Чӑваш Енре пурӑнакан арҫын кӑшӑлвирус пуррипе ҫуккине тӗрӗслемешкӗн тест паманшӑн штраф тӳлӗ. Вӑл Турцирен канса килнӗ хыҫҫӑн йӗркене пӑснӑ: ют ҫӗршыва вӗҫиччен Патшалӑх пулӑшӑвӗсен порталӗнче анкета ҫырман.
Раҫҫее ют ҫӗршывран килсен виҫӗ кунра ПЦР мелӗпе тест памалла: кӑшӑлвирус пур-и е ҫук-и? Анчах ҫак арҫын ку йӗркене пӑснӑ, тест туман.
Куншӑн Шурашкарти Мускав районӗн сучӗ арҫынна 15 пин тенкӗ штраф тӳлеттерме йышӑннӑ. Вӑл ҫӗршыври санитари-эпидемиологи саккунне пӑснӑшӑн явап тытнӑ.
Олег Ладыков-кӗҫӗннине юсанмалли колоние ӑсатни пирки пӗр хушӑ шавларӗҫ. Вӑл срокне 8-мӗш колонире, Улатӑртан инҫех мар вырнаҫнинче, ирттерет.
Ладыков-кӗҫӗнни колонире условлӑ майпа маларах тухас тесе ходатайство ҫырнӑ. Анчах Улатӑр районӗн сучӗ ӑна тивӗҫтерме хирӗҫленӗ. Эппин, унӑн колонире ҫулталӑкран ытларах, срок вӗҫлениччен, ларма тивӗ.
Ходатайствӑран ҫакӑ паллӑ: Ладыков-кӗҫӗнни колонире подсоблӑ рабочире вӑй хурать. Унта ларнӑ вӑхӑтра вӑл шар курнӑ ҫынна кӑмӑл-сипет тӗлӗшӗнчен хур кӑтартнӑшӑн тӑкака саплаштарнӑ (ҫур миллион).
Турцинчен таврӑннӑ Шупашкар хӗрарӑмне анализшӑн штрафланӑ. Тӗрӗсрех каласан, тӗрӗс мар анализшӑн явап тыттарнӑ.
Ют ҫӗршывран килекенсен кӑшӑлвирусран виҫӗ кун хушшинче тӗрӗсленсе ӗлкӗрмелле, ҫавӑн пирки патшалӑх пулӑшӑвӗн порталӗнче пӗлтермелле.
Турцинчен килнӗ Шупашкар хӗрарӑмӗ ҫӳлтисем хушнине итленӗ-ха, пульницӑна кайнӑ. Анчах вӑл ИФА меслечӗпе тӗрӗсленнӗ. Ку мел организмра кӑшӑлвируса хирӗҫ ятарлӑ белок (вырӑсла ӑна антитела теҫҫӗ) пуррине палӑртма май парать. Хӗрарӑмӑн ПЦР мелӗпе тӗрӗсленмелле пулнӑ. Вӑл анализ ҫын чирленипе чирлеменнине кӑтартать.
Йӗркене административлӑ майпа пӑснӑ тесе хӗрарӑма суд 15 пин тенкӗ штраф хурса панӑ.
Ытларикун, чӳк уйӑхӗн 3-мӗшӗнче, Чӑваш Ен Элтеперӗ пулнӑ Михаил Игнатьевӑн (йывӑр тӑпри ҫӑмӑл пултӑр) мӑшӑрӗ Лариса Юрьевна ҫӗршывӑн Аслӑ сучӗн президиумне надзор ҫӑхавӗпе ҫитнӗ.
Аса илтерер: Михаил Васильевичӑн арӑмӗ вилнӗ упӑшкин ырӑ ятне тавӑрассишӗн Раҫҫейӗн Аслӑ судне унччен икӗ хутчен тавӑҫ ҫырнӑччӗ, анчах ӗҫе пӑхса тухманччӗ. Лариса Игнатьева мӑшӑрне Раҫҫей Президенчӗ «шанчӑкран тухнӑ» тесе ӗҫрен кӑларнипе ҫырлахасшӑн мар.
