Чӑваш Республикин Министрсен Кабинечӗн председательне Сергей Артамонова II степеньлӗ «Тӑван ҫӗршыв умӗнчи тава тивӗҫлӗ ӗҫсемшӗн» орден медалӗпе чысланӑ. Хушӑва Раҫҫей президенчӗ Владимир Путин алӑ пуснӑ.
Наградӑна ӑна ӗҫре ӑнӑҫусем ҫӗнсе илнӗшӗн тата чылай ҫул таса чунпа ӗҫленӗшӗн панӑ тесе палӑртнӑ.
Аса илтерер: нумаях пулмасть Сергей Артамонова «Пӗрлӗхлӗ Раҫҫей» партин Чӑваш Енри уйрӑмӗн секретарьне суйланӑ.
Ҫулталӑк пуҫланнӑранпа Чӑваш Енре 50 ҫын «Раҫҫейӗн хисеплӗ донорӗ» ята тивӗҫнӗ. Ку хисепсене ахальтен аса илмерӗмӗр. Ака уйӑхӗн 20-мӗшӗнче Донорсен наци кунне паллӑ тунӑ. Ҫав кун республикӑра хисеплӗ донорсене кӑкӑр палли парса чысланӑ. Ҫак йышра ултӑ ҫын пулнӑ, вӗсем – Шупашкарта, Ҫӗнӗ Шупашкарта тата Канашра пурӑнакансем.
Сӑмах май, паянхи кун республикӑра 9 пин ытла донор пурӑнать. Вӗсенчен 4,7 пин ытларахӑшӗ «Раҫҫейӗн хисеплӗ донорӗ» ята тивӗҫнӗ.
Красноармейскинчи тӗп вулавӑшра Чӑваш Республикин культурӑн тава тивӗҫлӗ ӗҫченӗ, «Ял пурнӑҫӗ» хаҫат журналисчӗ, ҫыравҫӑ, Нестер Янкас ячӗллӗ пӗрлӗх лауреачӗ, Чӑваш наци конгресӗн Трак енри уйрӑмӗн хастарӗ Юрий Борисовӑн 65 ҫулхине уявлама пуҫтарӑннӑ.
Трак енӗн хастарӗ Зинаида Михайлова халӑх тетелӗнчи хӑйӗн страницинче пӗлтернӗ тӑрӑх, Юрий Борисов — 11 кӗнеке авторӗ. Юрий Зиновьевичӑн юратнӑ мӑшӑрӗ — Татьяна Борисова — педагог, ӳнерҫӗ, ҫыравҫӑ. Вӑл — 7 кӗнеке авторӗ. Телейлӗ мӑшӑрӑн 5 ача тата 3 мӑнук.
Эпир вара хамӑртан ҫакна хушса калар. Юрий Зиновьевич журналист ҫеҫ мар, краевед та. Вӑл Красноармейски районӗнчи Упи ялӗнче ҫуралнӑ. Шупашкарти аслӑ шкулта историпе филологи факультетӗнчен вӗренсе тухнӑ. 40 ҫул ытла «Ял пурнӑҫӗ» хаҫатра ӗҫлет. 2021 ҫулта ӑна «Чӑваш Республикинчи Красноармейски районӗн умӗнчи тава тивӗҫлӗ ӗҫсемшӗн» медальпе чысланӑ.
Ҫак эрнере Чӑваш Енри хаҫатсенчен пӗрин редакторне «Чӑваш Республикин культурӑн тава тивӗҫлӗ ӗҫченӗ» хисеплӗ ята пама йышӑннӑ. Кунта сӑмӑх Комсомольски тӑрӑхӗнчи «Каҫал ен» район хаҫачӗн тӗп редакторӗ Алевтина Ефремова пирки пырать.
Сӑмах май каласан, асӑннӑ хаҫӑтӑн пӗрремӗш номерӗ 1931-меш ҫулхи нарӑс уйӑхӗн 8-мӗшӗнче кун ҫути курнӑ. Ӑна Патӑрьелте «Паянхи сас» ятпа пичетлесе кӑларнӑ.
