Вырсарникун, нарӑс уйӑхӗн 6-мӗшӗнче, Шупашкарти ҫемье газпа наркӑмӑшланнӑ. Вӗсем – амӑшӗ тата унӑн икӗ ачи. Пӗр хӗрӗ – 11 ҫулта, тепри 6 ҫул тултарнӑ. Хӑй хӗрарӑм – 28-та.
Ҫемье Шупашкарти Пастрис Лумумба урамӗнчи 2/38-мӗш ҫуртра пурӑнать. Малтанлӑха пӗлтернӗ тӑрӑх, газ колонки ӗҫленӗ вӑхӑтра сӗрӗме туртакан тытӑм ӗҫлемен. Газ сӗрӗмӗпе наркӑмӑшланнӑ ҫемьене пульницӑна илсе кайнӑ.
Сӑмах май, ҫулталӑк пуҫланнӑранпа Шупашкарта кун пек тӗслӗх иккӗмӗш хут пулнӑ. Иртнӗ канмалли кунсенче Улатӑрти ҫемье газ сӗрӗмӗпе наркӑмӑшланнӑ.
Паян ирхине 8 сехетре Шупашкарта ҫӑмӑл тата васкавлӑ пулӑшу машини ҫапӑннӑ. Ҫул-йӗр ҫинчи транспорт инкекӗ Гладков урамӗнчи 25-мӗш ҫурт ҫывӑхӗнче пулса иртнӗ.
Малтанлӑха шутланӑ тӑрӑх «Соларис» ҫӑмӑл машшинӑн водителӗ айӑплӑ шутланать, вӑл васкавлӑ пулӑшу карети сасӑллӑ тата мӗлтлетекен сигналпа пынине пӑхмасӑрах сулахаялла пӑрӑнма шутланӑ.
Чӑваш Енри ШӖМӗн УГИБДД-ра пӗлтернӗ тӑрӑх, пӑтӑрмахра никам та шар курман. Васкавлӑ пулӑшу машини ачана лартса пынӑ. Каярах ӑна тепӗр экипаж медицина учрежденине илсе ҫитернӗ. Транспорт хатӗрӗсен водителӗсем иккӗшӗ те урӑ пулнине палӑртнӑ.
Паян оперштаб ларӑвӗ иртнӗ. Шкул ачисене малалла та дистанци мелӗпе вӗрентмелле-и е ҫук-и? Тӗп ыйтусенчен ҫакӑ пулнӑ.
Ларура ЧР Элтеперӗ Олег Николаев шкул ачисене малалла та дистанци мелӗпе вӗрентессине каланӑ. Аса илтерер: Шупашкар хулинчи шкул ачисем ҫак мелпе кӑрлач уйӑхӗн 27-мӗшӗнченпе вӗренеҫҫӗ, Ҫӗнӗ Шупашкарта вара – кӑрлачӑн 31-мӗшӗнченпе.
Планпа килӗшӳллӗн, нарӑс уйӑхӗнче 1-мӗш классен каникул пулмалла. Эпидемиологи лару-тӑрӑвӗ япӑх пулнӑран вӗсене халех кантарма йышӑннӑ.
Хӗллехи кунсенче кӑшӑлвирус кӑна мар, ытти тӗрлӗ вирус инфекцйӗ те вӑйлӑ сарӑлать.
Хальхи вӑхӑтра Чӑваш Енри ачасем инҫет ҫыхӑну мелӗпе вӗренеҫҫӗ. Ҫакӑн пек майпа вӗсем нарӑс уйӑхӗн 5-мӗшӗччен пӗлӳ тӗнчине шӗкӗлчӗҫ. Килте ларса урок вӗренес йӗркене тӑсассипе тӑсмассине паян иртекен оперштабӑн ларӑвӗнче татса памалла.
Улатӑр хулинче шкул ачисем вирус чирӗсемпе йышлӑ чирленӗ май вӗсене карантина куҫарма йышӑннӑ. Унта инҫет ҫыхӑну мелӗпе нарӑс уйӑхӗн 4-13-мӗшӗсенче вӗренӗҫ.
Нумаях пулмасть, пӗр эрне каялла, Чӑваш Енре 12-17 ҫулсенчи ачасене кӑшӑлвирусран вакцинацилеме пуҫланӑ. Вакцинӑн 960 дозине республикӑна кӑрлач уйӑхӗн 22-23-мӗшӗсенче кӳрсе килнӗ. ЧР Сывлӑх сыхлавӗн министерстви «Спутник М» пульницӑсенче ҫителӗклӗ пулнине пӗлтерет.
Нарӑс уйӑхӗн 2-мӗшӗ тӗлне республикӑра 12-17 ҫулсенчи 320 ача пӗрремӗш компонентпа укол тутарнӑ. Вӗсене ача-пӑча поликлиникисенче, районти пульницӑсенче вакцинацилеҫҫӗ. Анчах аслӑ ӳсӗмри ҫынсем пек патшалӑх пулӑшӑвӗсен порталӗ урлӑ ҫырӑнма ҫук.
Аса илтерер: 15 ҫултан аслӑрах ачасем прививкӑна ашшӗ-амӑшӗнчен ирӗк ыйтмасӑр хӑйсемех хут ҫырса тутарма пултараҫҫӗ.
«Чӑваш чӗлхипе литературине вӗренес кӑмӑлне ҫӗклес, чӑваш чӗлхипе литературине, историйӗпе культурине тӗпчес енӗпе пултаруллӑ ачасене тупса палӑртас тӗллевпе» республикӑн Вӗренӳ тата ҫамрӑксен политикин министерстви наци культурин «Туслӑх хӗлхемӗ» фестивальне ирттерессине пӗлтернӗ. Ку хыпара Чӑваш Енӗн Вӗренӳ институчӗ хыпарланӑ.
