«Контактри» сӑн

Ӗнер, ака уйӑхӗн 22-мӗшӗнче, Ҫӗнӗ Шупашкарта вӗренекен 4 шкул ачине Мускаври Хӗрлӗ тӳремре пионера илнӗ.

Ҫак куна ахальтен суйламан. Ӗнер Владимир Ленин ҫуралнӑранпа 156 ҫул ҫитнӗ. Ачасем малтан Мавзолей патне чечексем хунӑ. Унтан вӗсене КПРФ лидерӗ Геннадий Зюганов тата Патшалӑх Думин депутачӗ Мария Дробот хӗрлӗ галстук ҫыхса янӑ. Кун хыҫҫӑн ачасем В.И.Ленин музейне ҫитсе курнӑ.

Сӑмах май, пӗлтӗр Ҫӗнӗ Шупашкарта 19 пионер, 11 кандидат тата 6 комсомолец шутланнӑ. Халӗ, ав, йыш татах хушӑннӑ.

cap.ru сайтри сӑн

Андриян Николаевпа Валентина Терешковӑн хӗрӗн Еленӑн ҫуртне, Мускав ҫывӑхӗнчине, ҫаратнӑ. Кун пирки «Известия» хаҫат пӗлтерет.

Еленӑн мӑшӑрӗ Андрей Родионов пӗлтернӗ тӑрӑх, паллӑ мар ҫын ҫурта кӗнӗ те шыв ӑшӑтмалли хатӗре, газ баллонне тата стабилизатора йӑтса тухса кайнӑ. Пӗтӗмпе – 70 пин тенкӗлӗх. Халӗ ку ӗҫе следовательсем тӗпчеҫҫӗ. Елена Терешкова кил-ҫуртне ҫаратнине ака уйӑхӗн 9-мӗшӗнче асӑрханӑ.

Сӑмах май, Андриян Николаевпа Валентина Терешкова 1963 ҫулхи чӳкӗн 3-мӗшӗнче пӗрлешнӗ, 1964 ҫулхи ҫӗртме уйӑхӗн 8-мӗшӗнче вӗсен Елена ҫуралнӑ.

Роскосмос Юрий Гагарин космонавта, тӗрӗсрех каласан, вӑл тӗнче уҫлӑхне улӑхнине асра тытса халӑх тетелӗнче хӑйне евӗр акци ирттерме сӗннӗ.

Космос эрнинче ҫынсен хунарпа е телефонпа пӗлӗте ҫутатмалла, ҫав вӑхӑтра пӗлӗтелле тинкерсе пӑхмалла. Ҫавна сӑн ӳкерсе илсе халӑх тетелӗнче вырнаҫтармалла.

«Время Гагарина» (чӑв. Гагарин вӑхӑчӗ) акцие хутшӑнакансен сӑнӳкерчӗксен айне #ВремяГагарина тата #ЗаЗвездами хэштегсем ҫырса хумалла.

Роскосмосӑн акцийӗ пирки пӗлтернӗ хыпар валли усӑ курнӑ сӑнӳкерчӗкре хунара виҫӗ пӳрнепе тата пуҫ пӳрнепе тытнӑ. Нейросеть пулӑшнипе ӑнӑҫсӑр ӑсталанӑ сӑнӳкерчӗке асӑрханисем: «Акцие тӑватӑ пӳрнеллисен ҫеҫ хутшӑнма юрать-и е ыттисене те чармӗҫ-и?» – тесе тӑрӑхласа ҫырнӑ.

Ҫӑлкуҫ: tulasmi.ru

Тула облаҫӗнчи ӑслӑлӑх вулавӑшӗ «Раҫҫей чӗлхисем 2026» федераллӑ акцие хутшӑнать. Акцие хутшӑнакансене тутар е чӑваш чӗлхипе сӑвӑ вуламалла, унтан вертикаллӑ видео ҫырса халӑх тетелне вырнаҫтармалла. Вуланӑ чухне сӑввӑн куҫарӑвне е унӑн кӗске содержанине ҫырса памалла, тата мӗнле чӗлхепе вуланине палӑртмалла.

