Питӗрти Антон Кухта трискутерпа Владивостока ҫитесшӗн. Халӗ вӑл шӑпах ҫул ҫинче. Ҫула май ҫамрӑк арҫын Шупашкара кӗрсе тухнӑ.
36-ри Антон «Контактра» халӑх тетелӗнче страница тытса пырать, унта хӑй курнине ҫырать. Шупашкар ӑна килӗшнине палӑртнӑ вӑл унта.
Антон каласа катартнӑ тӑрӑх, вӑл сехетре 55-60 ҫухрӑм хӑвӑртлӑхпа пырать. Владивостока кайма тухнӑскершӗн Шупашкар уншӑн курма чарӑннӑ пиллекмӗш хула пулнӑ.
Коррупципе ҫыхӑннӑ преступлени пирки малашне Шупашкар хула администрацине кайса пӗлтерме пулать. Ҫитес вӑхӑтра унта «шанӑҫ ещӗкне» вырнаҫтарасшӑн. Ку ыйтӑва хальлӗхе обществӑпа сӳтсе яваҫҫӗ.
Унта ахаль ҫынсем те, организацисем те муниципалитет служащийӗсем тӗлӗшпе коррупци пирки ҫӑхавлама, ҫыру хӑварма, пултараҫҫӗ.
Ещӗке администрацин пӗрремӗш хутӗнче вырнаҫтарасшӑн. Ҫырусене унта ӗҫ кунӗсенче 8-17 сехетсенче яма май пулӗ.
Шупашкарта ашшӗ-амӑшӗ тин ҫуралнӑ ывӑлне ҫуллахи уйӑх ятне пама шутланӑ. Вӗсем ӑна Август тесе ҫыртарнӑ.
Ку - сайра тӗл пулакан ят. Шупашкарти Ленин районӗн ЗАГС пайӗн ӗҫченӗсем кунашкал ята юлашки 5 ҫулта пӗрремӗш хут регистрациленӗ.
Палӑртмалла: Август Рим императорӗн ятӗнчен пулса кайнӑ.
Виҫӗмкун, ҫурла уйӑхӗн 7-мӗшӗнче, Шупашкарта йӗрке хуралҫисем шурӑ тӗслӗ «Хендай Солярис» автомобиле хӑваланӑ.
Машинӑна ирхи 6 сехетре Октябре 50 ҫул урамра ҫул-йӗр инспекторӗсем чарӑнма ыйтнӑ. Вӑл вара тарма пикеннӗ. Ҫав вӑхӑтра светофорӑн хӗрлӗ ҫутине те пӑхӑнман, кӗрсе кайма юраман йӗр ӳкерсе хунине те пӑхса тӑман. База проездӗнче инспекторсем машинӑна хӑваласа ҫитсе чарса лартнӑ-лартнах. Машинӑран тухма килӗшменрен йӗрке хуралҫисен чӳрече кантӑкне ватма тивнӗ.
Водителе ӳсӗрле руль умне ларнӑшӑн унччен правасӑр хӑварнӑ иккен. Водитель правине вӑл ҫӗнӗрен илме экзамен тытман.
Пӑтӑрмах хыҫҫӑн пуҫтах водитель тӗлӗшпе йӗрке хуралҫисем 17 протокол ҫырнӑ.
Шупашкарти аэропортра самолётсене лартмалли радиотехника тытӑмне тӗрӗслекен самолёт вӗҫсе ҫӳрет. Сывлӑш ҫулӗн управенийӗн самолёчӗ пирӗн патра темиҫе кун ӗҫлӗ.
«Ан26» лаборатори самолёчӗ аэронавигаци тытӑмне тӗрӗслет, ятарлӑ оборудование вӑл кирлӗ пек йӗркелӗ.
Сӑмах май каласан, паянхи кун Шупашкарти аэропорта юсасси малалла пырать. Ӗҫе вӗҫлесен вӑл хитререх те, пассажирсемшӗн меллӗрех те пулӗ.
Сӑра сакки сарлака ҫав. Ӑна пула мӗн чухлӗ инкек пулса иртмест-ши?! Ӳсӗр чухне этем паттӑрланса каять пулмалла, уншӑн ҫынна хӗнесе пӗтересси те ним те мар-тӑр.
