Ҫу уйӑхӗн 28-мӗшӗнче ача ҫурчӗсенче Уҫӑ алӑксен кунӗ иртӗ. Ҫавӑн чухне ӑна виҫӗ ҫуртра йӗркелӗҫ: Шупашкарти, Ҫӗмӗрлери тата Пӑрачкаври И.Н. Ульянов ячӗллӗ ача ҫурчӗсенче.
Ют ачана ҫемьене илсе кил ӑшши пама ӗмӗтленекен ҫынсем ача ҫурчӗсене ҫитсе унти воспитанниксен пурнӑҫӗпе паллашма, вӗсен пурнӑҫӗ ҫинчен ыйтса пӗлме, шӑпӑрлансемпе калаҫма пултарӗҫ.
Аслисен специалистсемпе: педагог-психологсемпе, учитель-логопедсемпе тата социаллӑ педагогсемпе — канашлама май килӗ.
Хӑнасем валли спортпа массӑллӑ мероприятисем, ӑмӑртусем, вӑйӑсем ирттерӗҫ. Кайран ачасене каникул вӑхӑтӗнче киле вӑхӑтлӑха хӑнана илсе кайса усрама та пулать.
Уҫӑ алӑксен кунӗ 10 сехетре пуҫланӗ.
Хӗрлӗ Чутайри «Солнышко» (чӑв. Хӗвелӗш) ача пахчинче Ача-пӑча Фольклориадин фестивальне ирттернӗ. Ӑна Раҫҫейре кӑҫал халӑхсен культура эткерлӗхӗн ҫулталӑкне ирттернӗ май йӗркеленӗ. Сӑмах май, ҫӗртмен 23-мӗшпе 27-мӗшӗсенче Шупашкарта I Ача-пӑча Фольклориади иртӗ — районти мероприятие унта хатӗрленсе ирттернӗ те.
Ача пахчине ҫӳрекен шӑпӑрлансем илемлӗ тумсемпе ташланӑ, вӑйӑ картине тӑнӑ, юрӑсем шӑрантарнӑ. Воспитательсем те чӑваш тумӗсем тӑхӑнса хутшӑннӑ. Фестивальте тӗрлӗ номинацисем пулнӑ: халӑх юрри, халӑх ташши, халӑх кӗвӗ инструменчӗсем, чӑваш халӑх вӑййисем.
Хӗрлӗ Чутай районӗн официаллӑ сайчӗ пӗлтернӗ тӑрӑх фестиваль пурин кӑмӑлне те кайнӑ: ачасем те унта хавассӑн хутшӑннӑ, воспитательсем те пӗтӗм чунне парса ӗҫленӗ.
Куславккари юсанмалли 5-мӗш колонире ларакан хӗрарӑмсем теттесем ҫӗленӗ. Вӗсене Кӳкеҫри интернатра пурӑнакан ачасене парнеленӗ.
Тетте ҫӗлес шухӑш айӑпланнӑ хӗрарӑмсен ҫуралнӑ. Вӗсем пукане театрӗнче усӑ курмалли юмахри сӑнарсене ӑсталанӑ.
Интернатра пурӑнакан, ӑс енчен хавшак ачасем теттесене алла тытсан питӗ савӑннӑ, вӗсен куҫӗ телейпе ҫиҫнӗ. Ку акци шӑпӑрлансене кӑна мар, айӑпланнӑ хӗрарӑмсене хӑйсене те савӑнтарнӑ. Ара, вӗсем ҫапла майпа хӑйсен юратӑвне кӑтартма пултарнӑ.
Ҫу уйӑхӗн 7-мӗшӗнче юсанмалли 2-мӗш колони ӗҫченӗ Яков Андреев киле таврӑннӑ чухне пулӑшу ыйтса кӑшкӑрнине илтнӗ. Пӗве хӗрринче 6 ҫулти хӗрача ҫыранран ӳксе шыва чӑмнӑ иккен.
Арҫын часрах пулӑшма васканӑ. Вӑл хӗрачана ҫыран хӗррине йӑтса тухнӑ. Пӗчӗкскерӗн сывлӑхӗ аптӑраман та, ӑна ашшӗ-амӑшне панӑ.
Ҫак кунсенче Яков Андреев ячӗпе Айӑплава пурнӑҫлакан федераци службин Чӑваш Енри управленине Тав хучӗ килнӗ. Ӑна хӗрачан асламӑшӗ /е кукамӑшӗ/ ҫырса янӑ.
Хулари 1-мӗш клиника пульницин Перинаталь центрӗнче 800 грамм таякан ача ҫуралнӑ. Вӑл 26-мӗш эрнере ҫут тӗнчене килнӗ. Амӑшӗн сывлӑхӗ хавшасан ӑна васкавлӑ кесарево мелӗпе ҫураттарнӑ.
Тухтӑрсем хӗрачан пурнӑҫӗшӗн кӗрешнӗ. Малтан вӑл реанимацире выртнӑ, унтан - тин ҫуралнӑ ачасен патологи уйрӑмӗнче. Ӑна ӑста тухтӑрсем пӑхнӑ. Ҫак тапхӑрта хӗрачан йывӑрӑшӗ 2 килограмран иртнӗ. Ӑна тухтӑрсем киле кӑларма йышӑннӑ.
Палӑртмалла: хӗр пӗрчи - ҫемьери иккӗмӗш ача. Ашшӗ-амӑшӗ ӑна нумай вӑхӑт кӗтнӗ.
