culture.ru сайтри сӑн

Раҫҫейре ҫитес ҫул Халӑх пӗрлӗхӗсен ҫулталӑкӗ пулӗ. Ҫӗршыв Президенчӗ Владимир Путин ҫапла йышӑну тунӑ.

Чӑваш Енре 2026 ҫула мӗне халаллассине хальлӗхе палӑртман. ЧР Элтеперӗ Олег Николаев хӑйӗн телеграм-каналӗнче ыйтӑм ирттерет, 5 вариантран суйлама сӗнет. Унӑн пӗтӗмлетӗвӗ тӑрӑх ҫитес ҫул тематикине суйлӗҫ.

Вариантсем вара ҫапларах:

1. Халӑхсен туслӑхӗн ҫулталӑкӗ.

2. Пултарулӑх тата ырлӑх ҫулталӑкӗ.

3. Пӗрлӗх тата тачӑлӑх ҫулталӑкӗ.

4. Ҫемье хаклӑхӗсен ҫулталӑкӗ.

5. Йӑла-йӗрке хаклӑхӗсен ҫулталӑкӗ.

ФСБ тунӑ видео скринӗ

ФСБ ӗҫченӗсем Хусанти аэропортра Ҫывӑх Хӗвелтухӑҫӗнчи террористсен организацине кӗме палӑртнӑ 52 ҫулти арҫынна тытса чарнӑ. Ун тӗлӗшпе пуҫиле ӗҫ пуҫарнӑ.

Следстви палӑртнӑ тӑрӑх, вӑл мессенджер урлӑ Раҫҫейре йӗркелеме юраман террористсен организацийӗпе ҫыхӑннӑ. Ҫырӑннӑ чухне арҫын унӑн ӗҫӗ-хӗлне хутшӑнма хатӗрри пирки пӗлтернӗ. Ҫапла вӑл Раҫҫейрен тухса кайма хӑтланнӑ.

Лерен ӑна мӗнле тухса каймалли пирки инструкци панӑ. Арҫын вӗсем каланине пурнӑҫласа Хусанти аэропорта ҫитнӗ. Шӑпах ҫавӑнта тытса чарнӑ ӑна.

cap.ru сайтри сӑн

Хальхи вӑхӑтра «Раҫҫей хули. Наци суйлавӗ» халӑх сасӑлавӗ пырать. Юпа уйӑхӗн 21-мӗшӗнче Шупашкар унта 5-мӗш вырӑн йышӑннӑ, малта пыракан Нальчикран 54,2 пин сасӑ каярах пынӑ.

Унтанпа лару-тӑру вӑйлах улшӑннӑ. Халӗ Шупашкар танлаштарӑмра – 2-мӗш вырӑнта, Нальчикран 11,3 пин сасӑ кая юлса пырать. Тӗп хуламӑр кашни сехетре сасӑсем самай пухса пырать.

Шупашкара ҫӗнтерме пулӑшӑр! Сасӑлав ҫулталӑк вӗҫлениччен пырать. Тӑван хуламӑршӑн ҫак каҫӑпа сасӑлама май пур: https://город-россии.рф/.

news.rambler.ru сайтри сӑн

Ҫитес ҫултан Раҫҫейре ҫӗнӗ уява паллӑ тума тытӑнӑпӑр. Ҫу уйӑхӗн юлашки эрнекунӗнче Сварщик кунӗ пулӗ. Ку йышӑнӑва РФ премьер-министрӗ Михаил Мишустин алӑ пуснӑ.

Правительствӑна ку ыйтупа Сваркӑна тӗрӗслекен наци агентствин тата Санкт-Петербургри промышленноҫ предприятийӗсен ассоциацийӗн элчисем тухнӑ.

Мӗншӗн шӑпах ҫу уйӑхӗн юлашки эрнекунӗ-ха? Мӗншӗн тесен сварщиксен професси сообществинче ӑна ҫак кун паллӑ тӑваҫҫӗ ӗнтӗ. Ку йӑла 1990 ҫулсенче ҫирӗпленнӗ.

ШӖМ тунӑ сӑн

Дон ҫинчи Ростовра пурӑнакан 22 ҫулти хӗр Мускавра пурӑнакан чӑваш хӗрарӑмне улталанӑ. Вӑл юмӑҫ-мӗн, пӑснине пӗтерме шантарнӑ, анчах укҫасӑр тӑратса хӑварнӑ.

Пирӗн ентеш унпа пӗлтӗрхи ҫуркунне тӗнче тетелӗнче паллашнӑ. Хайхи «юмӑҫ» пӑснине пӗтернӗ тесе укҫа ыйтма тытӑннӑ – памасан пӑсассипе хӑратнӑ. Хӗрарӑм хӑранипе 130 пин тенкӗ куҫарса панӑ.

