«Ҫанталӑк 21» сайт пӗлтернӗ тӑрӑх, ҫак кунсенче республикӑра 33 градус таран шӑрӑх пулӗ.
Паянтан пуҫласа вырсарникунччен термометр 30 градус ӑшӑ кӑтартӗ. Паян кӑнтӑрла хыҫҫӑн пӑр ҫума, ҫил вӑйланма пултарать, ҫеккунтра 14-19 метр хӑвартлӑхпа вӗрӗ — асӑрханӑр! Шӑматкун ҫил лӑпланӗ.
Вырсарникун чи шӑрӑх кун пулӗ. Анчах каллех сивӗ фрончӗ килӗ, ҫӗрле ҫанталӑк кӑштах уҫӑлтарӗ. Тунтикун уяр, анчах шӑрӑхах мар пулӗ. Ҫитес эрне варринче каллех 25-30 градус таран ӑшӑтӗ, ҫил тӳлек вӗрӗ. Эппин, шыва кӗмелли лайӑх ҫанталӑк пулӗ.
Малтанлӑха пӗлтернӗ тӑрӑх, чи шӑрӑх кунсем утӑ уйӑхӗн варринче пулӗҫ. Темиҫе кун тропика каҫӗсем кӗтеҫҫӗ – ун чухне ҫӗрле 20 градус ытла ӑшӑ пулӗ.
Чӑваш Енре Сосновски пултӑран ашкӑрать. Темиҫе ҫул каялла ҫак культурӑна ҫак йӗркесен авторӗ Мускава автобуспа кайнӑ чух асӑрханӑччӗ. Владимир, Мускав облаҫӗсенче вӑл тем пек саркаланса ларатчӗ. Ҫак йӗркесен авторне ку курӑк уйрӑм ҫынсен ҫурчӗ умӗнче ашкӑрни, хуҫисем мӗншӗн ӑна ҫулманни тӗлӗнтернӗччӗ. Ҫул айкки пирки каласан, ӑна ҫул-йӗрҫӗсен тытса тӑмалли паллӑ ӗнтӗ.
Халӗ Чӑваш Енре те ку культура вӑй илсе пырать. «PRO Город» кӑларӑм пӗлтернӗ тӑрӑх, ку пултӑран Йӗпреҫ, Улатӑр, Шупашкар, Сӗнтӗрвӑрри районӗсенче вӑйлӑ ашкӑрать.
Сиенлӗ ҫумкурӑк мӗнпур экотытӑма пӗтерсе пырать, ҫынсем ӑна ӑнсӑртран тытсан пиҫсе каяҫҫӗ.
Чӑваш Енре пурӑнакансем сиенлӗ пултӑран пахчасемпе дачӑсене те куҫасран хӑраҫҫӗ иккен.
Пирӗн ҫӗршывра каллех йывӑҫшӑн сасӑлаҫҫӗ. Унта каллех Чӑваш Енри йывӑҫ хутшӑнать. Хальхинче — Шупашкар районӗнчи Кӑшавӑшри киремет йывӑҫҫи, юман.
Ҫак йывӑҫ 300 ҫулта иккен. Апла пулсан вӑл иккӗмӗш Кӗтерне патша саманине та астӑвать, ун чухне чӑвашсем мӗнле пурӑннине те курнӑ, туйнӑ. Паллах, этем пек мар ӗнтӗ. Хӑйне май. Кашни кӗркунне ҫулҫӑ тӑксан та ҫуркунне ҫитсен вӑл каллех ҫулҫӑ кӑларнӑ. Ҫак ҫулсенче мӗн чухлӗ йӗкел туман-ши!
Сасӑлас тесен https://rosdrevo.ru/ сайта кӗмелле. Чӑваш Енри ватӑ юмана, киремет йывӑҫҫине, 73-мӗш номерпе шыраса тупма ҫӑмӑлрах.
Сасӑлама вӑхӑт нумай иртмест: электрон адрес кӑтартмалла та ун ҫине килнӗ кода ҫырмалла. Пулчӗ те. Чӑваш Енри юманшӑн ҫурла уйӑхӗн 1-мӗшӗччен сасӑлама май пур.
Тинех, тинех! Ку эрнере тинех ҫанталӑк ӑшӑтать! Ҫапла пӗлтерет «Ҫанталӑк 21» сайт.
Паян ҫумӑр ҫукалӗ-ха. Ыран вара уяртӗ, ҫурҫӗр енчен вӗрекен ҫил вӑйланӗ, ҫапах ӑшӑ пулӗ: термометр 21-26 градус кӑтартӗ. Анчах республикӑн тухӑҫ енчи округсенче ҫумӑр ҫуса илес хӑрушлӑх пулӗ. Хӗвеланӑҫ енчи округсенче вара уяр ҫанталӑк тӑрӗ.
