Ыран, ҫурла уйӑхӗн 1-мӗшӗнче, Чӑваш Енре пурӑнакансем юн паракансен кунне хутшӑнма пултараҫҫӗ. «Суббота доноров» (чӑв. Донорсен шӑматкунӗ) пӗтӗм Раҫсейри акцие эрне варринче юн пама каяйманнисем пуррине шута илсе йӗркеленӗ.
Юн памалли республикӑри станцире пӗлтернӗ тӑрӑх, донорӑн 18 ҫултан аслӑрах пулмалла, 50 килограмран кая мар таймалла, юн парас умӗнхи кун тата панӑ кунхине диетӑна пӑхӑнмалла, йӗркеллӗ апатланмалла.
Юн паракансене Шупашкар урамӗнчи Пирогов урамӗнчи 9-мӗш ҫуртра кӗтеҫҫӗ. Унта ирхи 8 сехетрен пуҫласа 12 сехетчен каймалла. Хӑвӑрпа пӗрле паспорт чикме тата маска тӑхӑнма манмалла мар.
Шупашкарти васкавлӑ медпулашу пульницин ҫурчӗ умӗнче арҫын виллине тупнӑ. Кун пирки «Про Город» хаҫата халӑх корреспонденчӗ пӗлтернӗ.
Ку ӗнер пулнӑ. Васкавлӑ медпулӑшу пульници умӗнче арҫын 49 ҫулта пулнӑ. Малтанлӑха пӗлтернӗ тӑрӑх, вӑл пульницӑри пӗр уйрӑмра сипленнӗ.
Следстви комитечӗ пӗлтернӗ тӑрӑх, халӗ кун тӗлӗшпе тӗрӗслев иртет. Арҫын мӗнле сӑлтава тата мӗншӗн вилнине следовательсем уҫӑмлатаҫҫӗ.
Чӑваш Енри пульницӑсенче хальхи вӑхӑтра вырӑнпа выртакансем патне те кӗртмеҫҫӗ. Кун пирки Маргарита Красотина журналист Фейсбукра ҫырнӑ.
«Паян кашни пульница-стационар, кашни!, крепость евӗр пулса тӑчӗ. Пульницӑра выртакан ҫывӑх ҫынни патне палатӑна кӗртмеҫҫӗ ҫеҫ мар, пульницӑн холне е коридорне те иртейместӗн. Пандеми правилисем стационарсене тата вырӑнпа выртакан чирлӗ ҫынсене пӑхакансемсӗр хӑварчӗ», — хыпарланӑ журналист.
Чӑн та, вырӑнпа выртакансене пӑхакансем пульницӑсене ахаль те ҫукчӗ. Ун пекккисене, мӗн пытармалли, ҫывӑх ҫынсемсӗр йышӑнасшӑн та марччӗ маларах. Кун пеккине ҫак йӗркесен авторӗ хӑй те курнӑччӗ. Халӗ, ав, кӗрес-пӑхас тесен те ирӗк памаҫҫӗ иккен. Хуралҫӑ тытса чарать. Мӗн тӑвас, йӗрки ҫапла. Кӑшӑлвирус...
Раҫҫей Патшалӑх Думи Ӗҫ кодексне улшӑну кӗртме йышӑннӑ. Хальхи ҫӗнӗлӗх 40 ҫултан иртнӗ ҫынсене диспансеризаци тухма канмалли кун парассипе ҫыхӑннӑ. Вӗсене ун пек куна кашни ҫулах, ҫулталӑкра пӗр хутчен, памалла. Саккуна улшӑну кӗртес сӗнӳпе Патшалӑх Думине РФ Правительстви тухнӑ. Ҫакна ҫынсен сывлӑхӗшӗн тӑрӑшнипе сӑлтавланӑ. Унсӑр пуҫне тата тепӗр ҫӗрте пуҫлӑхсем ҫынсене пульницӑна ярасшӑнах мар.