Акцие Раҫҫейри наци вулавӑшӗ, ҫав шутра Тутарстан, Дагестан, Мордва тата Чӑваш Республикисен вулавӑшӗсем, хастар хутшӑнаҫҫӗ. Сӑвӑ вуланӑ ролике Тула облаҫӗнчи ӑслӑлӑх вулавӑшӗн «ВКонтакте» халӑх тетелӗнчи страницӑра «ЯзыкиРоссии2026» хештегпа вырнаҫтарса пырӗҫ.

Акцие «Регион 71» информаци агентстви тата «Эпир – Раҫҫей» пӗрлехи информаципе ҫут ӗҫ проектне пурнӑҫлакансем те пулӑшаҫҫӗ. Ку проект пуш уйӑхӗнче пуҫланнӑ. Акци тӗллевӗ – Раҫҫей халӑхӗсен туслӑхне тата пӗр-пӗрне ӑнланнине ҫирӗплетесси.

https://vk.ru/wall-194537172_27436 сӑнӳкерчӗкӗ

Ӗнер, пуш уйӑхӗн 16-мӗшӗнче, «Поле чудес» (чӑв. Тӗлӗнтермӗш уйӗ) телекӑларӑма чӑваш хӗрарӑмӗ мӑнукӗпе хутшӑннӑ.

Аса илтерер: телекӑларӑма Пӗрремӗш каналпа эрнекунсерен кӑтартаҫҫӗ.

Алина Артемьева капитал-шоун уяв умӗнхи кӑларӑмӗн хутшӑнаканӗ пулнӑ. Вӑййа Пӗтӗм тӗнчери хӗрарӑмсен кунне халалланӑ. Пирӗн ентешӗн «ерохвостка» сӑмаха пӗлмелле пулнӑ. Раҫҫей ҫурҫӗрӗнче пурӑнакансем ытла талпӑнуллӑ хӗрарӑма ӗлӗк ҫапла каланӑ.

Алина мӑнукӗ Ева чӑвашла юрӑ юрланӑ тата сӑвӑ вуласа панӑ. Леонид Якубович ӑна пукане парнеленӗ, анчах вӑл тӳрех хӑйӗн шӑллӗсемпе йӑмӑкне аса илнӗ — вӗсем валли те парне ыйтнӑ. Ҫапла вара ӑна тата тепӗр пукане, шӑллӗсем валли те парне панӑ.

Ева чӑвашла хитре калаҫать, амӑшӗн амӑшне вӑл куками тесе чӗнет.

Дзен.Чувашия пабликран илнӗ сӑнӳкерчӗк

Шупашкар тарологӗ федераци телекуравне лекнӗ — вӑл экстрасенссем ҫинчен калакан шоуна скептик пулса хутшӑннӑ.

Ольга Чугунникована Шупашкарта эзотерик тата «Давай встречаться» (18+) стендап-шоура мӑшӑрсен килӗштерес енӗпе ӗҫлекен эксперт евӗр пӗлеҫҫӗ. Вӑл ТНТ телеканалти «Экстрасенссен ҫӗнӗ тупӑшӑвӗ» (16+) шоура автомобиль багажникӗнчи ҫынна шырамалли тӗрӗслеве сӑнакансен ушкӑнне лекнӗ.

Ольга каланӑ тӑрӑх, эзотерика тӗнчине пӗлни ӑна сӑнав тӗрӗс иртнине тимлӗрех сӑнама хистенӗ.

Телекӑларӑма 42 сехет хушши ӳкернӗ.

Сӑмах май каласан, тарологсем, астрологсем, ҫавӑн йышши ытти ҫын хальхи вӑхӑтра сахал мар. Вӗсем пурте пулӑшма, тӗрлӗ ыйтӑва татса пама шантараҫҫӗ. Укҫасӑр мар, паллах. Укҫалла.

Эрнере пилӗк кун ӗҫлекенсен хальхинче 3 кун канӗҫ: шӑматкун, вырсарникун тата тунтикун. Ку Пӗтӗм тӗнчери Хӗрарӑмсен кунӗ вырсарникуна лекнипе ҫыхӑннӑ.

РФ Ӗҫ кодексӗпе килӗшӳллӗн, уяв канмалли куна лексен вӑл ҫитес ӗҫ кунӗ ҫине куҫать. Ҫапла майпа саккунлӑ канмалли кун хальхинче тунтикун ҫине куҫать.

