Ку эрне вӑрӑм пулӗ: 6 кун ӗҫлемелле. Ку Халӑх пӗрлӗхӗн кунне паллӑ тунипе ҫыхӑннӑ. Ҫакӑ эрнере 5 кун ӗҫлекенсене пырса тивет. Вӗсен шӑматкун та, чӳк уйӑхӗн 1-мӗшӗнче, ӗҫе тухмалла. Уяв умӗнхи кун пулӗ вӑл, ҫавна май ӗҫ вӑхӑчӗ 1 сехет кӗскелӗ.
Кун хыҫҫӑн 3 кун кантарӗҫ: вырсарникун, тунтикун тата юнкун (чӳкӗн 2-4-мӗшӗсенче).
Чӑваш Ен Элтеперӗ Олег Николаев вӗрентекенсене професси уявӗпе саламланӑ.
«Шкул – ӗҫ кӑна мар, вӑл - чи яваплӑ тивӗҫ. Эсир вӗҫӗ-хӗррисӗр пӗлӳ тӗнчин алӑкне уҫса ачасене ӑс паратӑр, вӗсен кӑмӑл-туйӑмне ҫирӗплететӗр. Сирӗн кулленхи ӗҫ- чӑтӑмлӑх, ӑс-хакӑл тата ӗҫе чунпа парӑнса пурнӑҫланине ҫирӗплетекен тӗслӗх.
Пирӗн республикӑра тӑхӑр пин ытла педагог ӗҫлет. Эпир вӗсен профессири ҫитӗнӗвӗсемпе мӑнаҫланатпӑр. Чӑваш Енри вӗрентекенсем ҫулсерен Пӗтӗм Раҫҫейри тата Пӗтӗм тӗнчери конкурссен ҫӗнтерӳҫисемпе лауреачӗсем пулса тӑраҫҫӗ, педагогсен пӗрлӗхӗшӗн ҫул кӑтартакансем шутланаҫҫӗ», — тенӗ республикӑн влаҫ органӗсен официаллӑ порталӗнче вырнаҫтарнӑ саламра.
Ҫитес уйӑхра, чӳкре, Раҫҫейре пурӑнакансене виҫӗ куна тӑсӑлакан канмалли кунсем кӗтеҫҫӗ.
Чӳк уйӑхӗн пӗрремӗш эрнинче 5 кун ӗҫлекенсем 6 кун ӗҫе тухӗҫ: тунтикунран пуҫласа шӑматкунччен (юпан 27-мӗшӗнчен пуҫласа чӳкӗн 1-мӗшӗччен). Ун хыҫҫӑн вара 3 кун канӗҫ.
Халӑх пӗрлӗхӗсен кунӗ, чӳкӗн 4-мӗшӗ, ытларикуна лекнӗрен шӑматкунхи кану кунне (чӳкӗн 1-мӗшне) тунтикун ҫине (чӳкӗн 3-мӗшӗ) куҫарнӑ. Виҫӗ кун каннӑ хыҫҫӑн кӗске ӗҫ эрни пулӗ: чӳкӗн 5-7-мӗшӗсенче.
Пирӗн ҫӗршывра ҫитес ҫулхи производство планне ҫирӗплетнӗ.
2025 ҫулхи раштав уйӑхӗн 31-мӗшӗнчен пуҫласа 2026 ҫулхи кӑрлач уйӑхӗн 11-мӗшӗсенче канӑпӑр.
Унсӑр пуҫне канмалли кунсем ҫапларах пулӗҫ: нарӑс уйӑхӗн 21-23-мӗшӗсенче, пуш уйӑхӗн 7-9-мӗшӗсенче, ҫу уйӑхӗн 1-3-мӗшӗсенче тата ҫу уйӑхӗн 9-1-мӗшӗсенче, ҫӗртме уйӑхӗн 12-14-мӗшӗсенче, чӳк уйӑхӗн 4-мӗшӗнче, раштав уйӑхӗн 31-мӗшӗнче.
Агродиктант ҫырса пӗлӗве тӗрӗслес килет-и? Апла Пӗтӗм Раҫҫейри акцие хутшӑнӑр.
Вӑл юпа уйӑхӗн 8-12-мӗшӗсенче пӗрремӗш хут иртӗ. Ӑна кирек мӗнле те ҫырма пулать: лапама килсе те, агродиктант.рф сайтра онлайн майпа та.
Акцие Ял хуҫалӑх ӗҫченӗн кунне халаллӗҫ. Унта хутшӑнакансен 30 ыйтӑва хуравлама тивӗ: вӗсем ӳсен-тӑран ҫитӗнтерессипе, выльӑх ӗрчетессипе, хальхи агротуризмпа тата органика ҫӗр ӗҫӗпе ҫыхӑннӑ.
Раҫҫей Федерацийӗнче паян пӗрремӗш хут Раҫҫей халӑхӗсен чӗлхисен кунне уявлаҫҫӗ.
Ку уяв чи ҫамрӑк уявсенчен пӗри — йӗркелессе ӑна кӑҫал ҫӗртмен 5-мӗшӗнче йӗркеленӗ. Уяв кунӗ валли Расул Гамзатов ҫуралнӑ кунне суйланӑ.
