Нарӑсӑн 12-мӗшӗнче Шупашкарта пурӑнакан 17 ҫулти каччӑна нацизма реабилитациленӗшӗн айӑпланӑ. Ӑна 20 пин тенкӗ штраф тӳлеттерме йышӑннӑ.
Следстви тата суд палӑртнӑ тӑрӑх, 2019 ҫулхи раштав уйӑхӗнче каччӑ халӑх тетелӗнчи пӗр уҫӑ ушкӑнра фашизм идеологине ырлакан, Тӑван ҫӗршывӑн Аслӑ вӑҫрҫи вӑхӑтӗнче Гитлер ӗҫне тӗрӗс тесе шутлакан комментари ҫырнӑ.
Каччӑ преступлени тунине ӗнентернӗ. Кӳнтеленсенчен ыйтса пӗлнӗ. Суд айӑплава ҫирӗплетнӗ.
Етӗрне районӗнче 62 ҫулти хӗрарӑм суд сакки ҫине ларнӑ. Вӑл хӗрне ҫӗҫӗпе суранлатнӑ. Куншӑн суд ӑна тӗрмене хупмасӑр 3 ҫуллӑха айӑпланӑ.
Суд ларӑвӗнче палӑртнӑ тӑрӑх, пӗлтӗр раштав уйӑхӗн пуҫламӑшӗнче вӑл хӗрӗпе хирӗҫсе кайнӑ. Лешӗ ачине воспитани паман-мӗн, килтен тӑтӑшах тухса кайнӑ, темиҫе кун ҫухалса ҫӳренӗ.
Хӗрарӑм судра хӑйӗн айӑпне йышӑннӑ. Судья прокуратура шухӑшӗпе килӗшсе хӗрарӑма тӗрмене хупмасӑр 3 ҫуллӑха айӑплама йышӑннӑ.
Вӑрмарти кайӑк-кӗшӗк фабрики шалупа парӑма кӗнӗ. Ҫавна вырӑнти прокуратура тӗрӗсленӗ май тупса палӑртнӑ. 35 ҫын умӗнче предприяти 390 пин тенкӗ парӑм пухнӑ.
Предприятин гендиректорӗ тӗлӗшпе прокуратура административлӑ ӗҫ пуҫарнӑ. Надзор органӗ унпах ҫырлахман-ха — парӑма шыраса илес тесе суда ҫитнӗ.
«Ҫыхӑнура» форумра пӗлтернӗ тӑрӑх, унччен те кайӑк-кӗшӗк фабрикинче шалу парӑмӗ пулнӑ. Ун чухне 2020 ҫулхи утӑ уйӑхнчен пуҫласа раштав таран тӳлемен. Уншӑн пуҫиле ӗҫ пуҫарнӑ. Кунсӑр пуҫне 41 ҫынна икӗ уйӑх таран шалу тӳлемен. Парӑма тӳлесе татнӑ хыҫҫӑн пуҫиле ӗҫе хупса хунӑ.
Маларах Федерацин налук службин Чӑваш Енри управленийӗ предприятие панкрута кӑларас тесе суда тухнӑ. Предприятин налукҫасен умӗнчи парӑмӗ 3,8 миллион тенкӗрен иртнӗ. Анчах Чӑваш Енӗн Арбитраж сучӗ панкрута кӑларас ӗҫе чарса лартнӑ.
Мускавра пулса иртнӗ пӑтӑрмаха Етӗрне районӗн сучӗ тишкернӗ. «Мускаври метрополитен» Чӑваш Ен арҫыннинчен 63 пин тенкӗ шыраса илнӗ.
Иртнӗ ҫулхи кӗркунне Мускаври «Новоясеневская» станцире Чӑваш Ен арҫынни, унта пурӑнаканскер, платформӑн палӑртнӑ йӗрӗнчен шаларах кӗнӗ та тоннеле пуйӑса хирӗҫ аннӑ. Юрать-ха, инкек пулман. Пуйӑс арҫынна тӗкӗрӗпе ҫеҫ лекнӗ.
Кун хыҫҫӑн метрона чарнӑ. Ҫавна май тӑватӑ пуйӑс расписанипе каяйман. Ку вара метрополитеншӑн тӑкак. Ӑна судра арҫынран шыраса илнӗ.
«Химпромри» пӗр цех мастерӗ суд сакки ҫине ларӗ. Унта ӗҫлекен пӗр ҫын куҫне амантнӑ, суккӑрланнӑ. Ҫакӑншӑн мастера явап тыттарасшӑн.
Следстви версийӗ тӑрӑх, 2020 ҫулхи нарӑс уйӑхӗн 8-мӗшӗнче 58 ҫулти смена мастерӗ тӑвар йӳҫекӗ кӑларакан цехра пулнӑ, ӗҫченне противогаз тӑхӑнмасӑр, наряд тумасӑр газпа ӗҫлеме ирӗк панӑ. Насус улӑштарнӑ чухне тӑвар йӳҫекӗ тухнӑ, 55 ҫулти арҫыннӑн куҫӗсем пиҫсе кайнӑ. Пӗр куҫӗ халӗ те курмасть-ха.
ЧР прокуратури пӗлтернӗ тӑрӑх, «Химпром» кун пирки тивӗҫлӗ органсене пӗлтермен, вӑрттӑнлӑхра тытнӑ. Предприяти тӗлӗшпе представлени ҫырнӑ. Мастер тӗлӗшпе пуҫарнӑ пуҫиле ӗҫе кӗҫех Ҫӗнӗ Шупашкар хулин сучӗ пӑхса тухӗ.
Красноармейски районӗнче пурӑнакан хӗрарӑма сӑмакун сутнӑшӑн айӑпланӑ. Юрать-ха, штрафпа хӑтӑлнӑ. Приговорпа килӗшӳллӗн, унӑн 30 пин тенкӗ штраф тӳлемелле.