Йӗрке хуралҫисем чӑваш хӗрарӑмне шӑнман пӑр ҫине лартса янӑ 22-ри хӗре шыраса тупнӑ. Халӗ вӑл ҫавнашкал преступленисем тата тунипе туманнине тӗрӗслеҫҫӗ.

Яндекс сӑнӳкерчӗкӗ

Иркутскра хамӑр ҫӗршывра туса кӑларнӑ пассажирсене турттармалли иккӗмӗш самолёт пуҫласа сывлӑша ҫӗкленнӗ.

«МС-21» лайнер бортӗнче хамӑр ҫӗршывра туса кӑларнӑ тытӑмсене тата «ПД-14» двигательсене тӗрӗсленӗ. Кун пирки «Ростех» патшалӑх корпорацийӗн пресс-служби пӗлтернӗ.

Самолёт 1 сехете яхӑн вӗҫнӗ. Хамӑр ҫӗршывра туса кӑларнӑ тытӑмсем ҫав вӑхӑтра йӗркеллӗ ӗҫленӗ.

Ку эрне вӑрӑм пулӗ: 6 кун ӗҫлемелле. Ку Халӑх пӗрлӗхӗн кунне паллӑ тунипе ҫыхӑннӑ. Ҫакӑ эрнере 5 кун ӗҫлекенсене пырса тивет. Вӗсен шӑматкун та, чӳк уйӑхӗн 1-мӗшӗнче, ӗҫе тухмалла. Уяв умӗнхи кун пулӗ вӑл, ҫавна май ӗҫ вӑхӑчӗ 1 сехет кӗскелӗ.

Кун хыҫҫӑн 3 кун кантарӗҫ: вырсарникун, тунтикун тата юнкун (чӳкӗн 2-4-мӗшӗсенче).

vk.com/chuv_kray пабликран илнӗ сӑнӳкерчӗк

Раҫҫейри вӑрман чи лайӑх касакан хӗрарӑм — Чӑваш Енрен. Йӑлӑмра пурӑнакан пилӗк ача амӑшӗн Галина Климинӑн чи кӗҫӗн ачи ҫур ҫулта ҫеҫ. Упӑшки Мускавра монтажникра тӑрӑшать та нумай ача амӑшӗ кил-тӗрӗшри ӗҫе хӑех пурнӑҫласа ӗлкӗрет.

Галина ачаранпах вӑрманта ӳснӗ. Ашшӗ лесник пулнӑран вӑрманҫӑ ӗҫне аван пӗлнӗ. Анчах малтанласа ашшӗн ҫулӗпе кайман-ха вӑл — Шупашкарта автослесарь пулса тӑрӑшнӑ. Авточупусене те хутшӑннӑ. Анчах чунӗ вӑрман еннех туртнӑ. Кӑштахран Галина Йӑлӑма таврӑннӑ, вӑрманти пушарпа кӗрешекен служба пуҫлӑхӗ пулса тӑнӑ.

Вӑрман касакансен конкурсне хӗрарӑм кашни ҫулах хутшӑнать. Йывӑр ҫын пулнӑ чухне те конкурса хутшӑннӑ. Кӑҫал вара Раҫҫейри конкурсра ҫӗнтернӗ.

Пирӗн ҫӗршывран ҫывӑх вӑхӑтра Венесулэлӑна самолётсем вӗҫме пуҫлӗҫ. Пассажирсене турттараканни Conviasa компани пулӗ. Вӑл ҫитес тапхӑр валли ятарлӑ ирӗк илнӗ.

Ҫӗнӗ маршрут Венесуэлӑпа Питӗр хулине ҫыхӑнтарӗ. Палӑртни пурнӑҫа кӗрсен усламҫӑсене те меллӗ пулӗ, ҫул ҫӳреме юратакансене те. Тепӗр майлӑ каласан, Раҫҫей ҫыннисем Кӑнтӑр Америкӑна тӳрӗ рейспа ҫитейӗҫ.

Авиамаршрут уҫасси пирки Раҫҫейӗн тата Венесуэлӑн транспорт министрӗсем Андрей Никитин тата Рамон Веласкес тӗл пулсан калаҫса татӑлнӑ.

t.me/bbbreaking сӑнӳкерчӗкӗ

Мускаври метрора акустика кабинисем вырнаҫтарнӑ. Унта кӗрсе телефонпа шӑплӑхра калаҫма пулать е ӗҫлеме те.

Пӗр кабинӑна пӗр ҫын вырнаҫаять. Унта телефона зарядкӑна лартма USB тата Type-C разъем та пур. Ларса ӗҫлеме пукан тата сӗтел вырнаҫтарнӑ. Вентиляци те пур.

Пӳлӗме 15 минутлӑха тара илес тесен алӑк ҫинчи QR-код сканерламалла. Ун пек кабина «Комосмольски» тата «Чулхула» станцисенче пур.

Ҫулталӑк вӗҫлениччен вӗсемпе тӳлевсӗр усӑ курма май пур.