Юлашки кунсенче республикӑра кӑшӑлвируспа чирлекенсем нумайланса пыраҫҫӗ. Ӗнерхи кун тӗлне 97 койка ҫеҫ пушӑ пулнӑ. Кун пирки ЧР сывлӑх сыхлавӗн министрӗн тивӗҫӗсене пурнӑҫлакан Алексей Кизилов пӗлтернӗ.
Ҫӗртме уйӑхӗнче 13 пульницӑра чирлисем валли 1497 койка хатӗрленӗ. Аса илтерер: ҫӗртмен 18-мӗшӗнче Хулари 2-мӗш пульница ковид-госпиталь пек ӗҫлеме пуҫланӑ. Шупашкар районӗн пульници те халӗ кӑшӑлвируслисене йышӑнать.
Ӗнерхи кун тӗлне стационарта 1400 ҫын сипленнӗ. 363 ҫын хӑйне йывӑр туять. 18 пациент ИВЛпа сывлать.
Кӑшӑлвирус сарӑлнӑран Сӗрпӳ, Вӑрнар районӗн тӗп пульницисем, Ҫӗнӗ Шупашкар хулин пульници те ковид-госпиталь пек ӗҫлеме хатӗр. Вӗсенче 570 койка хатӗрлӗҫ, 18 реанимаци койки пулӗ.
Авӑн уйӑхӗн пуҫламӑшӗ тӗлне Чӑваш Енри патшалӑх тата муниципалитет учрежденийӗсенче ӗҫлекенсене, учительсене, шкул ҫулне ҫитменнисен учрежденийӗсенчи педагогсене, суйлав комиссийӗсен пайташӗсене кашнине тенӗ пекех кӑшӑлвирусран прививка тӑвасшӑн. Бизнеса та «хӗсӗҫ»: суту-илӳре, общество апатланӑвӗнче ӗҫлекенсене, йӑла ыйтӑвне тивӗҫтерекенсене е пурне те вакцинаци витӗр кӑлармалла, е ӗҫре тӗрлӗ чару пулӗ.
Ертӳҫӗсен хӑйсене укол тутарнине ӳкерсе илмелле, ҫавна тӗнче тетелӗнчи ушкӑнсем урлӑ ыттисене паллаштармалла.
Унта Алла Салаева, Сергей Артамонов, Дмитрий Краснов вице-премьерсем, цифровизаци министрӗ Кристина Майнина, ӗҫ министрӗ Алена Елизарова, Шупашкар сити-менеджерӗ Алексей Ладыков вӑл енӗпе отчёт тунӑ та темелле.
Ҫак тата ытти ыйтӑва кӑшӑлвирус сарӑлассине чарас енӗпе ӗҫлекен оперативлӑ штабӑн черетлӗ ларӑвӗнче сӳтсе явнӑ. Ӑна Чӑваш Ен Элтеперӗ Олег Николаев ертсе пынӑ. Вӑл палӑртнӑ тӑрӑх, лару-тӑру йывӑрланса пырать, чирлекенсен шучӗ ӳсме тытӑннӑ. «Короновирусӑн штамӗсем вӑй илнӗ май амак чирлесе ирттернисене те, антитела пуррисене те ерме пултарать.
Шывра кӑшӑлвирус пурӑнмасть. Ҫакӑн пек пӗлтернӗ «Российская газета» хаҫата Вирус инфекцийӗсен Екатеринбургри ӑслӑлӑхпа тӗпчев институчӗн ертӳҫи, биологи ӑслӑлӑхсен докторӗ Александр Семёнов. Асӑннӑ учреждени Роспотребнадзорӑн «Вектор» вирусологипе биотехнологин патшалӑх центрӗн шутланать.
Александр Семенов каланӑ тӑрӑх, вирус — белок молекулинчен тӑракан кӑткӑс тытӑм. Ӑна упранса юлма изотони растворӗ кирлӗ. Тепӗр майлӑ каласан, шыв тӑварлӑхӗ физиологи растворне ҫывӑх пулмалла. Тинӗс шывӗ те унашкал мар.