Эрне варринелле тата ӑшӑтӗ, ҫил те лӑпланӗ. Эрне вӗҫнелле вара пушшех те шӑрӑхланӗ, термометр 30 градус кӑтартӗ, хӑш-пӗр вырӑнта – ытларах та. Ҫӗрлесерен те ӑшӑтӗ, 17-19 градус пулӗ. Анчах вырсарникун ҫӗрле хӑш-пӗр вырӑнта аслатиллӗ ҫумӑр ҫума пултарӗ.
Малтанлӑха палӑртнӑ тӑрӑх, ҫитес эрнере ҫанталӑк каллех сивӗтӗ, ҫумӑр ҫӑвӗ.
Ҫуллахи шӑрӑх кӗҫех пирӗн пата таврӑнӗ. Ҫапла пӗлтерет «Ҫанталӑк 21» сайт.
Анчах унччен тепӗр сивӗ те ҫиллӗ, ҫумӑрлӑ ҫанталӑка чӑтса ирттерме тивӗ. Шӑматкун хӗвеллӗ пулӗ-ха, анчах ҫӗрле самай сивӗтӗ. Вырсарникун вара кӑнтӑрла хыҫҫӑн ҫанталӑк пӑсӑлӗ: ҫумӑр ҫума тытӑнӗ, ҫӗрлесӗр те чарӑнмӗ. Ҫав вӑхӑтрах ҫил вӑйланӗ, ҫеккунтра 18 метр таран хӑвӑртлӑхпа вӗрӗ. Ҫавна май урамра 8-13 градус ӑшӑ пек кӑна туйӑнӗ.
Тунтикунран тинех ҫанталӑк, лайӑхланма ӑшӑтма тытӑнӗ, ҫапах хушӑран вырӑнӑн-вырӑнӑн ҫумӑр ҫума пултарӗ. Эрне варринче шӑрӑхланӗ, термометр 25-30 градус ӑшӑ кӑтартӗ.
Ҫулла, хӑть мӗнле пулсан та, ӑшӑ ҫанталӑках кӗтпӗр. Анчах ӑҫта вӑл?
Шел те, хальлӗхе «Ҫанталӑк 21» сайт лайӑххинех хыпарламасть, шӑрӑх хӑҫан килесси паллӑ мар. Ку эрнере паян, ыран тата эрнекун ытларах ҫумӑр ҫӑвӗ. Паян ирхине сивӗ пулсан та кӑнтӑрла хыҫҫӑн ҫанталӑк 21-23 градус таран ӑшӑтрӗ-ха. Ыран тата кӑшт ӑшӑрах пулӗ. Анчах кӑнтӑрла хыҫҫӑн каллех аслатиллӗ ҫумӑр ҫӑвӗ те ҫанталӑк сивӗтӗ.
Эрне варринче ҫумӑр ҫумӗ, уяртарах ҫанталӑк пулӗ. Анчах ҫил ҫурҫӗр-анӑҫ енчен вӑйлӑ вӗрӗ, эрнекун тӗлне кӑна лӑпланӗ. Эрнекун вара сивӗ те ҫумӑрлӑ пулӗ – кӑнтӑрла та термометр 15-17 градус кӑна кӑтартӗ. Канмалли кунсенче те ҫавӑн пек сивӗ пулӗ, ҫӗрлесерен термометр 10-12 градус кӑна кӑтартӗ.
«Ҫанталӑк 21» сайт пӗлтернӗ тӑрӑх, ырантан шӑрӑх ҫанталӑк вӗҫленет, кӑшт уҫӑлтарать.
Паян каҫхине вырӑнӑн-вырӑнӑн аслатиллӗ ҫумӑр ҫуса иртӗ. Ыран та кӑнтӑрлаччен хӑш-пӗр вырӑнта ҫумӑр пулӗ. Ытларикун кӑнтӑрла хыҫҫӑн вара уяртӗ. Анчах юнкун каллех вырӑнӑн-вырӑнӑн ҫумӑр ҫӑвӗ, ытларах – республикӑн тухӑҫ енче. Унта кӗҫнерникун ирчченех ҫума пултарӗ. Кӗҫнерникунпа эрнекун та хӑш-пӗр ҫӗрте ҫумӑр ҫуса иртӗ. Эрнекун ҫанталӑк 20-25 градус таран ӑшӑтӗ. Канмалли кунсенче ҫил лӑпланӗ те ҫуллахи пек ӑшӑ пулӗ: термометр 23-28 градус ӑшӑ кӑтартӗ.
Малтанлӑха пӗлтернӗ тӑрӑх, вӑраха тӑсӑлакан типӗ ҫанталӑк хальлӗхе курӑнмасть-ха.
«Ҫанталӑк 21» сайт пӗлтернӗ тӑрӑх, ҫуллахи шӑрӑх ҫанталӑк пирӗн пата майӗпен ҫывхарать.
