Ульяновск облаҫӗн чӑвашӗсем хӑйсен тӑван чӗлхепе тухса тӑракан пӗртен-пӗр „Канаш“ хаҫачӗ тухма тытӑннӑранпа 35 ҫул ҫитнине анлӑн палӑртрӗҫ. „Киндяковка“ Культура керменӗнче ҫӳллӗ шайра иртрӗ.

- Паян коллектив питӗ пӗчӗк, виҫӗ ҫынран кӑна тӑрать пулин те, Иван Яковлевӑн халалӗнчи „Эпӗ туса пӗтереймен ӗҫсене эсир туса пӗтерӗр“ девиза тӗпе хурса ӗҫленипе эпир кашни эрнере 8 страницӑллӑ, илемлӗ тӗслӗ хаҫата вулакан патне вӑхӑтра ҫитеретпӗр, Ульяновск облаҫӗн летопиҫне ҫырса пыратпӑр.

Пӗр сывлӑшпа сывлакан, пӗр тӗллевпе ӗҫлекен, маттур та пултаруллӑ ҫынсем, чӑн-чӑн профессионалсем вӗсем, манӑн ӗҫтешӗмсем Ирина Данилова яваплӑ секретарь тата пай пуҫлӑхӗ Елена Алексеева. Облаҫри тӗрлӗ ял-хулана ҫитсе пиншер ҫын шӑпипе тата чӑваш мероприятийӗсемпе паллаштарать вулаканӑмӑрсене Елена Геннадиевна.

Ирина Николаевна ҫав материалсене вырӑнлӑ лартма, илемлетме маҫтӑр. Хӑй те ятарлӑ пӗр страница илсе пырать. Пысӑк тав вӗсене, ҫавӑн пек йывӑр лава туртса пынӑшӑн, - палӑртрӗ хӑйӗн сӑмахӗнче тӗп редактор Елена Николаевна Мустаева.

Малалла...

"Контактри" сӑн

Шупашкарти ӑстасем Евгений Акимов тата Александр Иванов Тутарстанри Раиф мӑнастирӗ валли юртан скульптурӑсем тунӑ. Композицисем «Рожденственский Вертеп», «Архангел», «Грузинская икона Божией Матери» ятлӑ. Вӗсем «Пӑр тата ҫутӑ» Раштав фестивальне хутшӑнаҫҫӗ. Вӑл раштавӑн 30-мӗшӗнче пуҫланнӑ та кӑрлачӑн 8-мӗшӗнче вӗҫленет.

Сӑмах май, мӑнастир территорийӗнче темиҫе ҫул ӗнтӗ пӑр хулине ӑсталаҫҫӗ.

Инкеклӗ лару-тӑру министерстви тунӑ сӑн

Ӗнер каҫхине Хусана ҫитиччен Атӑл урлӑ каҫмалли кӗпере хупса хунӑ. Унта икӗ фура ҫапӑнсан пушар пуҫланнӑ.

Пӗр фурӑран газ баллонӗ тухса ӳкнӗ. Кайран ҫулӑм виҫҫӗмӗш фура ҫине куҫнӑ.

Аварие пула ҫула пӳлнӗ. Транспорта урӑх ҫулпа янӑ. Темиҫе сехетрен ҫула уҫнӑ.

"Контактри" сӑн

Саратов хулинче Раҫҫейпе Китай туслӑхне халалласа чи пысӑк граффити ӳкереҫҫӗ. Ӗҫе Китайри, Чӑваш Енри тата Атӑлҫи федераци округӗнчи хӑш-пӗр хулари ӳнерҫӗсем пурнӑҫлаҫҫӗ. Пирӗн регионтан унта Лилия Яковлева кайнӑ.

Стена ҫине Атӑлҫи федераци округӗнчи 14 регионти тата Китайри 6 провинци символӗсене ӳкерӗҫ. Варринче Атӑл тата Янцзы юханшывсене кӑтартакан хӗрсем пулӗҫ. Граффити 600 тӑваткал метр пулӗ. Ӑна «Атӑл - Янцзы» ҫамрӑксен форумӗ хупӑниччен туса пӗтерме палӑртнӑ.

Чӗмпӗрте хальхи чӑваш алфавитне йӗркеленӗ Иван Яковлев тата унӑн мӑшӑрӗ Екатерина Бобровникова (вӑл Чӗмпӗрти чӑваш шкулӗн хӗрарӑмсен уйрӑмне 40 ҫул ертсе пынӑ) пирки фильм ӳкерме тытӑннӑ. «Иван и Екатерина. Победа на двоих» ятлӑ вӑл.