Диспансеризаци тухма илнӗ куншӑн тӳлемелле. Ҫын чӑннипех те пульницӑра пулнине ӗненмен хуҫасем валли сывлӑх сыхлав учрежденийӗнче справка илмелле.
Саккуна улшӑну кӗртиччен диспансеризаци тухма виҫӗ ҫулта пӗр хутчен канмалли кун пама пӑхса хӑварнӑччӗ.
Ҫӗнӗ Шупашкар хулинчи стоматологи поликлиникинче кӑҫал ӗҫе кӳлӗннӗ ҫамрӑк специалиста, Никита Новокрещенова, халӑх халех килӗштерет. «Питӗ лайӑх, тимлӗ, ылтӑн стоматолог!» – ырланӑ, сӑмахран, ӑна шӑл кӑларттарма пынӑ В.П. Панина. Ҫамрӑк тухтӑра ӗҫтешӗсем те мухтаҫҫӗ. Терапи стоматологи уйрӑмӗн заведующийӗ Оксана Григорьева Никита Новокрещенова яваплӑ та талпӑнуллӑ специалист тес ехаклать.
Пульницӑра пӗлтернӗ тӑрӑх, каччӑ И.Н. Ульянов ячӗллӗ Чӑваш патшалӑх университетӗнчен вӗренсе тухнӑ. Хӗрлӗ дипломлӑ специалист, ординатор. Тӑршуллӑ Никита ЧПУн фармакологи, клиника фармакологийӗ тата биохими факультетӗнче те ӗҫлеме ӗлкӗрет. Унччен те вӑл хастарлӑхпа палӑрнӑ: ӑслӑлӑх конференцийӗсене хутшӑннӑ, тӗпчев ӗҫесем ҫырнӑ.
Йӗпреҫ районӗнче пурӑнакан 66 ҫулти хӗрарӑм ҫырла пуҫтарма кайнӑ. Вӑл ҫӗлен сӑхнине те сисмен.
Кӑштахран ывӑннине, пуҫ ҫаврӑннине, хырӑм ыратнине туйнӑ, хӑсма пуҫланӑ. Пульницӑна илсе ҫитерсен унӑн артери юн пусӑмне те виҫеймен, вӑл анса ларнӑ. Чӗри минутра 120 хутчен тапнӑ, хӗрарӑм аран сывланӑ. Унӑн пурнӑҫӗ кӗҫ-вӗҫ татӑлма пултарнӑ.
Хӗрарӑмӑн анафилактика шокӗ ҫӗлен наркӑмӑшне пула аталанни палӑрнӑ. Унӑн шалти органӗсем йӗркеллӗ ӗҫлеме пӑрахнӑ. Анестезиологсемпе реаниматологсем интенсивлӑ терапи ирттернӗ. Пӗр талӑкран пациентӑн сывлӑхӗ лайӑхланнӑ.
Сӑмах май, кӑҫал республикӑра 25 ҫынна ҫӗлен сӑхнӑ. Ҫӗлен сӑхнӑ хыҫҫӑн ҫын вилнӗ тӗслӗх юлашки хутчен 2017 ҫулта пулнӑ
Шупашкар хулинче вырнаҫнӑ Федерацин травматологи, ортопеди тата эндопротезировани центрӗ кӑшӑлвируспа чирлисене сиплеме пӑрахӗ. Кун пирки паян республикӑн Правительство ҫуртӗнче сӑмах хускатнӑ. Чӑваш Ен сывлӑх сыхлав министрӗ Владимир Степанов каланӑ тӑрӑх, травматологи центрӗнче пӳлӗмсемпе ӗҫ хатӗрӗсене сиенсӗрлетесси вӗҫленсе пырать. Раҫҫей Сывлӑх сыхлав министерствинчен хушу килсен центр унчченхилле йӗркепе ӗҫлеме тытӑнӗ.
Аса илтерер: ҫу уйӑхӗн 14-мӗшӗнче травматологи центрӗнче кӑшӑлвируспа чирлисене йышӑнма пуҫланӑччӗ.
