5-11-мӗш классенче вӗренекен ачасен хушшинче чӑваш чӗлхипе, литературипе тата культурипе интернет олимпиада иртнӗ. Унта 33 ҫӗнтерӳҫӗ ятне тивӗҫнӗ.
Кӑҫалхи олимпиадӑна Чӑваш Республикин тата республика тулашӗнчи вӗренӳ организацийӗсен 5–11 класӗсенче вӗренекен тӑват ҫӗр ытла ача хутшӑннӑ, ҫав шутра – республика тулашӗнчен – 26 ача.
Олимпиадӑна ирттернӗ Чӑваш Республикин Вӗренӳ институтӗнче пӗлтернӗ тӑрӑх, «пӗтӗмӗшле илсен, интернет олимпиадӑна кӑҫал пысӑк хастарлӑхпа Шупашкар, Ҫӗнӗ Шупашкар хулисен, Патӑрьел, Вӑрнар, Вӑрмар, Канаш, Куславкка, Йӗпреҫ, Ҫӗрпӳ, Муркаш, Тӑвай, Сӗнтӗрвӑрри, Шупашкар округӗсен шкул ачисем хутшӑннӑ».
Кӳкеҫри лицейра ачасем наркӑмӑшланнӑ. Ку нарӑс уйӑхӗн 4-мӗшӗнче пулнӑ.
ЧР Сывлӑх сыхлавӗн министерстви пӗлтернӗ тӑрӑх, нарӑсан 5-мӗшӗ тӗлне 7 ача тухтӑрсенчен пулӑшу ыйтнӑ. Вӗсенчен улттӑшӗ килте сипленет, пӗрине инфекци уйрӑмне вырттарнӑ.
РФ Следстви комитечӗн Чӑваш Енри следстви органӗсем ку тӗслӗх тӗлӗшпе следстви умӗнхи тӗрӗслев ирттереҫҫӗ.
Чӑваш Ене ҫӗнӗ 12 шкул автобусӗ илсе килнӗ. Кун пирки ЧР Элтеперӗ Олег Николаев телеграм-каналӗнче хыпарланӑ.
Автобуссене округсене те ӑсатӗҫ: Патӑрьел, Вӑрнар, Йӗпреҫ, Муркаш, Шупашкар, Етӗрне тӑрӑхӗсене. Ҫавӑн пекех Шупашкарти тӑлӑх тата ашшӗ-амӑшӗн хӳттисӗр юлнӑ ачасен центрне те автобус парӗҫ.
Ҫӗнӗ автобуссенче ГЛОНАСС, хӑрушсӑрлӑх пиҫиххисем, маяк пур. Палӑртса хӑварар: 9 автобуса – федераци хыснинчи, 3-шне республика хыснинчи укҫапа туяннӑ.
Кӑрлачӑн 23-24-мӗшӗсенче Шупашкарти 37-мӗш шкулта «Тӑван чӗлхепе литературӑна чи лайӑх вӗрентекен» конкурс иртнӗ. Ӑна хулари шкулсенче ӗҫлекен 14 учитель хутшӑннӑ.
Ҫӗнтерӳҫӗ ятне 60-мӗш шкулта ӗҫлекен Н.В. Александрова ҫӗнсе илнӗ. Иккӗмӗшпе виҫҫӗмӗш вырӑнта — 62-мӗш шкулти Н.И. Егорова тата 56-мӗш шкулти Н.В. Серебрякова.
Паян Шупашкарта «Чӑваш чӗлхине чи лайӑх вӗрентекен — 2025» конкурс пуҫланнӑ. Конкурса хула шайӗнче ирттереҫҫӗ.
Конкурсӑн жюри членӗ Елена Перепелкина «Хыпар» издательство ҫуртне пӗлтерне тӑрӑх, конкурс нумай ҫул хушши иртет.
«Ҫултан ҫул пирӗн питӗ пултаруллӑ учительсем палӑрса пыраҫҫӗ ҫак конкурс хыҫҫӑн. Тӗслӗхрен, Александр Марсович ҫинчен илтнӗ пулӗ. Пӗлтӗр Николаева Людмила ҫӗнтерчӗ. Эпир вӗсемпе савӑнатпӑр. Пирӗн ачасен пуласлӑхӗ чӑваш чӗлхине кам вӗрентнинчен, мӗнле вӗрентнинчен питӗ нумай килет. Ача чӑвашла калаҫса каясси, паллах, вӑл ҫемьерен пуҫланать. Анчах та шкулта мӗнле вӗрентеҫҫӗ ачана, ҫавӑнтан вӑл татах хавхаланать, пурнӑҫ ҫулӗпе малалла утнӑ чухне чӑваш чӗлхипе тата ытларах усӑ курма пуҫлать. Учительтен питӗ нумай килет», — тенӗ вӑл Нина Царыгина журналиста.