Уява йӗркеленӗ май Раҫҫей халӑхӗсен чӗлхисене упрасси тата вӗсене аталантарасси, патшалӑх енчен системӑллӑ пулӑшу парасси, ҫӗршывӑн чӗлхе уҫлӑхне пӗтӗмӗшле хӳтӗлесси питӗ пӗлтерӗшлӗ ӗҫ пулнине асӑннӑ.
Эпир те, Чӑваш халӑх сайчӗ, сире ҫак уявпа саламлатпӑр! Пирӗн чӑваш чӗлхи ытти чӗлхесемпе тан аталанса пытӑр тесе пӗтӗм вӑя хурӑпӑр!
Тӗплӗнрех уяв ҫинчен РУВИКИн чӑваш уйрӑмӗнче вуласа пӗлме пулать.
Сӑмах май, ӗнер, авӑнӑн 7-мӗшӗнче, Чӑваш халӑх сайчӗ 20 ҫул тултарчӗ. Икӗ уяв ҫумма ҫуммӑн пыни пирӗн халӑхшӑн питӗ аван пулӑм пулнине палӑртмалла.
Юнкун, авӑн уйӑхӗн 3-мӗшӗнче, Чӑваш патшалӑх гуманитари ӑслӑлӑхӗсен институчӗ 95 ҫул тултарнине паллӑ тӑвӗ.
Ларура институт директорӗ Юрий Исаев заведени утса тухнӑ кун-ҫулпа паллаштарӗ. Юбилейпа саламлама республика Элтеперӗ Олег Николаев, Патшалӑх Думин депутачӗсем Анатолий Аксаков тата Алла Салаева; чӑваш парламенчӗн спикерӗ Леонид Черкесов, Чӑваш Енӗн вӗренӳ министрӗ Дмитрий Захаров, культура министрӗ Светлана Каликова; И.Н. Ульянов ячӗллӗ ЧПУ ректорӗ Андрей Александров пырса ҫитӗҫ.
Савӑнӑҫлӑ лару 14 сехетре пуҫланӗ. Мероприяти Чӑваш патшалӑх гуманитари ӑслӑлӑхӗсен институчӗн Никольский залӗнче иртӗ.
Шупашкар районӗчи Кӳкеҫре фольклор уявӗ иртнӗ. Вӑл ӗнер, ҫурла уйӑхӗн 30-мӗшӗнче, пулнӑ.
Фольклор уявне Кӳкеҫ поселокӗн кунне палӑртнӑ май йӗркеленӗ. Унта Шупашкар тӑрӑхӗнчи фольклор коллективӗсем пуҫтарӑнса пынӑ.
Иккассинчи халӑх пултарулӑх ҫуртӗнчи «Шупуҫ» фольклор коллективӗ те хутшӑннӑ. Коллектив ертӳҫи — Иван Васильев.
Ыран Ҫӗнӗ Шупашкар хули 65-мӗш ҫуралнӑ кунне паллӑ тӑвать. Концерт 16 сехетре пуҫланӗ. Унта хулари пултарулӑх ушкӑнӗсем, артистсем хутшӑнӗҫ. Пултарулӑх бульварӗ тата фудкорт ӗҫлӗҫ.
20:10 сехетре Just Brass ушкӑн сцена ҫине тухӗ. 21 сехетре фейерверк вӗҫтерӗҫ те ун хыҫҫӑн уҫӑ тӳпе айӗнчи ташӑ каҫӗ пуҫланӗ.
Ҫавӑн пекех Ачасемпе ҫамрӑксен пултарулӑх центрӗнче тата Тӗкӗрҫ ращинче те лапамсем ӗҫлӗҫ.
Паян Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрта ӗҫ кунне «Под одним флагом» (чӑв. Пӗр ялав айӗнче) флешмобран пуҫланӑ. Ӑна Раҫҫейӗн патшалӑх ялавӗн кунне хаалланӑ.
Центрӑн пресс-служби ӗнентернӗ тӑрӑх, учрежденире Чӑваш Республикин тата Раҫҫейӗн элемӗпе ҫыхӑннӑ кунсене яланах чыслӑн уявлаҫҫӗ. Чӑваш тӗррин, Чӑваш чӗлхин кунӗсене те унта тӗрлӗ мероприти ирттерсе палӑртаҫҫӗ ҫеҫ мар, ватӑ ҫынсем чӑваш ушкӑнӗсенче юрлаҫҫӗ, чӑваш ташшисене вӗренеҫҫӗ, чӑваш эрешӗсемпе тӗрлӗ япала ӑсталаҫҫӗ.
Центрта хыпарланӑ тӑрӑх, паянхи флешмоба Олег Газмановӑн «Вперёд, Россия!» юррипе ирттернӗ. Хусканусене тума ятарласа никам та малтан вӗренмен те, вӗрентмен те. Физкультура инструкторӗ флешмоб умӗн кӑтартнӑ та — астуса та юлнӑ. Килтен хӗрлӗ, кӑвак тата шурӑ тӗслӗ футболка илсе килмеллине ҫеҫ пӗлнӗ центр ӗҫченӗсем.
Флешмоб хыҫҫӑн пурте пӗрле тӑрса ялав евӗр тӑрса тухса сӑн ӳкерӗннӗ.
-3.7 °C