Паян иртенпе уяр пулсан та кӑнтӑрла хыҫҫӑн вырӑнӑн-вырӑнӑн аслатиллӗ ҫумӑр ҫӑвӗ. Ҫапах ку ҫанталӑка ӑшӑтса пыма пӗрре те чӑрмантармӗ. Эрнен иккӗмӗш ҫурринче Шупашкарта термометр кӑнтӑрласерен – 27-29, каҫсерен 14-16 градус ӑшӑ кӑтартӗ. Республикӑра хӑш-пӗр вырӑнта 30 градус таранах шӑрӑх пулӗ. Айлӑмлӑ вырӑнсенче, шыв-шур патӗнче, ирсерен тӗтре карса илӗ. Ҫил тӳлек вӗрӗ, аслатиллӗ ҫумӑр вӑхӑтӗнче кӑна вӑйланӗ. Атмосфера пусӑмӗ нормӑпа килӗшӳллӗн пулӗ.
Малтанлӑха палӑртнӑ тӑрӑх, ҫитес эрнере те шӑрӑх ҫанталӑк пулӗ. Вӑтам сывлӑш температури 20 градуспа танлашӗ. Ку – ҫӗртме уйӑхӗнчи климат норми.
Ҫур уйӑхра Шупашкарта 45 мм ҫумӑр ӳкӗ. Ку — ҫӗртме уйӑхӗн нормин виҫҫӗ тӑваттӑмӗш пайӗ.
Чӑваш Ен Элтеперӗ Олег Николаев влаҫ оргнаӗсен официаллӑ порталӗнче Эколог кунӗпе салам вырнаҫтарнӑ.
«Паянхи професси уявӗ хӑйӗн пурнӑҫне Раҫҫейпе Чӑваш Енӗн хӑйне евӗрлӗ ҫут ҫанталӑкне сыхласа хӑварас ӗҫе халалланӑ мӗнпур ҫынна – ҫут ҫанталӑка сыхлакан ведомствӑсен ӗҫченӗсене, инженерсене, ӑсчахсене, общество ӗҫӗн хастарӗсене тата отрасль ветеранӗсене – пӗрлештерет.
Экологин лайӑх тӑрӑмӗ вӑл – отрасль тӗллевӗ ҫеҫ мар, кашни ҫын пурнӑҫӗн тата кирек хӑш регионӑн ҫирӗп аталанӑвӗн никӗсӗ те. Ҫӗршывра ҫавӑн ятлӑ наци проекчӗ пурнӑҫланать. Таса сывлӑш, таса шывсемпе вӑрмансем тата ҫӗре типтерлӗн упрани хальхи тата пулас ӑрусен пурнӑҫ пахалӑхне палӑртаҫҫӗ. Проект пуҫаракан ӗҫ-хӗл шутӗнче – территорисене тӑтӑшах тӗплӗн тасатса тирпейлесси, хупӑ цикллӑ экономикӑна аталантарасси, пурнӑҫ тӗрлӗлӗхне сыхласа хӑварасси тата экологи туризмне йӗркелесси.
Сирӗн кулленхи тата питӗ яваплӑ ӗҫӗре пула Чӑваш Ен экологи лару-тӑрӑвӗ тӗлӗшпе ҫиччӗмӗш ҫул ӗнтӗ Раҫҫейри чи лайӑх вунӑ регион шутне кӗрет, мониторингӑн юлашки кӑтартӑвӗсем вара эпир улттӑмӗш вырӑнта тӑнине ҫирӗплетеҫҫӗ», — палӑртса хӑварнӑ вӑл саламра.
«Ҫанталӑк 21» сайт пӗлтернӗ тӑрӑх, ҫитес кунсенче республикӑра шӑрӑх ҫанталӑк хуҫаланма тытӑнӗ.
Вырсарникун термометр – 23, тунтикун 25 градус ӑшӑ кӑтартӗ. Шӑматкун кӑнтӑрлаччен хушӑран ҫумӑр ҫукалӗ, ытларах — республикӑн кӑнтӑр енче. Вырсарникун тата тунтикун вара кӑнтӑрла хыҫҫӑн ҫумӑр ҫуса иртме пултарӗ, хӑш-пӗр ҫӗрте аслатиллӗ пулӗ.
Ҫитес эрнере Шупашкарта кӑнтӑрласерен 26-28, ҫӗрлесерен 13-15 градус ӑшӑ пулӗ. Вырӑнӑн-вырӑнӑн аслатиллӗ ҫумӑр ҫума пултарать. Ҫӗртме уйӑхӗн иккӗмӗш ҫурринче тинех типӗ ҫанталӑк хуҫаланма пуҫлӗ. Иккӗмӗш декада вӗҫӗнче вара 30 градус таран шӑрӑх пулма пултарӗ.
+23.9 °C