Шупашкар хула администрацийӗнче паянтанпа ҫӗнӗ ӗҫ ӗҫе кӳлӗннӗ. Ахаль-махаль вырӑн та йышӑнман вӑл. Хула администрацийӗн сити-менеджерӗн экономика аталанӑвӗпе финанс енӗпе ҫумӗ пулса тӑрӑшӗ. Хула администрацийӗнчи яваплӑ тилхепене Люция Рафаэльевна Сафинӑна тыттарнӑ.
Хула администрацийӗн пуҫлӑхӗ Алексей Ладыков Инстаграмра пӗлтернӗ тӑрӑх, Люция Рафаэльевна 20 ҫул ытла аудит, бухгалтер тата налук учёчӗ, бизнес аталанӑвӗ енӗпе тӑрӑшнӑ. Сафина финанспа хуҫалӑх ӗҫ-хӗлне тишкерес енӗпе пысӑк бизнес-проектсене ертсе пынӑ. 2017 ҫултанпа — муниципалитетӑн суйлав комиссийӗн председателӗ.
Чӑваш Енре агротехнопарк хута яма палӑртнӑ. Вӑл Ҫӗрпӳ районӗнче пулӗ. Кун пирки Аслӑ экономика канашӑн ларӑвӗнче вице-премьер – экономика министрӗ Дмитрий Краснов пӗлтернӗ.
Республикӑра патшалӑх индустри, агропромышленоҫ паркӗсене – пӗтӗмпе виҫҫӗ – тума палӑртнӑ. Ҫав шутра – Ҫӗрпӳ районӗнче, унта агротоехнопарк пулӗ.
Министр хальлӗхе ҫак паркра Чӑваш Енре регистрациленнӗ 15 ял хуҫалӑх компанийӗ вырнаҫма кӑмӑл пуррине пӗлтернӗ. Агротехнопарк усӑ курман ҫӗрсене пусӑ ҫаврӑнӑшне кӗртме, инвесторсене илӗртме май парӗ. Паллах, ҫӗнӗ ӗҫ вырӑнӗсем те йӗркеленӗҫ.
Ҫӗрпӳ районӗнчи Метикасси ялӗнче ферма уҫӑлнӑ. Унта 500 ӗне вырнаҫать. Ферма тумашкӑн 200 миллион тенке яхӑн тӑкакланнӑ.
Фермӑна тӳре-шара та ҫитсе курнӑ. Вӗсем палӑртнӑ тӑрӑх, аграрисем тӑкаксен пӗр пайне саплаштарма пултараҫҫӗ, РФ Ял хуҫалӑх министерствин конкурсне хутшӑнмалла ҫеҫ. Комисси витӗр тухнисем федераци хыснинчен – тӑкакӑн 25 процентне, регион хыснинчен 16 процентне илме пултараҫҫӗ. Конкурс суйлавӗ витӗр тухманнисен регион хыснинчен тӑкакӑн 30 процентне саплаштарас шанчӑк пур.
Аса илтерер: Ҫӗрпӳ районӗнче тислӗкпе пӗрле пӑру виллисене уя кӑларса ывӑтни пирки пӗлтернӗччӗ.
«Чӑваш Республикин аталану корпорацийӗ» ПАОн директорсен канашӗн председателӗ пулма Надежда Столяровӑна ҫирӗплетнӗ. Кун пек йышӑнӑва ӗнер, ҫу уйӑхӗн 20-мӗшӗнче, тунӑ. Кун пирки компани хыпарланӑ.
Надежда Столярова – республикӑн экономика аталанӑвӗн тата пурлӑх хутшӑнӑвӗсен министрӗн пӗрремӗш ҫумӗ.
Ӗнерхи ларура предприятин директорсен канашӗ темиҫе ыйтӑва тишкернӗ. Ҫав шутра – директорсен канашӗн председательне суйлассине те. Акционерсен ҫулталӑкри пухӑвӗ ҫӗртме уйӑхӗн 25-мӗшӗнче иртӗ. Иртнӗ ҫула компани тӑкакпа вӗҫленӗрен дивиденд тӳлес мар тесе йышӑннӑ. Пӗлтӗр корпораци 2,836 млн тенкӗ тӑкак курнӑ.