Фильма грант укҫипе ӳкереҫҫӗ. Ун валли 1 миллион та 489 пин тенкӗ уйӑрнӑ. Проект авторӗсем тепӗр 1 миллион та 509,7 пин тенкӗ хывӗҫ. Фильма Чӗмпӗр облаҫӗнче, Тутарстанра, Мускавра, Чӑваш Енре ӳкерӗҫ. Унӑн хӑтлавӗ 2025 ҫул пуҫламӑшӗнче иртмелле.

Фильм авторӗ тата режиссерӗ - Наталья Цуканова.

Паян кӑнтӑрла Хусанта пӑр ҫунӑ. Ун хыҫҫӑн хӑш-пӗр урамра пӑр выртнӑ.

«Чӑваш Енри ҫанталӑк» проект авторӗ Владимир Михайлов пӗлтернӗ тӑрӑх, паян Атӑлҫи тӑрӑхӗнче Кристи ятлӑ Атлантика циклонӗ хуҫаланать. Вӑл Чӑваш Енрен айккинчен иртсе кайнӑ.

Ҫӗнӗ Шупашкарта ирхине вӑйлӑ ҫумӑр ҫунӑ, пӑр та ӳкнӗ. Унтан Зеленодольск енне кайнӑ. Кӑнӑрла вара Хусана ҫитнӗ.

Синоптиксем пӗлтернӗ тӑрӑх, пирӗн республикӑра циклон тата темиҫе кун хуҫаланӗ, хушӑран аслатиллӗ ҫумӑр ҫукалӗ.

"Контактри" сӑн

Хусанти пулӑҫа чӑннипех те ӑннӑ. Дамир 90 килограмм таякан ҫуйӑн тытнӑ! Пулӑ 2,5 метр тӑршшӗ.

Дамир пулӑпа сӑн, видео ӳкерӗннӗ те ӑна каялла шыва янӑ. Вӑт ҫавӑн пек пулӑҫ вӑл - Дамир! Маттур!

РИА Новости архивӗнчи сӑн

Тутарстанра ӗнер, утӑ уйӑхӗн 10-мӗшӗнче, самолет ӳкнӗ. РИА Новости пӗлтернӗ тӑрӑх, инкекре ҫынсем вилнӗ. Аманни те пур.

Ку инкек Кама-Устье районӗнче пулнӑ. Виҫҫӗн вилнӗ. Вӗсенчен пӗри ача пулма пултарать. Пӗр ҫын суранланнӑ.

Ҫакӑ паллӑ: самолет пассажирсене илсе ҫӳрекенни пулман. Вӑл - уҫӑлса ҫӳремелли.

EMIRNURTDINOVICH21 тунӑ сӑн

Мари Элте вӑрман касакансем тупӑшнӑ. Ӑмӑртӑва тӗрлӗ регионти 40 ытла ҫын хутшӑннӑ. Пирӗн ентешсем унта палӑрнӑ.

Артем Шашков, Андрей Климин, Сергей Субботин, Андрей Епифанов тата Евгений Шурнеев команда зачетӗнче пӗрремӗш вырӑн йышӑннӑ. Харпӑр зачетра Андрей Климин - 2-мӗш вырӑн, Артем Шашков - 3-мӗш вырӑн йышӑннӑ. Юниорсен хушшинче Евгений Шурнеев 2-мӗш вырӑна тухнӑ.

Сӑмах май, утӑ уйӑхӗнче ҫакнашкал конкурса Улатӑр вӑрман хуҫалӑхӗнче ирттерме палӑртнӑ.

Чӑваш кӗнеке издательствин сӑнӳкерчӗкӗ

Чӑваш кӗнеке издательстви Пушкӑртстанӑн тӗп хулинче иртекен Пӗтӗм тӗнчери II «Китап-байрам» ярмӑрккӑна хутшӑнать.

Вӑл паян, ҫу уйӑхӗн 24-мӗшӗнче, уҫӑлнӑ, ҫу уйӑхӗн 26-мӗшӗнче вӗҫленӗ.

Чӑваш кӗнеке издательстви 200 ытла кӗнекепе паллаштарать, ҫав шутра – ача-пӑча, илемлӗ, ӑслӑлӑх, краеведени тата ытти литература. Вӗсен чӑвашлисем те, вырӑслисем те пур. Кӗнекесене 1000 ытла тенкӗлӗх туянса тепӗр кӗнекене парнелӗҫ.