2-мӗш классем валли кӑларнӑ «Чӑваш чӗлхи» вӗренӳ пособийӗ тӑрӑх интерактивлӑ хӑнӑхтарусем хатӗрленӗ. Вӗсене Шупашкар хулинчи 33-мӗш вӑтам шкулти чӑваш чӗлхипе литературине вӗрентекен Ирина Диарова хатӗрленӗ.
Кун пирки Александр Степанов педагог, чӑваш чӗлхи вӗрентекенӗ халӑх тетелӗнчи хӑйӗн страницинче пӗлтернӗ.
Чӑваш чӗлхи вӗренме тинтерех тытӑннисем валли сире 1-мӗш класс валли хатӗрленӗ интерактивлӑ хӑнӑхтарусен пуххи вырӑнлӑ пулмалла. Ӑна А.Блинов (Алпарух) тата унӑн ушкӑнӗ ҫырнӑ вӗренӳ пособийӗ тӑрӑх йӗркеленӗ. Хӑнӑхтарусене Шупашкар хулинчи 40-мӗш вӑтам шкулти чӑваш чӗлхипе литературине вӗрентекен Римма Гаврилова тунӑ. Ку хыпара Александр Степанов чӑваш чӗлхи вӗрентекенӗ халӑх тетелӗнчи хӑйӗн страницинче пӗлтернӗ.
«1-мӗш класс валли эпӗ пурӗ 34 вӑйӑ йӗркелерӗм. Ачасен ҫул тата пӗлӳ шайне шута илсе вӗсене ансатрах тума тӑрӑшрӑм. Вӗсем пӗрремӗш класра вӗренекенсем валли кӑсӑклӑ пулччӑр терӗм. Ку вӑйӑсемпе урокӑн кирек хӑш тапхӑрӗнче те усӑ курма пулать. Вӗсем ачасене урокра мӗн вӗреннине килте ҫирӗплетме те меллӗ», — пӗлтернӗ вӑл.
Шупашкар муниципаллӑ округӗнчи ҫамрӑк хӗрарӑм патшалӑх шучӗпе парикмехера вӗренсе тухнӑ. «Ҫемье» ҫӗнӗ наци проекчӗпе социаллӑ контракт валли Чӑваш Ене 996,5 миллион тенкӗ уйӑрса пама пӑхса хӑварнӑ.
Кристина Краснова декретра вӑхӑта сая ярас темен — парикмахера вӗренме кайнӑ. Вӑл унчченхи хӑйӗн ӗҫне пӑрахса парикмахерски уҫма кӑмӑл тунӑ.
«Эпӗ халӗ питех те телейлӗ. Парикмахер ӳнерӗ пӗр вырӑнта тӑмасть, пултарулӑха туптама тӗрлӗ ӑсталӑх класне ҫӳретӗп», — хавхаланса каласа кӑтартнӑ хӗрарӑм.
Земство учителӗ пулса яла каяс тесенсенчен заявкӑсем йышӑнма пуҫланӑ.
Программӑна хутшӑнас кӑмӑллӑ кандидатӑн 55 ҫултан аслӑ пулмалла мар. Унӑн яла е рабочи посёлока, е 50 пин ҫынран сахалтарах пурӑнакан хула йышши посёлока ӗҫлеме куҫса каймалла.
Заякӑсене ака уйӑхӗн 15-мӗшӗччен йышӑнӗҫ. Программӑна хутшӑнас ыйтупа Чӑваш Енӗн Вӗренӳ институчӗпе ҫыхӑнса уҫӑмлатма май пур. Телефон номерӗ: 8 (8352) 58-37-89, хушма номере 126 (Людмила Геннадьевна Иванова).
Чӑваш Енре рабочи профессине тӳлевсӗрех алла илме пулӑшакан организаци ӗҫлет. «Альма Матер» вӗренӳ центрӗ специалистсене пӗр-пӗр компани ыйтнине кура хатӗрлет.
Кӑҫал центр 200 ытла ҫынна вӗрентсе кӑларнӑ. Ҫав шутран 80-шӗ — электромонтажниксем. Вӗсене «Элекком Логистик» тулли мар яваплӑ общество валли хатӗрленӗ.
«Пирӗн тӗллев – регионти предприятисене кадр дефицитне ҫӗнме пулӑшасси тата ятарлӑ производствӑра кирлӗ специалистсене хатӗрлесси. Эпир куҫӑн тата куҫӑнсӑр мелпе вӗрентетпӗр», – каласа кӑтартнӑ вӗренӳ центрӗн ертӳҫи Максим Алексеев.
Квалификацие ӳстерме ӗмӗтленекенсем «Альма Матерпа» хӑйсем тӗллӗн те ҫыхӑнма пултараҫҫӗ.
+23.3 °C