Чӑваш Ен Наци ҫутҫанталӑк ресурсӗсен тата экологи министрӗн тивӗҫӗсене пурнӑҫлама Эмир Бедертдинова шаннӑ.
Асӑннӑ ҫын Патӑрьел районӗнчи Тутар Тимеш ялӗнче ҫуралнӑ.
Эмир Бедертдинова министр тивӗҫне пурнӑҫлама шанни ҫинчен калакан 65-мӗш номерлӗ хушӑва республика Элтеперӗ Олег Николаев паян алӑ пуснӑ.
Эмир Бедертдинов Мари политехника институтӗнче вӗреннӗ. Унӑн ӑсчах степенӗ пур. Вӑл — техника наукисен кандидачӗ. 2016 ҫулччен Мари Элта тӗрлӗ должноҫре ӗҫленӗ. Ҫав ҫулхи чӳк уйӑхӗнчен пуҫласа 2019 ҫулхи ҫурла уйӑхӗччен Тутарстанри вӑрман хуҫалӑхӗн министрӗн пӗрремӗш ҫумӗ пулнӑ. Кайран Мари Элта Вӑрманпа усӑ куракансен союзӗн директорӗнче ӗҫленӗ.
Ҫутҫанталӑк ресурсӗсен тата экологи министрӗ пулнӑ Александр Воробьев должноҫре ҫулталӑк ытларах ҫеҫ тӑрӑшнӑ. Ака уйӑхӗнче вӑл ӗҫрен кайма заявлени ҫырнӑ.
Ҫу уйӑхӗн 29-мӗшӗнче Чӗмпӗрте чӑваш Акатуйӗ иртӗ. Ҫак эрнере ку ыйтӑва республикӑн культура, национальноҫсен ӗҫӗсен тата архив ӗҫӗн министрӗ Светлана Каликова Чӗмпӗр облаҫӗнчи чӑвашсен наципе культура автономийӗн ертӳҫипе Олег Мустаевпа тӗл пулсан сӳтсе явнӑ.
Министра Олег Николаевич наци уявне епле хатӗрленни ҫинчен каласа кӑтартнӑ.
«Чӑваш Ен Чӗмпӗрти Акатуя чи лайӑх пултарулӑх ушкӑнӗсене ӑсатӗ», — шантарнӑ республикӑн культура, национальноҫсен ӗҫӗсен тата архив ӗҫӗн министрӗ Светлана Каликова Чӗмпӗр тӑрӑхӗнчи чӑваш хастарне.
«Трактор савучӗсем» концерн Шупашкарта ҫӗнӗ йышши тракторсем кӑларма пуҫлӗ. Ҫав енӗпе Раҫҫейӗн Промышленность министерстви унччен конкурс ирттернӗ.
Концерн производствӑн ҫӗнӗ хӑвачӗ ҫине тухӗ. Ҫулталӑкра 8 пин ял хуҫалӑх тракторӗ кӑларма пуҫласшӑн. Кашни техникӑн двигателӗн хӑвачӗ — 40-90 лаша вӑйӗ. Ку производствӑна уҫни ҫӗнӗ ӗҫ вырӑнӗсем йӗркелеме май парӗ. 500 ӗҫ вырӑнӗнчен пуҫласа 700 ӗҫ вырӑнӗ таран пулӗ.
Пӗчӗк тата вӑтам хӑватлӑ, урапаллӑ тракторсем кӑларассине Чӑваш Енӗн социаллӑ пурнӑҫӗпе экономика аталанӑвӗн комплекслӑ программине кӗртнӗ. Унӑн хакӗ — 2 миллиард тенкӗ ытла.