«Ахаль шывра ун пекки ҫук. Унсӑр пуҫне шывра кислород пур. Ҫавна май унта кӑшӑлвирус инфекцийӗ пурӑнаймасть», — уҫӑмлатнӑ Роспотребнадзорӑн Эпидемиологин тӗп ӑслӑлӑхпа тӗпчев институчӗн Млоекулярлӑ диагности центрӗн ертсе пыракан эксперчӗ Михаил Лебедев.
Чӑваш Енре кӑшӑлвирусран стационарта тата килте амбулатори мелӗпе сипленекенсен йышӗ ӳссе пырать. Паянхи кун тӗлне пульницӑсенче 792 ҫын сипленет.
Ҫӗртмен 23-мӗшӗ тӗлне республикӑра 26900 ҫын кӑшӑлвируспа чирленӗ. Вӗсенчен 24596-шӗ сывалнӑ. Шел те, вилекенсен йышӗ те кашни кунах ӳссе пырать. Ку хисеп паянхи кун тӗлне 1512 ҫынна ҫитнӗ. Юлашки талӑкра 4 ҫын кӑшӑлвируса парӑнтарайман.
Юлашки талӑкра 55 ҫын чирленӗ, сывлакансем 49-ӑн пулнӑ. Палӑртмалла: кӑшӑлвируспа чирленӗ кашни 18-мӗш ҫын вилнӗ.
Паян Шупашкарта ултӑ ҫулхи велосипедист машина урапи айне лекнӗ.
Шар курнӑ ача урамра пӗччен, аслисемсӗр, ярӑннӑ. Кун пирки Чӑваш Енӗн Шалти ӗҫсен министерствинче пӗлтернӗ.
Инкек Декабристсен урамӗнчи 33-мӗш урам картишӗнче 16 сехет те 20 минутра пулса иртнӗ.
Шар курнӑ ачана пульницӑна илсе кайнӑ.
Инкек сӑлтавне ҫул-йӗр хӑрушсӑрлӑхӗн патшалӑх инспекцийӗн тӗпчевҫисем тӗпчӗҫ.
Шупашкарти 2-мӗш хула пульници каллех ковид-госпиталь пек ӗҫлеме пуҫланӑ. Кун пирки Роспотребнадзорӑн Чӑваш Енри управленийӗн пуҫлӑхӗн ҫумӗ Вера Головач пӗлтернӗ.
Вӑл каланӑ тӑрӑх, кӑшӑлвиурспа чирлекенсем нумайланса пыраҫҫӗ, ҫавна май хушма койкӑсем хатӗрлеҫҫӗ. Паянхи кун тӗлне республикӑра 1302 койка пулнӑ, вӗсенчен 94-шӗ ҫеҫ пушӑ.
Танлаштармашкӑн: ҫӗртмен 10-мӗшӗ тӗлне республикӑра кӑшӑлвируспа чирлекенсем валли 1160 койка пулнӑ, вӗсенчен 241-шӗ пушӑ тӑнӑ. Малашне Шупашкарти 2-мӗш хула пульницинче кӑшӑлвируспа чирлисене талӑкӗпех йышӑнӗҫ.
Шупашкарти троллейбуссенче икӗ хӗрарӑм аманнӑ. Кунта сӑмах пӗр троллейбус ҫинчен пымасть. Вӗсен маршручӗсем расна.
«Ҫӗнӗ хула» микрорайонтан Университет урамне ҫӳрекен 3-мӗш троллейбусра салонри пассажир аманнӑ. Троллейбуса кӗтмен ҫӗртен хӑвӑрт чарнӑ, хӗрарӑм тытӑнса ӗлкӗреймен — суранланнӑ. Ӑна Васкавлӑ медицина пулӑшӑвӗн пульницине илсе кайнӑ. Инкек транспорт мичман Павлов урамӗпе пынӑ чухне пулса иртнӗ.