Фестивале хамӑр республикӑри тата тулай вӗренӳ организацийӗсен 1–4-мӗш класӗсенче вӗренекенсем хутшӑнаяҫҫӗ.
Фестиваль номинацийӗсем: «Сӑмах илемӗ», «Чӑваш вӑййи», «Янра, чӑваш юрри»,«Чӑваш ташши».
Фестиваль виҫӗ тапхӑрпа иртет. Пӗрремӗш тапхӑра районсемпе хула шайӗсенче нарӑс уйӑхӗн 25-мӗшӗччен йӗркелӗҫ.
Кӑҫалхи кӑрлачӑн 12–24-мӗшӗсенче Петӗр Хусанкай поэт ҫуралнӑранпа 115 ҫул ҫитнине халалласа вӗрентекенсемпе вӗренекенсен пултарулӑхӗн «Хусанкай вулавӗсем – 2022» фестивалӗ иртессине эпир унччен пӗлтернӗччӗ. Пултарулӑх ӑмӑртӑвне республикӑн Вӗренӳ институчӗ йӗркеленӗ.
Фестивале Чӑваш, Тутар, Пушкӑрт Республикисенчен пӗтӗмпе 257 ачапа 43 учительпе культура ӗҫченӗсем хутшӑннӑ. «Вӗсем хӑйсен пултарулӑхне Петӗр Хусанкайӑн сӑввисене чӑвашла, тутарла, вырӑсла вуласа ӳкернӗ видеороликсем хатӗрлесе кӑтартрӗҫ», — тесе пӗлтернӗ Вӗренӳ институтӗнче.
«Пӑшӑрхантараканни – конкурса хутшӑнакансенчен ҫурри ытла «Таня» поэма сыпӑкӗпе «Тилли юррисем» ярӑмри «Мехел» сӑвва вулани. Малашне фестивале хутшӑнакансен шкул программине кӗртнӗ сӑвӑсене кӑна вуламалла мар, ун картинчен те тухас пулать. Картаран тухма пултарни вӗрентекен чӑваш литературине пӗлнине тата унӑн тавра курӑмӗ анлӑ иккенне кӑтартать», — тесе шухӑшлаҫҫӗ Чӑваш Енӗн Вӗренӳ институтӗнче.
Чӑваш Енре йӑлара усӑ курмалли химипе наркӑмӑшланнӑ ачасен йышӗ ӳснӗ. Кун пирки ЧР сывлӑх сыхлавӗн министерстви пӗлтерет.
Ведомство палӑртнӑ тӑрӑх, ытларах чухне ку ашшӗ-амӑшӗ тимлӗхне ҫухатнӑран пулать. Ҫулталӑк пуҫланнӑранпа Республикӑри ача-пӑча клиника пульницине апат ҫулне пӗҫертсе янӑ 8 ачана илсе килнӗ. Шӑпӑрлансем тасатмалли хатӗр, чӗрне тасатмалли шӗвек, уксус ӗҫсе шар курнӑ. Тухтӑрсем палӑртнӑ тӑрӑх, кунашкал шӑпӑрлансен пульницӑра нумай вӑхӑт выртма, чылай сипленме тивет. Реабилитаци тапхӑрӗ те вӑраха тӑсӑлать.
Ачасем магнит, батарейка, тимӗр укҫа ҫӑтса янӑ тӗслӗхсем те пулнӑ. Ҫавӑнпа ашшӗ-амӑшне тимлӗрех пулма ыйтаҫҫӗ.
Кӑшӑлвируса сарӑлма чарас енӗпе ӗҫлекен оперативлӑ штабӑн черетсӗр ларӑвӗ иртнӗ. Унта тунтикунран пуҫласа Ҫӗнӗ Шупашкарти шкул ачисене те дистанци мелӗпе вӗренме ямашкӑн йышӑннӑ.
Хальлӗхе ачасене нарӑс уйӑхӗн 6-мӗшӗччен ҫапла вӗренме янӑ. Лару-тӑрӑва сӑнасах тӑрӗҫ. Вӑл мӗнле пулнине кура кайран тивӗҫлӗ йышӑну тӑвӗҫ.
Аса илтерер: Шупашкарти шкул ачисем ӗнертенпе дистанци мелӗпе вӗренеҫҫӗ. Республикӑри хӑш-пӗр шкулсем те ҫапла вӗренме пултарасси пирки каланӑ.
Ҫулталӑк пуҫланнӑранпа республикӑра ҫулталӑк тултарман ултӑ ача вилнӗ. Кун пирки ЧР Сывлӑх сыхлавӗн министерстви пӗлтерет.
Ултӑ ачаран виҫҫӗшӗ амӑшӗпе пӗр кравать ҫинче ҫывӑрнӑ. Президент пепкелӗх центрӗн тӗп тухтӑрӗн ҫумӗ Лариса Ногтева ку пысӑк хӑрушлӑх пулнине палӑртать, мӗншӗн тесен ҫывӑрнӑ чухне амӑшӗ пӗчӗкскере лапчӑтма пултарать.
Ачана тӗрӗс мӗнле пӑхмалла? Ҫак тата ытти ыйтӑва амӑшӗ пулма хатӗрленекен хӗрарӑмсене амӑшӗн шкулӗнче вӗрентеҫҫӗ. Унта пулас ашшӗсем валли те занятисем иртеҫҫӗ, мӗншӗн тесен ҫӑмӑлланнӑ хӗрарӑм малтанах вӑйсӑр, ашшӗсен те ачине пӑхма тивет.
+16.3 °C