 2-мӗшӗнче, шанса панӑ. Йышӑнӑва республикӑн влаҫ органӗсен официаллӑ порталӗнче вырнаҫтарнӑ. Чӳк уйӑхӗн 25-мӗшӗччен Ладыков ҫумӗсенчен пӗри Лидия Седойкина пулнӑ.

«Правда ПФО» пӗлтернӗ тӑрӑх, Елена Скворцова Раҫҫей почтин Чӑваш Енри уйрӑмӗнче ӗҫленӗ, кайран вӑл Мускавра пысӑкрах вырӑн йышӑннӑ, Раҫҫей почтинче ӗҫлеме тытӑннӑ. Юлашки вӑхӑтра ҫав хӗрарӑм РФ Патшалӑх Думин депутачӗн Анатолий Аксаковӑн пулӑшуҫи пулнӑ.