1932 ҫулта ҫав кӑларӑм икӗ хаҫата пайланнӑ: «Колхоз байрагы» тата «Октябрь ялавӗ». Икӗ хаҫачӗ те Патӑрьелте тухса тӑнӑ. 1939 ҫулта Комсомольски районне туса хунӑ хыҫҫӑн «Октябрь ялавӗ» хаҫат Комсомольскине куҫнӑ. Паян вӑл кӑларӑм «Каҫал ен» ятпа пичетленсе тухать, унта район пурнӑҫӗ ҫинчен каласа кӑтартаҫҫӗ.
Пуш уйӑхӗн 27-мӗшӗнче уявлакан Театр кунӗ умӗн пирӗн республикӑра XXVI хут ӗнтӗ «Чӗнтӗрлӗ чаршав» конкурс иртет. Унӑн ҫӗнтерӳҫисене ҫав кун Чӑваш патшалӑх филармонийӗнче чысланӑ.
Чи лайӑх спектакль ятне Чӑваш академи драма театрӗн «Хуркайӑк ҫулӗ» ӗҫӗ тивӗҫнӗ. Унӑн режиссёрӗ — Раҫҫейӗн искусствӑсен тава тивӗҫлӗ ӗҫченӗ Борис Манджиев (сӑнӳкерчӗкре).
«Чи лайӑх хӗрарӑм ролӗ» номинацире ҫак спектакльте Чӗкеҫ сӑнарне калӑпланӑ Надежда Зубкова тивӗҫнӗ. «Чи лайӑх арҫын ролӗ» номинацире Вырӑс драма театрӗнче лартнӑ «Дядюшкин сон» спектакльте Мозгляков ролӗнче вылякан Александр Смышляев ҫӗнтернӗ.
«Чи лайӑх сценографи» — Чӑваш пукане театрӗн «Черная курица, или Подземные жители» спектакльне илемлетнӗ Эмиль Капелюш, Юрий Сучков.
«Музыка енчен спектакле чи лайӑх илемлетни» номинацире Чӑваш патшалӑх оперӑпа балет театрӗн «Мы хотим танцевать» спектакльне илемлетнӗ Александр Гриханкин палӑрнӑ.
«Иккӗмӗш планри чи лайӑх роль» номинацире Чӑваш патшалӑх ҫамрӑксен театрӗн «Ҫӑкӑр чӗлли» спектаклӗнче Лисук сӑнарне калӑпланӑ Алина Зайцева палӑрнӑ.
«Ачасем валли лартнӑ чи лайӑх спектакль» — Чӑваш патшалӑх сӑнавлӑ театрӗн «Праздник непослушания» спектаклӗ, унӑн режиссӗрӗ – Андрей Аверин.
Республикӑна кӑмӑллӑ хыпар ҫитнӗ: Шупашкарти 117-мӗш ача пахчи Пӗтӗм Раҫҫейри «Хальхи йышши ача пахчи» конкурсра чи лайӑххи пулса тӑнӑ!
Тупӑшу хӗрӳ иртнӗ: унта 1000 ытла шкул умӗнхи вӗренӳ учрежденийӗ хутшӑннӑ. Шупашкарти ача пахчи вӗсен йышӗнче пӗр иккӗленмесӗрех мала тухнӑ. Ҫапла вӑл Хальхи йышши ача пахчисен реестрне кӗнӗ. Эппин, ҫак учреждени ачасемшӗн хӑтлӑ, унта аталанмалли условисем вӑйлӑ пулнине тепӗр хутчен ҫирӗплетет.
Ҫак ача пахчинче вӑй хуракан Надежда Григорьева педагогӑн ӗҫне уйрӑммӑн палӑртнӑ. Ӑна «Чи лайӑх педагог-новатор» номинацире чысланӑ. Вӑл ҫак хисепе ачасене вӑйӑ урлӑ вӗренме пулӑшакан ҫӗнӗ программӑсене пурнӑҫланӑшӑн тивӗҫнӗ.
Шупашкарти шкул ачи «Ҫулталӑкри вулакан» ята тивӗҫнӗ. Ҫавӑн пек ырӑ тӗслӗх кӑтартнӑ Татьяна Савельева.
Татьяна Шупашкарти 20-мӗш шкулта 3-мӗш класра ӑс пухать. Вӑл ҫулталӑкра 108 кӗнеке вуласа тухнӑ. Ҫапла вӑл Республикӑри ачасемпе ҫамрӑксен библиотекинчен «Ҫулталӑкри вулакан – 2025» ята тивӗҫнӗ.
