Чӑваш Енӗн Правительствинче кадр улшӑнӑвӗ пулса иртӗ. Патшалӑхӑн юстици енӗпе ӗҫлекен службин пуҫлӑхӗн ҫумӗ пулса тӑрӑшнӑ Игорь Михайлова ӗҫрен кӑларнӑ. Документа республика ертӳҫи Олег Николоаев паян, авӑн уйӑхӗн 3-мӗшӗнче, алӑ пуснӑ.
Игорь Викторович — юридици пӗлӗвӗллӗ ҫын. Вӑл 2004 ҫулта Мускаври Ҫар университетӗнчен вӗренсе тухнӑ, унта вӑл юриспруденци енӗпе вӗреннӗ, специализацийӗ — «Прокурорпа тӗпчев ӗҫӗ».
Шупашкарти «Фармаци» патшалӑхӑн унитарлӑ предприятин пуҫлӑхне ӗҫрен кӑларнӑ. Хушӑва республика ертӳҫи Олег Николаев алӑ пуснӑ.
Асӑннӑ предприятие Евгений Куксов гендиректор пулс аертсе пынӑ. Ӑна ҫав пукана пӗлтӗрхи ҫу уйӑхӗн 4-мӗшнче шанса панӑ. Кӑҫалхи авӑн уйӑхӗн 2-мӗшнченпе вӑл ку тивӗҫе пурнӑҫлама шаннӑ.
«Фармаци» предприяти эмел тата медицина тӗллевӗллӗ изделисене ваккӑн сутать. Пӗрремӗш аптекӑна 1871 ҫултах уҫнӑ. Паян пердприятин – аптека бази, 130 аптека тата аптека пункчӗ.
Чӑваш Ен Элтеперӗн йышӑнӑвӗпе Чӑваш Енре пӑтӑрмахпа ӗҫлекен штаб туса хунӑ.
Асӑннӑ документ ячӗ ҫапларах: О создании регионального штаба по исполнению инцидента № 55 «Очистные сооружения» (чӑв. «Тасатмалли сооруженисем» 55-мӗш номерлӗ инцидента пурнӑҫа кӗртессипе ӗҫлекен регионти штаба туса хурасси ҫинчен).
Асӑннӑ документ, ҫак йӗркесен авторӗ штаб ятне кура тӗшмӗртнӗ пекех, Атӑла тасатассипе ҫыхӑннӑ федераци проекчӗпе ҫыхӑннӑ иккен.
Атӑла тасатассипе ҫыхӑннӑ федераци программине хӑш-пӗр регионта тивӗҫлипе пурнӑҫламанни ҫиеле тухнӑ хыҫҫӑн (укҫана хут ҫинче тӑкакланӑ, ӗсне йӗркеллӗ пурнӑҫламан) ку ыйтӑва тӗрлӗ Телеграм-каналта, пуҫлӑхсен, ҫивӗч чӗлхеллӗ общество хастарӗсен шайӗнче хытах ҫӗклерӗҫ. Ҫак йӗркесен авторӗ пӗлнӗ тӑрӑх, пирӗн республикӑра та кӑлтӑксӑр пулман.
Чӑваш Ене темиҫе туризм зонине пайланӑ. Кун пирки республикӑн экономика министрӗ Дмитрий Краснов пресс-конференцире пӗлтернӗ. Ҫурҫӗр, Хӗвелтухӑҫ тата Анӑҫ – ҫакӑн пек зонӑсем туса хунӑ.
«Ҫурҫӗр» туризмпа рекреаци зонине Шупашкар, Сӗнтӗрвӑрри, Куславкка, Ҫӗрпӳ, Етӗрне, Муркаш, Красноармейск тӑрӑхӗсем кӗреҫҫӗ. «Хӗвелтухӑҫ» зонӑна — Канаш, Комсомольски, Тӑвай, Патӑрьел, Шӑмӑршӑ, Вӑрмар тата Елчӗк тӑрӑхӗсем, «Хӗвеланӑҫ» зонӑна — Хӗрлӗ Чутай, Элӗк, Ҫӗмӗрле, Вӑрнар, Йӗпреҫ, Улатӑр, Пӑрачкав тӑрӑхӗсем.
Чӑваш Енӗн ӗҫ тата социаллӑ хӳтлӗх министрӗ Алёна Елизарова республикӑра пурӑнакансен ыйтӑвне тӗнче тетелӗнче хуравлӗ. Министр нумай ачаллӑ ҫемьесене паракан тӳлевсем пирки уҫӑмлатса парӗ. Укҫана шкула каймалли тум, спорт тумтирӗ туянма параҫҫӗ.
Ун пек пулӑшӑва камсене кӳреҫҫӗ? Компенсаци илес тесен мӗн тумалла? Мӗнле документсем кирлӗ? Министр пур ыйтӑва та хуравлӗ.
Министр халӑхпа уҫӑ эфира ыран, ҫурла уйӑхӗн 29-мӗшӗнче, 10 сехетре «Контактра» эфира тухӗ.