Ҫитес эрне вара кӗске пулӗ: ытларикун ӗҫе тухмалла, эрнекун – ку эрнери ӗҫлемелли юлашки кун. Ҫитес вӑрӑм канмалли кунсем вара ҫу уйӑхӗнче кӑна пулӗҫ. Ун чухне икӗ хутчен виҫшер кун канӑпӑр. Ку ҫу уйӑхӗн 1-мӗшӗпе тата Ҫӗнтерӳ кунӗпе ҫыхӑннӑ.

«Контактра» халӑх тетелӗнчи сӑн

Чӑваш Енри актер, Елчӗк районӗнчи Аслӑ Таяпа ялӗнче ҫуралса ӳснӗ Владимир Тяптушкин, паян Пӗрремӗш каналти «Доброе утро» кӑларӑма хутшӑннӑ. Вӑл тӳрӗ эфирта пулнӑ.

Владимир кӑларӑмра «Ландыши. Такая, нежная любовь» телесериала мӗнле ӳкерни, хӑйӗн Демьян сӑнарӗ мӗнле ҫурални пирки каласа кӑтартнӑ, кулиса хыҫӗнчи самантсене те аса илнӗ.

Палӑртса хӑварар: пӗлтӗр Владимир Тяптушкин «Кинопоиск» платформӑра «Ландыши. Такая, нежная любовь» сериалта Демьян рольне калӑпланӑшӑн ТОП-10 актерсен йышне кӗнӗ.

Эсир паян ирхине эфира курса ӗлкӗреймен-и? Ҫак каҫӑпа курма пултаратӑр: https://www.1tv.ru/shows/dobroe-utro/nashi-gosti/vladimir-tyaptushkin-o-filme-landyshi-dobroe-utro-fragment-vypuska-ot-02-03-2026.

gorod.lv сайтри сӑн

Кӗҫех Чӑваш Енре пурӑнакансем сайра тӗл пулакан астрономи пулӑмӗпе киленме пултарӗҫ.

Ыран, нарӑс уйӑхӗн 28-мӗшӗнче, 18 сехет те 40 минутра (Мускав сехечӗпе) тӳпере ултӑ планета пӗр рете тӑрӗҫ: Юпитер, Сатурн, Венера, Меркурий, Уран тата Нептун. Ҫакна асӑннӑ кунран пӗр-икӗ кун маларах е каярах курма пулать.

Ку пулӑма планетӑсен парачӗ теҫҫӗ. Чи ҫутти Венера пулӗ. Вӑл шурӑ тӗслӗ ҫутатӗ. Парада кӑшт кӑна тулса ҫитеймен Уйӑх та хутшанӗ. Вӑл Юпитерпа юнашар тӑрӗ.

Чи кирли – ҫанталӑк кӑна меллӗ пултӑр. Вара хӗвел ансан тепӗр 1-2 сехетренех ҫак илемпе киленӗпӗр!

Chat-GPT ӑсталанӑ ӳкерчӗк

Санкт-Петербургри Боготырский проспектӗнче халӑх ачана вилӗмрен ҫӑлса хӑварнӑ. Вуннӑмӗш хутран ӳкнӗ ҫулталӑк ҫурӑри ачана ҫынсем куртка сарса ҫӑлнӑ.

Ку пӑтӑрмах кӑнтӑрла пулса иртнӗ. Хваттерте ачан амӑшӗ тата унӑн пиччӗшӗ пулнӑ. Амӑшӗ кӗске вӑхӑта пӳлӗмрен тухнӑ пулнӑ, асли компьютерпа вылянӑ. Амӑшӗ таврӑнсан кӗҫӗн ывӑлне тупайман, чӳрече уҫӑлнине курсан, аялалла пӑхнӑ. Унта ҫынсем пуҫтарӑннине курсан хӑвӑрт урама чупса тухнӑ.

Васкавлӑ пулӑшу служби пӗлтернӗ тӑрӑх ҫурт патӗнчи ҫынсем ачана курсан нумай шухӑшласа тӑман, куртка хывса ӑна ӳкекен ача валли сарса хунӑ. Ача шӑпах ҫав куртка ҫине ӳкнӗ.

Санкт-Петербург прокуратура пӑтӑрмахпа ҫыхӑннӑ ӗҫ-пуҫа тӗрӗслет.