Шӑрӑх ҫанталӑк пуҫланчӗ. Шел те, каллех путса вилекенсем пулнӑ. Утӑ уйӑхӗн 2-мӗшӗнче каҫхине Ҫӗмӗрлери пӗверен ватӑ арҫын виллине кӑларнӑ.
Инкеклӗ лару-тӑру министерстви пӗлтернӗ тӑрӑх, 1954 ҫулта ҫуралнӑ арҫын техника пӗлтерӗшлӗ шывра путнӑ. Сӑмах май, Ҫӗмӗрлере кунашкалли – виҫҫӗмӗш тӗслӗх. Малтанхи икӗ ҫын, 54-ри арҫын тата 35 ҫулти хӗрарӑм, Статуев пӗвинче путнӑ.
Улатӑр тӑрӑхӗнчи прокуратура Чӑвашупрдор предприяти Улатӑртан Патӑрьеле каякан ҫул хӗррине йӗркеллӗ тытса тӑманнине тупса палӑртнӑ.
Аслӑ ҫул хӗррипе йывӑҫсемпе тӗмсем тӳнсе кайса ҫӗрсе выртнӑ, халь-халь персе анас пек усӑнса ларакансем те пулнӑ. Пластик савӑт-сапа, целлофан хутаҫ йӑваланса выртнӑ.
Кӑлтӑка пӗтерме ыйтса надзор органӗ Чӑвашупрдор ячӗпе асӑрхаттару хучӗ шӑрҫаланӑ.
Улатӑр муниципаллӑ округӗнчи Суйкӑн ялӗ ҫывӑхӗнче вӑрман патӗнчи ҫӗр ҫине пӗрисем ҫӳп-ҫап тӑкса тултарнӑ. Пластик кӗленче, хутаҫ, кирпич, ҫӗрӗк курӑк, строительство юлашки. Ҫавӑн пек майпа икӗ вырӑна тирпейсӗрленӗ.
Йӑлари каяша кам пырса тӑкнине палӑртма май килмен енне ҫӗрӗн хуҫине – вырӑнти муниципаллӑ округа – тасаттарӗҫ. Кун пирки прокуратура пӗлтернӗ.
Шупашкарти медицина центрӗсенчен пӗринче ӗҫленӗ тухтӑра пула ҫын вилнӗ.
2022 ҫулхи пуш уйӑхӗнче Вӑрмар тӑрӑхӗнчи хӗрарӑм тӳлевлӗ эндоскоп тӗрӗслевӗ (ФГДС) витӗр тухас тенӗ. Врач тӗрӗслев ирттермелли техникӑна пӑснине пула хӗрарӑмӑн шалти органне сиенлетнӗ. Ӑна кирлӗ пек пулӑшмасӑрах килне янӑ. Кӑштахран хӗрарӑм темиҫе кунтан пульницӑра куҫне хупнӑ.
Асӑннӑ пӑтӑрмахпа ҫыхӑннӑ ӗҫ суда ҫитнӗ. Тухтӑра тӗрмене хупса хумасӑр 2 ҫуллӑха ирӗкрен хӑтарма йышӑннӑ, сӑнав вӑхӑтне 2 ҫуллӑха палӑртнӑ. Хӗрарӑмӑн тӑванӗсене кӑмӑл-сипет енчен сиен кӳнӗшӗн тухтӑртан тата ҫав врач ӗҫленӗ медцентртан 2 миллион тенкӗ шыраса илмелле тунӑ.
Ҫӗртме уйӑхӗн 29-мӗшӗнче, шӑматкун, Ҫӗрпӳ хулинчи пӗвере (вӑл Парк бульварӗнчи 5-мӗш ҫурт ҫывӑхӗнче вырнаҫнӑ) ҫынсем арҫын виллине тупнӑ. Мӗнле путса вилнӗ вӑл? Халӗ йӗрке хуралҫисем ку ыйтӑва уҫӑмлатаҫҫӗ.
Аса илтерер: нумаях пулмасть Красноармейски округӗнчи Ҫӗньял Чуракассинче 59 ҫулти арҫын путса вилнӗ. Унччен вӑл ҫухалнӑ, 3 кунран унӑн виллине тупнӑ.