Шупашкарта пурӑнакан 50 ҫулти хӗрарӑм та эрехе пулах пӑтӑрмаха ҫакланнӑ теме юрать. Кӑҫалхи пуш уйӑхӗн вӗҫӗнче вӑл хӑйӗн пӗлӗшӗ патӗнче хӑналаннӑ. Унта кил хуҫи хӗрарӑмӗпе пурӑнакан арҫын та пулнӑ. Кӑштахран тем пайлама тытӑнса кайнӑ-ҫке — хӑнана кайнӑ хӗрарӑм арҫынна пуҫӗнчен мӑлатукпа ҫапса пӗтернӗ. Арҫын реанимаци уйрӑмӗнче кӑштахран вилсе кайнӑ.
Хӗрарӑм тӗлӗшпе пуҫарнӑ пуҫиле ӗҫе халӗ суда ярса панӑ.
Чӑваш Енри ултӑ районта инкеклӗ лару-тӑру режимӗ туса хунӑ. Хушӑва республика Элтеперӗ Олег Николаев алӑ пуснӑ.
Документра каланӑ тӑрӑх, чрезвычайлӑ лару-тӑру режимне утӑ уйӑхӗн 28-мӗшпе 29-мӗшӗсенчи ҫутҫанталӑкӑн хӑрушла пулӑмӗсене сирсе ярас тӗллевпе йышӑннӑ.
Асӑннӑ режима Канаш, Комсомольски, Вӑрмар, Ҫӗрпӳ, Шупашкар, Елчӗк тӑрӑхӗсенче туса хунӑ. Вырӑнтисене пулӑшма республикӑн Резерв фондӗнчен укҫа-тенкӗ уйӑрса парӗҫ.
Йывӑрлӑха лекнӗ хӗрарӑмсене пулӑшассине Чӑваш Енре анлӑлатасшӑн.
Пурнӑҫри йывӑр лару-тӑрӑва лекнисене пулӑшакан сакӑр центртан тӑракан сеть йӗркелесшӗн. Ӑна пирӗн республикӑра 2025 ҫул тӗлне ӗҫлеттерсе ярасшӑн.
Паянхи куна ун пек нумай функциллӗ центрсем Шупашкарта тата Ҫӗмӗрлере пур. 2023 ҫул вӗҫне Шупашкарпа Канашра ӗҫлеттерсе ярасшӑн. 2025 ҫул тӗлне ун пеккисене тата тепӗр тӑваттӑ йӗркелесшӗн: Шупашкарта, Вӑрмарта, Улатӑрта, Ҫӗнӗ Шупашкарта.
Асӑннӑ центрсен сетьне Чӑваш Енӗн Ӗҫ тата социаллӑ хӳтлӗх министерстви, халӑха социаллӑ пулӑшу паракан комплекслӑ центрсен уҫмалла.
Банкра ӗҫлекен ҫамрӑк специалист ултавҫӑсен аллине лекнӗ. Ҫапла вӑл 25 пин тенкӗ ҫухатнӑ.
19 ҫулти хӗр патне палламан ҫын шӑнкӑравланӑ. Вӑл финанс учрежденийӗн ӗҫченӗ имӗш. Хайхискер пӗлтернӗ тӑрӑх, ултавлӑ майпа пама хатӗрленнӗ кредита чарса лартмалла. Хӗр палламан ҫын каланине пурнӑҫласа пынӑ та 25 пин тенкине ҫухатнӑ.
Хӗр хӑйне улталани пирки полицие пырса каласа кӑтартнӑ. Халӗ кун тӗлӗшпе пуҫиле ӗҫ пуҫарас ыйтӑва пӑхса тухаҫҫӗ.
Ҫанталӑк шӑрӑх тӑрать. Ҫынсем шывра чӑмпӑлтатса уҫӑлаҫҫӗ. Анчах шыв ҫинче инкек пуласси те часах. Республикӑра 3 кунра пилӗк ҫын путса вилнӗ.
Ҫурлан 4-мӗшӗнче Шупашкарта тӗп пляжра Атӑлтан арҫын виллине кӑларнӑ. Тепӗр кунхине ГЭС патӗнче Ҫӗнӗ Шупашкарти 46-ри арҫын путса вилнӗ. Вӑл ӳсӗрле шыва кӗнӗ. Ҫав кунах Елчӗк районӗнче 47 ҫулти арҫыннӑн пурнӑҫӗ шыва кӗнӗ чухне татӑлнӑ.
Ҫурлан 6-мӗшӗнче Улатӑр районӗнче 47 ҫулти арҫын путнӑ. Ҫав кунах Комсомольски районӗнче 49-ти хӗрарӑм шывран тухайман.
+19.3 °C