Патшалӑх Канашӗн депутатне, Вӑрнарти аш-какай комбиначӗн президентне Юрий Попова «Раҫҫей ял хуҫалӑхӗн тава тивӗҫлӗ ӗҫченӗ» ята панӑ. РФ Президенчӗ хушӑва пуш уйӑхӗн 25-мӗшӗнче алӑ пуснӑ.
Юрий Попов 1961 ҫулта Елчӗк округӗнчи Лаш Таяпа ялӗнче ҫуралнӑ. Шупашкарти строительство техникумӗнче тата Чӑваш патшалӑх ял хуҫалӑх академийӗнче вӗреннӗ. 2005 ҫултанпа Вӑрнарти аш-какай комбиначӗн тӗп директорӗ пулнӑ, 2016 ҫултанпа – предприяти президенчӗ.
Сӑмах май, ку наградӑна унччен Чӑваш Енрен Аркадий Айдак тата Вадим Николаев тивӗҫнӗ.
Юрий Попов пирки РУВИКИ-н чӑваш уйрӑмӗнче тӗплӗнрех вуласа пӗлме пулать.
ШӖМ пуҫлӑхӗ Чӑваш Ен полицейскине хӗрарӑмпа ачана пушарта ҫӑлнӑшӑн чысланӑ. Йӗрке хуралҫи хӑй те ун чухне сӗрӗмпе наркӑмӑшланнӑ.
Ку пушар кӑрлачӑн 22-мӗшӗнче Ҫӗмӗрлере пулнӑ. Амӑшӗ тӗпелте чухне 4-ри ачи залра шӑрпӑкпа вылянӑ. Кӗҫех икӗ пӳлӗмлӗ хваттере ҫулӑм ярса илнӗ.
Хӗрарӑм малтан ҫулӑма хӑй тӗллӗн сӳнтерме хӑтланнӑ. Анчах май килмен – ывӑлӗпе подъезда чупса тухнӑ. Унта вара – тӗтӗм.
Дмитрий Антропов чӳречерен тӗтӗм тухнине асӑрханӑ. Подъездра пулӑшу ыйтса кӑшкӑрнине илтсен унталла вирхӗннӗ, тӗттӗмре хӗрарӑма тупнӑ та ӑна урама илсе тухнӑ. Шалта ача юлнине пӗлсен каялла кӗнӗ. Вӑл ӑна урама илсе тухса хӑйӗн бушлачӗпе чӗркенӗ.
Ачапа амӑшне Шупашкара пульницӑна ӑсатнӑ. Полицейски те пӗр каҫ пульницӑра выртса тухнӑ. Ҫак кунсенче ӑна ШӖМ пуҫлӑхӗ Владимир Колокольцев «Ҫӑлнӑ чухне хӑюлӑх кӑтартнӑшӑн» медальпе чысланӑ.
Мускавра «Раҫҫей регионӗсем: ҫирӗп аталану малашлӑхӗ» конференци иртнӗ. Унта ертӳҫӗсен хушшинче иртнӗ конкурса пӗтӗмлетнӗ.
Чӑваш Ен валли кӑмӑллӑ хыпар пур: «Паха тӗрӗ» фабрикӑн тӗп директорӗ Наталия Посынкина «Раҫҫейӗн тава тивӗҫлӗ директорӗ» ята тивӗҫнӗ.
Чӑваш Ен Правительствин премьер-министрӗ Дмитрий Краснов пирӗн республика пултаруллӑ хӗрарӑм-ертӳҫӗсемпе мухтаннине палӑртнӑ.
Чӑваш Енри тата тепӗр икӗ ҫынна орден медалӗпе чыслама йышӑннӑ.
«Чӑваш Республики умӗнчи тава тивӗҫлӗ ӗҫсемшӗн» орден медалӗпе Патӑрьел тӑрӑхӗнчи «Исток» агрофирма генеральнӑй директорне Александр Илюткина тата Пӑрачкав муниципалитет округӗн пуҫлӑхне Евгений Лебедева (сӑнӳкерчӗкре) чысланӑ.
Хушӑва республика Элтеперӗ пуш уйӑхӗн 18-мӗшӗнче алӑ пуснӑ.
Шупашкарти пӗтӗм ветерана, Тӑван ҫӗршывӑн Аслӑ вӑрҫине хутшӑннисене, хулан хисеплӗ ҫыннин ятне парӗҫ. Хальхи вӑхӑтра Шупашкарта 17 ветеран пурӑнать.
«Шупашкар хулин хисеплӗ ҫынни» ята Ҫӗнтерӳ пулнӑранпа 80 ҫул ҫитнине уявланӑ чухне, ҫу уйӑхӗн 9-мӗшӗнче, чыслӗҫ. Ҫак ята тивӗҫнисен йышӗнче – 101 ҫулти Иван Григорьев, 100 ҫулти Зинаида Канова, 99 ҫулти Михаил Сорокин. Вӗсемсӗр пуҫне тепӗр 14 ветеран ҫак хисеплӗ ята тивӗҫӗ.