ЧР строительство министрне Михаил Коледана тытса чарнӑ. «На связи» портал пӗлтернӗ тӑрӑх, Строительство министерствинче шырав иртнӗ.
Паян Михаил Коледа ӗҫ вырӑнӗнче пулман-мӗн. Министра тытса чарни пирки хальлӗхе официаллӑ информаци ҫук. Ӑна мӗншӗн тытса чарнине те пӗлтермен.
Аса илтерер: нумаях пулмасть строительство министрӗ пулнӑ Павел Данилова тытса чарнӑ. Халӗ ун тӗлӗшпе следстви пырать.
Кӳкеҫри ваттисемпе инвалидсен интернат-ҫуртӗнче ҫӗнӗ директор ӗҫе пуҫӑннӑ. Директор тилхепине Гузель Ивановӑна тыттарнӑ.
Республикӑн ӗҫ тата социаллӑ хӳтлӗх министрӗ Алена Елизарова Телеграмри хӑйӗн страницинче пӗлтернӗ тӑрӑх, ҫӗнӗ пуҫлӑхпа коллектива паян паллаштарнӑ.
Гузель Иванова 10 ҫул ытла Ҫӗнӗ Шупашкарти социаллӑ реабилитаци центрӗнче тӑрӑшнӑ, кайран асӑннӑ хулари 12-мӗш ача пахчин заведующийӗнче ӗҫленӗ. Министр палӑртнӑ тӑрӑх, Гузель Иванован ӗҫе ертсе пырас опыт пысӑк.
Обществӑпа ҫыхӑну тытакан тата коммуникаци сферинче цифра проекчӗсене аталантарас енӗпе ӗҫлекен «Диалог Регионсем» организацин (Мускав хули) Чӑваш Республикипе ӗҫлекен пайӗн пуҫлӑхне Татьяна Немцевӑна Чӑваш Республикин Хисеп грамотипе наградӑланӑ.
Татьяна Вячеславовна — истори наукисен кандидачӗ. Хальхи вӑхӑтра вӑл влаҫпа общество ҫыхӑнӑвӗшӗн яваплӑ ӗҫре тӑрӑшать. Чӑваш Енри Регион управленийӗн центрне уҫни виҫӗ ҫул ытла. Унӑн тӗп тивӗҫӗ — ҫынсен ыйтӑвӗсемпе ӗҫлесси. Ҫак ӗҫе асӑннӑ центр «Инцидент Менеджмент» тытӑм тата «Госуслуги. Решаем вместе» (чӑв. Патшалӑх пулӑшӑвӗ. Пӗрле татса паратпӑр) портал урлӑ туса пырать. Центр влаҫ органӗсем халӑх тетелӗсенчи хӑйсен ушкӑнӗсем урлӑ халӑхпа епле ӗҫленине сӑнаса-тӗрӗслесе тӑрать.
Чӑваш Енӗн физкультурӑпа спорт министрӗн пӗрремӗш ҫумне Татьяна Рябининӑна «Чӑваш Республики умӗнчи тава тивӗҫлӗ ӗҫсемшӗн» медаль орденӗпе чыслама йышӑннӑ.
Вӑл 1981 ҫулти Шупашкарта ҫуралнӑ. Мускаври потребкоопераци университетӗнче, Раҫҫейӗн коопераци университетӗнче вӗреннӗ. Пӗлӗвӗпе ҫав хӗрарӑм — юрист тата экономист, предприятие ертсе пырас ӗҫе вӗреннӗ.
2004-2020 ҫулсенче патшалӑхӑн влаҫ органӗсенче ӗҫленӗ, 2020 ҫулхи ака уйӑхӗнченпе Спорт министерствинче тӑрӑшать.
Раҫҫейӗн хӑш-пӗр регионӗнче туристсене налук тӳлеттереҫҫӗ. Чӑваш Енре те ку темӑна хускатнӑ. Анчах республикӑн экономкиа аталанӑвӗн министрӗ Дмитрий Краснов ҫав шухӑша ырласах кайманни сисӗнет. Кун пирки вӑл Телеграмри хӑйӗн страницинче пӗлтернӗ.
«Хушма налук тени илемлӗ янӑрать. Ҫитменнине тата федераци шайӗнчи ӗҫтешсем ҫав налука регионсенче хӑварса ӑна муниципалитетсенче туризм инфраструктурине аталантарма яма ирӗк парасшӑн. Ҫав вӑхӑтрах хӑш-пӗр тӳнтерлӗх те пур», — тесе шухӑшлать министр.
Ҫав налук отельерсемпе кану бази тытакан усалмҫӑсене епле витӗм кӳнипе пӗрлех туристсем епле йышӑнасси пирки те шухӑшласа пӑхмалла тесшӗн Дмитрий Краснов. Тепӗр ҫыншӑн талӑкра тепӗр ҫӗр тенӗ тӳлеме тивни тем мар пек те тепри вара вӑл укҫана хӗрхенӗ те кӳршӗллӗ Мари Элта ҫӗр каҫас тейӗ. «Туризм налукне пирӗн тӗплӗ шухӑшласа йышӑнмалла», — тенӗ министр.
+19.3 °C