Чӑваш Енӗн экс-Элтеперӗн арӑмӗ надзор ҫӑхавне РФ Аслӑ сучӗн президиумӗ ячӗпе шӑрҫалани пирки «Коммерсантъ» хаҫат пӗлтернӗ.
Лариса Игнатьева Ҫын правине хӳтӗлес енӗпе ӗҫлекен Европӑри суда та ҫитме хатӗр-мӗн.
Шупашкарти Ашмарин урамӗнче ҪҪХПИ ӗҫченӗсем «Фольксваген Поло» машинӑна чарнӑ. Руль умӗнче ларнӑ арҫын ӳсӗр пулнӑ.
Инспекторсем водитель правине тӗрӗсленӗ – суя иккен. Водитель тӗлӗшпе пуҫиле ӗҫ пуҫарнӑ. Арҫынна суд тунӑ.
Судра хайхискер йӑлтах каласа кӑтартнӑ. Вӑл автошкулта вӗреннӗ, анчах экзамен тытайман. 2015 ҫулта хайхискер интернетра палламан ҫынран права туяннӑ. Вӑл ӑна хӑйӗн сӑнӳкерчӗкне, даннайӗсене ярса панӑ. Правана кайран почтӑпа ярса панӑ.
Арҫын айӑне йышӑннӑ. Ӑна ҫирӗп режимлӑ колоние 4 уйӑхлӑха янӑ.
Раҫҫейри паллӑ актер Михаил Ефремов суд пулнӑ хыҫҫӑн айӑплава Чӑваш Енри колонире татасси пирки пӗлтернӗччӗ. Аса илтерер: актер руль умне ӳсӗр ларса аварие лекнӗ, ӑна пула тепӗр водитель вилнӗ.
Михаил Ефремов шухӑшне улӑштарнӑ. Вӑл Чӑваш Енри колоние килесшӗн мар, Мускаври 5-мӗш колонирех ларасшӑн. Унччен, авӑн уйӑхӗнче, вӑл чӑвашсен Ҫуттакӑларуҫин Иван Яковлевӑн тӑванӗ тесе Чӑваш Енри колоние каяс килнине пӗлтернӗччӗ.
«Вакунсем питӗ сивӗ, тӗрлӗ пунктра стоянка вӑраха тӑсӑлать», - ҫапла пӗлтернӗ актерӑн ваккачӗ. Михаил Ефремовӑн сывлӑхӗ хавшакрах-мӗн, ҫавӑнпа сивӗ вӑхӑтра ҫула тухма шикленет.
Чӑваш Енри тӗрмесенчен пӗринчен тухса тарнӑ ҫынна суд тунӑ. Айӑплав вӑхӑтне вӑл ҫирӗп режимлӑ колонире ирттерӗ. Унччен ӑна унтан кӑларса колони-поселение куҫарнӑ.
32 ҫулти Шупашкар арҫыннине йывӑр преступлени тунӑшӑн Ҫӗрпӳри ҫирӗп режимлӑ 9-мӗш колоние хупса хунӑ. Кӑҫалхи ҫу уйӑхӗнче суд ӑна колони-поселение куҫарма йышӑннӑ. Ҫурла уйӑхӗн 2-мӗшӗнче ӑна айӑпланнисем патне апатпа кайма ирӗк панӑ. Лешӗсем колонири ӗне кӗтӗвӗпе ҫӳренӗ. Шӑпах ҫавӑнтан тапса сикнӗ те хайхи. Ҫула май транспортпа малтан Патӑрьеле ҫитнӗ, унтан республикӑран тухса кайнӑ. Федерацин айӑплава пурнӑҫа кӗртессипе ӗҫлекен службин ӗҫченӗсем таркӑна пӗр эрнере Волгоградра тытса чарнӑ.
Унчченхи айӑплав вӑхӑчӗ те иртменнине тата колонирен тарнине шута илсе таркӑна ҫирӗп режимлӑ колоние 5,5 ҫуллӑха хупса хума йышӑннӑ.