Чӑваш Енри икӗ ҫынна Чӑваш Республикин Хисеп грамотипе чыслама йышӑннӑ.
Вӗсенчен пӗри — Сергей Муравьев. Сергей Иванович Шупашкарти «Стандарт» тулли мар обществӑра техника директорӗ (тӗп инженерӗ) пулса ӗҫлет. Тепри вара — Юлия Стройкова. Юлия Викторовна – Чӑваш Енен Элтеперӗн Администрацийӗнче пресс-службӑпа протокол управленийӗн пуҫлӑхӗ.
Юлия Стройкова хӑй вӑхӑтӗнче республикӑн цифра аталанӑвӗн министрӗн ҫумӗ пулса тӑрӑшнӑччӗ, унтан маларах вара — Чӑваш Енӗн Наци телекуравӗнче директор ҫумӗнче.
Ӗнер, нарӑс уйӑхӗн 17-мӗшӗнче, Чӑваш Ен Элтеперӗ Олег Николаев республикӑри вӑрҫӑ вететарнӗсемпе тыл ӗҫченӗсене Тӑван ҫӗршывӑн аслӑ вӑрҫинче ҫӗнтернӗренпе 80 ҫул ҫитнине халалланӑ юбилей медалӗпе савӑнӑҫлӑ лару-тӑрура чысланӑ.
А.В. Кочетов ячӗллӗ Чӑваш Енри кадет корпусӗнчи мероприятие 17 ватта чӗннӗ. Пӗтӗмпе вара ун пек медальпе республикӑри 2574 ҫынна чыслӗҫ.
Медале тивӗҫнисенчен пӗри, Тамара Даниловская, Олег Николаева сӑвӑ вуласа панӑ. Тверь облаҫӗнчи ялта ҫуралнӑ хӗрарӑм колхозра лашапа ӗҫленӗ, уйсене сӳреленӗ. Кайран Шупашкарти 5-мӗш стройтрестра аслӑ экономистра ӗҫленӗ.
Чӑваш Енӗн Культура министерствине Хисеп грамотипе наградӑланӑ.
Мускавра вырнаҫнӑ Раҫҫейри патшалӑх вулавӑшӗн Пашков ҫуртӗнче Раҫҫейӗн Культура министерствин стратегиллӗ форумӗ иртнӗ. Унта вулавӑшсене ҫӗнетес ыйтӑва сӳтсе явнӑ.
Форума Чӑваш Енӗн Наци вулавӑшӗн директорӗн ҫумӗ Марина Андрюшкина тата пай заведующийӗ Татьяна Белов хутшӑннӑ.
Унта модельлӗ вулавӑшсене тӑвас енӗпе лайӑх ӗҫленӗшӗн Раҫҫейӗн Культура министерствин Хисеп грамотипе Чӑваш Енӗн Культура министерствине чысланӑ.
Шупашкарта пурӑнакан 101 ҫулти ветерана Иван Григорьева Ҫӗнтерӳ ҫитнӗренпе 80 ҫул ҫитнине халалласа кӑларнӑ медале панӑ.
Иван Григорьевич фронта 1941 ҫулта хайӗн ирӗкӗпе кайнӑ III Украина тата II Беларуҫ фрончӗсенче минометчик пулса ҫапӑҫнӑ. Вӑл виҫӗ хутчен аманнӑ, ҫапах Ҫӗнтерӗве кӗтсе илнӗ.
Вӑрҫӑ хыҫҫӑн вӑл Хусанти юридици факультетӗнчен вӗренсе тухнӑ, Чӑваш АСССРӗн прокуратуринче 15 ҫул ытла ӗҫленӗ. 1965 ҫулта службӑна республика прокурорӗн ҫумӗн должноҫӗнче вӗҫленӗ.
Пирӗн республикӑра пурӑнакан вӑрҫӑ ветеранӗсене Тӑван ҫӗршывӑн аслӑ вӑрҫинче ҫӗнтернӗренпе 80 ҫул ҫитнине халалласа кӑларнӑ юбилей медалӗсем пама пуҫланӑ. Паян ӑна Шупашкарта пурӑнакан Надежда Лабузова тивӗҫнӗ.
Ун патӗнче паян хула пуҫлӑхӗ Владимир Доброхотов тата Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центр директорӗ Светлана Милкина пулнӑ.
Надежда Лабузова 1936 ҫулта Смоленск тӑрӑхӗнче ҫуралнӑ. Хӑйсен ялне нимӗҫсем ярса илнине те вӑл аван астӑвать. Шупашкара Костромари технологи институтӗнчен вӗренсе тухнӑ хыҫҫӑн Шупашкара направленипе килнӗ. Кунти пир-авӑр комбинатӗнче ӗҫлесе ӗмӗрленӗ.
+5.3 °C