Суд палӑртнӑ тӑрӑх, ҫак хӗрарӑм чӳк уйӑхӗн 4-мӗшӗнче, Халӑхсен пӗрлӗхӗн кунӗнче, 1,5 литр сӑмакуна 200 тенкӗпе сутнӑ. Унӑн хаярлӑхӗ 38,1 процент пулнӑ. Ахӑртнех, вӑл ҫынсен килте туса кӑларнӑ эрехе сутма юраманни пирки пӗлнӗ.
Судра хӗрарӑм хайӗн ӗҫӗшӗн ӳкӗннӗ. Ҫапах ку яваплӑхран хӑтарман, ӑна штраф тӳлеттерме йышӑннӑ.
«Юрма» агрохолдинга каллех панкрута кӑларма ыйтаҫҫӗ. Арбитраж сучӗн сайтӗнче пӗлтернӗ тӑрӑх, унӑн парӑмӗ 1,6 миллиард тенке яхӑн.
Суда тавӑҫа Перекет банкӗ тӑратнӑ. Кӑрлач уйӑхӗн 14-мӗшӗнче тавӑҫа тӗрӗслеме суд ларӑвӗ ирттерме палӑртнӑ. Вӑл нарӑс уйӑхӗн 12-мӗшӗнче пулӗ. Тавӑҫра 1 миллиард та 695 миллион тенкӗ те 537 пин те 705 тенкӗ ыйтса ҫырнӑ.
Сӑмах май, 2019 ҫулхи утӑ уйӑхӗнче Арбитраж судне Тутарстан компанийӗ «Юрмана» панкрута кӑларма ыйтса тавӑҫ ҫырнӑ. Нумаях пулмасть агрохолдингӑн ҫӗнӗ пуҫлӑхӗ ҫитменлӗхсене пӗтересси пирки пӗлтернӗ.
Чӑваш Енре пурӑнакан хӗрарӑм ӗҫсӗр тесе халӑха ӗҫпе тивӗҫтерекен центрта шутра тӑнӑ. Хӑй вара ҫав вӑхӑтра ӗҫлесе укҫа ӗҫлесе илнӗ.
Хайхискер Канашра Раҫҫей чукун ҫулӗн филиалӗнче тӑрӑшнӑ, пӳлӗмсене тирпейленӗ, ҫунӑ. Куншӑн ӑна укҫа тӳленӗ. Ҫав вӑхӑтрах вӑл халӑха ӗҫпе тивӗҫтерекен центрта шутра тӑрса тӑватӑ уйӑх пособи илнӗ.
Ҫапла майпа ҫак хӗрарӑм халӑха ӗҫпе тивӗҫтерекен центра 24 пин ытла тенкӗлӗх тӑкак кӳнӗ. Ун тӗлӗшпе пуҫиле ӗҫ пуҫарнӑ. Халӗ пуҫиле ӗҫе следовательсем тишкерсе пӗтернӗ. Ӑна кӗҫех Канашри миравай суд пахса тухӗ.
Хӗрлӗ Чутай районӗнче пурӑнакан 38 ҫулти арҫынна суд тунӑ. Ӑна 18 ҫул тултарман хӗрне тивӗҫлӗ воспитани паманшӑн айӑпланӑ.
Прокуратура пӗлтернӗ тӑрӑх, 11 ҫулти хӗрне вӑл лайӑх пӑхман. Ача санитари тӗлӗшӗнчен хура пӳртре пурӑннӑ, вӗренме, канма, ҫывӑрма условисем пулман. Ку кӑна мар, хӗрачан куллен апат ҫиме те май пулман. Ӳсӗр ашшӗ унпа тӑтӑшах хирӗҫнӗ, хӗненӗ.
Ку тӑрӑ шыв ҫине епле майпа тухнӑ-ха? Пӗлтӗр ҫурла уйӑхӗнче ӑна ашшӗн прависӗр хӑварас ыйтӑва хускатнӑ. Тавӑҫа судра пӑхса тухнӑ чухне ашшӗ хӗрне хӗнени пирки пӗлнӗ. Кун хыҫҫӑн ун тӗлӗшпе пуҫиле ӗҫ пуҫарнӑ. Халӗ хӗрачан опекунпа пурӑнать.
Арҫын унччен судпа айӑпланманнине, хӑйӗн айӑпне йышӑннине шута илсе ӑна 280 сехет ӗҫлеттермелле тунӑ.
Шупашкарти ҫӑкӑр комбиначӗсенчен пӗрин техника директорне производствӑра ҫын аманнӑшӑн явап тыттарнӑ.
Инкек пӗлтӗрхи авӑн уйӑхӗн 18-мӗшӗнче кӑнтӑрла пулнӑ. 42-ри хӗрарӑм ҫакӑр пӗҫермелли цехра сылтӑм аллине темиҫе ҫӗртен хуҫнӑ. Ҫапла майпа вӑл сывлӑхне йывӑр сиен кӳнӗ.
Пӑтӑрмахшӑн предприятин техника директорӗ айӑплине палӑртнӑ. Шӑпах ӑна ӗҫ хӑрушсӑрлӑхӗшӗн яваплӑ тесе ҫирӗплетнӗ. Хӗрарӑм шар курнӑ оборудовани хупӑлчасӑр пулнӑ.
Арҫын унччен судпа айӑпланманнине, хӗрарӑма кӑмӑл-сипет енчен сиен кӳнине саплаштарнине кура пуҫиле ӗҫе суд чарса лартнӑ, ӑна 5 пин тенкӗ суд штрафӗ хурса панӑ.
+4.3 °C