Влаҫ органӗсен порталӗнче ЧР Элтеперӗ Олег Николаев иртнӗ ҫул мӗн чухлӗ ӗҫлесе илнине пичетленӗ.
Декларацире кӑтартнӑ тӑрӑх, 2020 ҫулта вӑл 4 418 271,33 тенкӗ тупӑш тунӑ. Ку – тӗп ӗҫ вырӑнӗнчен. Шутласан, вӑл Элтепер тата ЧР Министрсен Кабинечӗн председателӗ пек уйӑхне 400 пин тенке яхӑн ӗҫлесе илнӗ.
Сӑмах май, депутатра ӗҫленӗ чухне вӑл декларацие тупӑш нумайрах кӑтарнӑ: 5,4 миллион тенкӗ. Ҫапах, пӗтӗмӗшле илсен, Элтепер халӗ те унран сахалрах ӗҫлесе илмен. Хушма тупӑшӗ – 1 128 523,90 тенкӗ.
Пӗлтӗр ҫӗртме уйӑхӗнче Хӗрарӑмсен канашне ертсе пыма тытӑннӑ Наталья Николаева, унӑн мӑшӑрӗ, 216 пин тенкӗ ӗҫлесе илнӗ. Эппин, унӑн шалӑвӗ 36 пинпе танлашнӑ. Кунсӑр пуҫне унӑн хушма тупӑш пулнӑ: 335 пин тенкӗ.
Паян Росгвардин Чӑваш Енри управленийӗн ҫӗнӗ пуҫлӑхӗпе республика Элтеперне Олег Николаева паллаштарнӑ. Чӑваш Ен Правительство ҫуртӗнчи тӗлпулӑва Раҫей Федерацийӗн наци гвардийӗн пуҫлӑхӗн Атӑлҫи тӑрӑхнчи ҫарӗсен ведомствӑлла мар хурала тата лицензипе ирӗк паракан ӗҫе йӗркелесе пыракан пуҫлӑхӗн ҫумӗ Павел Дегтярёв хутшӑннӑ.
Росгвардин Чӑваш Енре управленине Дмитрий Расчетов ертсе пырӗ. Ӑна ҫак должноҫе Раҫҫей Федерацийӗн Президенчӗн ака уйӑхӗн 12-мӗшӗнчи Хушӑвӗпе ҫирӗплетнӗ.
Дмитрий Расчетов РФ Шалти ӗҫсен министерствин Барнаулти юридици институтӗнчен вӗренсе тухнӑ. Шалти ӗҫсен органӗсенче 2000 ҫулсенче ӗҫлеме тытӑннӑ. 2014 ҫулта Алтай Республикинчи ведомствӑлла мар хурал пайне ертсе пыма тытӑннӑ. 2016 ҫулхи юпа уйӑхӗнченпе Росгвардин Алтай Республикинчи упралвенине ертсе пынӑ.
Чӑваш Енре виҫӗ ҫын кӑшӑлвирусӑн Британӗ штамӗпе чирленине палӑртнӑччӗ. Паянхи куна вӗсен йышӗ ӳснӗ – 9 ҫынна ҫитнӗ.
Анчах питех хӑрамалли ҫук-мӗн. ЧР сывлӑх сыхлавӗн министерӗ Владимир Степанов пӗлтернӗ тӑрӑх, хӑрушӑ вируса сарӑлма паман, вӑхӑтра изоляци тунӑ. Чирлисем хутшӑннӑ ҫынсемпе профилактика ӗҫӗсем ирттернӗ.
Ҫапах япӑх хыпар та пӗлтернӗ: Чӑваш Ене Кӑнтӑр Африкӑри тата Индири штамсем килес хӑрушлӑх пур.
Министр пӗлтернӗ тӑрӑх, ҫӗнӗ штамсем хӑрушӑрах, вӗсем япӑх сипленеҫҫӗ, вилекенсем вара нумайрах. Чирлес мар тесен прививка тумалли, дистанцие пӑхӑнмалли, маска тӑхӑнмалли пирки каланӑ.
-5.7 °C