Ҫу уйӑхӗн 16-мӗшӗнче Ҫӗнӗ Шупашкарти Юрий Гагарин ячӗллӗ вулавӑшра Лариса Петрова (сӑнӳкерчӗкре — сулахайран пӗрремӗшӗ) сӑвӑҫпа тӗлпулу иртнӗ.
Методика зарядки евӗр йӗркелекен мероприяти ҫӗнӗ кӗнекесемпе паллашма, ҫыравҫӑсене лайӑхрах пӗлме май парать. Лариса Петровӑн нумаях пулмасть «Мӗн ҫинчен авӑтать-ши куккук?» сӑвӑ пуххийӗ кун ҫути курнӑ. Ӑна Чӑваш кӗнеке издательствинче пичетлесе кӑларнӑ. Ҫӗнӗ Шупашкарти вулавӑш ӗҫченӗсем сӑвӑҫӑн пурнӑҫӗпе пултарулӑхӗ пирки ыйтса пӗлнӗ, сӑвӑсем итленӗ.
Библиотекарьсем Лариса Петрова камӑн сӗнӳ-канашне итленине, пӗр шухӑшлӑ ҫынсемпе ӑҫта тӗлпулнине те пӗлесшӗн пулнӑ. Чӑваш чӗлхине упраса хӑварас, аталантарас ыйту та ҫӗкленнӗ.
Малтан шкулсенче юлашки шӑнкӑрав ҫу уйӑхӗн 20-мӗшӗнче иртет тесе пӗлтернӗччӗ. Анчах нумаях пулмасть хула администрацийӗн вӗренӳ управленийӗ РФ ҫутӗҫ министрӗ Сергей Кравцов сӗннипе уява куҫарма йышӑннӑ: вӑл ҫу уйӑхӗн 25-мӗшӗнче иртӗ.
Ку хыпар чылай ашшӗ-амӑшне савӑнтарман. Мӗншӗн тесен вӗсем уява паллӑ тумалли кафе-ресторана суйласа хунӑ-ҫке-ха. Ҫавна май Раҫҫӗйри ведомство Чӑваш Енре уява ашшӗ-амӑшӗн шухӑшне шута илсе йӗркелеме ыйтнӑ. Министр хӑш шкулта уява ирттерессипе йывӑрлӑхсем сиксе тухнине кура вӗсене пулӑшма каланӑ.
Шупашкарти Мускав районӗнче Светозар ятлӑ арҫын ачана регистрациленӗ. Вӑл ака уйӑхӗн вӗҫенчех ҫут тӗнчене килнӗ
Светозар - ҫемьери виҫҫӗмӗш ача. Ун валли ашшӗ-амӑшӗ хӑйне евӗр ят суйланӑ. Ҫак ятпа пирӗн несӗмӗлсем тӗне кӗмен чухнех усӑ курнӑ-мӗн.
Светозар "ҫутӑ сапалакан" тенине пӗлтерет. Аса илтерер: Шупашкарта Космос ятлӑ ача та пур.
Ҫӗнӗ Шупашкарта пурӑннӑ 37 ҫулти арҫынна суд 22 ҫуллӑха тӗрмене хупса хума йышӑннӑ. Вӑл ачасем ҫумне ҫулӑхма юратнӑ. 2007 ҫулта ӑна ҫавӑншӑн 15 ҫуллӑха хупса хунӑ-ха. 2020 ҫулхи ҫурла уйӑхӗнче ӑна ирӗке кӑларнӑ, анчах судпа айӑпланнӑ вӑхӑчӗ иртсе пӗтеймен. Ирӗкре савӑнса пурӑнас вырӑннӗ вӑл тепӗр икӗ хутчен пуҫтахланнӑ.
2021 ҫулхи кӑрлач уйӑхӗнче хайхи этем хӑй паллакан хӗрарӑмӑн килӗнче ӑна вӗлерессипе хӑратса пусмӑрланӑ. Арҫын ҫӗҫӗпе хӑмсарнӑ.
Ҫав ҫулхи нарӑс уйӑхӗн 17-мӗшӗнче Ҫӗнӗ Шупашкарти нумай хваттерлӗ ҫуртсенчен пӗрин картишӗнче 9 ҫулти хӗрачана асӑрханӑ, ун хыҫҫӑн подъезда кӗнӗ. Унта ача ҫумне ҫулӑхнӑ.
Ҫуркунне кахал ҫын та урампа пахчана тирпейлеме вӑй-халпа вӑхӑт тупатех.
Кӳкеҫри 27-мӗш професси училищинче (темиҫе ҫул каялла ӑна Ҫӗрпӳри аграрипе технологи техникумӗпе пӗрлештерчӗҫ) вӗренекенсем вӗренӳ заведенийӗ тавралли территорие тасатса тирпейленӗ. Анчах ҫӳп-ҫап миххисене урамрах купаласа хунӑ. Ҫамрӑксем ӗҫлени харама каясси те часах. Ара, йытӑсем туртса-ҫурса пӗтерсен е вӑйлӑ ҫилпе михӗсем ҫӗтӗлсе пӗтсен ҫӳп-ҫап каллех сапаланса пӗтӗ.
Кӳкеҫсем тӗнче тетелӗнчи пабликсенчен пӗринче ҫӳп-ҫап купине ӳкерсе илсе вырнаҫтарнӑ, вырӑнти пуҫлӑхсене михӗсене турттараса кайма ыйтнӑ.
+13.3 °C