Татьяна Савельевӑна Халӑхсен туслӑхӗн ҫуртӗнче Пӗтӗм Раҫҫейри «Ача-пӑча кӗнеке эрни» акципе килӗшӳллӗн иртнӗ «Раҫҫейри кӗнеке мозаики» уявра чысланӑ. Ӑна парнепе те хавхалантарнӑ: «АнимаТус» студире вӗренмелли сертификат панӑ. Унта Татьяна хӑйне мультфильм хатӗрлес ӗҫре тӗрӗслӗ.
«Хыпар» издательство ҫурчӗн ача-пӑча кӑларӑмӗсен редакцийӗ Ҫӗнӗ ҫул умӗн «Капӑр чӑрӑш» конкурс йӗркеленӗ. Ача-пӑча кӑларӑмӗсен редакторӗ Елена Атаманова «Контактра» халӑх тетелӗнчи хӑйӗн страницинче пӗлтернӗ тӑрӑх, республикӑн тӗрлӗ кӗтесӗнчен чылай вӗренекен хутшӑннӑ, ҫакӑ йӗркелӳҫӗсене питӗ савӑнтарнӑ.
«Ал ӑстисем пирӗн пӳлӗме ытарма ҫук хитре чӑрӑшсемпе тултарчӗҫ. Уйрӑмах Елчӗк, Патӑрьел, Йӗпреҫ, Комсомольски тата Шупашкар тӑрӑхӗсенчи шкул ачисем хастар пулчӗҫ», — тесе ҫырнӑ Елена Атаманова.
Ҫак кунсенче ҫӗнтерӳҫӗсене вырӑна ҫитсех чыслама тӗв тунӑ. Патӑрьелти 1-мӗш шкулти тата Елчӗк шкулӗнчи хастарсем дипломлӑ пулса тӑнӑ. Кӗҫех ытти тӑрӑха та ҫитсе килесшӗн, ҫӗнтерӳҫӗсене хавхалантарасшӑн.
Шупашкарти юханшыв порчӗн тӗп директорӗ Ванифатий Шайкин пысӑк наградӑна тивӗҫнӗ. РФ Президенчӗ Владимир Путин ӑна II степень «Тӑван ҫӗршыв умӗнчи тава тивӗҫлӗ ӗҫсемшӗн» орден медалӗпе чысласси пирки хушӑва паян, пуш уйахӗн 12-мӗшӗнче, алӑ пуснӑ.
Ванифатий Васильевич Патӑрьел районӗнчи Вӑтаел ялӗнче 1962 ҫулта ҫуралнӑ. И.Н.Ульянов ячӗллӗ Чӑваш патшалӑх университетӗнчен «истори» специальноҫпе вӗренсе тухнӑ. 1999 ҫулта Атӑл-Вятка патшалӑх службин академине «Патшалӑх муниципалитет управленийӗ» специальноҫпе пӗтернӗ.
Вӑл Шупашкарти юханшыв порчӗн тӗп директорӗнче 2005 ҫултанпа ӗҫлет. Ҫавӑн пекех Чӑваш Республикин Общество палати йышне кӗнӗ, халӗ унӑн председателӗ шутланать.
Ҫак кунсенче Улатӑрта ЗАГСра пӗрле 55 ҫул пурӑнакан Шоболовсене чысланӑ.
Борис Константиновичпа Татьяна Ивановна 1969 ҫулта паллашнӑ. Ӑнсӑртран паллашни шӑпа пӳрни пулса тӑнӑ. Майӗпен вӗсен туслӑхӗ юратӑва куҫнӑ. Ҫапла вӗсем 1971 ҫулхи нарӑс уйӑхӗнче пӗрлешнӗ. Вӗсем ывӑлпа хӗр ҫуратса ӳстернӗ. Халӗ вӗсем виҫӗ мӑнукӗпе савӑнса пурӑнаҫҫӗ.
Татьяна Ивановнӑпа Борис Константинович 20 ҫул ытла пӗр ҫӗрте ӗҫленӗ – ҫар савутӗнче тӑрӑшнӑ. Иккӗшӗ те – ӗҫ ветеранӗ.
ЗАГСра чысланӑ чухне мӑшӑр ҫӑмрӑклӑхне аса илсе Мендельсон кӗввипе киленнӗ, пӗр-пӗрне ҫӗрӗ тӑхӑнтартнӑ.
+20.0 °C