Ҫӗртме уйӑхӗн 18-мӗшӗнче 8-мӗш маршрутри троллейбусра (вӑл Хӗветухӑҫ проходнойран Кӑнтӑр посёлокне каять) кондуктор шар курнӑ. Салонта персе аннӑ хӗрарӑма хулари 1-мӗш клиника пульницине ӑсатнӑ.
Чӑваш Ене кӑшӑлвирусӑн Инди штамӗ те ҫитнӗ. Кун пирки Шупашкар мэрийӗнче иртнӗ планеркӑра Роспотребнадзорӑн Чӑваш Енри управленийӗн пуҫлӑхӗн ҫумӗ Вера Головач пӗлтернӗ.
«Пирӗн патра кӑшӑлвирусӑн ҫӗнӗ штамӗпе чирлисене шута илме тытӑнтӑмӑр. Маларах Британи штамне шута илнӗ, юлашки кунсенче вирусӑн Инди штамне регистрациленӗ», – тенӗ Вера Головач.
Мускав мэрӗ Сергей Собянин иртнӗ эрнере пӗлтернӗ тӑрӑх, ҫӗршывӑн тӗп хулинче пурӑнакансенчен кӑшӑлвируспа чирленисен 90-а яхӑн проценчӗн Инди штамне тупса палӑртнӑ.
Сӑмах май каласан, Шупашкар сити-менеджерӗ Алексей Ладыков та кӑшӑлвирусран паян прививка тутарнӑ. Кун пирки вӑл Инстаграмра пӗлтернӗ.
Шупашкарта суту-илӳ тытӑмӗнче ӗҫлекенсене ӗҫ вырӑнӗнчех кӑшӑлвирусран прививка тума пултарӗҫ. Кун пирки хула администрацийӗн пресс-служби пӗлтерет.
Нумаях пулмасть тухтӑрсем общество рынокӗн предприятийӗн ертӳҫисемпе тӗл пулнӑ. Хулари тӗп пульницӑн тухтӑрӗ Татьяна Маркелова пӗлтернӗ тӑрӑх, кӑшӑлвируспа чирлекенсен йышӗ кашни кунах ӳсет. Ҫамрӑксем те йывӑррӑн чирленине каланӑ вӑл.
Ӗҫпе тивӗҫтерекенсем ӗҫченӗсене прививка тӑвассине хӑйсемех йӗркелеме пултараҫҫӗ. Ҫичӗ ҫынран сахал мар тупӑнсан тухтӑрсем вырӑнах ҫитӗҫ.
Чылай регионта кӑшӑлвирус тӗлӗшпе лару-тӑру йывӑрланса пырать. Ҫавна май каллех чарусем йышӑнма тытӑннӑ.
Тӗслӗхрен, Мускавра ҫӗртме уйӑхӗн 15-19-мӗшӗсенче ҫӗнӗ чарусем вӑйра пулӗҫ. Хула мэрӗ организаци-предприяти ӗҫченӗсене май килнӗ таран дистанци мелӗпе ӗҫлеттерме ыйтнӑ. Ваттисене вара килте е дачӑра юлма сӗннӗ.
Мари Элте те ӗҫлекен ҫынсен 30 процентне дистанци мелӗпе ӗҫлеттерме йышӑннӑ. Ӗнертен пуҫласа утӑн 5-мӗшӗччен ачасене суту-илӳ центрне ашшӗ-амӑшӗсӗр кайма чарнӑ. Ача-пӑча вылямалли центрсене вӑхӑтлӑха хупнӑ.
Бурятире, Ханты-Манси автономи округӗнче, Мурманск облаҫӗнче, Хабаровск крайӗнче, Вологда облаҫӗнче те чарусем йышӑннӑ. Чӑваш Енре хальлӗхе улшӑнусем ҫук. Пирӗн патра кӑшӑлвирусран талӑкне 4 ҫын таран вилет.
+30.3 °C