Ҫӗрпӳ районӗнче 46 ҫулти усламҫӑна суд тунӑ. Ӑна ҫыннӑн сывлӑхне йывӑр сиен кӳнӗшӗн, асӑрханмасӑр вӗлернӗшӗн явап тытарнӑ.
Пӑтӑрмах 2019 ҫулхи юпа уйӑхӗн 1-мӗшӗнче сиксе тухнӑ. Арҫын Ҫӗрпӳ районӗнче, «Атӑл» М-7 ҫул ҫинче, кафе тытнӑ. Ӑна 44 ҫулти пӗр арҫын тӗрлӗ ӗҫ пурнӑҫласа пулӑшнӑ. Арҫын ӗҫре ӳсӗр пулнӑ. Ҫавӑншӑн усламҫӑ тарӑхса кайнӑ, иккӗшӗн хушшинче харкашу сиксе тухнӑ. Унтан вӑл алли-урине ирӗке янӑ. Рабочие вӑл 30 хутран кая мар тапса-ҫапса пӗтернӗ. Йывӑр суранланнӑ арҫын киле кайма тухсан ҫул ҫинче вилсе кайнӑ.
Суд усламҫӑна 7 ҫуллӑха ирӗкрен хӑтарма йышӑннӑ. Ӑна ҫирӗп режимлӑ колоние ӑсатасшӑн. Суд приговорӗ хальлӗхе саккунлӑ вӑя кӗреймен.
Шупашкар хулинчи хула строительствин тата хуҫалӑхӗн техникумӗн директорӗ пулса ӗҫленӗ ҫыннӑн хвтатерсӗр юлас хӑрушлӑх пур.
Пуҫлӑхра ӗҫленипе пӗрлех вӑл Шупашкар хулин депутачӗ те пулнӑ. Ун пеккисен тупӑша кӑтартакан декларацисем тӑратма тивет. Ҫав ҫын та ҫаплах тунӑ. 2015, 2016, 2017 ҫулсенчи миҫе тенкӗ ӗҫлесе илнине вӑл пытарман. Ҫав вӑхӑтра унӑн тата мӑшӑрӗн тупӑшӗ 5 миллион тенкӗрен кӑшт иртнӗ. Ҫав вӑхӑтрах ҫемье 7 миллион тенкӗ тӑракан хваттер туяннӑ. Ипотекӑпа мар. Ӑна директорӑн арӑмӗн аякри тӑванӗ ҫине ҫыртарнӑ. Лешӗ те пенсири ҫын та, унӑн 7 миллион тенкӗ тӑракан хваттер туянма укҫи-тенки пулман тесе шухӑшлаҫҫӗ.
Хваттере туртса илме прокуратура тавӑҫпа тухнӑ. Ӑна судра пӑхса тухмалла.
Шупашкар хулинчи Калинин районӗн сучӗ ют ҫӗршыв ҫыннипе пӗрлешнӗ хӗрарӑма суд тунӑ. Ҫемье ҫавӑрнӑшӑн арҫын 100 пин тенкӗ укҫа тӳленӗ.
Хӗрарӑмпа арҫын пӗрлешессе пӗрлешнӗ-ха, анчах вӗсем пӗрле пурӑнман. Тепӗр майлӑ каласан, суя мӑшӑрлану пулнӑ вӗсен. Ют ҫӗршыв арҫыннипе Шупашкар хӗрарӑмӗ 2017 ҫулхи ҫурла уйӑхӗнче Котельники хулинчи загсра пӗрлешнӗ. Суйса пӗрлешни арҫынна пирӗн ҫӗршыва килсе тӗпленме кирлӗ пулнӑ.
Суя мӑшӑрланӑва прокуратура тӗрӗслевӗ вӑхӑтӗнче тупса палӑртнӑ. Суд арҫынпа хӗрарӑма уйӑрма йышӑннӑ.
+23.3 °C