Чӑваш Ен Элтеперӗ тивӗҫӗсене вӑхӑтлӑх пурнӑҫлакан Олег НиколаевCOVID диагнозӗллисене сиплемелли центрсем йӗркеленӗ республикӑри ытти пульницӑна та хӑйсен унчченхи йӗркипе ӗҫлеттерме тытӑнмаллине каланӑ. Анчах паян-ыранах мар. лару-тӑру лайӑхланнӑҫемӗн.
Чӑваш Ен Сывлӑх сыхлав министерствин Президент пепкелӗх центрӗнче виҫӗреш ҫуралнӑ. Кӑҫал унта апла тӗслӗх халиччен пулман. Хӗрарӑм виҫӗреш ҫуратакан тӗслӗхсем ытти чухне ҫулталӑкра пӗр хутран пуҫласа тӑватӑ хут таран пулкаланӑ.
Халӗ асӑннӑ тӗслӗхре ҫут тӗнчене виҫӗ хӗр килнӗ. Вӗсем 1,5 килограма яхӑн таяҫҫӗ. Ҫут тӗнчене вӑхӑт ҫитиччен васкасарах килнисен сывлӑхӗшӗн тухтӑрсем тӑрӑшаҫҫӗ.
Ачасен амӑшӗ шурӑ халатлисене каланӑ тӑрӑх, пӗр харӑс виҫӗ пепке ҫуралнӑшӑн килтисем савӑннӑ. Хӗрарӑм унчченхи ачана 2018 ҫулта ҫуратнӑ. Ҫавӑн чухне ҫамрӑк ҫемьене ывӑл килнӗ. Халӗ телейлӗ мӑшӑр харӑсах тӑватӑ ачаллӑ пулса тӑнӑ.
Утӑ уйӑхӗн 15-мӗшӗнче Ҫӗмӗрле районӗн пульницинче 40 ҫулти хӗрарӑм вилнӗ. Вӑл реанимаци уйрӑмӗнче утӑ уйӑхӗн 4-мӗшӗнченпе выртнӑ.
Хӗрарӑма упӑшки хӗнесе пӗтернӗ, кун хыҫҫӑн вӑл реанимацие лекнӗ. Следстви версийӗ тӑрӑх, утӑ уйӑхӗн 4-мӗшӗнче 40 ҫулти упӑшки ӳсӗр пулнӑ, арӑмӗпе хирӗҫсе кайнӑ. Арҫын ӑна аллипе, йӗлтӗр патакӗпе пуҫӗнчен, кӗлеткин ытти пайӗнчен ҫапнӑ.
Упӑшки тӗлӗшпе пуҫиле ӗҫ пуҫарнӑ. Ӑна следстви вӑхӑтӗнче хупас ыйтӑва пӑхса тухаҫҫӗ.
Ҫӗртме уйӑхӗн 18-мӗшӗнченпе Шупашкар хулин тӗп пульницине ҫӗлен сӑхнӑ 10 ҫын пулӑшу ыйтма пынӑ. Вӗсенчен 5-шӗ сывалнӑ, тепер 5-шӗ сипленеҫҫӗ.
Ҫапла, шӑрӑх ҫанталӑкра ҫӗленсем нумайланнӑ, хӗвел питтине тухма тытӑннӑ. Чӑваш Енре хурӑн пуҫлӑ ҫӗлене, медянкӑна тата хура ҫӗлене тӗл пулма пулать. Хура ҫӗлен – наркӑмӑшлӑ.
Специалистсем асӑрхаттараҫҫӗ: ҫӗленсем хӑйсем пӗрремӗш нихӑҫан та тапӑнмаҫҫӗ. Ӑна курсан майӗпен чакмалла, хӳтӗленсе алла малалла тӑсмалла мар. Ытларах чухне ҫӗленсем ҫынсене утӑ пуҫтарнӑ чухне, вӑрмана, улӑх-ҫарана ҫырлана кайсан сӑхаҫҫӗ.
+18.3 °C