Ӗнер Элӗкпе Сарплат ялӗ хушшинче ҫӑмӑл машинӑпа мотоблок ҫапӑннӑ. Тӗрӗсрех каласан, мотоблок ҫӑмӑл машина ҫине хыҫалтан пырса кӗнӗ.
Малта «Део Матиз» иномарка пынӑ. Мотоблок - хыҫалта. Вӑл малти транспорта хӑваласа ҫитсе ун ҫине пырса тӑрӑннӑ.
Иномарка рулӗ умӗнчи хӗрарӑм аманман. Мотоблок ҫинчи 30-ти водитель тата икӗ пассажир суранланнӑ. Мотоблок водителӗ ӳсӗр пулнӑ.
Ӗнер ирхи 6 сехетре Патӑрьел округӗнчи Кивӗ Катек ялӗнче пушар тухнӑ. 70 ҫулти хӗрарӑмӑн килӗнче душ пӳлӗмне ҫулӑм ярса илнӗ.
Пушар 7 тӑваткал метр лаптӑк ҫинче алхаснӑ. Малтанлӑха пӗлтернӗ тӑрӑх, пушар юсавсӑр кӗпе-йӗм ҫумалли машинӑна пула тухнӑ. Ҫулӑм алхасма пуҫланӑ вӑхӑтра килте хӗрарӑмӑн хӗрӗ пулнӑ. Вӑл кӳршисем пулӑшнипе пушара ҫӑлавҫӑсем киличченех сӳнтернӗ. Ҫулӑм душ пӳлӗмне, котельнӑя, кухньӑна сиенлетнӗ.
Красноармейски округӗнчи Ҫӗньял Чуракассинче 59 ҫулти арҫын 3 кун каялла ҫухалнӑ. Ӑна тупнӑ. Тӗрӗсрех каласан, унӑн виллине тупнӑ. Ҫӗртме уйӑхӗн 26-мӗшӗнче 14 сехетре Ҫӗньял Чуракасси ҫывӑхӗнчи пӗверен унӑн виллине ҫыран хӗррине кӑларнӑ.
Аса илтерер: ҫӗртмен 21-мӗшӗнче Комсомольски округӗнчи Асанкасси ялӗнче 52 ҫулти арҫын путса вилнӗ. Унӑн виллине ҫӑлавҫӑсем тупнӑ.
Ҫулталӑк пуҫланнӑранпа республикӑра 15 ҫын путса вилнӗ, ҫав йышран 13-шӗ – ҫӗртме уйӑхӗнче. Вӗсен йышӗнче – 3 ача.
Шупашкар муниципаллӑ округӗнчи Колешша ялӗнче пурӑнакан ҫынна кӳршине кӳрентерсе пӗтернӗшӗн явап тыттарнӑ. Ӑна суд штрафланӑ.
Ял ҫынни пӑтӑрмах пирки прокуратурӑна ҫӑхавланӑ хыҫҫӑн унтисем тӗрӗслев ирттернӗ. Колешша ялӗнче пурӑнакан арҫын пӗр ирхине, чӑн та, хӑйӗн кӳршине килӗшӳсӗр сӑмахпа кӳрентерсе пӗтернине палӑртнӑ. Лешӗ ҫавна телефон камери ҫине ӳкерсе илнӗ.
Чӗлхене ирӗке янӑшӑн арҫынна суд административлӑ майпа явап тыттарса 3 пин тенкӗ штраф тӳлеттерме йышӑннӑ.
Чӑваш Енри пӗр ялта пурӑнакан арҫын утӑ ҫулма тухса граната курнӑ. Вӑрнар муниципаллӑ округӗнчи Кульцав ялӗнче пурӑнакан ҫын хӑй асӑрханӑ япала пирки тӳрех йӗрке хуралҫисене пӗлтернӗ.
Вырӑна Росгвардин ОМОН ӗҫченӗсем пырса ҫитнӗ. Граната вӗренмеллискер пулнӑ иккен.
Граната хӑҫантанпа унта выртнине калама йывӑр, вӑл тутӑхма ӗлкӗрнӗ.
Йӗрке хуралҫисем ун пек япалана курсан тӳрех хӑйсене систерме сӗнеҫҫӗ.
+10.3 °C